1, 2. (a) Anton kasal so panliketan diad tawen? (b) Anto ran tepet so pantongtongan tayo?

TALAGAN kaukolan so panaon ed pamparaan parad bansal. Balet say aralen tayo natan et say sankaengrandean ed amin a bansal—say bansal na ari! Isip mo pa. Manga 2,000 taon lan ipaparaan itan. Natan et manasingger lay pikasakey na nobyo ed nobya to. Napanoy maliket a musika so palasyo na Ari, tan mangansion iray pinalsa ed tawen: “Idayew yo si Jah, . . . lapud si Jehova a Dios tayo, say Makapanyarin-amin, et ginmapo lan manuley bilang ari. Manggayaga itayo tan manliket itayon maong, tan sikatoy igloria tayo, lapud asabi la so kasal na Kordero tan akaparaan la so nobya to.”—Apo. 19:6, 7.

² Say “Kordero,” a say pankasal to et panliketan diad tawen et anggapoy arum noag si Jesu-Kristo. (Juan 1:29) Antoy isulong tod bansal? Siopay nobya to? Panon ton ipaparaan so nobya to parad pankasal da? Kapigay pankasal da? Walay liket ed tawen lapud sayan kasal, balet kasin manliket met iramay maniilalon manbilay na andi-anggaan diad dalin? Labalabay tayo lan naamtaan so ebat, kanian ituloy tayon aralen so Salmo 45.

3, 4. (a) Antoy nibagad kawes na Nobyo ed bansal to, tan antoy mangaarum ed liket to? (b) Siopa so “reyna” tan “bibii ya anak na saray arari” ya mililiket ed Nobyo?

³ Basaen so Salmo 45:8, 9. Isulong na Nobyo, si Jesu-Kristo, so maglorian kawes to parad bansal. Sankaangob ed kawes to so ‘sankaabigan’ a pabalingit, a singa say mira tan kasia, ya kaibad saray ilalaok ed masanton larak a panaglana ya uusaren ed Israel nensaman.—Exo. 30:23-25.

⁴ Say musika diad tawen et mangaarum ed liket na Nobyo legan ya manasingger so pankasal to. Mililiket ed sikato so “reyna,” say organisasyon na Dios diad tawen, tan kaibad satan iray “bibii ya anak na saray arari,” ya ontutukoy ed saray masanton anghel. Agaylay dakep na boses da legan dan ikakansion ya: “Manggayaga itayo tan manliket itayon maong . . . lapud asabi la so kasal na Kordero”!

5. Siopa so “asawa na Kordero”?

⁵ Basaen so Salmo 45:10, 11. Amta tayo la no siopa so Nobyo, balet siopa so nobya to? Say nobya to et tugyopen na saray alanaan a membro na kongregasyon ya idadaulo nen Jesu-Kristo. (Basaen so Efeso 5:23, 24.) Magmaliw iran kabiangan na Mesianikon Panarian na Kristo. (Luc. 12:32) Sarayan 144,000 ya alanaan a Kristiano et “nantultuloy a tinmumbok ed Kordero anggan iner so laen to.” (Apo. 14:1-4) Magmaliw iran “asawa na Kordero” tan kaiba to ran manayam diad tawen.—Apo. 21:9; Juan 14:2, 3.

6. Akin a saray alanaan et tinukoy ya “bii ya anak na ari,” tan akin ya niganggan iran ‘lingwanan iray kabaleyan da’?

⁶ Say nobya et aglabat tinukoy ya “bii ya anak” noagta “bii ya anak na ari.” (Sal. 45:13) Siopa iyan “ari”? Saray alanaan a Kristiano et tinagibi nen Jehova bilang “ananak” to. (Roma 8:15-17) Lapud sikara so magmaliw a nobya ed tawen, oniay niganggan ed sikara: ‘Lingwanan mo ray kabaleyan mo tan say abung na [literal ya] amam.’ Kaukolan dan ‘iyapasakey so kanonotan da diad saray bengatlan walad tawen, aliwan diad saray bengatlan walad dalin.’—Col. 3:1-4.

