1, 2. Akin et nepeg ya interesado itayo ed Salmo 45?

MIGUERRA so sakey ya maglorian ari nisengeg ed katuaan tan inkatunong tan taloen to ray kalaban to. Kayari sigpot ya panalo to, ikasal toy magangganan nobya to. Sayan ari et nodnonoten tan itandoro na amin ya onsabin henerasyon. Atan so manunan tema na Salmo 45.

² Balet say koma 45 ya Salmo et aliwa labat ya balibalin istorya ya maliket so sampot to. Importante ed sikatayo iray ebento ya adeskribe ditan ta apektaen day mismon bilay tayo natan, tan say arapen tayo. Aralen tayo sirin ya maong iyan salmo.

3, 4. (a) Anton “maong a pamaakaran” so insulat na salmista, tan antoy epekto na satan ed puso tayo? (b) Akin ya nibagan ‘saray sasalitaen tayo et nipaakar ed ari,’ tan panon ya nagmaliw a singa panagsulat so dila tayo?

³ Basaen so Salmo 45:1. Walay “maong a pamaakaran” nipaakar ed sakey ya ari ya anenyeg ed puso na salmista kanian ‘manleppua’ itan. Say Hebreon salita ya nipatalos a ‘manleppua’ et mankabaliksay “manbabwak,” odino “manlelwag.” Aliling to et manlelwag so puso na salmista lapud ligsa tan say dila to et nagmaliw ya singa “pluma” o panagsulat.

 ⁴ Sikatayo ey? Say maong a balita na Mesianikon Panarian et “maong a pamaakaran” ya manetenyeg ed puso tayo. Say mensahe na Panarian et lalon nagmaliw ya “maong” nen 1914. Manlapu lad saman, satan ya mensahe et aliwa lan nipaakar ed onsabin Panarian noagta nipaakar ed tuan gobierno ya manuuley la natan ed tawen. Saya so “maong a balita na panarian” ya ipupulong tayod “interon dalin bilang pantasi ed amin a nasyones.” (Mat. 24:14) Kasin ‘manleppua’ so kapusoan tayo lapud mensahe na Panarian? Kasin maseseg tayon ipupulong so maong a balita na Panarian? Singa say salmista, ‘saray sasalitaen tayo et nipaakar ed ari’—say Ari tayon si Jesu-Kristo. Sikato so iyaabawag tayon nitronon Ari na Mesianikon Panarian. Ontan met, iimbitaan tayo so amin—saray manuley tan saray uuleyan da—ya manpasakop ed uley to. (Sal. 2:1, 2, 4-12) Tan say dila tayo et nagmaliw ya singa panagsulat ta uusaren tayon maong so Biblia diad panagpulong.

5. (a) Anto ray rason akin et nibagan guapo si Jesus? (b) Akin a nibagan ‘nikalbo so grasya manlapud bibil na Ari,’ tan panon tayon naalig so alimbawa to?

⁵ Basaen so Salmo 45:2. Dagdaiset labat so ibabagay Kasulatan nipaakar ed itsura nen Jesus. Seguradon sikatoy “marakdakep” o guapo ta perpekto. Balet, say manunan rason ya sikatoy nibagan guapo et lapud matoor ed si Jehova tan agbalot sinmaew so integridad to. Ontan met, impulong nen Jesus so mensahe na Panarian diad “makapasagyat” a paraan. (Luc. 4:22; Juan 7:46) Kasin gagawaen tayoy anggaay nayarian tayon aligey alimbawa to diad panagpulong, tan manguusar tayo ray salitan mamakiwas ed puso na totoo?—Col. 4:6.

6. Panon ya si Jesus et benendisyonan nen Jehova “lawas”?

⁶ Lapud interon puson debosyon nen Jesus, sikatoy benendisyonan nen Jehova legan na ministeryo to diad dalin tan tinumangan To kayari impangisakripisyo tod bilay to. Insulat nen apostol Pablo: “Sanen [si Jesus et] walad kipapasen na sakey a too, sikatoy nampaabeba tan nagmaliw a matulok anggad ipapatey, on, ipapatey ed panamairapan a kiew. Lapud saya met, sikatoy intandoro na Dios ed mas atagey a posisyon tan maaron inikdan to na ngaran ya atagey nen say arum niran ngaran, ta pian diad ngaran nen Jesus so talimukoran na amin na saramay walad tawen tan saramay walad dalin tan saramay walad dalem na dalin, tan bidbiren na amin a si Jesu-Kristo so Katawan diad kigloriaan na Dios ya Ama tayo.” (Fil. 2:8-11) Si Jesus et benendisyonan nen Jehova “lawas” sanen sikatoy pinaoli to diad imortal a bilay.—Roma 6:9.

