1, 2. (a) Antoy resulta no naasikason maong iray karnero? (b) Akin ya dakel ed saray totood panaon nen Jesus so singa saray karneron andiay pastol?

MALIGLIGSA iray karnero no maasikasoy managpastol da. Unong ed sakey ya libron nipaakar ed panag-asikasoy karnero, no say sakey a pastol et basta to labat awiten ed panagpastolan iray karnero tan agto ra asikasoen, agmabayag et onkapuy tan magmaliw iran masakit. Balet no naasikason maong iray karnero, arawid sakit so interon pulok.

² Ontan met ed kongregasyon. Say panangasikaso tan atension ya iiter na saray Kristianon pastol ed kada karneron inmatalek ed sikara et apektaen toy espiritualidad na interon kongregasyon. Nensaman, naabagey nen Jesus iray totoo lapud “singa ra kinatatan tan pinaulyanan a karnero ya andian na managpastol.” (Mat. 9:36) Akin et onman so kipapasen da? Lapud saramay aturon mangibangat ed sikara na Ganggan na Dios et anggapoy panangasi, istrikto, tan mankuankuanan ira. Imbes ya tulongan tan asikasoen na saray relihyoson lider ed Israel iray walad pulok da, pinasakbatan da ray “ambebelat ya awit.”—Mat. 23:4.

3. Antoy nepeg a tandaan na saray elder legan dan aasikasoen iray karnero ed kongregasyon?

³ Baleg sirin so responsabilidad na saray Kristianon pastol ed panaon tayo. Saray karneron walad pulok ya aasikasoen da et kayarian nen Jehova tan “say maong a managpastol,” si Jesus. (Juan 10:11) “Sinaliw” nen Jesus iray karnero “panamegley na mablin dala” to. (1 Cor. 6:20; 1 Ped. 1:18, 19) Inar-aro to ra kanian mabulos ton imbagat so bilay to parad sikara. Nepeg a lawas tandaan na saray elder ya katulongan iran pastol kanian kaukolan day manpasakop ed maaron Anak na Dios, “say  manunan managpastol na saray karnero,” si Jesu-Kristo.—Heb. 13:20.

4. Antoy aralen tayod sayan artikulo?

⁴ Panon sirin so nepeg a pantrato na saray elder ed saray karnero? Papasesegen iray membro na kongregasyon ya ‘ontulok irad saramay mangidadaulo’ ed sikara. Balet ta papasesegen iray elder ya ag-ira “pakakatawan ed saramay kayarian na Dios.” (Heb. 13:17; basaen so 1 Pedro 5:2, 3.) Panon sirin ya nidaulo na saray aturon elder so pulok ya ag-ira pakakatawan? Diad arum a panangibaga, panon a naasikaso na saray elder so pankaukolan na saray karnero ya agda papalampasay autoridad ya inter na Dios ed sikara?

5. Antoy naaralan tayod Isaias 40:11 nipaakar ed si Jehova?

⁵ Oniay imbaga nen propetan Isaias nipaakar ed si Jehova: ‘Pankabkaben to naani so ayep to, singa sakey a pastol, tiponen to naani so saray kordero ed taklay to, tan awiten to ra ed pagew to, tan guyoren to a makalna so saray walaan na kilaw.’ (Isa. 40:11) Ipapanengneng na satan a teksto no panon ya itatarya nen Jehova so pankaukolan na saray membro na kongregasyon ya maletey tan mankaukolay proteksion. Singa say sakey a managpastol ya amta toy espisipikon pankaukolan na kada karnero ed pulok to tan akaparaan ya mangasikasod sikara, amta nen Jehova so pankaukolan na saray walad kongregasyon tan maliket ya ontulong sikara. Sakey ni, say sakey a managpastol et awiten toy kapangiyanak a kordero diad pagew to no kaukolan. Diad mairap iran panaon et singa ontan met so gagawaen ed sikatayo nen Jehova, “say Ama na maaron panangasi.” Ligliwaen to itayo no wala ray dadalanen tayon subok o kairapan.—2 Cor. 1:3, 4.

