1, 2. Akin ya kasmak so panagpalikdo natan, tan anto ray uusaren na saray managpalikdo? (Nengnengen so litrato ed sayan pahina.)

KASMAK so panagloko, panagsaol, tan panagpalikdo ed mundon pambibilayan tayo. Agti la pankelawan itan. Ibabaga na Biblia ya si Satanas a Diablo et eksperton managpalikdo, tan sikato so manuuley ed mundo. (1 Tim. 2:14; 1 Juan 5:19) Legan ya manasingger so anggaan na sayan mauges a mundo, onloloor so pasnok nen Satanas lapud “antikey lay panaon to.” (Apo. 12:12) Kanian nailaloan tayo ya saramay naimpluensyaan na Diablo et magmaliw nin mas matila, tan say manunan palikdoen da et saramay manlilingkor ed si Jehova.

² No maminsan, wala ray report ed media ya mangiiter na lingon ideya o katilaan ni ingen nipaakar ed saray lingkor nen Jehova tan ed saray papanisiaan da. Uusaren da ray headlines ed dyaryo, palabas ed TV, tan Internet pian ikayat iray palson istorya. Kanian wala ray nadidismaya odino onsyosyodot lapud manisia ran tampol ed saratan ya katilaan.

3. Antoy makatulong ed sikatayon nalabanay panagpalikdo?

³ Misalsalamat itayo ta sarag tayon labanan iratan ya taktika na kalaban lapud walad sikatayoy Salita na Dios ya “mausa-usar ed . . . panangipetek ed saray bengatla.” (2 Tim. 3:16) Makaaral tayod insulat nen apostol Pablo. Imbaga ton wala ray Kristianon taga Tesalonica ya apalikdo lapud anisiaan da ray katilaan. Oniay insimbawa tod sikara: “Agkomon nawetwet a tampol so panagkatunongan yo.” (2 Tes. 2:1, 2) Anto ray naaralan tayod maaron pasakbay nen Pablo, tan panon tayon niyaplika iratan?

4. Panon ya pinasakbayan iray Kristiano ed Tesalonica nipaakar ed isabi na “agew nen Jehova,” tan panon itayon napapasakbayan?

⁴ Diad inmunan sulat nen Pablo ed kongregasyon diad Tesalonica, impaimano toy isabi na “agew nen Jehova.” Agto labay ya ag-itan naamtaan na saray agagi tan ag-ira makapanparaan. Imbes, pinaseseg to ra ya bilang “ananak na liwawa” et kaukolan day ‘mansiansian aliing tan mantultuloy ya manlikas.’ (Basaen so 1 Tesalonica 5:1-6.) Diad sikatayo balet, aalagaren tayoy kaderal na Makapanyarin Babilonia, say sankamundoan ya empiryo na palson relihyon. Satan so pakapatnagan na igapoy baleg ya agew nen Jehova. Misalsalamat itayo ta mas natatalosan tayo no panon ya susumpalen nen Jehova iray gagala to. Sakey ni, panamegley na kongregasyon et regular itayon makakaawat na saray dugarugan panonot ya makatulong ed sikatayon mantultuloy ya manlikas. No dengelen tayo iratan ya paulit-ulit a pasakbay, ombiskeg so determinasyon tayon manlingkor ed Dios tekep na ‘pakayari tayon mankatunongan.’—Roma 12:1.

5, 6. (a) Antoy imbaga nen Pablo diad komaduan sulat tod saray taga Tesalonica? (b) Antoy magano lan gawaen na Dios panamegley nen Jesus, tan anto ray kaukolan tayon itepet ed sarili tayo?

⁵ Ag-abayag, impawit nen Pablo so komaduan sulat to ed saray Kristiano ed Tesalonica. Diad satan a sulat et impaimano toy onsabin irap sano ipaakseb la na Katawan a Jesus so panangukom to ed “saramay agmikabat ed Dios tan ed saramay agmanguunor ed maong a balita.” (2 Tes. 1:6-8) Diad kapitulo 2 na satan a sulat, imbaga nen Pablo ya say arum ed kongregasyon et ‘apagaan a tampol’ ed isabi na agew nen Jehova, say amta da et onsabi lad saman a panaon. (Basaen so 2 Tesalonica 2:1, 2.) Agni masyadon natatalosan na saray Kristiano ed saman ya panaon no panon ya nasumpal so gagala nen Jehova. Inamin itan nen Pablo nen nansulat nipaakar ed saray propesiya: “Aliwan nagnap so pikakabat tayo tan aliwan nagnap so pampropropesiya tayo; balet sano onsabi la imay nagnap, naandi imay aliwan nagnap.” (1 Cor. 13:9, 10) Balet ta makatulong iray pinuyanan a pasakbay ya insulat di Pablo, apostol Pedro, tan arum nin matoor ya alanaan ed saman a panaon pian mansiansian mabiskeg so pananisia ra.

