SANEN ginmapoy Sankamundoan a Guerra I nen 1914, naimano na interon mundo ya neutral iray Estudyante na Biblia. (Isa. 2:2-4; Juan 18:36; Efe. 6:12) Amtaen tayo no antoy agawad saray lingkor na Dios diad Britanya.

Nen 1916, angipasa so Britanya na ganggan ya nepeg a mansundalo so amin ya balolaki a mantaon na 18 anggad 40. Diad satan a ganggan et exempted iramay agmalabay ya mansundalo lapud “relihyon odino prinsipyo” ra. Anuro so gobierno na korte ya mangasikaso ed no siopa ray ikdan na exemption tan no anto ray limitasyon.

Balet, ag-abayag et manga 40 ya Estudyante na Biblia so impriso, tan 8 so imbakin miguerra diad France. Lapud sayan agmakatunongan ya desisyon, sinulat na agagid Britanya so Prime Minister a si Herbert Asquith pian kerewen so pangibulos ed saray impriso, tan akatekep ed satan so 5,500 ya pirma.

Insan, abalitaan ya saramay waloran imbakid France et asentensiaan ya paltogen ta agda labay so milaban. Balet nen impandarasig da la ra pian paltogen, anguman so sentensia. Pinapawil irad England tan nipriso rad man na samploy taon.

Lapud nantultuloy ni so guerra, ingganggan na gobierno ya mansundalo met la ray walaay asawa. Diad sakey ya pangaligan a kaso diad Manchester, England, say akusado et si Henry Hudson, sakey ya doktor tan Estudyante na Biblia. Nen Agosto 3, 1916, nandesisyon so korte ya sikatoy guilty, pinanmulta ra, tan impalima dad saray militar. Legan na satan, wala ni sakey a kaso diad Edinburgh, Scotland. Nalmoan ya si James Frederick Scott, 25 años ya colporteur et aliwan guilty. Inmapela so gobierno balet agda lanlamang intuloy ta nanpokus la rad sananey nin kaso diad London. Diad saman et nandesisyon so korte ya si agin Herbert Kipps et guilty, pinanmulta ra, tan impalima dad saray militar.

Nen Setyembre 1916, 264 ya agagi so kinmerew na exemption ed pansundalo. Limarad sikara so naabuloyan, 154 so inikday ambelat iran trabaho ya singa say panggaway karsada, 23 so naikdan na arum a kimey diad kampo na militar, 82 so impalimad saray militar tan arum ed sikara et inusay tan impriso lapud ag-ira tinmulok. Ag-agustoan na totoo so impanmaltratod sarayan priso, kanian inyalis ira na gobierno diad saray pantratrabahoan ya kampo.

 Si Edgar Clay tan Pryce Hughes, a nagmaliw ya manangasikasod branch na Britanya et kaibad saray nanggaway dam diad Wales. Balet, si Herbert Senior, sakey ed saramay waloran nanlapud France et imprisod Wakefield, Yorkshire. Saray arum et senentensiaan ya mankimey na ambelat diad prisoan ed Dartmoor, a mair-irap so kipapasen. Ditan inkulong so dakel ya agagin agmalabay ya mansundalo.

Si Frank Platt, sakey ya Estudyante na Biblia et inmabobon ya manggaway arum lan kimey imbes ya mansundalo. Balet sanen pinilit dan milaban tan agtinmulok, diad andukey a panaon et agaylay impamairap dad sikato. Si Atkinson Padgett, ya akaamtad katuaan ag-abayag kayarin atawag ya mansundalo, et brutal met ya minaltrato na saray militar lapud agto labay so milaban.

Anggaman diad saman et agni tanton malinew ed agagi no anto ’tay Kristianon neutralidad, ginawa ray anggaay nayarian da pian paliketey Jehova a Dios. Saramay abitla dia et angipanengneng na maong ya alimbawa na neutralidad legay mairap ya “oras na subok.” (Apo. 3:10)—Inalad daan iran koleksion mi diad Britanya.