6. Bilang pastol ed kongregasyon, panon a naalig na sakey ya elder so alimbawa nen Jehova?

⁶ Talagan dakel so naaralan na sakey a pastol na kongregasyon ed alimbawa na Ama tayon walad tawen! Singa si Jehova, kaukolan ya sikatoy maimano ed pankaukolan na saray karnero. No amta to ray aarapen dan subok tan saray pankaukolan dan nepeg ya naasikason tampol, niiter toy nakaukolan a panamaseseg tan tulong. (Uli. 27:23) Kanian nepeg ya ipanaon na sakey ya elder so pitongtong ed saray agagi tan dengelen to ra. Anggaman rerespetoen toy privacy da, agto ibabaliwalay nanenengneng tan narerengel tod kongregasyon tan lawas akaparaan ya ‘ontulong ed saramay makapuy.’—Gawa 20:35; 1 Tes. 4:11.

7. (a) Panoy impantratod saray karnero na Dios diad panaon nen Ezequiel tan Jeremias? (b) Antoy naaralan tayo ed impangikaindan nen Jehova ed saray agmatoor ya pastol?

⁷ Imanoen pay ugali na saray pastol ya kinondena nen Jehova. Diad panaon nen Ezequiel tan Jeremias, inkaindan nen Jehova iramay mangasikaso komon ed saray karnero to balet ta papaulyanan da ra. No anggapoy manbantay ed saray karnero, atakien ira na atap ya ayayep tan nataytayak ira. Imbes ya pakanen na saraman ya pastol iray karnero, pinaulyan da ra tan say ‘tinagano da labat et saray laman da.’ (Eze. 34:7-10; Jer. 23:1) Inkaindan met na Dios iray lider na Kakristianoan ed panaon tayo lapud miparan rason. Antoy naaralan na saray elder ed satan? Kaukolan ya aroen tan dugay pangasikaso dad pulok nen Jehova.

8. Panon ya angipanengneng si Jesus na maabig ya alimbawa ed pangiter na simbawa ed arum?

⁸ Lapud ag-itayo perpekto, nayarin wala ray membro na kongregasyon ya agda ni tampol a natalosan iray iilaloan nen Jehova ed sikara. Posiblin makapanggawa ray desisyon ya agmitunosan ed prinsipyo na Biblia, odino napatnagan ed kiwas da ya aliwa ni ran matatken ed espiritual. Antoy nepeg ya gawaen na saray elder? Kaukolan dan  aligey inkaanos nen Jesus ed saray disipulo to sanen mabetbet iran mansasangsangan no siopay sankamanunaan ed sikara diad Panarian. Imbes ya pampasnokan to ra, intultuloy to ran imbangat tan maaron sinimbawa nipaakar ed inkamapaabeba. (Luc. 9:46-48; 22:24-27) Inurasan to ni ingey sali ra pian nipanengneng tod sikaray maabig ya alimbawa na inkamapaabeba, say kualidad a kaukolan ya ipatnag na saray Kristianon manangasikaso natan.—Basaen so Juan 13:12-15; 1 Ped. 2:21.

9. Anton panmoria na saray apostol so impetek nen Jesus?

⁹ Miduma so panmoria nen Jesus ed kanonotan di Santiago tan Juan nipaakar ed betang na sakey a pastol ed kongregasyon. Kinerew dad si Jesus ya ikdan to ray atagey ya posisyon diad Panarian. Balet ta impetek nen Jesus so panmoria ra. Inkuan to: “Amta yo a saray arari na saray nasyon et pakakatawan ed saray totoo ra tan uusaren na manunaan a totoo so autoridad da ed sikara. Aliwan ontan balet ed sikayo, ta siopaman a labay toy magmaliw a manunaan ed sikayo et nepeg a magmaliw a lingkor yo.” (Mat. 20:25, 26) Kaukolan ya labanan na saray apostol so tendensian ‘pakatawan’ ed saray agagi, odino diktaan irad amin ya gawaen da.