7. Diad anto ran paraan ya say impanlana na Dios ed si Jesus et mas niyatagey nen ‘saray kaiba’ to?

⁷ Basaen so Salmo 45:6, 7. Inad-aron maong nen Jesus so inkatunong tan kabusol toy antokaman ya agmamapagalang ed Ama to, kanian sikato so nilanaan nen Jehova bilang Ari na Mesianikon Panarian. Si Jesus et nilanaan na “larak na inkaliket” tan mas ‘niyatagey nen saray kaiba to,’ saray ari na Juda ya nanlapud poli nen David. Akin et ontay nibaga tayo? Unona, si Jehova a mismo so nanlana ed si Jesus. Sakey ni, sikatoy nilanaan nen Jehova bilang  Ari tan Atagey a Saserdote. (Sal. 2:2; Heb. 5:5, 6) Ontan met, si Jesus et nilanaan na masanton espiritu, tan say uley to et aliwan diad dalin noagta diad tawen.

8. Akin et nibagan legal so autoridad nen Jesus, tan akin ya segurado tayon matunong so panarian to?

⁸ Introno nen Jehova so Anak to bilang Mesianikon Ari ed tawen nen 1914. ‘Say setro na panarian to et sakey a maptek a setro,’ kanian segurado ya matunong tan patas so uley to. Legal so autoridad ya walad sikato ta si Jehova so angiletneg na panarian to. Ontan met, say trono nen Jesus et mansiansia ed “ando lan ando.” Agta maliket kan manlingkor ed si Jehova tan ed makapanyarin Ari ya pinili to?

9, 10. (a) Kapigan imbalkes na Kristo so espada to, tan panon to itan ya inusar a tampol? (b) Panon nin usaren na Kristo so espada to?

⁹ Basaen so Salmo 45:3. Ingganggan nen Jehova so Ari ya ‘ibalkes so espada to ed awak to.’ On, inikdan toy autoridad si Jesus ya miguerra ed amin ya onsusumpad soberanya na Dios tan ipaakseb so panangukom Tod sikara. (Sal. 110:2) Lapud say Kristo et agnatalon Sundalon-Ari, sikatoy tinawag ya ‘makapanyari.’ Imbalkes toy espada to nen 1914 tan tinalo toy Satanas tan saray demonyo, tan imbasileng to rad dalin.—Apo. 12:7-9.

¹⁰ Gapo ni labat itan na panalo na Ari. ‘Sumpalen to ni panatalo to.’ (Apo. 6:2) Kaukolan nin ipaakseb so panangukom nen Jehova ed amin ya kabiangan na sistema nen Satanas diad dalin, tan kaukolan ya ekalen so impluensya nen Satanas tan saray demonyo to. Say unonan naderal et say Makapanyarin Babilonia, say sankamundoan ya empiryo na palson relihyon. Usaren nen Jehova iray lider na politika pian deralen iyan mauges a “balangkantis.” (Apo. 17:16, 17) Kayari to, isublay na Sundalon-Ari ya deralen so politikal ya sistema nen Satanas. Insan lad satan sumpalen na Kristo, say tinawag ya “anghel na kaaralman,” so panatalo to diad pangibasileng tod si Satanas tan saray demonyo to diad kaaralman. (Apo. 9:1, 11; 20:1-3) Nengnengen tayo no panon ya impropesiya na Salmo 45 irayan maaksion ya ebento.

11. Panon ya miguerra so Kristo “nisengeg ed katuaan”?

¹¹ Basaen so Salmo 45:4. Say piguerra na Sundalon-Ari et aliwan pian manamsam na teritorya tan pairapen iray totoo. Matunong tan maabig so gagala to. Sikatoy miguerra “nisengeg ed katuaan tan kauyamoan tan inkatunong.” Say sankamanunaan ya katuaan a kaukolan ton idepensa et say inkasoberano nen Jehova. Nen nanrebelde si Satanas, kinuestion toy kanepegan nen Jehova a manuley. Manlapu lad saman, kukuestionen met la itan na saray demonyo tan totoo. Sinmabi lay panaon ya miguerra so nilanaan ya Ari nen Jehova pian maminpinsan ton paneknekan so katuaan ya si Jehova so makanepegan ya manuley.

