NILAKALAKAP na pobrin balo so anak to, say alenleneg ya anak to. Agmakapanisia! Nen niman labat et walad akwalan to so bangkay na ugaw. Natan et sankanengneng toy apaolin anak to tan naliliketan a maong ed imis to. ‘Nengneng mo,’ so kuan na bisitan miaayam ed sikara, “say anak mo mabilay.”

Agawa itan ngalngali 3,000 taon lay apalabas. Nabasa itan diad 1 Arari kapitulo 17. Samay bisita et say propeta na Dios ya si Elias. Siopa may ina ey? Sikatoy sakey ya balo a taga baley na Zarepat, balet ag-abitlad Biblia so ngaran to. Say inkioli na anak to et sakey ed saray agawad bilay ton amabiskeg ed pananisia to. Nengnengen tayo no antoy naaralan tayod sayan bii.

Nandesisyon si Jehova ya mabayag ya agto pauranen ed panarian na mauges ya Ari na Israel ya si Ahab. Kayari itan ya inyabawag nen Elias, sikatoy inyamot na Dios pian agnaanap nen Ahab tan tinagano to so propeta na tinapay tan karne panamegley na saray wawak. Insan oniay imbaga nen Jehova ed si Elias: ‘Onalagey ka, onla ka ed Zarepat, a kabiangan na Sidon, tan manayam kad man. Nia, ingganggan ko so sakey a balo a bii a taganoen to ka.’—1 Ara. 17:1-9.

Kasabi nen Elias ed Zarepat, walay anengneng ton pobrin balo ya mankiekiew. Sikato la kasi imay biin managano ed propeta? Panon ton gawaen itan anta mairap met so bilay to? Nayarin manduaruwa si Elias, balet kinatongtong to nin siansia imay bii. Inkuan to: “Iyalaan mo ak, pikasik ed sika, na daiset a danum dia ed sakey a birong, pian oninum ak.” Nen linma imay bii ya mangalay danum, kinerew ni nen Elias: “Iyakaran mo ak, pikasik ed sika na sankakamot a tinapay.” (1 Ara. 17:10, 11) Mainomay komon no danum  labat so kekerewen na sayan laki, balet ta problema na balo no iner so pangalaan toy tinapay ya iter to.

Onia so ebat na balo: ‘Unong a si Jehova a Dios mo mabilay, andian ak na tinapay, noag sankaakop labat a tapong diad kamaw, tan daiset a larak dia ed salongkit. Et nia mangala ak na duaran kiew, pian onla ak tan sikato so itadiak nipaakar ed siak tan say anak ko, pian sikato so kanen mi, insan ompatey kami la.’ (1 Ara. 17:12) Nengnengen tayo no anto ray naaralan tayod sayan impantongtong da.

Amta na balo ya si Elias et sakey ya Israelitan matakot ed Dios. Napatnagan itan ed samay imbaga to ya ‘unong a si Jehova a Dios mo mabilay.’ Balet anggano kabat to so Dios na Israel, agto tinawag si Jehova ya “Dios ko.” Sikatoy manaayam ed Zarepat, sakey a baley ya “kabiangan” odino mandedepende ed syudad na Fenicia ya Sidon. Posiblin saray manaayam ditan et mandadayew ed si Baal. Anggaman ontan, walay anengneng nen Jehova ya espisyal ed sayan balo.

Walay pananisia to anggano saray kabaleyan to et mandadayew ed talintao. Imbaki nen Jehova si Elias ed sikato parad pankaabigan dan dua. Walay naaralan tayon importantin leksion ed satan.

Aliwan amin ya taga Zarepat ya mandadayew ed si Baal et talagan mauges. Diad impangibaki nen Jehova ed si Elias ed sayan balo, nanengneng tayo ya iimanoen To iray maong ya totoo ya agni manlilingkor ed Sikato. On, “diad balang nasyon et makapaliket ed [Dios] so toon ontatakot ed sikato tan manggagawa na inkatunong.”—Gawa 10:35.

Wala kasi ray totood teritorya yo a singa samay balo a taga Zarepat? Anggano apaliberan ira na totoon manisiad palson relihyon, nayarin nalilikna ran walay kulang ed bilay da. Anganko et dagdaiset o anggapo ni ingey amta ra nipaakar ed si Jehova. Kanian kaukolan day tulong tayo pian naamtaan day katuaan. Kasin aanapen tan tutulongan mo iratan ya indibidual?

Isipen pan maong so pagagawa nen Elias ed samay balo. Kakkapangibaga to ni labat ya kayari ton iparaan so kanen dan sanina, mangan ira insan la ra ompatey. Balet antoy imbaga nen Elias? ‘Agka ontatakot. Onla ka tan gawaen mo so singa inkuan mo; balet igawaan mo ak nin unona na melag a tinapay, tan iter mo ed siak, tan insan manggawa ka na parad sika tan ed anak mo. Ta onia so kuan nen Jehova, a Dios na Israel, Say kamaw na tapong agnabawasan, anggan say salongkit na larak ag-onkulang, anggad agew a si Jehova mangibaki na uran ed dalin.’—1 Ara. 17:11-14.

‘Iter mi sankaunoran lan kanen mi? Manlulurey ka amo,’ so nayarin ibaga na arum. Balet aliwan ontan so reaksion na samay balo. Anggano dagdaiset so amta to nipaakar ed si Jehova, anisia ed si Elias tan ginawa to so kekerewen na propeta. Talagan baleg itan a subok ed pananisia to—tan ag-alingolingo ed desisyon to!

