1. Akin et nayarin magmaliw itayon agmakaanos?

NEN niletneg so Mesianikon Panarian nen 1914, ginmapo so kaunoran iran agew na mundo nen Satanas. Diad saman a taon et walay agawan guerra ed tawen tan imbantak nen Jesus diad dalin so Diablo tan saray demonyo to. (Basaen so Apocalipsis 12:7-9.) Amta nen Satanas ya “antikey lay panaon to.” (Apo. 12:12) Balet satan ya “panaon” et ngalngali 100 taon la kanian nayarin isipen na arum ya abaybayag lay kaunoran iran agew. Legan tayon aalagarey ikiwas nen Jehova, kasin ngalngali agtayo la makaanos?

2. Antoy aralen ed sayan artikulo?

² Mapeligro so pagmaliw ya agmakaanos, ta ompan bengatbengat itayon onkiwas. Anto sirin so makatulong pian naanosan tayoy manalagar? Natulongan itayo na sayan artikulo diad pangebat ed sarayan tepet. (1) Antoy naaralan tayod maan-anos ya impanalagar nen propeta Miqueas? (2) Anto ray nagawa ya pakapatnagan a nasumpal lay panaalagar tayo? (3) Panon tayon nipanengneng so apresasyon tayod panaanos nen Jehova?

3. Diad panaon nen Miqueas, antoy situasyon ed Israel?

³ Basaen so Miqueas 7:2-6. Naimatonan na propeta nen Jehova a si Miqueas so inkapuy ed espiritual na saray Israelita ya anggad imbeneg da lay Jehova legay uley na mauges ya Arin si Ahaz. Saray agmatoor ya Israelita et inyaliling nen Miqueas ed “sabitan” o masabit a tanaman, tan “alar a sabit.” Saraman ya Israelita et singa ra masabit a tanaman o alar ya makasugat ta mauges so panagtrato dad arum. Talagan grabe inkauges da ta anggan saray sankapamilya et anggapo lay panangaro rad balang sakey. Lapud amta nen Miqueas ya anggapoy nagawaan to pian umaney situasyon, sikatoy impapuson  nampikasid si Jehova. Insan to maan-anos ya inalagar so ikiwas na Dios. Matalek si Miqueas ya ipetek nen Jehova so situasyon diad inggeter Ton panaon.

4. Anto ray subok ya aarapen tayo?

⁴ Singa si Miqueas, nakakalimog tayo ray totoon makasarili. Amayamay so ‘agda amtay misalamat, aliwan matoor, anggapoy panangaro ra ed kapamilyaan da.’ (2 Tim. 3:2, 3) Makapa-stress no saray katrabaho, kaeskuela, tan kakaabay tayo et sarili da labat so nononoten da. Balet wala ray lingkor na Dios ya mas mairap so subok ya aarapen da. Imbaga nen Jesus ya saray papatumbok to et busolen na saray kapamilya da, tan oniay inkuan ton epekto na mensahe to ya miparad samay nabasad Miqueas 7:6: “Linma ak dia pian pansengegan na inkaapag-apag, diad anak a laki sumpad ama to, tan anak a bii sumpad ina to, tan malangwer ya asawan bii sumpad katulangan ton bii. On, say magmaliw a kakabusol na sakey a too et saray kabiangan na dilin sankaabungan to.” (Mat. 10:35, 36) Talagan mairap ya sungdoan so panagbalaw tan isusumpa na saray agmananisian kapamilya! No ontan so situasyon tayo, ag-onsusuko. Imbes, mansiansia tayon matoor tan maan-anos ya alagarey Jehova ya mangipetek ed situasyon. No naynay tayon kerewey tulong to, ikdan to tayoy biskeg tan karunongan pian makapansungdo itayo.

5, 6. Panon a benendisyonan nen Jehova si Miqueas, balet antoy agto anengneng?