⁶ Pian nipetek so kanonotan da, pinuyanan na Dios si Pablo ya ipaliwawa a say kagawa na apostasya tan say isabi na “too na kaugsan” et antis na agew nen Jehova. * Kayari na  satan, diad inggeter na Dios a panaon, “paandien” na Katawan a Jesus so amin ya apalikdo. Impalinew nen apostol Pablo ya say rason na pangukom ed sikara et lapud “agda impatnag so panangaro ra ed katuaan.” (2 Tes. 2:3, 8-10) Kanian oniay kaukolan tayon itepet ed sarili tayo: ‘Panon kabaleg so panangarok ed katuaan? Kasin aaralen ko iyan magasin tan arum ni ran publikasyon ya itataryad saray totoo na Dios ed interon dalin pian naamtaan ko ray sankabaloan ya pakatalos tayo ed saray bangat na Biblia?’

7, 8. (a) Anto ran kapeligroan so inarap na saray Kristiano nensaman? (b) Anto so mamepeligron maong ed saray tuan Kristiano natan?

⁷ Aliwa labat ya saray apostata tan saray bangat da so mamepeligro ed saray Kristiano. Insulat nen Pablo ed si Timoteo ya “say panangaro ed kuarta et lamot na amin a makaderal a bengatla.” Imbaga to ya “diad pampipirawat na arum ed saya et abalang ira ed pananisia tan sinasaksak day inkasikara na dakel ya ot-ot.” (1 Tim. 6:10) Naynay met ya mapeligro “iray gawa na laman.”—Gal. 5:19-21.

⁸ Balet, angiter na mabiskeg a pasakbay si Pablo ed saray taga Tesalonica nipaakar ed saramay tatawagen ton “palson apostoles.” Arum ed sikaray mansasalita na “pikewet iran bengatla pian tangguyoren iray disipulo ya ontumbok ed sikara.” (2 Cor. 11:4, 13; Gawa 20:30) Kinomendaan nen Jesus so kongregasyon ed Efeso lapud agda inawat iray “mauges a totoo.” Apaneknekan da met ya saraman ya totoo et palso iran apostol tan matitila. (Apo. 2:2) Diad komaduan sulat nen Pablo ed saray taga Tesalonica, oniay insimbawa to: “Natan et igaganggan mi kayo, agagi, diad ngaran na Katawan a Jesu-Kristo, ya arawian yo so balang agi ya aliway kagagawa to.” Insan to binitla iray Kristianon ‘agda labay so mankimey.’ (2 Tes. 3:6, 10) No saraman et ipapasen ya aliway kagagawa ra, di mas lalod saramay magmamaliw lan apostata! On, say piulop ed saray onman ya totoo nensaman et mapeligron maong tan kaukolan ya paliisan. Tua met itan ed sikatayo natan.—Uli. 13:20.

9. Akin ya kaukolan tayoy manalwar no walay mangibagay sarili ton espikulasyon odino mankritiko ed arum?

⁹ Asingsingger lay baleg ya irap tan say anggaan na sayan mauges a mundo, kanian mas importante ed sikatayo natan iramay pasakbay ya inter nen Jehova nen inmunan siglo. Agtayo labay ya “lingwanan so gagala” na agnaparaan a kaabigan nen Jehova tan naandi so ilalo tayon manbilay ya andi-angga, balanglan dimad tawen o diad dalin. (2 Cor. 6:1) Kaukolan tayoy manalwar ed siopaman ya onaatendid saray pantitipon tayo ya managyat ed sikatayon pantongtongan iray sarilin espikulasyon ed saray bengatlan ag-ipapaliwawa na Biblia o mibiang ed tongtongan pian kritikoen iray elder tan arum ya manlilingkor ed Dios.—2 Tes. 3:13-15.