10. Panon so labay nen Jesus a pantrato na saray elder ed pulok, tan anton alimbawa so impanengneng nen Pablo?

¹⁰ Iilaloan nen Jesus ya tratoen na saray Kristianon elder so pulok a singa ed impantrato tod satan. Kaukolan ya mabulos iran manlingkor ed agagi, ag-ira pakakatawan. Singa si Jesus, mapaabeban nanlingkor ed arum si Pablo. Oniay inkuan to ed saray elder ed kongregasyon diad Efeso: “Amta yo a manlapud unonan agew ya indakat ko ed distrito na Asia, akaiba yo ak ed amin a panaon, a nampaaripen ak ed Katawan tekep na sigpot a kapaabebaan na nonot.” Labay nen Pablo ya masimoon tan mapaabeba dan tulongan iray agagi. Inkuan to: “Impanengneng ko ed sikayo ed amin a bengatla a diad pansasagpot yo sirin et nepeg yon tulongan iramay makapuy.” (Gawa 20:18, 19, 35) Imbaga nen Pablo ed saray taga Corinto ya sikatoy aliwan katawan na pananisia ra, noagta sakey a kakimeyan da pian manliket ira. (2 Cor. 1:24) Angipanengneng si Pablo na maabig ya alimbawa na kapaabebaan tan inkakuli parad saray elder natan.

11, 12. Panon so nayarin panulong na sakey ya elder ed sakey ya agi diad panggaway desisyon?

¹¹ Say sakey ya elder ed kongregasyon et nepeg ton ‘tumboken a maong so matuan salita’ diad panagbangat to. (Tito 1:9) Balet ta gawaen to itan “tekep na inkaulimek.” (Gal. 6:1) Imbes ya diktaan to ray agagi no antoy gawaen da, say sakey ya maong a pastol et tutulongan to ran manggaway sarili dan desisyon ya nibased panangaro rad si Jehova tan ed Salita to. Singa bilang, nayarin ipaimano tod sakey ya agi iray prinsipyo na Biblia ya makatulong ed sikaton manggaway importantin desisyon. Sarag ton irepaso iray matukoy ya artikulod publikasyon tayo. Sarag to met ya ibaga ed agi ya mannonot nin maong no antoy posiblin epekto na pilien ton desisyon diad relasyon tod si Jehova. Sarag ton idanet so kaimportantian na pampikasi ed Dios parad tulong antis a mandesisyon. (Uli. 3:5, 6) Kayari ton itongtong iratan ed agi, abuloyan na elder so agi ya manggawa na sarili ton desisyon.—Roma 14:1-4.

¹² Say basiyan labat na saray Kristianon manangasikaso no mangiiter iray panangiwanwan et say Kasulatan. Kanian importante ya maong iran mangusar na Biblia tan naynay dan ibase ditan iray simbawa ra. No ontan so gawaen na saray elder, napaliisan  day posiblin pangabusod autoridad da. Tandaan ya katulongan labat iran pastol, tan balang sakey ed kongregasyon et eebatan dad si Jehova tan si Jesus iray sarili dan desisyon.—Gal. 6:5, 7, 8.

13, 14. Diad anto ran paraan ya nepeg a mangipanengneng na maabig ya ehemplo so sakey ya elder?

¹³ Kayarin binilin nen Pablo iray mamasiken ed kongregasyon ya ‘ag-ira pakakatawan ed saramay kayarian na Dios’ pinaseseg to ran ‘magmaliw ya ehemplo ed pulok.’ (1 Ped. 5:3) Panon a nayarin magmaliw ya ehemplo ed pulok so sakey ya elder? Imanoey duara ed saray kualipikasyon parad sakey ya brother a ‘manadampot na betang na manangasikaso.’ Kaukolan ya “maabig so panagnonot to” tan “maabig so panangidaulo to ed dilin sankaabungan to.” No walay pamilya na sakey ya elder, kaukolan ya napanuliranay panangidaulo to, ta “no say siopaman et agto amta ya idaulo so dilin sankaabungan to, panon ton naasikaso so kongregasyon na Dios?” (1 Tim. 3:1, 2, 4, 5) Pian onkualipika ed betang na manangasikaso, kaukolan a maabig so panagnonot to pian malinew so pakatalos tod saray prinsipyo na Dios tan amta ton iyaplika ed mismon bilay to. Sikatoy kalmado anggano diad mairap iran situasyon tan aliwan bengatbengat ya mandedesisyon. No saratan ya kualidad et nanengneng na saray agagid kongregasyon ed saray elder, mas ombiskeg so talek dad sikara.

