1, 2. Antoy epekto na impamabaleg ed sikatayo tan say kaliberliber tayo?

BALEG so epekto na impamabaleg ed sikatayo tan say kaliberliber tayo. Nanduruma so panangawes tayo, saray labay tayon kanen, tan pati ugali tayo. Akin? Say sakey ya rason et lapud impluensya na saray totoo tan say kipapasen tid bilay.

² Balet, wala ni ray mas importante nen say pampili naakan o kawes. Singa bilang, diad ibabaleg tayo et wala ray angibangat ed sikatayo no antoy duga tan aliwa. Balet kaslakan et nandurumay opinyon na totoo. No maminsan met et uunoren tayoy ididikta na konsiensia tayo. Ibabaga na Biblia ya anggan “saray totoo na nasyones ya andian na ganggan et sipor a manggagawa na saray bengatlan walad ganggan.” (Roma 2:14) Balet, kasin labay ya ibaga na saya ya no anggapoy espisipikon ganggan na Dios et sarag ti lan gawaen no antoy apasalan tayo o aligen ti lay gagawaen na dakel?

3. Antoy duaran rason no akin ya agtutumboken na saray Kristiano so estandarte na mundo?

³ Niay duaran importantin rason no akin ya aliwan ontan so gagawaen na saray Kristiano. Unona, ibabaga na Biblia: “Wala so dalan a singa maptek ed too, balet say sampot to sikara so saray dalan na patey.” (Uli. 16:25) Ag-itayo perpekto kanian agtayo sarag ya igiya so sarili tayo. (Uli. 28:26; Jer. 10:23) Komadua, ibabaga na Biblia ya kokontrolen nen Satanas so estandarte na mundo ta sikato so “dios na sayan sistema.” (2 Cor. 4:4; 1 Juan 5:19) Kanian no labay tayon bendisyonan tan abobonan itayo nen Jehova, kaukolan tayon unoren so simbawad Roma 12:2.—Basaen.

4. Antoy aralen tayod sayan artikulo?

 ⁴ Aralen ed sayan artikulo so taloran importantin punto ed Roma 12:2. (1) Akin ya kaukolan tayoy “manpasimbalo”? (2) Antoy kaukolan tayon pasimbaloen? tan (3) Panon itayon makapanpasimbalo?

5. Parad siopa imay simbawa nen Pablo ya nabasad Roma 12:2?

⁵ Sayan sulat nen apostol Pablo et aliwan parad amin ya taga Roma, noagta parad saray kapara ton alanaan a Kristiano. (Roma 1:7) Binilin to ran manpasimbalo tan ‘agda la aaligen iray paraan na sayan sistema na mundo.’ Say tutukoyen dia nen Pablo ya “sistema na mundo” et saray estandarte, kustombre, ugali, tan panangawes ed Roma diad saman a panaon nen manga 56 C.E. Imbaga nen Pablo ed sikara ya “agyo la aaligen” ta wala ni ran siansiay agagi ya naimpluensyaan na satan ya sistema. Panon iran naimpluensyaan?

6, 7. Nen panaon nen Pablo, akin et mairap so pagmaliw a Kristiano ed Roma?

⁶ Nanengneng nin siansia natan ed Roma iray geray na saray templo, lubok, monumento, istadyum, tan teatro nensaman. Say arum ed saratan et nen inmunan siglo ni. Nanengneng ditan no panoy panagbilay tan relihyon na saray taga Roma nensaman. Diad saray history ya libro, nabasa tayon diad Roma et wala ray panlalaban na saray gladiator, lumba na saray karwahe, tan palabas ya no maminsan et imoral. Dakel met so negosyo ed Roma, kanian saray totoo ditan et baleg so oportunidad dan manpayaman.—Roma 6:21; 1 Ped. 4:3, 4.

⁷ Anggano dakel so templo tan dirios na saray taga Roma, anggapoy personal ya relasyon dad dirios da. Say relihyon da et puros labat ritual—sano walay nananak, nankasal, odino inatey. Sarayan ritual et parte lay bilay da. Kanian imadyin mo pa labat no panon kairap so pagmaliw a Kristiano ed Roma. Maslak ed sikara et ontan so binalegan da, kanian kaukolan dan talagay manpasimbalo pian magmaliw ya tuan Kristiano. Tan anggano abautismoan la ra, wala ni ran siansiay kaukolan dan pasimbaloen.

8. Akin et mapeligro iyan mundo ed saray Kristiano natan?

⁸ Singa say Roma nensaman, mapeligro met iyan mundo ed saray Kristiano natan. Akin? Ta maksil so impluensyay espiritu na mundo. (Basaen so Efeso 2:2, 3; 1 Juan 2:16.) Walad kaliberliber tayo so pilalek, panagnonot, estandarte, tan moralidad na sayan mundo, kanian walan walay posibilidad ya naalisan itayo. Maabig sirin no unoren tayo imay  simbawa ya ‘agla aaligen iray paraan na sayan sistema na mundo’ tan “manpasimbalo.” Antoy kaukolan tayon pasimbaloen?

