“NIA, saray ugugaw sikara so sakey a tawir [manlapud si] Jehova; tan say bunga na eges sikato so tumang,” so kuan na Biblia. (Sal. 127:3) Kanian agla pankelawan no akin ya malikeliket iray atateng kapaway na anak da.

Balet satan a liket et walay katekep ton seryoson responsabilidad. Pian ombaleg so ugaw ya aliwan masakit, kaukolan ya regular a pakanen na masustansia. Pian say anak et matoor a manlingkor ed si Jehova, kaukolan toy espiritual a panangan tan panangigiya na atateng to ya mansasagpot pian nipurek ed sikato iray prinsipyo na Dios. (Uli. 1:8) Kapigan so pangigapod ontan a panangipasal, tan panon itan a gawaen?

Imanoen so agawad si Manoa ya nanlapud tribu nen Dan, a nanayam ed baley na Zora diad Israel. Impaamta na anghel nen Jehova ed lepes ya asawa nen Manoa a sikatoy mangiyanak na sakey a laki. (Uko. 13:2, 3)Seguradon manliket iran sanasawa. Balet mapaga met ira no panon dan pabalegey anak da kanian impikasi nen Manoa: “O! Katawan, pikasik ed sika, iyabuloy mo a say laki na Dios a sikato so imbakim onla lamet ed sikami, tan ibangat to kami no anto so gawaen mi ed ugaw a niyanak.” (Uko. 13:8) Imbangat nen Manoa tan si asawa to so ganggan na Dios ed anak da ya si Samson, tan maabig so resulta na impansagpot da. Oniay inkuan na Biblia: ‘Et say espiritu nen Jehova, inggapo ton tinenyeg si Samson.’ Antoy resulta? Akapanggawa si Samson na amayamay ya makapanyarin gawa bilang sakey ya ukom ed Israel.—Uko. 13:25; 14:5, 6; 15:14, 15.

Kapigan so igapon pangipasal ed anak? “Manlapud inkaugaw” nen Timoteo, sikatoy impasal nen nanay ton Eunice tan bai ton Loida ed saray “masanton sulat.” (2 Tim. 1:5; 3:15) On ginapoan da lan ipasal si Timoteo ed Kasulatan anggan melag ni.

Maabig no manpikasi iray Kristianon atateng parad panangiwanwan tan manplano iran masakbay pian nigapo dan nipasal so anak da “manlapud inkaugaw.” Oniay ibabaga na Biblia: “Saray plano na makuli et seguradon ontalona.” (Uli. 21:5, NW) Antis ya ompaway so ugaw, seguradon manpaparaan la ray atateng. Nayarin manggawa ni ra ingey listaan na saray kaukolan na ugaw. Importante met ya iplano day espiritual iran aktibidad da. Kaukolan ya igapo day pangipasal ed anak da legan ya baby ni.

Oniay imbaga na libron Early Childhood Counts—A Programming Guide on Early Childhood Care for Development: Saray bulan kapaway na ugaw so sankaimportantian ya panaon na pan-develop na utek. Legan na satan, saray synapses—saray koneksion a nakaukolan pian makaaral—et ondakel na duamplon beses. Kanian maabig no samboten na atateng iyan antikey a panaon na pandi-develop na utek na ugaw pian igapon ipurek iray maespiritual a bangat tan ugali!

Oniay imbaga na sakey ya ina ya regular payunir nipaakar ed anak ton bii: “Sakey bulan to ni labat, ipipilak lan manpulong. Anggano agto natatalosan no antoy nagagawa, amtak ya no masakbay ya nipasal, walay maabig ya epektod sikato. Nen duay taon to, makpel lan mangiiter na tract ed saray napupulongan mi.”

Maabig so resulta na masakbay a pangipasal ed ugaw. Balet amta na atateng ya aliwan naynay a mainomay so pangitaryay espiritual ya instruksion ed ananak.

Say sakey ya rason no akin a mairap ya ibangat iray ugugaw et lapud magalaw tan maganggano ran onsawa. Mapmainomay ya nabalang so atension na angkelag nin ugugaw. Masyado iran mausisa tan labay dan diskobrien iray walad kaliberliber da. Antoy nagawaan na atateng pian natulongan day anak dan makapanpokus ed ibabangat da?

Imanoen pay imbaga nen Moises. Oniay nabasad Deuteronomio 6:6, 7: “Saraya a salita, ya iganggan ko ed sika ed sayan agew, nepeg da so ontatak ed pusom; Tan nepeg mo ya ibangat iraya a sankakulian ed saray anak mo, tan nepeg mo ra a tongtongen kapagno manyurong ka ed abung mo, tan kapagno manaakar ka ed dalan, tan kapagno mandukdukol ka tan kapagno ombangon ka.” Say labay ya ibaga na salitan ‘ibangat a sankakulian’ et maminpigapigan uliten. Say melag ya ugaw et singa palakay a kaukolan ya regular a salogen. No diad saray adulto et makatulong so maminpigan pangulit pian agda nalingwanay importantin bengatla, seguradon ontan met ed saray ugugaw!

Pian nibangat ed saray ugugaw so katuaan nipaakar ed Dios, nepeg ya walay panaon na atateng ed ananak da. Diad sayan mundo ya masyadon busy, mairap ya gawaen itan. Balet impaseseg nen apostol Pablo ed saray Kristiano ya nepeg dan ‘anamoten so kada pankanawnawa’ parad saray Kristianon aktibidad. (Efe. 5:15, 16) Panon iyan nagawaan? Walay sakey ya Kristianon manangasikaso ya say asawa to et regular payunir kanian pareho iran busy. Aliwan mainomay parad sikato ya balansiey pangibangat  ed anak, pangasikasod saray responsabilidad ed kongregasyon, tan pananap na pambilay. Panon dan nipanaon so pangibangat ed anak da? Oniay inkuan na ama: “Kada kabuasan antis ak ya mantrabaho, ibabasa mid anak mi so libron Saray Istorya ed Biblia odino bokletan Usisaen so Kasulatan ya Inagew-agew. Diad labi, seseguroen min ibasaan antis ya onugip, tan no onla kamin manpulong et ipipila mi. Agmi labay ya nasayang irayan unonan taon na bilay to.”

Labay tayon ombaleg ya responsable iray ananak tayo. Balet say manunan gagala na pangipapasal tayod sikara et pian aroen day Dios ed interon puso ra.—Mar. 12:28-30.

Oniay ibabaga na Salmo 127:4: “Singa saray panapana ed lima na sakey a mabiskeg a too, ontan so saray anak.” Kanian saray anak et singa pana ya kaukolan ya nikena ed target. Aglan balot nabawi so pana no imbulos la itan na managpana. Saray atateng et walay pana ra—saray anak da—diad antikey labat a panaon. Kaukolan dan anamoten itan a panaon pian ipurek iray prinsipyo na Dios ed isip tan puso na ananak da.

Oniay insulat nen apostol Juan nipaakar ed espiritual ya ananak to: “Anggapo lay mas baleg a rason na pisalsalamat ko nen say saya, a narerengel kon mankukurang ed katuaan iray ananak ko.” (3 Juan 4) Ontan met so nibalikas na Kristianon atateng no nanengneng da ray anak da ya “mankukurang ed katuaan.”