12. Panon ya miguerra so Ari ‘nisengeg ed kauyamoan’?

¹² Miguerra met so Ari ‘nisengeg ed kauyamoan.’ Bilang say bogbogtong ya Anak na Dios, sikatoy marakep ya alimbawa na inkamapaabeba tan matoor ya panagpasakop ed inkasoberano na Ama to. (Isa. 50:4, 5; Juan 5:19) Amin ya matoor a sakop na Ari et ontutumbok ed alimbawa to tan mapaabeban manpapasakop ed soberanya nen Jehova diad amin a bengatla. Sikara labat so naabuloyan ya manbilay diad balon mundo na Dios.—Zac. 14:16, 17.

13. Panon ya makpel a miguerra so Kristo ‘nisengeg ed inkatunong’?

¹³ Makpel met a miguerra so Kristo  ‘nisengeg ed inkatunong.’ Say inkatunong ya idedepensa na Ari et say “inkatunong na Dios”—saray estandarte nen Jehova ed no antoy duga tan aliwa. (Roma 3:21; Deu. 32:4) Oniay impropesiya nen Isaias nipaakar ed Arin Jesu-Kristo: “Sakey ya Ari so man-ari naani ed kaptekan.” (Isa. 32:1) Say uley nen Jesus so mangipagamor na insipan ya “balon katawenan” tan “balon dalin,” a ditan et “manayam so inkatunong.” (2 Ped. 3:13) Amin ya manayam ed satan a balon mundo et kaukolan ya ontulok ed saray estandarte nen Jehova.—Isa. 11:1-5.

14. Panon ya say kawanan a lima na Kristo et manggawa na ‘saray bengatlan makapakebbiew’? (Nengnengen so litratod gapo na sayan artikulo.)

¹⁴ Akabalkes lay espada ed awak na Ari. (Sal. 45:3) Balet onsabi panaon ya usaren to la itan ya espada panamegley na kawanan a lima to. Impropesiya na salmista: “Say limam a kawanan ibangat to ka ed saray bengatla a makakebbiew.” (Sal. 45:4) Sano miguerra lay Jesus diad Armagedon pian ipaakseb so panangukom nen Jehova, sikatoy manggawa na ‘saray bengatlan makapakebbiew’ ed saray kalaban to. Agtayo amta no antoy usaren ton paraan diad paneral tod sistema nen Satanas. Balet seguradon pansengegan itan na takot ed puso na saray totoon agtinmulok ed pasakbay na Dios tan agnampasakop ed uley na Kristo. (Basaen so Salmo 2:11, 12.) Diad samay propesiya nen Jesus nipaakar ed panaon na anggaan, imbaga ton saray totoo et “onkapuy lapud takot tan pantatalaran da ed saray nagawa diad dalin; lapud nayegyeg iray pakayari na katawenan.” Inyarum to: “Insan nanengneng da so Anak na too ya onsasabi a walad sakey a lurem tekep na pakapanyari tan baleg a gloria.”—Luc. 21:26, 27.

15, 16. Siopa ray kaibad ‘saray armada’ ya milad Kristo diad guerra?

¹⁵ No nipaakar ed pangiyanunsio ed isabi na Ari “tekep na pakapanyari tan baleg a gloria” pian ipaakseb so panangukom, oniay nabasad libro na Apocalipsis: “Anengneng kon alukasan so tawen, tan nia! sakey ya amputin kabayo. Tan samay akakabayo ed satan et tatawagen a Matoor tan Matua, tan sikato so mangukom tan milaban unong ed inkatunong. Ontan met, ontutumbok ed sikato iray armada ed tawen ya akalugan ira ed saray amputin kabayo, tan akakawes ira na amputi, malinis, tan pinon lienzo. Tan diad sangi to et ompapaway so makdem tan andukey ya espada, pian kabilen to iray nasyon diad panamegley na satan, tan pastolan to ra diad panamegley na balatyang a baston. Igatin-gatin to met so panagpespesan na baleg a sanok na Dios a Makapanyarin-amin.”—Apo. 19:11, 14, 15.

