Say Salitam—Kasin “On insan Andi”?
Imadyinen iya: Walay elder ya membro na Hospital Liaison Committee ya akisipan ya mi-partner ed kalangweran ya brother diad panagpulong ed Simbay kabuasan. Balet diad saman a kabuasan, walay agi ya naaksidente asawa to tan imbatik ed ospital. Tinawagan na satan ya agi imay elder pian manpatulong ya mananap na doktor ya man-operad asawa to ya ag-usaray dala. Kanian kinansela na elder so plano ton mi-partner ed samay kalangweran ya brother pian nipanengneng toy panangaro ed sayan pamilya ya mankakkaukolan.
Imadyinen met iya: Walay sanasawa ya angimbitad kakongregasyon da ya mansosolon ina tan ed duaran ananak to ya mandem diad abung da. Nen imbaga itan na ina ed ananak to, manliket ira. Eksayted la rad satan. Balet antis to may nantongtongan dan agew, imbaga na sanasawa ed samay ina ya agla natuloy imay imbitasyon da ta walay agawan agda iilaloan. Insan naamtaan na ina so rason. Wala manayay angimbitad samay sanasawa diad saman met ya labi tan ineselan da.
Lapud Kristiano itayo, siempre nepeg ya tooren tayoy salita tayo. Agtayo ibabagan “On” insan magmaliw met lanlamang ya “Andi.” (2 Cor. 1:18) Balet singa ipapanengneng na samay duaran alimbawa, aliwan amin ya situasyon et parepareho. Ompan wala ray panaon ya singa anggapo lay nagawaan tayo tan talagan kaukolan ya kanselaen so insipan tayo. Naeksperiensya itan nen apostol Pablo.
INAKUSAAN SI PABLO YA AGNAPANMATALKAN
Nen 55 C.E., legan ya walad Efeso si Pablo diad komatlon impanbiahe to bilang misionero, labay toy manbiahed Dayat Aegean tan onsamar ed Corinto, insan manlapud man et onlad Macedonia. Diad ipawil tod Jerusalem, plano to lamet ya bisitaen so kongregasyon ed Corinto pian kolektaen so maaron regalo da parad saray agagid Jerusalem. (1 Cor. 16:3) Amta tayo itan ta oniay nabasad 2 Corinto 1:15, 16: “Lapud sayan panagmatalek, nononoten ko la nensaman so onla ed sikayo, ta pian naliketan kayo ed komaduan pankanawnawa, tan kayari na isamar ko ed sikayo et onla ak ed Macedonia, tan ompawil ak ed sikayo manlapud Macedonia tan ipatnubang yo ak sano onla ak ed Judea.”
Mapatnag ya wala lay inmunan sulat nen Pablo ed saray agagid Corinto ya ditan et imbaga toy plano ton ombisita. (1 Cor. 5:9) Balet nen nipawit la nen Pablo itan ya sulat, naamtaan to diad sankaabungan nen Cloe ya walay seryoson problema diad kongregasyon ed Corinto. (1 Cor. 1:10, 11) Kanian inuman nen Pablo so plano to, insan to ra sinulatan. Satan imay sulat ya tatawagen tayo natan ya 1 Corinto. Ditan et maaro iran sinimbawa tan kinorihe nen Pablo. Imbaga to met ed sikara ya inuman toy rota to, ya onla nin unona ed Macedonia insan diad Corinto.—1 Cor. 16:5, 6. *
Nen naawat na agagid Corinto so sulat to, wala ray pigaran “sankamaongan ya apostol” ed satan ya kongregasyon ya inakusaan day Pablo ya agto kuno totoorey salita to tan manguman-uman so nonot to. Indepensa nen Pablo so sarili to. Intepet to: “Sanen nononoten ko itan, agta aliwan alemlemew so impangipasen ko ed satan? Odino saray bengatlan inggagalak, kasin unong iratan ed laman, ta pian ibagak ya ‘On, On’ insan ‘Andi, Andi’?”—2 Cor. 1:17; 11:5.
Nayarin naisip tayo, Talagan kasin ‘alemlemew so impangipasen’ nen Pablo ed satan? Siempre andi! Amay salitan nipatalos ya “alemlemew” et mankabaliksay panguman-uman na nonot, tan uusaren itan ya salita pian deskribien so toon agto totoorey salita to. Ipapalinew nen Pablo diad samay tepet ton ‘kasin saray bengatlan inggagalak et unong ed laman?’ ya aliwan lapud inuman toy plano to et agla napanmatalkan.