10. Anto ran bangat so nipaseseg ya tumboken na saray Kristiano ed Tesalonica?

¹⁰ Pinaseseg nen Pablo iray agagi ed Tesalonica ya ‘ontalindeg ira’ tan mansiansia rad saray naaralan da. (Basaen so 2 Tesalonica 2:15.) Anto ray ‘imbangat la ed sikara’? Seguradon aliwan saramay bangat na palson relihyon. Imbes, say tutukoyen nen Pablo et saray imbangat nen Jesus tan ed saray impaisulat na Dios ed si Pablo tan ed arum, ya maslak ed saratan et nagmaliw a kabiangay pinuyanan a Kasulatan. Kinomendaan nen Pablo iray agagid kongregasyon ed Corinto lapud sayan rason ya kabiangay sulat to: “Nononoten yo ak diad amin a bengatla tan maapit yon uunoren iray bangat a  singa nen inyawat ko iratan ed sikayo.” (1 Cor. 11:2) Say nanlapuan na saratan ya bangat et napanmatalkan kanian napanisiaan tayo.

11. Diad anto ran paraan ya napapalikdo so arum?

¹¹ Diad sulat nen Pablo ed saray Hebreo, impaimano toy duaran paraan a nayarin naderal so pananisia na sakey a Kristiano tan agmakapanmatoor ed si Jehova. (Basaen so Hebreos 2:1; 3:12.) Tinukoy toy salitan “niyarawi” tan “iyaarawi.” Say sakey ya baloto et nayarin niyarawi ed gilig na ilog ya agnaim-imano ed gapo, ya anggad arawdawi la. Balet say sakey ya toon itutulak toy baloto to et gagagalaen ton paarawien ed gilig na ilog so baloto to. Parehon ipapanengneng na saratan ya alimbawa no antoy nagawad sakey ya aabuloyan toy sarili ton napalikdo tan papaulyanan ton onkapuy so talek tod katuaan.

12. Anto ray nayarin mangapektad espiritualidad tayo?

¹² Nayarin ontan so kipapasen na arum ed saray taga Tesalonica. Diad sikatayo ey? Amayamay so nayarin mangupot na panaon tayo. Isipen pa so karakel na oras ya uusaren ed saray social network, pambasa tan pangebat ed saray text odino e-mail, panagrelaks, odino pansubaybay ed saray isports. Nayarin abalaen na anggan sakey ed saratan so sakey a Kristiano tan nabawasay seseg tod panaglingkor. Antoy resulta? Nayarin naapektoay impapuson panagpikasi to, panagaral tod Salita na Dios, pipiaral, tan pibibiang tod panagpulong. Antoy nagawaan tayo pian agmain-inomay ya nawetwet so panagkatunongan tayo?

13. Singa nipropesiya, antoy ugali na dakel a totoo, tan antoy makatulong ed sikatayon naprotektaay pananisia tayo?

¹³ Importante ya agtayon balot lilingwanan ya asingsingger lay anggaan na mundo nen Satanas, kanian mapeligron maong so piulop ed saray totoon agmanisia ya manbibilay tayo lad “kaunoran iran agew.” Oniay insulat nen apostol Pedro nipaakar ed panaon tayo: “Wala ray managbalaw tan manbalaw ira, a tumboken da iray dilin pilalek da tan ibaga ran: ‘Kawalaan la na samay insipan a kiwawala to? Abayag lan inaatey iray inmuunan atateng mi, balet pareho nin siansia so amin a bengatla manlapu la nen apalsa so mundo.’” (2 Ped. 3:3, 4) Makatulong so regular a pambasa tan panaral ed Salita na Dios pian agtayo nalingwanan ya manbibilay itayo lad “kaunoran iran agew.” Abayag lan ginmapo so nipropesiyan apostasya tan wala ni anggad natan. Agni naandi so “too na kaugsan” tan siansia nin aatakien to ray lingkor na Dios. Kanian, kaukolan tayoy mansiansian akabantay parad asingsingger lan agew nen Jehova.—Sof. 1:7.

