1, 2. Anto ray pandurumaan tayo no nipaakar ed kipapasen na pamilya tan ed impakaamtad katuaan?

SI Jehova so angigapo ed uksoyan na pamilya. (Efe. 3:14, 15) Anggano kabiangan itayo na sakey a pamilya, nandurumay ugali tan kipapasen tayo. Nayarin pinabaleg ka na atateng mo. Say arum balet et asakbay ya naulila lapud nansakit o naaksidente so atateng da, odino lapud arum ni ran trahedya. Wala met so arum ya agda anggan kabat so atateng da.

² Diad sikatayo ran kabiangan na pamilya nen Jehova, nanduruma met so paraan na impakaamta tayod katuaan. Nayarin ‘pinabaleg kad katuaan,’ a singa panangibaga na arum, ta imbangat ed sika na atateng mo iray prinsipyo na Dios. (Deu. 6:6, 7) Odino sakey kad saray nilibon akaamtad katuaan lapud impanpulong na saray lingkor nen Jehova.—Roma 10:13-15; 1 Tim. 2:3, 4.

3. Anto ray pampaparaan tayo?

³ Anggano wala iratan ya pandurumaan tayo, wala met iray pampaparaan tayo. Maniirap tayo lapud impanrebelde nen Adan tan atawir tayoy ag-inkaperpekto, kasalanan, tan ipapatey. (Roma 5:12) Anggaman ontan, lapud dadayewen tayoy Jehova,  duga labat ya sikatoy tawagen tayon “Ama.” Diad Isaias 64:8, oniay nabasa tayon imbaga na saray pinilin totoo na Dios: “O Jehova, sika so Ama mi.” Tan oniay gapo na samay modelon pikakasi ya imbangat nen Jesus: “Ama mi a walad tawen, napasanto komon so ngaran mo.”—Mat. 6:9.

4, 5. Legan tayon uusisaen so kaaralem na panamabli tayod si Aman Jehova, anto ray nepeg tayon isipen?

⁴ Aasikasoen tan proprotektaan itayo nen Aman Jehova bilang totoon ontatawag ed ngaran to a walay pananisia. Oniay insulat na salmista ya ibabaga nen Jehova nipaakar ed sakey ya mandadayew ed sikato: “Impasen to so aro to ed siak, kanian sikato so iliktar ko: sikato so ipasen ko ed tagey, nisengeg ed kinabat to so ngaran ko.” (Sal. 91:14) On, maaro itayon ililiktar nen Jehova ed saray mamubusol ed sikatayo tan sasalimbengan to tayo, pian ag-itayo sigpot a naderal.

⁵ Pian lalo tayon napabli so Ama tayod tawen, aralen tayo iyan taloran punto: (1) Say Ama tayo so Manangitarya tayo. (2) Si Jehova so Manangiliktar tayo. (3) Tan say Dios so sankaapitan a Kaaro tayo. Legan tayon aaralen irayan punto, maabig no dalepdepen tayoy relasyon tid Dios tan nonoten no panon tayon nigalang bilang Ama tayo. Makatulong met no isipen tayo ray bendisyon ya iiter nen Jehova ed saramay onaapit ed sikato.—Sant. 4:8.

6. Antoy sakey a paneknek ya si Jehova so Mangiiter na “amin a maong a regalo”?

⁶ “Amin a maong a regalo tan amin ya ayadyarin langkap et manlalapud tagey,” so insulat nen disipulo ya Santiago, lapud “manlalapu itan ed Ama na saray liwawa ed tawen.” (Sant. 1:17) Say bilay tayon mismo et marakdakep a regalo ya nanlapud si Jehova. (Sal. 36:9) No usaren tayoy bilay tayo ed panggaway linawa na Dios, naawat tayoy dakel a bendisyon natan tan walay ilalo tayon manbilay na andi-anggaan diad balon mundo. (Uli. 10:22; 2 Ped. 3:13) Balet panon iyan posible anta mauges so resulta na impanrebelde nen Adan?