7. (a) Panon ya abayag lan ipaparaan na Kristo so nobya to? (b) Panoy pangipapasen na nobya ed Nobyo to?

⁷ Pigaran siglo lan ipaparaan na Kristo so nobya to parad pambansal dad tawen. Impaliwawa nen apostol Pablo ‘a say Kristo et inaro toy kongregasyon tan inter toy inkasikato parad satan, pian napasanto to itan, a lilinisan tan uurasan toy danum na salita na Dios, pian nipresenta to ed inkasikato so karakpan na kongregasyon, ya andian itan na mantsa odino kumanet odino anggan dinan ed saratan a bengatla, noagta masanto tan andian na pakabalawan.’ (Efe. 5:25-27) Oniay imbaga nen Pablo ed saray alanaan a Kristiano diad Corinto nensaman: “Maniimon ak ed sikayo a singa paniimon na Dios, ta siak a mismo et insipan ta kayon mikasal ed sakey ya asawan laki, diad Kristo, tan labay ta kayon iyarap ed sikato bilang masimpit a birhen.” (2 Cor. 11:2) Apresyaen na Nobyon-Ari a si Jesu-Kristo so espiritual a “karakpan” o ganggana na nobya to. Tan sikatoy bibidbiren na nobya to bilang “katawan” to tan ‘ondakmomo ed sikato’ bilang say piasawaan tod arapen.

8. Akin et nibagan talagan makapadinayew so itsura na nobya diad bansal to?

⁸ Basaen so Salmo 45:13, 14a. Talagan makapadinayew so itsura na nobyad  bansal to. Diad Apocalipsis 21:2, say nobya et nikomparad sakey a syudad, say Balon Jerusalem, tan sikatoy “kinawesan a marakep parad piasawaan to.” Walad sayan syudad ed tawen so “gloria na Dios” tan masmasnag, “singa say sankamablian a bato, singa baton jaspe a maliwliwawan singa kristal.” (Apo. 21:10, 11) Balibali so impaneskribe na libro na Apocalipsis ed kasnagan na Balon Jerusalem. (Apo. 21:18-21) Kanian talagan makapadinayew so itsura na nobya! Duga met labat itan ta say bansal et nagawad tawen.

9. Siopa so “ari” ya pangiyakaran ed nobya, tan antoy sulong na nobya?

⁹ Inyakar so nobya ed Nobyo to—say Mesianikon Ari. Abayag to lan ipaparaan so nobya to, a “lilinisan tan uurasan toy danum na salita na Dios.” Say nobya et “masanto tan andian na pakabalawan.” (Efe. 5:26, 27) Nepeg met ya marakep so kawes na nobya parad sayan okasyon. Tan talagan marakep! ‘Say kawes to et walaan na balitok,’ tan sikatoy ‘niyakar ed ari tan akakawes na ginansilyo.’ Diad pikasal tod Kordero, say nobya et “naabuloyan a mangisulong na masileng, malinis, tan pinon lienzo, ta say kabaliksan na pinon lienzo et saray matunong a gawa na saray masanto.”—Apo. 19:8.

10. Kapigan so pankasal na Kordero?

¹⁰ Basaen so Apocalipsis 19:7. Kapigay pankasal na Kordero? Anggano “akaparaan la so nobya to” parad pankasal da, saray onsublay ya nabasa ed Apocalipsis 19 et aliwan nipaakar ed aktual ya bansal da. Imbes, nabasa ditan iray nagawad bandad sampot na baleg a kairapan. (Apo. 19:11-21) Kasin labay ya ibaga na satan ya say pankasal da et antis ya nasumpal na Nobyon-Ari so panatalo to? Andi. Saray pasingawey ed libro na Apocalipsis et agnisulat unong ed mantutumbokan ya nagawa. Diad koma 45 ya Salmo, nagawa so bansal kayarin ibalkes na Arin Jesu-Kristo so espada to tan atalo to la ray kalaban to.—Sal. 45:3, 4.