14. Akin ya proteksion so pansiansian busy ed panaglingkor ed Dios?

¹⁴ Say sakey nin apaneknekan lan paraan ya makatulong pian mansiansia itayon alerto tan agnawetwet so panagkatunongan tayo et say regular ya pangipulong ed maong a balita. Kanian nen ingganggan nen Kristo Jesus, say Ulo na kongregasyon, iray papatumbok to ya manggaway disipulo ed amin a nasyones tan ibangat iran mangunor ed amin a bengatlan imbangat to, sikatoy mangiiter na simbawan manprotekta ed saray papatumbok to. (Mat. 28:19, 20) Pian natulok tayo itan ya ingganggan to, kaukolan ya maseseg tayod panagpulong. Kasin naimadyin mo ray agagid Tesalonica ya kontento lad paspasaray ya panagpulong pian nibaga labat ya gagawaen day kakaukolanen ed sikara? Tandaan iyan imbaga nen Pablo ed sikara: “Agyo eerepen so apoy na espiritu.  Agyo mumudmoraen iray panagpropesiya.” (1 Tes. 5:19, 20) On, talagan makapaliket iray propesiyan aaralen tan inanabang tayod arum!

15. Anto ray sarag tayon gawaen ya parte na panagdayew na pamilya?

¹⁵ Siempre, labay tayon tulongan iray kapamilyaan tayon paaligwasey abilidad da ed lawak na kimeyan. Asali la na dakel so sakey ya epektibon paraan pian nagawaan itan. Gagawaen dan sakey a parte na panagdayew na pamilya ra so pampraktis parad ministeryo. Nayarin makatulong no pantongtongan na pamilya no panon dan pawilen iramay angipanengneng na interes. Antoy ibaga rad onsublay ya ibisita ra? Anto ran topic so posiblin mangarum ed interes na saray papawilen? Kapigan so sankaabigan ya ibisita? Uusaren met na dakel so arum ya oras ed panagdayew na pamilya ra pian iparaan iray aaralen ed kongregasyon. Wala ni kasi nagawaan yo pian mas akaparaan kayon mibiang? No mibibiang kayod saray aral, ombiskeg so pananisia yo tan makatulong itan pian agnawetwet so panagkatunongan yo. (Sal. 35:18) Talagan proteksion so panagdayew na pamilya pian ag-itayo man-imbentoy sarilin espikulasyon tayo tan ag-itayo manduaruwa.

16. Antoy mamapakiwas ed saray alanaan ya ag-abuloyan a nawetwet so panagkatunongan da?

¹⁶ No dalepdepen tayoy pangiiter nen Jehova ed saray totoo to na mas malinew a pakatalos ed saray propesiyad Biblia diad ilalabas na panaon, lalo tayon naapresyay marakdakep ya bendisyon ya iter tod arapen. Saray alanaan et walay ilalo dan nakaibay Kristo dimad tawen. Seguradon satan so mamapakiwas ed sikaran ag-abuloyan a nawetwet so panagkatunongan da! Oniay insulat nen Pablo ed saray taga Tesalonica ya onaplika met ed saray alanaan natan: ‘Nepeg kamin misalamat a naynay ed Dios nipaakar ed sikayo, agagin inad-aro nen Jehova, ta pinili kayo na Dios diad impamasanto to ed sikayo ed panamegley na espiritu tan lapud pananisia yo ed katuaan.’—2 Tes. 2:13.

17. Panon kan apaseseg ed saray akasulat diad 2 Tesalonica 3:1-5?

¹⁷ Saramay maniilalon manbilay na andi-angga diad dalin et kaukolan da met ya gawaey anggaay nayarian dan ag-abuloyan a nawetwet so panagkatunongan da. No diad dalin so ilalom, ipapusom so maaron panamaseseg ya insulat nen Pablo ed saray kapara ton alanaan ed Tesalonica. (Basaen so 2 Tesalonica 3:1-5.) Nepeg ya apresyaen na balang sakey ed sikatayo iraman ya maaron balikas. On, saray sulat parad saray taga Tesalonica et nankarga na saray importantin pasakbay nipaakar ed sarilin espikulasyon tan panisiad kuestionable iran ideya. Asingsingger lan mangangga so panaon ya pambibilayan tayo, kanian pisalsalamatan tayo iratan ya pasakbay.