7. Panon ya nanggaway paraan so Dios pian nawalaan tayoy maapit a relasyon ed sikato?

⁷ Talagan si Jehova so Makapadinayew ya Manangitarya diad dakel a paraan. Singa bilang, lapud agnaparaan a kaabigan to et labay to itayon tulongan. On, amin tayo et makasalanan tan atawir tayoy ag-inkaperpekto ed inmunan ama tayo. (Roma 3:23) Balet lapud panangaro nen Jehova, sikato so nanggaway paraan pian nawalaan tayoy maapit a relasyon ed sikato. “Lapud saya et nipatnag so aro na Dios ed sikatayo,” so insulat nen apostol Juan, “ta imbaki na Dios so bogbogtong ya Anak to diad mundo pian nagamoran tayo so bilay diad panamegley to. Sayan panangaro et aliwan lapud inaro tayo so Dios, noagta lapud inaro to itayo tan imbaki toy Anak to bilang bagat a manakbong ed saray kasalanan tayo.”—1 Juan 4:9, 10.

8, 9. Akin a nibaga tayon Makapadinayew ya Manangitarya si Jehova diad panaon nen Abraham tan Isaac? (Nengnengen so litrato ed gapo na artikulo.)

⁸ Nen koma 19 siglo B.C.E., walay agawan pakapatnagan no antoy maaron gawaen nen Jehova parad saray maunor ya totoo pian nawalaan iray andi-anggaan a bilay. Ipapaliwawa na Hebreos 11:17-19: “Lapud pananisia, si Abraham et singa to la inyapay si Isaac sanen asubok, tan sayan too a maliket ya angawat ed saray sipan et akaparaan lan mangiyapay ed bogbogtong ya anak to, anggano imbaga la ed sikaton: ‘Say tawagen a “binim” et manlapud si Isaac.’ Balet inisip to a nayarian na Dios a paolien so anak to anggano inatey la; tan aliling to et inawat to lanlamang so anak to manlapud ipapatey.” No panon ya akaparaan si  Abraham ya ibagat so anak ton si Isaac, mabulos ya inyapay nen Jehova so Anak ton si Jesu-Kristo parad amin a totoo.—Basaen so Juan 3:16, 36.

⁹ Seguradon maliket si Isaac ta ag-atuloy so pangibagat ed sikato! Agaylay pisasalamat to ta angiter si Jehova na kasalat ya ibagat—sakey a kalakian a karnero a nipanget iray saklor to ed melag a kiew. (Gen. 22:10-13) Kampega lan satan ya pasen et tinawag ya “Jehova-jireh,” a say labay ton ibaga et “Mangitarya si Jehova.”—Gen. 22:14.

10, 11. Siopa ray angidaulo ed “ministeryo nipaakar ed pikakareenan,” tan panon dan ginawa itan?

¹⁰ Legan tayon dadalepdepen no panon ya si Jehova so Makapadinayew ya Manangitarya, agaylay pisalsalamat tayod importantin betang nen Jesu-Kristo. Ontan so alikna nen Pablo sanen insulat to: “Say aro na Kristo so mamapakiwas ed sikami, lapud onia so inisip mi, ya inatey so sakey a too parad amin; diad tua, amin so inatey; tan sikatoy inatey parad amin pian saramay manbibilay et agla ra manbilay parad inkasikaran dili, noagta parad samay sakey ya inatey parad sikara tan pinaoli.”—2 Cor. 5:14, 15.

¹¹ Saray inmuunan Kristiano et inar-aro day Dios tan papablien day balbaleg a pribilehyon manlingkor ed sikato, kanian maliket dan inawat so “ministeryo nipaakar ed pikakareenan.” Lapud impanpulong tan impanggawa ray babangatan, awalaan na pankanawnawa iray mauyamon totoo ya mikareenan ed Dios, mikaaro ed sikato, tan magmaliw ya espiritual ya ananak to. Diad panaon tayo, ontan met so gagawaen na saray alanaan ya lingkor nen Jehova. Bilang embahador na Dios tan Kristo, tutulongan da ray totoon walaan na dugan kipapasen na puso pian iyasingger ira nen Jehova tan magmaliw iran mananisia.—Basaen so 2 Corinto 5:18-20; Juan 6:44; Gawa 13:48.

12, 13. Panon tayon nipanengneng ya aapresyaen tayoy dakel a probisyon nen Jehova?

