1, 2. Anton nikadkaduman kagalangan so walad Saray Tasi nen Jehova, tan antoy naliliknam ed satan?

PARAD dakel, baleg ya kagalangan so pakaawat na award lapud balibalin agawaan mo. Singa bilang, wala ray akaawat na Nobel Prize lapud apankasakey da ray mankalaban ya grupo. Balet mas baleg a kagalangan no ibaki ka na Dios bilang embahador o representanti pian makapikareenan iray totoo ed Amalsa ed sikara!

² Bilang Tasi nen Jehova, walad sikatayo itan ya nikadkaduman kagalangan. Imbaki itayo na Dios tan nen Jesus ya mikasid saray totoo ya ‘mikareenan ed Dios.’ (2 Cor. 5:20) On, uusaren itayo nen Jehova pian iyasingger iray totoo ed sikato. Minilyon lan totoo ed masulok ya 235 a bansa so atulongan ya nawalaay maabig a relasyon ed Dios tan ilalon bilay ya andi-angga. (Tito 2:11) Maseseg tayon iimbitaan so ‘siopaman a malabay ya mangala na libren danum na bilay.’ (Apo. 22:17) Lapud papablien tan makulikuli tayon gagawaen iyan importantin kimey, matukoy labat ya tawagen itayon totoon “maseseg ed maabig iran gawa.” (Tito 2:14) Pantongtongan tayo no panon a say inkaseseg tayod maabig iran gawa et makatulong pian niyasingger iray totoo ed si Jehova. Say sakey et diad kimey tayon panagpulong.

3. Antoy ipapasegurod sikatayo na ‘inkaseseg nen Jehova’?

³ Nipaakar ed gawaey uley na Anak na Dios, oniay ibabaga na Isaias 9:7: “Say paga [“seseg,” NW] nen Jehova na saray ehersito so manumpal ed saya.” Ipapaseguro na saratan a balikas ya talagan labay na Ama tayod tawen a nilaban iray totoo. Kanian bilang manangiyabawag na Panarian, nepeg ya sigpot-puso, maliket, tan maseseg tayon gawaen so kimey ya inter to.  Say pilalek tayon ontulong ed totoo a nakabat so Dios et pakapatnagay inkaseseg nen Jehova. Kanian bilang kakimeyan to, kasin determinado itayon gawaey anggaay nayarian tayo a mibiang ed pangiyabawag na maong a balita anggad iyabuloy na kipapasen tayo?—1 Cor. 3:9.

4. Panon ya impanengneng nen Jesus so inkaseseg ed ministeryo?

⁴ Angipanengneng si Jesus na maabig ya alimbaway inkaseseg diad ministeryo. Anggan diad graben isusumpa, sikatoy nansiansian maseseg ed panagpulong anggad impanampot na bilay to diad dalin. (Juan 18:36, 37) Legan a manasingger so agew na pangisakripisyo tod bilay to, mas determinadon tinmulong ed arum pian nakabat day Jehova.

5. Panon ya inyaplika nen Jesus so ilustrasyon to nipaakar ed kiew na igos?

⁵ Alimbawa, nen 32 C.E. et walay ilustrasyon nen Jesus nipaakar ed sakey a too ya taloy taon lan agmanbubunga so kiew na igos to. Sanen papabatang to la, kinerew na managkimey ed ubasan ya andi ta abonoan to ni. (Basaen so Lucas 13:6-9.) Diad saman et dagdaiset ni babangatan nen Jesus ya nibagan bunga na impanpulong to. Balet ipapanengneng na samay ilustrasyon ya inusar nen Jesus so nakekeran panaon to—manga anem bulan—pian mas dakel so napulongan tod Judea tan Perea. Pigaran agew antis na impatey to, inakisan to ray kabaleyan ton ‘akadngel ed sikato balet agkinmiwas.’—Mat. 13:15; Luc. 19:41.