¹⁶ Siopa ray kabiangan na ‘saray armada’ ed tawen a kaiba nen Jesus a miguerra? Sanen imbalkes nen Jesus so espada to pian pataynaney Satanas tan saray demonyo diad tawen, sikatoy inibaan na “saray anghel to.” (Apo. 12:7-9) Nibaga tayo sirin ya diad guerra na Armagedon, kaiba iray masanton anghel ed saray armada na Kristo. Siopa ni ray kaiba ed saratan ya armada? Oniay insipan nen Jesus ed saray alanaan ya agagi to: “Say manalo tan ontumbok ed saray gagawaen ko anggad kasampotan et ikdan ko na pakauley ed saray nasyon, tan diad panamegley na balatyang a baston et pastolan to iray totoo, ta pian namisimisi ira a singa saray banga a gawa ed pitek, a singa ed impakaawat koy pakauley manlapud Amak.” (Apo. 2:26, 27) Kanian kaibad saray armada na Kristo iray alanaan ya agagi to, ya diad saman et naawat da lay tumang da diad tawen. Kaiba to ray alanaan sano sikatoy manggawa la na ‘saray bengatlan  makapakebbiew’ legan ton papastolan iray nasyon panamegley na balatyang a baston.

17. (a) Antoy irerepresenta na amputin kabayo ya niluganan na Kristo? (b) Antoy irerepresenta na espada tan pana?

¹⁷ Basaen so Salmo 45:5. Say Ari et akalugan ed amputin kabayo, a mangirerepresentad malinis tan matunong a guerra ed imaton nen Jehova. (Apo. 6:2; 19:11) Likud ed espada, wala met so awit ton pana. Nabasa tayo: “Nia! Anengneng ko so sakey ya amputin kabayo; tan samay akakabayo ed satan et walay pana to; tan niiter ed sikato so sakey a korona, tan sikatoy linma pian manalo tan sumpalen toy panatalo to.” Say espada tan say pana et parehon mangirerepresenta ed paraan ya usaren na Kristo pian ipaakseb so panangukom ed saray kalaban to.

18. Akin a nibaga tayon ‘mautok so pana’ na Kristo?

¹⁸ Impropesiya na salmista ya ‘saray pana na Ari et mautok’ ya ontalos ed ‘puso na saray kakabusol’ tan ‘napelag so katooan ed silong to.’ Nagawa itan ed interon dalin. Impropesiya nen Jeremias: “Saray pinatey nen Jehova sikara naani ed satan ya agew manlapu ed sakey a sampot na dalin angga met lanlamang ed sananey a sampot na dalin.” (Jer. 25:33) Oniay nabasa ed miparan propesiya: “Anengneng ko met so sakey ya anghel ya akaalagey ed pegley na agew, tan sikatoy kinmelyaw ed maksil a boses tan inkuan to ed saray amin a manok ya ontitikyab ed pegley na tawen: ‘Gali dia, mantitipon kayo parad baleg a pangdem na Dios, pian kanen yo iray laman na saray arari tan laman na saray komandante na militar tan laman na saray mabiskeg a lalaki tan laman na saray kabayo tan saramay akalugan ed saratan, tan saray laman na amin, saray laman na bulos a totoo ontan met ed saray aripen tan saray abeba tan saray atagey.’”—Apo. 19:17, 18.

19. Panon ya mantultuloy ya ‘ombulaslas’ so Kristo tan sumpalen toy panatalo to?

¹⁹ Kayarin deralen na Kristo so mauges a sistema nen Satanas, sikatoy mantultuloy ya ‘ombulaslas’ lapud gloria to. (Sal. 45:4) Sumpalen toy panatalo to diad pangibasileng tod si Satanas tan saray demonyo diad kaaralman tan mansiansia ra ditan legan na Sanlibon Taon ya Uley. (Apo. 20:2, 3) Lapud ditan et singa inatey so kipapasen na Diablo tan saray demonyo to, agda la naimpluensyaan iray totoo kanian sigpot iran makapampasakop ed maglorian Ari. Balet, antis ya nanengneng na totoo a kalkalnan magmaliw a paraiso so interon dalin, wala ni sananey a rason ya miliket irad Ari da tan ed 144,000. Satan a maliket ya okasyon so aralen tayo diad ontumbok ya artikulo.