⁵ Benendisyonan nen Jehova si Miqueas lapud maan-anos ya impanalagar to. Naimatonan nen Miqueas so impangangga nen Arin Ahaz tan say mauges ya uley to. Anengneng toy impagmaliw ya ari na ilalak nen Ahaz ya si Hezekias, tan say impangipawil tod dugan panagdayew. Anengneng to met ya say mensahe na panangukom sumpad Samaria ya impaisulat ed sikato nen Jehova et asumpal nen sinakop na saray Asiryano so amianen a panarian na Israel.—Miq. 1:6.

⁶ Balet, ag-anengneng nen Miqueas so kasumpalan na amin ya propesiyan impaisulat ed sikato nen Jehova. Singa bilang, oniay insulat nen Miqueas: “Dia ed saray kaunoran ya agew . . . say palandey na abung nen Jehova niletneg naani ed toktok na saray palandey, tan sikato naani nipaatagey ed tagey na saray pukdol; et saray baley onagus ira naani ed sikato. Et dakel a nasyon onla ra naani a kuan da, Dago kayo, tan onsegep itayo ed palandey nen Jehova.” (Miq. 4:1, 2) Nansiansian matoor si Miqueas anggad impatey to, anggano dumay ginawa na saray totood kaliberliber to. Oniay insulat to nipaakar ed saya: “Saray amin a baley manakar ira balang sakey ed ngaran na dios to; et manakar itayo naani dia ed ngaran nen Jehova a Dios tayo ed ando lan ando lawas.” (Miq. 4:5) Maan-anos ya nanalagar si Miqueas ed saraman ya mair-irap a panaon lapud sikatoy segurado ya tooren nen Jehova so amin ya impromisa To. Sikatoy nanmatalek ed si Jehova.

7, 8. (a) Akin ya manmamatalek tayod si Jehova? (b) Antoy gawaen tayo pian mas maples ya onlabas so panaon?

⁷ Kasin manmamatalek tayo met ed si Jehova? Walay rason tayo pian gawaen itan. Anengneng tayon mismoy kasumpalan na propesiya nen Miqueas. Legan na “saray kaunoran ya agew,” minilyon ya totoon nanlapud amin a bansa tan rasa tan pansasalita so onaagus ed “palandey na abung nen Jehova.” Anggano sarayan managdayew et nanlapud saray bansan mankakalaban, pinitpit da ray ‘kampilan da pian magmaliw a tarem na lukoy’ tan agda la labay so “manaral na bakal.” (Miq. 4:3) Talagan baleg a pribilehyo so magmaliw a kabiangan na mareen a totoo nen Jehova!

⁸ Labalabay tayon panganggaen la nen Jehova iyan mauges a mundo. Balet, pian  makapanalagar tayon maan-anos, kaukolan tayon moriaen iray bengatla unong ed panmoria nen Jehova. Inggeter to lay agew ya pangukom tod saray totoo panamegley na “tinuro to,” si Jesu-Kristo. (Gawa 17:31) Antis na satan balet, iikdan na Dios so amin a totoo na pankanawnawan nawalaan na “suston pikakabat ed katuaan,” iyaplika itan ya pikakabat, tan nilaban. Napepeligro so dakel a bilay. (Basaen so 1 Timoteo 2:3, 4.) No busy tayon ontutulong ed arum pian nawalaan iray suston pikakabat nipaakar ed Dios, say nakekeran panaon antis ya onsabi panangukom nen Jehova et mas maples ya onlabas. Asingsingger lan onsabi itan, ompan bigla ni ingen. Tan no onsabi itan, manliket tayo ta nansiansia tayon busy ed panagpulong a kimey!

9-11. Kasin asumpal lay propesiya ed 1 Tesalonica 5:3? Ipaliwawa.

⁹ Basaen so 1 Tesalonica 5:1-3. Magano lan ibaga na saray bansa so “Kareenan tan kaligenan!” Pian ag-itayo napatitan na satan ya deklarasyon, kaukolan ya “mansiansia itayon aliing tan mantultuloy itayon manlikas.” (1 Tes. 5:6) Pian makapansiansia itayon aliing ed espiritual, pantongtongan tayo ray agawa ya mangitonton ed satan ya importantin proklamasyon.

