DIAD tua, agak mapaga ya daiset labat so inmatendid saman ya paliwawak nen 1957. Nensaman ni et mabapbaing ak la. Nen ugaw ak ni, onamot ak no wala ray ombisitad abung mi, anggano kabat ko ra.

Tua, ompan nabigla kayo no naamtaan yon maslak ed saray asainmin kod organisasyon nen Jehova et mankaukolan na pitongtong ed dakel ya totoo​—balanglan kakaaro odino arum a too. Balet, talagan mabapbaing ak tan anggapoy talek kod sarilik, kanian agko nibagan siak so lapuan na intalonak ed saraman ya asainmin ko. Imbes, anengneng kon tua so sipan nen Jehova: ‘Pabiskegen ta ka naani, on, tulongan ta ka, ampayaen ta ka ed nikawanan a lima na inkatunong ko.’ (Isa. 41:10) Sakey ed saray manunan paraan na intulong nen Jehova ed siak et panamegley na suporta na agagi. Ibagak ed sikayo so pigarad saratan manlapu la nen ugaw ak ni.

Diad kabuasan na Simba nen dekada na 1940, si Elsie Huntingford et nampulong ed uma na pamilya mi diad southwestern Ontario. Si nanay ko so akitongtong ed sikato diad puerta, balet si tatay ko ya mabaing met a singa siak et inmirong ed abay ko diad loob, tan  dinmengel. Say amta nen tatay ko et lalakoan nen Sister Huntingford si nanay ko na agmi met kaukolan, kanian sikatoy inmasingger ed puerta tan imbaga ton agkami interesado. “Agkayo interesadon manaral na Biblia?” so intepet nen Sister Huntingford. “Siempre interesado kamid satan,” so ebat nen tatay ko.

Dugarugay imbisitad sikami nen Sister Huntingford. Aktibon maong iray ateng ko ed United Church diad Canada balet inmekal lanlamang irad satan. Akin? Lapud kaloob ed simbaan, nanengneng so impaskil na ministro ya listaan na amin ya mangiiter na kuarta tan no pigaray iiter da. Mairap labat iray ateng ko kanian say ngaran da et lanang ya walad sampot na listaan, tan pipiliten ira na mamasiken na simbaan ya aruman da ni iter da. Lapud aglabay na sakey a ministro ya naekal ed trabaho to, inamin ton agto ibabangat iray talagan papanisiaan to. Kanian inmekal kamid simbaan, balet siansia nin manaanap kami paraan pian napenek so espiritual a pankaukolan mi.

Diad saman et sebel so kimey na Saray Tasi nen Jehova ed Canada, kanian say uusaren labat nen Sister Huntingford no iyaralan toy pamilya mi et say Biblia tan pigaran nota ed melag ya andeket a libro to. Nen amoria ton agmi idalem ed autoridad, inikdan to kami literatura ed Biblia. Maalwar min iyaamot iray publikasyon kayari na kada panaral mi. *

Anggaman wala ray isusumpa tan subok, masetseseg si Sister Huntingford ya angipulong ed maong a balita. Apaseseg ak ed sikato tan apakiwas ak ya ondapag ed katuaan. Sakey taon kayarin abautismoan iray ateng ko bilang Tasi nen Jehova, indedikak so bilay kod Dios. Nampabautismo ak nen Pebrero 27, 1949 diad sakey a metal ya panag-inuman na saray ayep. Say edad kod saman et 17. Kayari to, determinado ak a manlingkor ya sigpot-panaon ed ministeryo.

Manaalangan ak no kasin manpayunir ak ya tampol. Nantrabaho ak ni ya agano ed bangko tan ed opisina ta inisip kon kaukolan koy kuarta pian walay pansuportak ed pampayunir ko. Balet lapud kalangweran ak ni, no walay kuartak et igastos kon  tampol. Kanian pinaseseg ak nen brother Ted Sargent ya manpakpel tan manmatalek ed si Jehova. (1 Awa. 28:10) Lapud saman ya maaron panamaseseg to, nampayunir ak nen Nobyembre 1951. Wala labat so 40 dolyar ko, daan ya bisikleta, tan balon bag. Balet naynay ya seseguroen nen Jehova ya niwalad siak iray nakaukolan ko. Misalsalamat ak ta pinaseseg ak nen Ted ya manpayunir! Lapud satan et dakdakel ni agamoran kon bendisyon.