¹² Lapud panamabli dad si Jehova bilang Makapadinayew ya Manangitarya, amin a Kristianon maniilalo ya manbilay na andi-anggaan diad dalin et mitutulongan ed saray alanaan diad panagpulong a kimey. Uusaren tayod satan so Biblia, sakey ed saray balibalin probisyon na Dios. (2 Tim. 3:16, 17) No epektiboy pangusar tayod impuyan ya Salita na Dios diad ministeryo, natulongan tayo ray totoo ya nawalaay andi-anggaan a bilay. Pian nagawaan tayo iyan kimey, manmamatalek tayod sananey nin probisyon nen Jehova—say masanton espiritu to. (Zac. 4:6; Luc. 11:13) Balibali iray resulta na pampupulong tayo, a singa nabasad kada edisyon na Yearbook of Jehovah’s Witnesses. Baleg ya kagalangan so mibiang ed sayan kimey ya mangirarayew ed Ama tan Manangitarya tayo!

¹³ Diad amin ya intarya na Dios parad sikatayo, maabig no itepet tayo: ‘Kasin gagawaen koy anggaay nayarian ko diad ministeryok pian nipanengneng kod si Jehova ya aapresyaen ko ray probisyon to? Anto ni ray sarag kon gawaen pian magmaliw ak ya mas epektibo ed panagpulong?’ Nipanengneng tayoy pisasalamat ed saray balibalin probisyon na Dios diad pangiyuna tayod Panarian. No ontan so gawaen tayo, seguradoen nen Jehova ya niiter so amin a pankaukolan tayo. (Mat. 6:25-33) Inar-aro itayo na Dios, kanian labay tayon gawaen so anggaay nayarian tayon paliketey puso to.—Uli. 27:11.

14. Panon a nagmaliw ya Manangiliktar si Jehova parad saray totoo to?

¹⁴ Inkansion nen salmista David: ‘Pakaskasi ak tan naukolan ak; say Katawan nononoten to ak. Sika so tulong ko tan manangiliktar ko.’ (Sal. 40:17) Aminpigan nagmaliw ya Manangiliktar si Jehova parad saray totoo  to bilang grupo, lalo la no grabe tan agmanunda so pamapairap na saray mamubusol ed sikara. Agaylay pisasalamat tayod tulong na Dios diad ontan iran panaon tan ed dakel ya espiritual a probisyon ya itatarya to parad sikatayo!

15. Mangiter na alimbawa no panon ya proprotektaan na maaron ama so anak to.

¹⁵ Say maaron ama et aglabat mangitatarya na pankaukolan na ananak to noagta proprotektaan to met ira. Sasalimbengan to ra no walay peligro. Nanonotan ni na sakey a brother so agawa nen ugaw ni. Pasempet la rad saman nen ama to kayari dan nampulong tan walay nadalan dan karayan. Maksil so uran ed saman a kabuasan kanian aralem so danum. Makabaliw labat ira no ontoon irad angkakabaleg a bato. Amay ugaw so walad unaan, balet legan ton onkukupbang et agto abalanse laman to kanian naplag ed danum tan amiduan linmereg. Maong labat ta aguyor a tampol nen ama to diad takeb kanian agnalner! Ililiktar itayo met nen Aman Jehova pian agtayo niyanor ed sayan mauges ya mundon uuleyan nen Satanas. Anggapo lay makapiparad si Jehova bilang Manangiliktar.—Mat. 6:13; 1 Juan 5:19.

16, 17. Panon ya tinulongan tan prinotektaan nen Jehova iray Israelita nen akilaban irad saray Amalekita?

¹⁶ Say sakey ya balibalin alimbawa na maaron proteksion nen Jehova et agawa kayari impangibulos tod saray Israelita diad panangaripen na Ehipto. Prinotektaan to ra legan iran ombabaliw ed Ambalangan Dayat nen 1513 B.C.E. Diad panaakar da paarap ed Palandey Sinai, akasabi rad Refidim.