¹⁴ Nipanengneng met na saray elder so maabig ya ehemplo diad panangidaulod lawak na kimeyan a singa ginawa nen Jesus. Nen sikatoy wadiad dalin, importantin kabiangan na kimey to so pangipulong ed maong a balita na Panarian. Imbangat to ray disipulo to no panon ya gawaen itan. (Mar. 1:38; Luc. 8:1) Diad panaon tayo, talagan napapaseseg iray manangipalapag no kaiba da ray elder ed panagpulong, nanengneng day seseg dad manangisalbay bilay a kimey, tan makaaral irad paraan na panagbangat da! No saray manangasikaso et talagan ipapanaon tan pansasagpotan day mibiang ed panagpulong anggano busy ira, napaseseg so interon kongregasyon ya aligen ira. Makapangipanengneng met iray elder na maabig ya ehemplo no manpaparaan tan mibibiang irad saray aral ed kongregasyon tan arum nin aktibidad, singa diad panaglinis tan panmintina ed Kingdom Hall.—Efe. 5:15, 16; basaen so Hebreos 13:7.

15. Anto ray rason no akin ya oonlan man-shepherding iray elder?

¹⁵ Say maong a pastol et asikasoen ton tampol so karneron asakitan o mansasakit. Mipadpara, nepeg ya tulongan a tampol na saray elder so siopaman ed kongregasyon ya walay dadalanen ton irap o mankaukolay espiritual a tulong. Nayarin mankaukolan na tulong iray maedad tan mansasakit diad saray inagew-agew a pankaukolan da, balet ta mas kaukolan day espiritual a tulong tan  panamaseseg. (1 Tes. 5:14) Saray kalangweran ed kongregasyon et nayarin wala ray lalabanan dan subok, singa saray “pilalek ya inuugaw.” (2 Tim. 2:22) Kanian diad pan-shepherding na saray elder, natulongan day amin ya agagi ed kongregasyon. No ombisita ira, gagawaen day anggaay nayarian dan talosan so situasyon na saray agagi insan ira mangiter na matukoy a panamaseseg ya nibased Biblia. No niiter a tampol so tulong a kakkaukolan na saray agagi, agla onloor iray problema.

16. No mankaukolan na espiritual a tulong so sakey ya agi ed kongregasyon, antoy nayarin gawaen na saray elder?

¹⁶ Panon to no linmoor iray problema ya anggad apektado lay espiritualidad na saray agagid kongregasyon? “Wala ta ed sikayo so mansasakit?” so intepet nen Santiago ed pinuyanan a sulat to. “Patawag to komon iray mamasiken ed kongregasyon, tan sikatoy ipikasi ra, a puyokan day larak diad ngaran nen Jehova. Tan say pikakasi ya atekepan na pananisia et mamaabig ed samay mansasakit, tan sikatoy ibangon nen Jehova. Ontan met, no sikatoy akagawa na saray kasalanan, sikatoy naperdona.” (Sant. 5:14, 15) Anggano say sakey ya mansasakit ed espiritual et agto “patawag . . . iray mamasiken ed kongregasyon,” kaukolan ya tulongan dan tampol no naamtaan day situasyon to. No manpikasi iray elder kaiba iray agagi odino ipikasi da ra tan tulongan da rad saray kairapan da, napaneknekan na saray elder ya makaparepresko tan makapaseseg irad saramay walad panangasikaso ra.—Basaen so Isaias 32:1, 2.

17. No aligen na saray elder so “manunan managpastol,” antoy resulta?

¹⁷ Diad amin a gagawaen dad organisasyon nen Jehova, pansasagpotan na saray Kristianon manangasikaso ya aligen so “manunan managpastol,” si Jesu-Kristo. Lapud espiritual a tulong na sarayan responsablin lalaki, minanabang ya maong so pulok tan tuloytuloy ya ombibiskeg. On, misalsalamat itayo tan napapakiwas itayon idayew so agnaparaan ya Pastol tayo, si Jehova.