Sakey ya labi diad bandad sampot na Agosto 1952, akaawat ak na tawag manlapud Toronto. Inimbitaan ak na branch office na Saray Tasi nen Jehova diad Canada ya onggapon manlingkor ed Bethel diad Setyembre. Anggano mabaing ak tan agak nin balot akaonlad branch, eksayted ak ta marakdakep iray ibabagad siak na arum ya payunir nipaakar ed Bethel. Komportable ak ya tampol.

Duay taon kayari insabik ed Bethel, diad sakey ya kongregasyon ed Toronto, siak so sinmalat ed si Bill Yacos bilang congregation servant (natan et coordinator na ulop na mamatatken). Lapud 23 años ko ni labat, pakaliknak et singa ak inosentin dumaralos. Balet mapaabeba tan maaron imbangat ak nen Brother Yacos no antoy gawaen ko. Tan talagan tinulongan ak nen Jehova.

Si Brother Yacos, ya sakey a maregkel tan maimis ya brother, et interesadod totoo. Inaro to ray agagi, kanian sikatoy inaro da met. Regular to ran bibisitaen ed saray abung da, aliwa labat lan no wala ray problema da. Pinaseseg ak nen Bill Yacos ya gawaen met iman tan mikimey ed saray agagi diad ministeryo. “Ken,” so inkuan to, “ipaliknam ed saray agagi ya iyaansakit mo ra. Sakbongan na satan so dakel ya lingo.”

Tinulongan ak nen Jehova diad nikaduman paraan manlapu nen Enero 1957. Diad satan ya bulan et nankasal kami nen Evelyn, sikatoy akapanaral ed koma 14 a klase na Gilead. Antis kamin mankasal, sikatoy manlilingkor ed probinsya na Quebec ya mansasalitay French. Diad saman a panaon, kontrolado na Simbaan na Romanon Katoliko so Quebec. Kanian mair-irap so asainmin nen Evelyn, balet nansiansian matoor ed satan tan ed si Jehova.

Nansiansia met ya matoor si Evelyn ed siak. (Efe. 5:31) Diad tua, asubok so katooran to kayarin tampol na impankasal mi! Wala lay plano min ompasyar ed Florida, U.S.A., balet sakey agew kayari bansal mi, imbaki ak na branch ya onatendid sakey simban miting ed Bethel diad Canada. Siempre, lapud sayan miting, agla natuloy iray plano mi, balet labalabay mi nen Evelyn ya gawaen so antokaman ya ipagawa nen Jehova ed sikami. Kanian, kinansela mi honeymoon mi. Legan na satan ya simba, sikatoy nampulong diad asingger ed branch. Anggaman duman maong so teritorya no ikomparad Quebec, inanosan to.

Diad sampot na satan a simba, asurprisa ak—naasain ak bilang manangasikaso na sirkito diad northern Ontario. Kapkapankasal ko, 25 años ko ni labat, tan talagan kulang ni eksperiensyak, balet nanmatalek kamid si Jehova tan tinmuloy kami. Diad sakey ed saray sankabetelan ya agew legan  na winter ed Canada, sanlabi kamin akalugan ed tren kaiba iray eksperiensyadon ombiabiahen manangasikaso ya ompawil lad saray teritorya ra. Talagan pinaseseg da kamin maong! Pinilit kami ni ingen na sakey a brother ya onugip ed kuarto diad tren ya inreserba ton parad sikato komon, pian agkami sanlabin akayurong. Kaimbuasan to, 15 agew labat kayari bansal mi, binmisita kami ed melag a grupo diad Hornepayne, ya singa abitlak ed gapo.

Dakel nin pananguman so agawad sikami nen Evelyn. Legan kamin walad distriton kimey nen mansamposampot so taon na 1960, akaawat ak na imbitasyon ya manaral ed koma 36 a klase na Gilead. Samploy-bulan iyan kurso ya onggapod bulan na Pebrero 1961 diad Brooklyn, New York. Siempre, malikeliket ak, balet abawasay liket ko nen naamtaan kon agko kaiban manaral si Evelyn. Singa met ed arum ya asawan bii ya walad ontan a kipapasen, sikatoy pinansulat ya ibaga ton mabulos ya mansian kamin magano na samploy bulan. Manakis si Evelyn, balet nandesisyon kamin manaral ak, tan sikatoy maliket ta naeksperiensyak so makanakanan panangipasal ed Gilead.

Legan ya manaaral ak, nanlingkor si Evelyn ed branch diad Canada. Sikatoy apribilehyoan a maong ta nagmaliw ya roommate to so maar-aron alanaan a sister ya si Margaret Lovell. Siempre, nami-miss min maong nen Evelyn so sakey tan sakey. Balet diad tulong nen Jehova, ayarian mi ray temporaryon asainmin mi. Talagan atenyeg so pusok lapud mabulos ton insakripisyoy panaon ya paniba mi komon, pian mas nausar kami nen Jehova tan na organisasyon to.