¹⁷ Lapud samay propesiya na Dios ya nabasad Genesis 3:15, ontan lay panaanap nen Satanas na pankanawnawa ya onataki ed saray Israelita. Ginawa to itan diad impangusar tod saray Amalekita ya kalaban na  saray totoo na Dios. (Num. 24:20) Isipen pa labat so ginawa nen Jehova panamegley na apatiran matoor a lalaki—si Josue, Moises, Aaron, tan Hur. Legan ya milalaban si Josue ed saray Amalekita, walad toktok na pukdol si Moises, Aaron, tan Hur. No akaatagey iray lima nen Moises, manatalo iray Israelita. No naksawan lay lima to, bembenan itan nen Aaron tan Hur. Kanian diad tulong tan proteksion nen Jehova, ‘tinalo nen Josue so Amalek.’ (Exo. 17:8-13) Nanggaway altar si Moises diman ya tinawag ton “Jehova-nissi,” a say labay ton ibaga et “Si Jehova so Palitek a Pinagkatandak.”—Basaen so Exodo 17:14, 15.

18, 19. Panon itayon proprotektaan na Dios diad panaon tayo?

¹⁸ Proprotektaan nen Jehova iray mangaaro tan manguunor ed sikato. Singa saramay Israelita nensaman ya walad Refidim, manmamatalek itayod Dios no aatakien itayo na saray kalaban. Sasalimbengan itayo nen Jehova bilang grupo ed saray patit na Diablo. Nonoten pa labat so impanalimbeng na Dios ed saray agagi tayo ya nansiansian neutral. Ontan so agawa diad uley na Nazi ed Germany tan ed arum a bansa nen 1930’s tan bandad gapo na 1940’s. No basaen tan dalepdepen tayo ray istoryay bilay tan saray salaysay ed Yearbook nipaakar ed proteksion ya iiter na Dios diad panaon na panamasegsegang, ombiskeg so talek tayod si Jehova bilang say Salimbeng tayo.—Sal. 91:2.

¹⁹ Makakaawat tayo na saray maaron panonot panamegley na organisasyon nen Jehova tan diad saray publikasyon tayo. Isipen pa labat no panon itayon naproprotektaan lapud saratan. Lalon onloloor so imoralidad tan pornograpiya ed sayan mundo, kanian iikdan itayo nen Jehova na saray dugarugan panonot tan praktikal ya tulong pian naiwasan tayo ray peligro ed moral. Singa bilang, nabibilin itayo ya paliisan iray mauges a kaulop ed saray social networking site ed Internet. *—1 Cor. 15:33.

20. Anton proteksion tan panangigiya so naaawat tayo diad Kristianon kongregasyon?

²⁰ Panon tayon nipanengneng ya ‘paibabangat tayod si Jehova’? Diad pangunor tayod amin ya ganggan to. (Isa. 54:13) Diad loob na kongregasyon itayo makakaawat na panangigiya tan proteksion, ta wadtan iray matoor ya lalakin manlilingkor bilang elder ya mangiiter na Makasulatan iran tulong tan simbawa. (Gal. 6:1) Nalilikna tayoy panangasikaso nen Jehova panamegley na sarayan “langkap a lalaki.” (Efe. 4:7, 8) Antoy nepeg tayon gawaen? Mabulos itayon manpasakop tan ontulok ed sikara, pian bendisyonan itayo na Dios.—Heb. 13:17.

21. (a) Antoy determinado tayon gawaen? (b) Antoy aralen tayod onsublay ya artikulo?

²¹ Nepeg ya determinado tayon paigiya ed masanton espiritu tan tumboken so panangiwanwan na Ama tayod tawen. Dalepdepen tayo met so bilay na Anak to, si Jesu-Kristo, tan gawaen tayoy anggaay nayarian tayon aligen so sankaabigan ya ehemplo to. Lapud sikatoy inmunor anggad impatey to, baleg so naawat ton bendisyon. (Fil. 2:5-11) Singa si Jesus, nabendisyonan itayo met no manmatalek tayod si Jehova ya interon puso. (Uli. 3:5, 6) Komon ta manilalo tayon lanang ed si Jehova bilang say agnaparaan ya Manangitarya tan Manangiliktar tayo. Agaylan liket tan pribilehyo so panlingkor ed sikato! Lalon onelet so panangaro tayod sikato diad panaral tayod komatlon aspekto na pangaasikaso na Ama tayo—say pikakaaro to. Aralen tayod onsublay ya artikulo no panon ya si Jehova so sankaapitan a Kaaro tayo.