¹⁰ Kayari inmuna tan komaduan sankamundoan a guerra, desperado iray bansa ya niwalay kareenan. Kayari na inmunan sankamundoan a guerra, pinorma day League of Nations pian niwalay kareenan. Insan kayari komaduan sankamundoan a guerra, inilaloan na totoo ya napawala na United Nations so kareenan diad mundo. Nanilalo iray gobierno tan lider na relihyon ed saratan ya organisasyon. Alimbawa, indeklara na United Nations so taon 1986 bilang International Year of Peace. Diad saman a taon, akikasakey iray lider na dakel ya bansa tan relihyon ed ulo na Katolikon Simbaan diad Assisi, Italy, pian ipikasi kareenan.

¹¹ Balet satan ya deklarasyon parad kareenan tan kaligenan, ontan met ed arum nin miparan deklarasyon et aliwa nin kasumpalan  na propesiyad 1 Tesalonica 5:3. Akin? Lapud agni agaway nipasakbay ya “biglan kadederal.”

12. Antoy amta tayo ed deklarasyon ya “Kareenan tan kaligenan”?

¹² Siopay mangibaga ed importantin deklarasyon ya “Kareenan tan kaligenan”? Antoy papel na saray lider na Kakristianoan tan arum ya relihyon? Panon ya mibiang iray lider na nanduruman gobierno ed sayan proklamasyon? Anggapoy ibabaga na Biblia. Balet anggan panon so pangiproklama dad satan odino anggano singa makakombinse itan, amta tayon aliwan tua itan. Si Satanas nin siansia so mangokontrol ed sayan mundo ya abulok lan maong tan agla nauman. Kanian makapaermen no walad sikatayo so napalikdo na satan ya satanikon propaganda tan agmansiansian neutral!

13. Akin ya popokpokan ni na saray anghel iray dagem na kadederal?

¹³ Basaen so Apocalipsis 7:1-4. Legan tayon aalagaren so kasumpalan na 1 Tesalonica 5:3, popokpokan na saray makapanyarin anghel so makaderal iran dagem na baleg a kairapan. Antoy aalagaren da? Say sakey ya importantin nagawa et insulat nen apostol Juan—say permanentin pantatak ed saray alanaan ya “ariripen na Dios tayo.” * No nakompleto la iyan pantatak, bulosan la na saray anghel iray dagem na kadederal. Anto lay nagawa?

14. Anto ray pakapatnagan ya asingger lay kaderal na Makapanyarin Babilonia?

¹⁴ Say Makapanyarin Babilonia, salanti, say sankamundoan ya empiryo na palson relihyon et naderal. Anggapoy nitulong ed sikato na saray “grupo na totoo tan nasyon tan lenguahe.” Nanenengneng tayo la ray pakapatnagan ya asingger lay kanepegan ton kadederal. (Apo. 16:12; 17:15-18; 18:7, 8, 21) Diad tua, nanenengneng tayo la natan ed saray balita ya krikritikoen da ray relihyon tan saray lider na relihyon. Balet, say pakalikna na saray lider na Makapanyarin Babilonia et ag-ira napepeligro. Talagan alingolingo ra! Kayarin iproklamay “Kareenan tan kaligenan!” et tampol ya atakien na politikal a sistema nen Satanas so palson relihyon tan sigpot ton deralen itan. Anggapo lay Makapanyarin Babilonia! Talagan nabawbawi tayoy maan-anos a panalagar ed saratan ya importantin nagawa.—Apo. 18:8, 10.

15. Akin ya maan-anos a manaalagar si Jehova?

¹⁵ Anggaman ag-igagalang na totoo so ngaran nen Jehova, maan-anos ton aalagaren so dugan panaon ya ikiwas to. Agto labay ya walay matuan impanpuso ya naderal. (2 Ped. 3:9, 10) Kasin ontan met so nalilikna tayo? Antis ya onsabi agew nen Jehova, nipanengneng tayoy apresasyon tayod panaanos to diad nanduruman paraan.