Kayari na manga taloy bulan kod Gilead, walay nikadkaduman imbitasyon ya inyopresid siak nen Brother Nathan Knorr, say mangidadaulod sankamundoan ya kimey ed saman. Tinepetan to ak no labay kon itunda ed saman so panaaral kod Gilead tan ompawil ed Canada pian temporaryon manlingkor bilang instruktor ed Kingdom Ministry School diad branch. Imbagad siak nen Brother Knorr ya agko met kaukolan ya awaten so imbitasyon. Sarag kon sumpalen so panaaral kod Gilead no labay ko tan posiblin niasain ak bilang misionero. Imbaga to met ya no mandesisyon ak ya ompawil ed Canada, ompan agak lan balot makapanaral lamet ed Gilead, tan diad satan et ompan niasain ak ya ompaway lanlamang ed Bethel na Canada. Inabuloyan to ak ya mandesisyon kayarik ya itongtong iyad asawak.

Lapud imbaga lad siak nen Evelyn so panmoria tod saray teokratikon asainmin, tampol kon imbagad si Brother Knorr, “Antokaman a labay na organisasyon nen Jehova ya ipagawad sikami, maliket min gawaen.” Naynay min sankanonot ya anggano duma iya ed panlabayan mi, kaukolan mi onla ed anggad iner ya pangibakian ed sikami na organisasyon nen Jehova.

Kanian nen Abril 1961, inmalis ak lad Brooklyn tan pinmawil ak ed Canada pian makapanbangat ed Kingdom Ministry School. Sinmabi panaon,  nanlingkor kami bilang membro na pamilyan Bethel. Insan nen kien, abigla ak ta akaawat ak na imbitasyon ya manaral ed koma 40 a klase na Gilead, ya onggapod 1965. Kanian kaukolan lamet nen Evelyn so mansulat ya sikatoy onabuloy ed pansian min magano. Balet kayari pigaran simba, manliket kamin dua ta akaawat met si Evelyn na imbitasyon pian manaral a kaibak.

Kasabi mid Gilead, imbaga nen Brother Knorr ya saray estudyanten akapanaral na lenguahen French, ya singa sikami, et ibaki ed Africa. Balet diad graduation mi, niasain kamin ompawil ed Canada! Aturo ak ya balon manangasikaso na branch (ya natan et Branch Committee coordinator). Lapud 34 años ko ni labat, impanonot kod si Brother Knorr ya uga-ugaw ak ni. Balet pinabiskeg to ak. Nanlapu lad inggapok ed satan ya pribilehyo, naynay ak ya onkokonsulta ed saray mas matatken tan mas eksperiensyadon brother diad Bethel antis ak ya manggaway importante iran desisyon.

Lapud impanlingkor kod Bethel, awalaan ak na pankanawnawan makaaral ed arum. Rerespetoen tan talagan pandinayewan ko iray arum ya membro na Branch Committee. Maabig met so impluensya ed siak na nilasus iran Kristianon lalaki tan bibii—kalangweran tan mamatatken—ya akaiba min manlilingkor dia ed branch tan ed nanduruman kongregasyon ya nanlingkoran mi.

Tan lapud impanlingkor kod Bethel, awalaan ak na pankanawnawan bangatan so arum tan pabiskegey pananisia ra. Imbaga nen apostol Pablo ed si Timoteo: “Saray nadngel mo ed siak a sinuportaan na dakel a tasi et imatalek mo ed saray matoor a lalaki pian magmaliw met iran kualipikadon manbangat ed arum.” (2 Tim. 2:2; 3:14) No maminsan, wala ray agagin mantepet ed siak no antoy naaralan ko ed 57 taon lan panlilingkor kod Bethel. Say simplin ebat ko et, “Mabulbulos tan gawam a tampol so pagagawa na organisasyon nen Jehova ed sika, manmatalek kan tulongan ka nen Jehova.”

Singa nen karuman ak labat sinmabid Bethel, sakey ya mabaing ya ugaw a lakin kulang na eksperiensya. Balet diad amin na sarayan taon, si Jehova et ‘mamebemben ed kawanan a limak.’ Nagkalalo la, panamegley na kaabigan tan nipanpanaon ya tulong na saray agagi, itutultuloy ton papaseguroan ak ya: ‘Agka ontatakot. Tulongan ta ka.’​—Isa. 41:13.