Binasam ta iray agano nin isyu na Say Panag-bantayan tan The Watchtower? Salim pa sirin ya ebatan irayan tepet:

Kapigan ‘nampulong si Jesus ed saray niprison espiritu’? (1 Ped. 3:19)

Posible ya inyabawag nen Jesus ed saray mauges ya anghel so manepeg a dusa ra kayari na inkioli to.—6/15, pahina 23.

Anto ray taloran pakasubokan na pangasawa o piasawan pidua?

Nia ra: aliwan mainomay ya lingwanan so inmunan impangasawa o impiasawam; pilimog ed saray datin kakaaro ya agpamilyar ed komaduan asawam; panmatalek ed balon kapareham anggano agnanmatoor so unonan asawam.—7/1-E, pahina 9-10.

Kapigan so pangukom nen Jesus ed saray totoo no kasin karnero ira o kanding? (Mat. 25:32)

Nagawa itan sano sikatoy onsabi pian ukomen so totoo legan na baleg a kairapan, kayarin naderal so palson relihyon.—7/15, pahina 6.

Kapigan mannangis tan manngalatenget so ngipen na saramay manggagaway kaugsan ya abitlad parabolo na trigo tan sisanyas? (Mat. 13:36, 41, 42)

Nagawa itan legan na baleg ya irap sano namoria dan ag-ira makaliktar.—7/15, pahina 13.

Kapigan asumpal iramay imbaga nen Jesus nipaakar ed matoor tan makabat ya aripen? (Mat. 24:45-47)

Ginmapon asumpal iratan, aliwan nen Pentecostes 33 C.E., noagta kayari 1914. Nen 1919, aturo iyan aripen a mangasikasod saray lingkor na sankaabungan, ya ontutukoy ed amin a Kristiano ya papakanen ed espiritual.—7/15, pahina 21-23.

Kapigan turoen nen Jesus so matoor ya aripen ya mangasikaso ed amin a kayarian to?

Nagawa itan diad arapen legay baleg a kairapan, sano sayan aripen et wala lad tawen ya miuley ed si Jesus.—7/15, pahina 25.

Kasin saramay karakter ed Biblia ya ag-abitlay ngaran da et nibaga tayon mauges odino aliwan importante?

Andi met. Arum ed saray karakter ya ag-abitlay ngaran da et maong tan say arum et mauges. (Rut 4:1-3; Mat. 26:18) Diad Biblia, duara labat ed saray matoor ya anghel so abitlay ngaran da.—8/1-E, pahina 10.

Likud ed pakayari ya inter na Dios ed sikara, antoy tinmulong ed 230 ya Tasi pian nasungdoan day andukey ya impan-akar da manlapud panamairapan a kampo na Sachsenhausen?

Anggano kinmakkapuy ira lapud eras tan sakit, pinaseseg dan lanang so sakey tan sakey ya ag-onsuko.—8/15, pahina 18.

Akin et makapaseseg imay salaysay nipaakar ed imbaliw na saray Israelita ed Ilog Jordan paonlad Insipan a Dalin?

Anggano araldalem so ilog, pinatunda nen Jehova so iyaagus to pian makabaliw iray totoo to. Seguradon lapud satan et binmiskeg so pananisia tan talek dad sikato, tan anggan sikatayo et napaseseg ed satan a salaysay.—9/15, pahina 16.

Antoy papaneknekan na mabetbet ya impamitlad Biblia na nanduruman kolor?

Paneknek itan ya amta nen Jehova ya apektaen na kolor so emosyon tayo tan ontulong itan pian nanonotan tayo iray bengatla.—10/1-E, pahina 14-15.

Panon ya nasusumpal natan imay propesiya ed Miqueas 5:5 nipaakar ed saray pastol tan manunaan a lalaki?

Atalosan tayo ya saramay ‘pitoran pastol tan manunaan a lalaki’ ya abitlad Miqueas 5:5 et ontutukoy ed saray aturon elder ed kongregasyon, ya mamapabiskeg ed totoo na Dios pian nasarag da so iyatakid sikara ya nagawad arapen.—11/15, pahina 20.

Anto ray pigaran rason akin et kaukolan tayoy Dios?

Kaukolan tayoy panangigiya tan ebat ed saray tepet tayo nipaakar ed bilay, ya parehon labay ya iter na Dios ed sikatayo. Tulongan to itayo pian marakep tan maliket so bilay tayo. Pian magmaliw itan ya posible, tooren to iray sipan to ya nabasad Salita to.—12/1-E, pahina 4-6.