9. Anto ran pananguman so nepeg ya gawaen na sakey pian onkualipikad bautismo?

⁹ No say sakey et manaaral na Biblia tan iyaaplika to la itan, onggapo met lan onaligwas ed espiritual. Wala ray umanen tod bilay to tan taynan to lay palson relihyon. Pansasagpotan ton isulong so balon personalidad tan aligey Jesus. (Efe. 4:22-24) Maliket itayo ta nilibo so onaaligwas ed espiritual kada taon tan manpapabautismo bilang simbolo na dedikasyon dad Dios a Jehova. Seguradon naliliketan so puso nen Jehova. (Uli. 27:11) Balet, kasin saraya labat ya pananguman so nepeg ya gawaen na sakey ya too?

10. Akin et duma so pampasimbalo ed pamarakep labat ed personalidad?

¹⁰ Diad tua, say pampasimbalo et aglabat basta ontutukoy ed iyaligwas odino pamarakep ed personalidad tayo. Singa bilang, ompan ibaga ran pinarakep so sakey ya produkto, anta manaya et ag-anguman. Ompan wala labat so balon inlaok, odino pinabalibali labat so kargaan. Ibabaga na Vine’s Expository Dictionary ya say balikas a “manpasimbalo” diad Roma 12:2 et say panguman odino pansalat ed panagnonot tayo diad tulong na masanton espiritu. Say pampasimbalo sirin na sakey a Kristiano et aglabat basta ontutukoy ed pangitunda tod saray bisyo, marutak ya panagsalita, tan imoral ya kagagawa. Wala pa ray totoon anggapoy amta rad Biblia balet agmet ira manggagaway mauges. Anto sirin so kaukolan tayo nin pasimbaloen?

11. Unong ed si Pablo, antoy kaukolan ya gawaen na sakey pian makapanpasimbalo?

¹¹ “Manpasimbalo kayo diad panguman yo ed panagnonot yo,” so kuan nen Pablo. Say “panagnonot” et aglabat ontutukoy ed isip tayo. Diad Biblia, kaibad satan iray labalabay tayon nonoten, say ugali tayo, tan say abilidad tayon mankatunongan. Diad bandad gapo na sulat nen Pablo ed saray Romano, deneskribe to ray totoon say ‘kipapasen na nonot da et ag-aabobonan na Dios’ lapud “gagawaen da so amin a klase na ag-inkatunong, karelmengan, panag-agum, kaugsan, a napno ra na ibeg, panagpatey, pankokolkol, panagpalikdo,” tan arum nin makapasakit a bengatla. (Roma 1:28-31) Kanian ontan lay bilin nen Pablo ed saramay Kristianon ontan so binalegan da ya kaukolan day “manpasimbalo” tan ‘umanen so panagnonot da.’

12. Antoy naoobserbaan mon panagnonot na saray totoo natan, tan akin et mapeligro iyan panagnonot ed saray Kristiano?

¹² Makapaermen, maslak ya totoo et  onmad samay deneskribe nen Pablo. Agda labay so padiktaan no antoy duga, iisipen da ya karaanan kan too no maprinsipyo ka tan uunoren moy ganggan na Dios. Saray ugugaw et pappaulyanan labat na dakel ya maestra tan atateng ya gawaen day labay da. Say kuan da akauley kan mandesisyon no antoy duga tan aliwa. Anggan saramay mangibabagan manisia rad Dios et iisipen dan agda kaukolan ya unoren iray ganggan na Dios. (Sal. 14:1) Say onian panagnonot et mapeligrod saray Kristiano. No ag-itayo manalwar, ompan agti met la unoren iray teokratikon uksoyan tan manreklamo tayo la no walay agtayo nagugustoan. Ompan agtayo mipaknad arum ya simbawan base ed Biblia no nipaakar ed panagligliwaan, panangusar na Internet, tan pangalay atagey ya edukasyon.

13. Akin et nepeg tayon usisaen so sarili tayo?

¹³ Pian agtayo la naalig iyan mundo, kaukolan tayon usisaen so paraan na panagnonot tayo, no antoy walad puso tayo, saray labay tayon gawaen, tan saray estandarte tayo. Nayarin ag-iraya nanengneng na arum a too tan ompan ibaga da ni ingen ya balibali nagagawaan tayo. Balet, sikatayon mismo so makaamta no talagan mansasagpot itayon manpasimbalo base ed saray nanaaralan tayod Biblia.—Basaen so Santiago 1:23-25.