6. Akin a kaukolan tayoy magmaliw a mas maseseg ed ministeryo?

⁶ Lapud asingsingger lay anggaan, agta kaukolan tayo met so magmaliw a mas maseseg ed panagpulong? (Basaen so Daniel 2:41-45.) Talagan alay abig ya pribilehyo so pagmaliw a Tasi nen Jehova! Sikatayo labat so manginanabang na ilalon mangiter na peteg a solusyon ed problema na katooan. Imbaga na sakey a kolumnista ed dyaryo ya agnaebatan so tepet ya, “Akin a nagagaway mauges anggan diad saray maong a totoo?” Bilang Kristiano, responsabilidad tan pribilehyo tayon inabang so ebat na Biblia ed saray ontan ya tepet diad saramay malabay ya ondengel. Kanian panggunaetan tayoy magmaliw a “marlang ed espiritu” legan tayon gagawaen so kimey ya inter na Dios. (Roma 12:11) Seguradon bendisyonan na Dios so maseseg ya pampupulong tayo pian natulongan iray totoon nakabat tan naaroy Jehova.

7, 8. Akin a mamapagalang ed si Jehova so inkamasakripisyo tayo?

⁷ Singa naeksperiensya nen apostol Pablo, diad ministeryo tayo et nayarin nasasali tayo ray “labin agpakakaugip” tan “saray panaon ya agpakakapangan.” (2 Cor. 6:5) Napatnagan ed saratan ya balikas so inkamasakripisyo, tan nayarin nanonotan tayo ray payunir ya iyuuna dad bilay da so ministeryo legan iran mantratrabaho pian nasuportaay sarili da. Wadtan met iray misionero ya ‘iyiibung day inkasikara a singa apay ya iinumen’ pian makapanlingkor ed sananey ya bansa. (Fil. 2:17) Kumusta iray makukulin elder ya no maminsan et agla makakapangan o makakaugip pian naasikasoy karnero nen Jehova? Kaiba tayo met iray agagin maedad tan walaay sakit, ingen ta panggugunaetan day miaral tan manpulong. Talagan aapresyaen tayo so inkamasakripisyo na sarayan lingkor na Dios. Baleg so epekto na saratan ed panmoria na totood ministeryo tayo.

⁸ Diad sulat ya naawat na Lincolnshire Boston Target, United Kingdom, oniay inkuan na sakey ya aliwan Tasi: “Nababalang lay talek na totoo ed relihyon . . . Antoy gagawaen na saray ministroy simbaan?  Aliwan singa say Kristo, ag-iran balot ompapaway tan mililimog ed saray totoo . . . Say relihyon labat ya nibagan mangiyaansakit et Saray Tasi nen Jehova, ompapaway ira tan kakatongtongen da ray totoo tan ipupulong dan talaga so katuaan.” Diad sayan mundon sarili da labat so nononoten da, say inkamasakripisyo tayo et mamapagalang ed si Jehova a Dios.—Roma 12:1.

9. Antoy mamakiwas ed sikatayon mansiansian maseseg ed maabig iran gawa diad ministeryo tayo?

⁹ Balet, antoy gawaen tayo no singa nababawasan lay seseg tayod ministeryo? Maabig no dalepdepen tayo no antoy susumpalen nen Jehova panamegley na kimey a panagpulong. (Basaen so Roma 10:13-15.) Akadepende so kilalaban ed panisia tan itawag ed ngaran nen Jehova, balet ag-itan nagawaan na totoo no agtayo ra pulongan. Saya komon so mamakiwas ed sikatayon mansiansian maseseg ed maabig iran gawa tan makuli ed panangiyabawag na maong a balita na Panarian.

10. Akin ya nayarin natangguyor a mandayew ed si Jehova so arum no maabig so kondukta tayo?

¹⁰ Anggaman importante so inkaseseg ed ministeryo, wala ni kaukolan pian napakiwas iray totoo ya onasingger ed Dios. Say sakey nin ikdan tayoy imano et say maabig ya kondukta tayo. Indanet nen Pablo so kaimportantian na kondukta tayo sanen inkuan to: “Agkamin balot manggagawa na antokaman a pakatiroran, pian anggapoy naromog a pakabalawan ed ministeryo mi.” (2 Cor. 6:3) No maabig so kondukta tan panagsalita tayo, paparakepen tayoy bangat na Dios a manangguyor ed arum a mandayew ed si Jehova. (Tito 2:10) Diad tua, lanang tayon makakarengel na maabig iran resulta na Kristianon kondukta tayo.