11. Antoy mantutumbokan ya gawaen na Kristo diad panumpal tod panatalo to?

¹¹ Nibaga tayo sirin ya oniay mantutumbokan ya nagawa: Unona, ipaakseb so panangukom ed “bantog a balangkantis,” say Makapanyarin Babilonia, say sankamundoan ya empiryo na palson relihyon. (Apo. 17:1, 5, 16, 17; 19:1, 2) Insan deralen na Kristo so arum nin kabiangan na mauges ya sistema nen Satanas diad Armagedon, say “guerra a nagawa ed baleg ya agew na Dios a Makapanyarin-amin.” (Apo. 16:14-16; 19:19-21) Kayari na satan, sumpalen na Sundalon-Ari so panatalo to diad pangibasileng tod si Satanas tan saray demonyo to diad kaaralman, a ditan et singa inatey so kipapasen da.—Apo. 20:1-3.

12, 13. (a) Kapigay pankasal na Kordero? (b) Siopay manliket ed tawen diad kasal na Kordero?

¹² Legan na kiwawala na Kristo, saray alanaan a Kristiano ya manampot lay bilay da diad dalin et napaoli ed tawen. Kayari kaderal na Makapanyarin Babilonia, tiponen nen Jesus iray nakekeran membro na nobya to. (1 Tes. 4:16, 17) Antis sirin ya onggapo so guerra ya Armagedon, wala lad tawen so amin a membro na “nobya.” Kayari na Armagedon, mankasal la so Kordero. Seguradon malikeliket itan a bansal! “Maliket iramay naimbitaan ed ponsia na kasal na Kordero,” so kuan na Apocalipsis 19:9. On, maliket so 144,000 ya membro na nobya. Tan manleppuay liket na Nobyon-Ari lapud kaiba to la so kompleton bilang na saramay kaiba ton manuley,  ya masimbolikon ‘mamangan tan oniinum diad lamisaan tod Panarian to.’ (Luc. 22:18, 28-30) Balet aliwa labat a say Nobyo tan say nobya to so manliket ed pankasal da.

¹³ Singa nibaga la, oniay nankakasakey ya kansionen na saray pinalsa ed tawen: “Manggayaga itayo tan manliket itayon maong, tan sikatoy igloria tayo, lapud asabi la so kasal na Kordero tan akaparaan la so nobya to.” (Apo. 19:6, 7) Panon to balet iray lingkor nen Jehova diad dalin? Kasin miliket met ira?

14. Siopa iramay “mamarikit” ya atukoy ed Salmo 45 ya kaiba na nobya?

¹⁴ Basaen so Salmo 45:12, 14b, 15. Impasakbay nen propetan Zacarias ya diad panaon na anggaan, saray totoo et maliket a miulop ed saray nakekeran membro na espiritual ya Israel. Insulat to: ‘Diad saman ya agew walay samploran lalaki manlapud amin a pansasalita na saray nasyon ya ompeket ed saloy na kawes na sakey a Judio, a kuan da, Mila kami ed sikayo, ta nadngelan mi a say Dios walad sikayo.’ (Zac. 8:23) Diad Salmo 45:12, sarayan simbolikon “samploran lalaki” et tinawag ya “say bii ya anak na Tiro” tan “say mayaman ed leet na katooan.” Akila rad saray nakekeran alanaan diad dalin tan aliling to et iikdan da ra na saray regalo, ta labay dan alaen so pabor da tan patulongan ed espiritual. Manlapu la nen 1935, minilyon lan totoo so akiulop ed saray nakekeran alanaan pian ‘awiten da rad inkatunong.’ (Dan. 12:3) Sarayan matoor ya kaiba na saray alanaan a Kristiano et nilinisan day kabibilay da, kanian nagmaliw iran espiritual  ya birhen. Sarayan birhen o “mamarikit” ya kaiba na nobya et indedika ray sarili da ed si Jehova tan pinaneknekan dan matoor irad Nobyon-Ari.