14. Antoy makatulong pian naamtaan tayo ray kaukolan tayon umanen?

¹⁴ Pian makapanpasimbalo itayo, kaukolan tayon umanen so walad puso tayo—say mismon inkatoo tayo. Antoy ontulong pian nagawaan tayo itan? Diad Biblia, nanaaralan tayo no antoy labay nen Jehova ya inkatoo tayo. Say reaksion tayod saray nababasa tayod Biblia so pakanengnengan no antoy walad puso tayo. Ontulong itan pian naamtaan tayo no anto ray kaukolan tayon umanen pian nagawaan tayoy “ayadyarin linawa na Dios.”—Roma 12:2; Heb. 4:12.

15. Antoy napasimbalo sano manpamoldi tayod si Jehova?

¹⁵ Basaen so Isaias 64:8. Walay importantin naaralan tayod ilustrasyon ya inusar nen propetan Isaias. Sikatayo so pitek tan si Jehova so Domadamili. Momoldien to itayo aliwan pian onganggana odino onguapo itayo. Imbes, say inkatoo tayo so uumanen to. No manpamoldi tayo ed sikato, say napasimbalo et say inkatoo tayo—nauman so walad puso tan panagnonot tayo. Atan so nakaukolan pian nalabanan tayoy impluensya na sayan mundo. Panon to itayon momoldien?

16, 17. (a) Deskribien no antoy gagawaen na domadamili ed pitek pian makapanggaway de-kalidad ya banga. (b) Panon itayon tutulongan na Salita na Dios pian napasimbalo itayo tan magmaliw a mausar ed si Jehova?

¹⁶ Pian makapanggawa so domadamili na de-kalidad ya banga, marakep a klase na pitek so usaren to. Balet, wala ni duaran kaukolan ton gawaen ed pitek antis ton moldien. Unona, linisan to itan pian naekal iray akilan dutak. Komadua, imasa to itan ed danum ya dugaruga labat so karakel to pian agnaderal so kurti na banga sano amoldi la.

¹⁷ Imanoen ya nepeg ya malinis imay pitek, tan kaukolan so danum pian mainomay ya masaen. Say Salita na Dios et singa met danum. Ontulong itan pian  naekal tayoy datin panagnonot tayo sanen agti ni kabat so Dios. Sano agawaan tayo la itan, pasimbaloen itayo na Dios pian magmaliw tayon mausar ed sikato. (Efe. 5:26) Lanang itayon nabibilin ya inagew-agew a basaen so Biblia tan regular ya miaral. Akin? Ta no gawaen tayo itan, manpapamoldi tayod si Jehova.—Sal. 1:2; Gawa 17:11; Heb. 10:24, 25.

18. (a) Akin et kaukolan tayo so panagdalepdep no labay tayon napasimbalo itayo na Salita na Dios? (b) Anto ray tepet ya ontulong ed sikatayo?

¹⁸ Pian napasimbalo itayo na Salita na Dios, agtayo labat itan basta basaen tan aralen. Wala ray totoon manbabasa met na Biblia tan kabisado day karga to. Ompan wala ray ontan ya akatongtong mod lawak na kimeyan. Say arum ni ingen et memoryado da iray tekstod Biblia. * Balet, anggapo met so epekto tod bilay tan panagnonot da. Antoy rason? Napasimbalo labat na Salita na Dios so sakey a too no abuloyan ton ontanek itan ed puso to. No ontan sirin, dalepdepen tayon maong so nanaaralan tayo. Tepetan tayoy sarili tayo: ‘Kasin kombinsido ak ya aliwa labat iyan bangat na relihyon? Kasin apaneknekan ko lan aya so katuaan? Tan kasin iyaaplikak a mismo so nanaaralan ko, tan agko labat itan ibabangat ed arum? Kasin panisiaan ko ya si Jehova so mismon mitotongtong ed siak?’ No dalepdepen tayo irayan tepet, onaralem so panangaro tayod si Jehova. Nasabi so puso tayo, kanian napakiwas itayon manggaway pananguman ya mamaliket ed Dios.—Uli. 4:23; Luc. 6:45.

19, 20. Antoy maabig a resulta no iyaplika tayoy simbawa na Biblia?

¹⁹ No lanang tayon babasaen tan dadalepdepen so Salita na Dios, nitultuloy tayon gawaen iyan imbaga nen Pablo: “Lakseb yo la so daan a personalidad pati saray kagagawa na satan, tan isulong yoy balon personalidad, a diad panamegley na suston pikakabat et napapasimbalo itan.” (Col. 3:9, 10) On, no talagan natatalosan tayo so ibabangat na Biblia tan iyaaplika itan, nipanengneng tayoy balon personalidad ya manprotekta ed sikatayo ed saray patit nen Satanas.

²⁰ “Bilang matulok ya ananak, agkayo la onkikiwas unong ed saray datin pilalek yo,” so kuan nen apostol Pedro, “balet magmaliw kayon masanto diad amin a kagagawa yo.” (1 Ped. 1:14, 15) Aralen ed ontumbok ya artikulo no panon itayon bendisyonan nen Jehova no gawaen tayoy anggaay nayarian tayon manpasimbalo.