Impanengneng nen Pablo ya aliwan tua imay akusasyon nen insulat to ya: “Balet napanmatalkan so Dios a say sasalitaen mi ed sikayo et aliwa ya On insan Andi.” (2 Cor. 1:18) Inuman nen Pablo so plano to lapud sankanonot toy pankaabigan na saray agagid Corinto. Diad 2 Corinto 1:23, imbaga nen Pablo: “Agak ni linma ditan ed Corinto ta pian agkayo lalon manermen.” On, inikdan to ray pankanawnawa ya ayosen so problema antis to ran bisitaen. Legan ya walad Macedonia si Pablo, naamtaan tod si Tito ya lapud sulat to et amoria na saray agagid Corinto ya aliway gagawaen da tan nagbabawi ra. Lapud satan et aliketan si Pablo.—2 Cor. 6:11; 7:5-7.
SAY “AMEN” YA IBABALIKAS TAYOD DIOS
Nen inakusaan si Pablo ya agnapanmatalkan so salita to, singa da ibabagan agmet napanmatalkan so impulong to. Impanonot balet nen Pablo ed saray agagid Corinto ya say impulong tod sikara et say mensahe nen Jesu-Kristo. “Say Anak na Dios, si Kristo Jesus, ya impulong mi ed sikayo, kaibak si Silvano tan si Timoteo, et agnagmaliw ya On insan Andi, balet say On et nagmaliw ya On ed sikato.” (2 Cor. 1:19) Kasin agnapanmatalkan si Jesu-Kristo? Andi! Diad interon bilay tan ministeryo to, katuaan ya lanang so sinalita to. (Juan 14:6; 18:37) No tua tan napanmatalkan so impulong nen Jesus, tan atan met so impulong nen Pablo, napanmatalkan met sirin so impulong na sayan apostol.
Siempre, si Jehova so “Dios na katuaan.” (Sal. 31:5) Nanengneng tayo itan ed samay sinmublay ya imbaga nen Pablo: “Anggan panon karakel iray sipan na Dios, nagmaliw iratan ya On diad panamegley to,” diad panamegley na Kristo. Lapud nansiansian matoor si Jesus nen wadiad dalin, anggapon balot so basiyan ya panduaruwaan iray sipan nen Jehova. Intuloy nen Pablo: “Kanian diad panamegley to [si Jesus] et ibabalikas tayo ed Dios so ‘Amen’ ta pian sikatoy nigloria tayo.” (2 Cor. 1:20) Si Jesus so “Amen” o say garantiya ya amin a sipan nen Jehova et ontua!
No panon ya lanang a sasalitaen nen Jehova tan Jesus so katuaan, totooren ya lanang met nen Pablo so salita to. (2 Cor. 1:19) Agmanguman-uman so nonot to tan agmangisisipan ‘unong ed laman.’ (2 Cor. 1:17) Imbes, sikatoy ‘nanakar unong ed espiritu.’ (Gal. 5:16) Sankanonot toy pankaabigan na arum diad amin ya ginawa to. Say On to et On!
KASIN SAY ON MO ET ON?
Diad panaon tayo, normal labat ed totoon agmanbibilay ed prinsipyoy Biblia ya agda toorey sipan da anggano say rason et melag met labat a problema odino biglan walay mas labay dan gawaen. Diad negosyo, say “on” et aliwan lanang ya “on” anggano wala ni kasulatan. Parad dakel natan, say pankasal et aliwa lan legay bilay ya paknaan. Dakel so mandidiborsyo tan paneknek itan ya parad sikara et ag-importante imay sipanan da kanian mapmainomay dan pultoten.—2 Tim. 3:1, 2.
Sika ey? Kasin say On mo et On? Tua, singa abasa tayod gapo na sayan artikulo, ompan no maminsan et kaukolan mon kanselaen so sakey ya appointment aliwan lapud manguman-uman so nonot mo, noagta lapud wala ray situasyon ya agmo nakontrol. Balet bilang Kristiano, no walay imbagam odino insipan mo, gawam so anggaay nayarian mon tooren itan. (Sal. 15:4; Mat. 5:37) No ontan, nanengneng na totoo ya napanmatalkan ka, totooren moy salitam, tan lanang ya katuaan so ibabagam. (Efe. 4:15, 25; Sant. 5:12) No ontan so reputasyon mo, mas ondengel irad sika no ipulong mod sikara so Panarian na Dios. Kanian seguroen tayon say On tayo et talagan On!
^ par. 7 Kayarin insulat nen Pablo so 1 Corinto, sikatoy dinmalan ed Troas paonlad Macedonia, tan ditan to insulat so 2 Corinto. (2 Cor. 2:12; 7:5) Insan kayari to et binmisitad Corinto.
