Baleg so epektod sikatayo na saray problemad bilay. Apektaen toy isip, pakapuyen to itayo, tan naandi liket tayo. Graben irap so naeksperiensya na ari na Israel ya si David. Panon ton asarag iratan? Diad sakey ya makapatenyeg a salmo, oniay imbaga to: ‘Inyakis ko so boses ko ed Jehova; diad boses ko et oney-ey ak ed Jehova. Mandalem ak ed arap to; iparungtal ko ed arap to so gonigon ko. No say espirituk et nalner dia ed loob ko, babantayan mo so basbas ko.’ On, mapaabeban kinmerew na tulong si David ed Dios.—Sal. 142:1-3.

Diad sananey nin salmo, inkansion nen David: ‘Sakey a pamaakaran so kinerew ko ed Jehova, a sikato so anapen ko: salanti, say panayam ko komon ed abung nen Jehova ed amin ya agew na bilay ko, say inengneng kod karakpan nen Jehova.’ (Sal. 27:4) Aliwan Levita si David, balet imadyin mo ya sikatoy akaalagey ed paway na masanton sular ya asingger ed tabernakulo, say sentro na dugan panagdayew ed saman a panaon. Ontan lay pisalsalamat to kanian labay toy manayam diman diad interon bilay to pian nanengneng toy “karakpan nen Jehova.”

Say salitan “karakpan” et mikonektaan ed kipapasen o kualidad ya “maabig odino balibali ed nonot tan liknaan.” Talagan aapresyaen nen David so uksoyan na Dios ed dugan panagdayew. Maabig no tepetan tayoy sarili tayo, ‘Onman met kasi naliliknak ed alikna nen David?’

Diad panaon tayo, agla akadepende ed saksakey a pasen so iyasingger ed si Jehova. Say uusaren na Dios natan ya sagradon uksoyan parad dugan panagdayew et say baleg ya espiritual a templo to. * No apresyaen tayo iyan uksoyan, nanengneng tayo met so “karakpan nen Jehova.”

Konsideraen so altar ya gawad gansa diad asingger ed lolooban na tabernakulo. (Exo. 38:1, 2; 40:6) Irerepresenta na satan so maliket ya pangawat na Dios ed bilay nen Jesus bilang bagat. (Heb. 10:5-10) Isipen pa no antoy maabig ya resulta na satan! Insulat nen apostol Pablo: “Akapikareenan itayo ed Dios diad impatey na Anak to sanen kakabusol to itayo ni.” (Roma 5:10) Diad pangipatnag tayoy pananisia ed niyibung ya dala nen Jesus, magmaliw itayon kaaro na Dios ya papaboran tan panmamatalkan to. Bilang resulta, nalikna tayoy maapit a “pikakaaro ed Jehova.”—Sal. 25:14.

Lapud ‘aperdona iray kasalanan tayo,’ naeksperiensya tayoy “makapainawan panaon a manlapud si Jehova.” (Gawa 3:19) Say situasyon tayo et miparad sakey a priso ya legan ton alagaren so sentensia ton ipapatey et pagbabawian toy ginawa to tan anguma-uman. Naimano itan na sakey ya maaro tan makasin huis kanian inekal to lay sentensia na satan a too. Seguradon akainawa tan malikeliket iman a priso! Si Jehova et singa satan ya huis—kakasian to ray totoon magbabawi tan ekalen to lay sentensia dan patey.

Pigarad saray naobserbaan nen David ya kabiangan na dugan panagdayew diad abung nen Jehova et say pantitipon na dakerakel ya Israelita, say panagbasa tan pangipaliwawa ed Ganggan, say pamool na insenso, tan say sagradon panlilingkor  na saray saserdote tan Levita. (Exo. 30:34-38; Num. 3:5-8; Deu. 31:9-12) Sarayan kabiangan na dugan panagdayew ed Israel nensaman et walay piparaan to natan.

Singa met nensaman, diad panaon tayo et “agaylay abig tan makapaliket ed saray totooy Dios a manbilay iran nankakasakey!” (Sal. 133:1, Maung a Balita) Dinmakerakel itayon sanaagi diad interon mundo. (1 Ped. 2:17) Ibabasa tan ipapaliwawa so Salita na Dios diad saray aral tayo. Mangitatarya si Jehova na dakel ya programa panamegley na organisasyon to pian nibangat itayo. Agmet nasabaan so niimprintan espiritual ya naakan ya nausar tayod personal tan pamilyan panagaral. Oniay komento na sakey a membro na Mananguley ya Ulop: “Diad pandadalepdep kod Salita nen Jehova tan ed kabaliksan na satan, tan diad pansasagpot kon nawalaay kakabatan tan pakatalos, talagan naliliknak so inkayaman ed espiritual tan inkakontento.” On, ‘say pakatalos et makapaliket ed kamarerwa tayo.’—Uli. 2:10.

Diad panaon tayo, inagew-agew ya onsasabid si Jehova iray pikakasi na saray lingkor to. Parad sikato, saratan ya pikakasi et singa ambalbalingit ya insenso. (Sal. 141:2) Malikeliket itayo ta amta tayon labalabay nen Jehova no onaasingger itayod sikato diad pikakasi!

Impikasi nen Moises: “Katawan a Dios mi, bendisyonan mo kami pa. Paaligwas mo kami pad amin a gagawaen mi!” (Sal. 90:17, Maung a Balita) Bebendisyonan nen Jehova so kimey tayo legan tayon maseseg a manpupulong. (Uli. 10:22) Nayarin wala ray atulongan tayon makaamtad katuaan. Anganko et mantutultuloy tayo nin siansia ed sayan kimey ed piga-pigara lan taon anggano dakel so ag-ondengel, walay sakit o emosyonal ya problema tayo, odino makakaeksperiensya tayoy panamasegsegang. (1 Tes. 2:2) Anggaman ontan, agta anengneng tayoy “karakpan nen Jehova” tan nalilikna tayon naliliketan a maong so Ama tid tawen ed saray sagpot tayo?

“Si Jehova sikato so nabebetangan ko a tawir ko,” so inkansion nen David. “Wala so sakey a maong a tawir ko,” so kuan to. (Sal. 16:5, 6) Misalsalamat si David ed “tawir” to—say maapit ya relasyon tod si Jehova tan say pribilehyo ton manlingkor ed sikato. Singa si David, nayarin makaeksperiensya tayo met na dakel ya irap, balet dakel so espiritual ya bendisyon tayo! Komon ta lanang tayon panliketan so dugan panagdayew tan apresyaen so espiritual a templo nen Jehova.