16, 17. (a) Akin ya kaukolan tayon tulongan iramay nagmaliw ya inaktibo? (b) Akin et kaukolan ya ompawil lad si Jehova iray inaktibo?

¹⁶ Tulongan iramay nagmaliw ya inaktibo. Imbaga nen Jesus ya walay liket ed tawen no naromog so sakey ya karneron abalang. (Mat. 18:14; Luc. 15:3-7) Mapatnag ya inar-aro nen Jehova iramay angipanengneng na panangaro ed sikato, anggan ag-ira aktibon manlilingkor ed sikato natan. No tulongan tayo ran ompawil ed kongregasyon, napaliket tayoy Jehova tan saray anghel.

¹⁷ Kasin sakey kad saray aliwa lan aktibon manlilingkor ed Dios? Nayarin asakitan ka na sakey ed kongregasyon kanian intundam so milimog ed organisasyon nen Jehova. Balet ompan abayag la iman, kanian tepetan moy sarilim: ‘Kasin mas  makabaliksan so bilay ko natan, tan mas maliket ak? Kasin si Jehova so akaopendid siak, odino agperpekto ya too? Wala tay mauges ya ginawa nen Jehova ed siak?’ Lawas pankaabigan tayoy gagawaen to. Anggaman agtayo natotoor natan so dedikasyon tayod sikato, siansia nin aabuloyan to tayon napanliketan iray maong a bengatlan itatarya to. (Sant. 1:16, 17) Balet asingsingger lay agew nen Jehova, say maaron Ama tayo, kanian panaon la pian ompawil ed sikato tan diad kongregasyon—say alenleneg ya salimbengan ed sarayan kaunoran iran agew.—Deu. 33:27; Heb. 10:24, 25.

18. Akin et kaukolan tayon suportaan iramay mangidadaulo?

¹⁸ Matoor ya suportaan iramay mangidadaulo. Bilang maaron Pastol, igigiya tan proprotektaan itayo nen Jehova. Tinuro toy Anak to bilang Manunan Managpastol ed pulok. (1 Ped. 5:4) Papastolan na saray elder ed masulok ya 100,000 a kongregasyon so kada karnero na Dios. (Gawa 20:28) No matoor tayon susuportaan iray mangidadaulo ed sikatayo, ipapanengneng tayoy apresasyon tayod si Jehova tan si Jesus ed amin ya ginawa ra parad sikatayo.

19. Antoy gawaen tayo pian ombiskeg so depensa tayo?

¹⁹ Onapit ed balang sakey. Antoy labay ya ibaga na satan? No say grupo na nipasal ya maong iran sundalo et atakien na kalaban, manaapitan ira. Kanian mas mabiskeg so depensa ra. Mas papasyaen nen Satanas so pangaataki tod saray totoo na Dios, kanian aliwa iyan panaon pian labanan iray agagi tayo. Panaon iya pian onapit ed balang sakey, palampasen so ag-inkaperpekto na arum, tan ipanengneng so panagmatalek ed panangidaulo nen Jehova.

20. Antoy kaukolan tayon gawaen natan?

²⁰ Mansiansia itayo sirin ya alerto ed espiritual tan maan-anos a manalagar. Alagaren tayoy pangiproklamay “Kareenan tan kaligenan!” tan say permanentin pantatak ed saray alanaan. Kayari na satan, bulosan la na apatiran anghel iray makaderal a dagem, tan naderal so Makapanyarin Babilonia. Legan tayon aalagaren so kagawa na saratan, unoren tayoy panangiwanwan na saramay aturon mangidaulo ed organisasyon nen Jehova. Manaapitan tayo pian labanay Diablo tan saray demonyo! Natan la so panaon pian tulokey simbawa na salmista: “Manpakpel kayo, tan pabiskeg yoy linawa yo, amin yo a manaalagar ed si Jehova.”—Sal. 31:24, NW.