11. Akin ya kaukolan tayon usisaen so epekto na kondukta tayo?

 ¹¹ Amta tayo a nayarin walay maong ya epekto na kondukta tayo, balet no maminsan et andi. Kanian no wala itayod trabaho, abung, odino diad eskuelaan, agtayo komon manggagaway antokaman a pakabalawan na ministeryo o kondukta tayo. No gagalaen tayoy manggawa na kasalanan, seguradon mauges so pansumpalan tayo. (Heb. 10:26, 27) Saya komon so mamakiwas ed sikatayon usisaey gagawaen tayo tan say naiimatonan na arum ed sikatayo. Legan ya onaabeba so estandarte ed moral na sayan mundo, lalon ‘nibiig iray manlilingkor ed Dios tan saray agmanlilingkor ed sikato.’ (Mal. 3:18) On, baleg so nagawaan na maabig a kondukta tayo pian makapikareenan ed Dios iray totoo.

12-14. No sungdoan tayo ray subok, antoy nayarin epekto na satan ed panmoria na arum ed ministeryo tayo? Mangiter na alimbawa.

¹² Sanen sinulat nen Pablo iray taga Corinto, imbaga to ya asagmak to ray kairapan, inkapekpek, tan apriso ni. (Basaen so 2 Corinto 6:4, 5.) No nasubok itayo, nayarin napakiwas iray makaimaton ed pansusungdo tayo ya awatey katuaan. Pian iyilustra: Pigay taon lay apalabas, walay planon upoten so amin a Tasi nen Jehova diad Angola. Tinipon na saray sumusumpa so duaran bautismadon Tasi tan 30 ya interesado ya onaatendid saray aral. Pinilit da ray totoo ed satan ya lugar ya bantayay pansiplat ed sikara anggad asugat-sugat ira. Pati saray bibii tan ugugaw et pinairap da. Ginawa da itan pian taktakoten iray totoo tan anggapo lay ondengel ed Saray Tasi nen Jehova. Balet kayari na satan ya inkagawa, dakel ed satan a lugar so inmasingger ed saray Tasi tan nampaiyaral na Biblia! Bilang resulta, inmaligwas so kimey a panagpulong, dakel so angawat ed katuaan, tan abendisyonan iray agagi.

¹³ Ipapanengneng na sayan alimbawa ya baleg so epekto ed arum na pangunor tayod saray prinsipyo na Biblia anggan antoy nagawa. Nayarin naisip tayo no pigaray akapikareenan ed Dios lapud impanpakpel di Pedro tan arum ni ran apostol. (Gawa 5:17-29) Diad sikatayo, nayarin awaten na saray kaeskuela, katrabaho, odino kakanayon tayo so katuaan no nanengneng day determinasyon tayon gawaey duga.

¹⁴ Anggan anton panaon, walan wala ray agagi tayon papasegsegangen. Singa bilang, diad Armenia et manga 40 ya brother so akapriso lapud agda labay so mansundalo, tan dakel ni posiblin napriso diad onsublay iran bulan. Diad Eritrea, 55 ya agagi so akapriso, tan say arum ed sikara et masulok lan 60 so edad da. Diad South Korea, manga 700 ya Tasi so akapriso lapud agda labay so mansundalo. Anemaplon taon lan ontan so nagagawad saray agagi tayo ditan. Kanian, komon ta ipikasi tayon lanang ya say katooran na saray agagi tayon napapasegsegang et mangidayew ed Dios tan makatulong ed arum ya awatey katuaan.—Sal. 76:8-10.