15. Panon ya mitutulongan iray “mamarikit” ed saray membro na nobya ya wadia nid dalin?

¹⁵ Saray nakekeran membro na nobya diad dalin et misalsalamat ed saray “mamarikit” ya kaiba da lapud maseseg ya itutulong da pian nipulong so “maong a balita na panarian” diad interon dalin. (Mat. 24:14) Aliwan say “espiritu tan say nobya” labat so mangibabagay “Gala!” noagta “siopaman ya onderengel” et mangibabaga met na “Gala!” (Apo. 22:17) On, arengel na ‘arum a karnero’ iray membro na nobya ya mangibabagay “Gala!” tan akila rad nobya pian ibagay “Gala!” ed saray totoo.—Juan 10:16.

16. Anton pribilehyo so inter nen Jehova ed arum a karnero?

¹⁶ Inad-aro na saray nakekeran alanaan iray kaiba dan “mamarikit.” Maliket ira ta say Ama na Nobyo, si Jehova, et inikdan toy pribilehyo irayan arum a karnero diad dalin ya miliket ed pambansal na Kordero diad tawen. Nipropesiya ya sarayan “mamarikit” ya kaiba ra et ‘niyakar tekep na panliliket tan gayaga.’ On, say arum a karnero ya say ilalo da et manbilay na andi-anggaan diad dalin et miliket met no mankasal lay Kordero diad tawen. Dugaruga sirin so impaneskribe na libro na Apocalipsis ya say “baleg ya ulop” et ‘akaalagey diad arap na trono tan arap na Kordero.’ Manlilingkor irad si Jehova diad sular na espiritual a templo to.—Apo. 7:9, 15.

17, 18. Antoy epekto na pankasal na Kordero, tan siopa ray magmaliw ya ananak to legan na Sanlibon Taon ya Uley to?

¹⁷ Basaen so Salmo 45:16. Lalon manliket iray “mamarikit” ya kaiba na nobya na Kristo sano diad balon mundo et nanengneng day epekto na pankasal na Kordero. Imanoen lad satan na Nobyon-Ari so dalin tan paolien to ray ‘inmuunan atateng’ to, a magmaliw ya ‘ananak to.’ (Juan 5:25-29; Heb. 11:35) Diad sikara et sikatoy manuro na saray ‘prinsipe ed amin a dalin.’ Seguradon manuro met so Kristo na saray matoor ya elder natan ya mangidaulo ed balon mundo.—Isa. 32:1.

¹⁸ Legay Sanlibon Taon ya Uley na Kristo, sikatoy magmaliw met ya ama na arum. Diad tua, amin ya manayam diad dalin et makaawat na andi-anggaan ya bilay lapud pananisia rad dondon bagat nen Jesus. (Juan 3:16) Kanian sikatoy magmaliw ya “Andi-anggaan ya Ama” ra.—Isa. 9:6, 7.

19, 20. Antoy epekto ed amin a tuan Kristiano natan na saramay ebento ya nabasad Salmo 45?

¹⁹ Basaen so Salmo 45:1, 17. Talagan importante ed amin a Kristiano iray ebento ya akarekord ed Salmo 45. Malikeliket iray nakekeran alanaan diad dalin ya asingger la ran mikasakey ed agagi ra tan ed Nobyo ra diad tawen. Napapakiwas so arum a karnero ya lalon manpasakop ed maglorian Ari da tan misalsalamat irad pribilehyo ran makapiulop ed nakekeran membro na nobya diad dalin. Kayari kasal na Kristo tan saray kaiba ton manuley ed Panarian, ipagamor day dakel ya bendisyon ed saray totoo diad dalin.—Apo. 7:17; 21:1-4.

²⁰ Legan tayon aalagaren so nagawan ‘maong a pamaakaran’ nipaakar ed Mesianikon Ari, agta napakiwas itayon ‘ipakabat so ngaran to’? Komon ta kaiba tayo ed saramay mangigalang tan ‘misalamat ed Ari diad ando lan ando.’