Agpinaulyan na Dios so balo. Unong ya insipan nen Elias, pinarakel nen Jehova so dagdaiset ya abasto ra kanian agbalot naerasan si Elias, say balo, tan say anak to anggad impelag lamet na uran. On, ‘say kamaw na tapong et agnaupotan, anggan say salongkit na larak agkinmulang, unong a sinalita nen Jehova panamegley nen Elias.’ (1 Ara. 17:16;  18:1) No ag-inter na sayan balo imay kekerewen nen Elias, ompan amay tinapay ya ginawa to manlapud dagdaiset ya tapong tan larak so sankaunoran lan naakan dan sanina. Balet lapud pananisia tan talek tod si Jehova, pinakan to nin unona si Elias.

Naaralan tayod saya ya bebendisyonan na Dios iramay onkikiwas tekep na pananisia. Sano nasusubok so katooran mo tan ipapanengneng moy pananisia, tulongan ka nen Jehova. Sikato so magmaliw ya Manangitarya, Managprotekta, tan Kaaro pian natulongan to kan nasarag iray problemam.—Exo. 3:13-15.

Nen 1898, oniay imbaga na Zion’s Watch Tower ya naaralan tayod istorya na sayan balo: “No sayan bii et tinmulok lapud pananisia, makanepegan ya tulongan na Katawan panamegley na Propeta; no anggapoy pananisia to, sananey lagin balo so napili. Ontan met sirin ed sikatayo—diad nanduruman parte bilay tayo, aliling to et awiten itayo na Katawan diad pasen ya ditan et salien toy pananisia tayo. No ipatnag tayoy pananisia, makaawat tayoy bendisyon; no agtayo ipatnag so pananisia, anggapoy bendisyon.”

No wala ray dadalanen tayon subok, kaukolan ya paigiya tayod Kasulatan tan ed saray publikasyon tayon nibase ed Biblia. Tan nepeg tayon unoren so panangigiya nen Jehova anggan panon kairap. On, nabendisyonan itayo no unoren tayo iyan makabat ya proverbio: “Manmatalek ka ed Jehova ed simoon a pusom, tan agka onsaral ed tapew na dili a pakatalos mo. Dia ed saray amin a dalan mo sikato so bidbiren mo, et sikato itonton to so saray basbas mo.”—Uli. 3:5, 6.

Wala lamet so nagawan pakasubokay pananisia na sayan balo. “Kayari saraya a bengatla,” so kuan na Biblia, “say anak na bii, ya akankien ed abung, abeblayan; et say sakit to sikato so makapasinagem, ya anggapo so linawa ya atilak ed sikato.” Lapud ag-amta na balo so rason no akin ya ontay agawa, oniay maer-ermen ya imbaga tod si Elias: ‘Anto so pibiangan ko ed sika, O sika ya too na Dios? Linma ka ed siak pian ipanonot mo so kasalanan ko, tan pian pateyen mo so anako?’ (1 Ara. 17:17, 18) Antoy labay ton ibagad saratan ya ansakit ya salita?

Wala kasi anonotan ton agawaan ton kasalanan ya pakakakonsiensiaan to? Inisip to kasi ya say impatey na anak to et dusa na Dios, tan si Elias et mensahero na Dios ya mangawit na patey? Anggapoy ibabaga na Biblia, balet nia so segurado: Agto tinetel so Dios.

Anganko et abigbiglay Elias nen inatey may anak na balo tan ed iisipen na ina a say inyakar to diman so rason ed sayan agawa. Inawit nen Elias so bangkay na ugaw diad kuarto ed tagey insan nampikasi: ‘O Jehova a Dios ko, inyakar mo met so mauges ed balo a dinawesan ko, diad impangiyabuloy mon ompatey so anak to?’ Agnitepel na propeta ya nabalaw so ngaran na Dios no abuloyan Ton naarumay paniirap na sayan maomaong tan maparawes ya bii. Kanian akikasi si Elias: “O Jehova a Dios ko, pikasik ed sika, iyabuloy mo a say kamarerwa na sayan ugaw ompawil komon ed sikato.”—1 Ara. 17:20, 21.

Dinengel nen Jehova so pikakasi nen Elias. Pinarawes na balo so propeta to tan impatnag toy pananisia. Mapatnag ya inyabuloy na Dios ya ompatey imay ugaw lapud sakit ta amta Ton walay nagawan kioli—say sankaunaan ya akarekord ed Kasulatan—a mangiter na ilalo ed saray onsublay ya henerasyon. Kanian nen nampikasi Elias, pinaoli nen Jehova so ugaw. Imadyin mo pay liket na balo nen imbaga nen Elias ya: ‘Nengneng mo, say anak mo mabilay’! Kanian imbaga na balo ed si Elias: ‘Natan amtak a sika so too na Dios, tan say salita nen Jehova dia ed sangim sikato so tua.’—1 Ara. 17:22-24.

Anggapo lay arum ya nabasad 1 Arari kapitulo 17 nipaakar ed sayan bii. Balet lapud positibo so imbaga nen Jesus nipaakar ed sikato, nibagan sikatoy matoor ya nanlingkor ed si Jehova anggad impatey to. (Luc. 4:25, 26) Naaralan tayod istorya to ya bebendisyonan na Dios iramay manggagaway kamaongan ed saray lingkor to. (Mat. 25:34-40) Paneknek itan ya aasikasoen na Dios iray matoor anggan diad saray mairap ya situasyon. (Mat. 6:25-34) Nanengneng met ed sayan salaysay ya pipilaleken tan sarasarag nen Jehova ya paolien iray inaatey. (Gawa 24:15) On, maabig irayan rason ya nodnonoten tayo so balo a taga Zarepat.