15. Iyilustra no panon a say inkamatua et nayarin mamakiwas ed saray totoon awatey katuaan.

¹⁵ Say inkamatua tayo so sakey nin mamakiwas ed saray totoo ya awatey katuaan. (Basaen so 2 Corinto 6:4, 7.) Imanoen iyan eksperiensya: Ikakarga na sakey ya sister so bayar tod ticket machine na bus sanen imbaga na kaaro to ya agla manbabayar ta asingsingger met so laen da. Imbaga na sister ya kaukolan day manbayar anggano asingger labat. Kayari na satan, inmepas lay kaaro to. Tinepetan na drayber so sister, “Tasi ka?” “On, akin et atepet yo?” kuan na sister. “Nadngel koy tongtongan yo nipaakar ed ticket, tan amtak a Saray Tasi nen Jehova et kaibad saray pigpigara lan totoo a matua ed amin a bengatla.” Kalabas na pigaran bulan, diad aral et walay  lakin inmasingger ed samay sister tan inkuan to, “Natandaan mo ak ni? Siak may drayber na bus ya akitongtong ed sika nipaakar ed impanbayar moy ticket. Lapud samay ginawam, nandesisyon ak ya manpaiyaral na Biblia ed Saray Tasi nen Jehova.” No nanengneng na saray totoo ya matua itayo, panisiaan day maong a balitan ipupulong tayo.

16. Antoy nayarin epekto no ipanengneng tayoy inkaanos, panangaro, tan kaabigan? Mangiter na alimbawa no antoy gagawaen na arum ya relihyoson lider.

¹⁶ No nanengneng na totoo so inkaanos, panangaro, tan kaabigan tayo, nayarin napakiwas iran kabatey Jehova, saray gagala to, tan saray lingkor to. Say ugali tan kondukta na saray tuan Kristiano et arawdawi no ikomparad saray kunwarin makadios. Wala ray relihyoson lider ya onyayaman lapud lolokoen da ray membro ra, insan ira mangaliw na ankablin abung tan luluganan. Wala ni ingey nampagawa na air-conditioned ya abung na aso to. Malinew, agda tutumbokey ganggan na Kristo ya, “iter yon anggapoy bayar.” (Mat. 10:8) Imbes, kapadpara da ray mauges ya saserdote ed Israel nensaman ya ‘manbabangat lapud upa’—tan agnibased Biblia so maslak ya ibabangat da. (Miq. 3:11) Lapud satan ya kagagawa ra, anggapon balot so natutulongan dan makapikareenan ed Dios.

17, 18. (a) Panon tayon napagalangan si Jehova no aligen tayo ray kualidad to? (b) Akin et labay moy mansiansian maseseg ed maabig iran gawa?

¹⁷ Balet wala ray napapakiwas ya onasingger ed Dios lapud napapaneknekan dan katuaan so ibabangat tayo tan maong so pidedeneng tayod kakaabay tayo. Alimbawa, sanen manpupulong so sakey a payunir, aglabay na sakey ya akulaw lan balo so ondengel. Inkuan to ya nen nan-doorbell so agi, walad takayan ta sasalatan toy apundin bombilyad kusina. “Bai, delikado no bukor yoy manggawad satan,” so kuan na brother. Sinalatan toy bombilya insan la inmalis. Sanen akabatan na anak na balo so agawa, mandinayew a maong kanian inanap to may brother pian misalamat. Ag-abayag, nampaiyaral na Biblia imay anak na balo.

¹⁸ Akin et labay moy mansiansian maseseg ed maabig iran gawa? Nayarin lapud antam ya no maseseg kad ministeryo tan maabig so konduktam, napagalangan moy Jehova tan natulongan moy arum ya nilaban. (Basaen so 1 Corinto 10:31-33.) Say sakey nin rason no akin ya maseseg tayod panangipulong na maong a balita tan pansiasiansiaen tayoy maabig a kondukta tayo et lapud labay tayon ipatnag so panangarod Dios tan ed kapara tayon too. (Mat. 22:37-39) No maseseg itayod maabig iran gawa, natan ni labat et nalikna tayo lay tuan liket tan inkapnek. Tan maliket tayon talaranan so agew sano idayew tan pagalangan na amin a totoo so Amalsa, si Jehova.