1, 2. Akin et natatalosan nen Pablo so liknaan na saray makapuy?

WALA ray panaon ya makapuy tayo. No natrangkaso odino walay arum ya liliknaen tayo, ompan nairapan tayon gawaen iray kimey ed inagew-agew. Balet imadyin mo pa no aliwa labat ya sakey o duaran simba ya makakkapuy ka, noagta pigaran bulan. No ontay kipapasen mo, agta labay mo ya talosan ka na arum tan milikna irad sika?

² Asali met nen apostol Pablo so kinmapuy lapud problema ed paway tan loob na kongregasyon. Aliwa labat ya aminpinsan ya alikna ton singa agto la nayarian. (2 Cor. 1:8; 7:5) Diad amin ya dinadalan ton irap bilang matoor a Kristiano, oniay imbaga to: “Siopa so makapuy, tan agak makapuy?” (2 Cor. 11:29) Nen inkompara nen Pablo iray membro na Kristianon kongregasyon ed parte na laman, imbaga ton anggan saramay ‘singano mas makapuy et nakaukolan.’ (1 Cor. 12:22) Antoy labay ton ibaga? Akin et nepeg ya miparad si Jehova so panmoria tayod saray agagin singano mas makapuy? Tan panon itayon nagunggonaan no ontan so gawaen tayo?

3. Antoy nayarin makaimpluensya ed panmoria tayod saray agagin mankaukolan na tulong?

³ Diad mundo natan, makompetensia iray totoo tan parad sikara et importante so kaksilan pian onaligwas. Gagawaen dan amin pian naala ray labay da, anggano naagrabyado day arum. Agtayo kokonsintien so ontan ya ugali, balet ompan agtayo naliklikas ya naiimpluensyaan itayo la tan manisip tayo lay aliwa ed saray agagin mankaukolan na tulong. Panon tayon naalig so panmoria nen Jehova ed kada membro na kongregasyon?

4, 5. (a) Antoy naaralan tayod samay ilustrasyon ya nabasad 1 Corinto 12:21-23 nipaakar ed panmoria nen Jehova ed kada lingkor to? (b) Panon itayon nagunggonaan no tulongan tayo ray makapuy?

⁴ Parad si Jehova, importante so kada membro na kongregasyon. Diad kapitulo 12 na unonan sulat nen Pablo ed saray taga Corinto, impanonot ton anggan saray agmarakep o sankakapuyan ya parte na laman na too et walay usar da. (Basaen so 1 Corinto 12:12, 18, 21-23.) Ibabaga na arum ya manisia ed ebolusyon ya wala ray parte na laman na too ya agkaukolan. Balet apaneknekan ya saramay parte na laman ya datin iisipen dan anggapoy usar to et importante manaya. * Singa bilang, panduaruwaan na arum nensaman no kasin walay usar na kiking ed sali, balet natan et adiskobre na saray sientista ya ontutulong itan pian nabalanse tayoy laman tayo.

⁵ Idadanet na ilustrasyon nen Pablo ya makana so amin ya membro na Kristianon kongregasyon. Labay nen Satanas ya isipen tayon anggapoy kana tayo. Balet parad si Jehova, amin a lingkor to et “nakaukolan” ed kongregasyon, anggan saramay singa makapuy. (Job 4:18, 19) No ontan sirin, tandaan ya balang sakey et walaan na importantin betang diad kongregasyon tayo, ontan met ed sankamundoan ya kongregasyon na Dios. Alimbawa, asalim ta lan intabin so sakey ya maedad la? Anganko et intantan moy akar mo. Akatulong kad samay agi, balet agta sikan mismo et balibali liknaan mo? On, no ontutulong tayod arum, maliket itayo tan magmaliw tayon mas maanos, maarod saray agagi, tan ontatken tayod espiritual. (Efe. 4:15, 16) Labay nen Jehova ya moriaen tayon importante iray agagi, anggan saramay singa makapuy. No ontan so panmoria tayo, ikonsidera tayoy limitasyon da tan magmaliw ya mas maaro so interon kongregasyon.

6. Panon ya inusar nen Pablo so salitan “makapuy” tan “mabiskeg”?

⁶ Tua, inusar nen Pablo so salitan “makapuy” nen tinukoy toy arum ya agagi diad kongregasyon. Say rason et lapud ontan so panmoria na saray agmananisia ed saray Kristiano nensaman. Diad tua, imbaga nen Pablo ya anggan sikato et makapuy. (1 Cor. 1:26, 27; 2:3) Tan nen inusar toy salitan “mabiskeg,” agto labay ya ibagan wala ray Kristiano ya mas maong nen say arum. (Roma 15:1) Imbes, idadanet to ya nepeg ya maanos iray eksperiensyado lan Kristiano ed saray agagin agano ni ed katuaan.

7. Akin ya no maminsan et aliwan mainomay so itulong ed saray mankaukolan?

⁷ No tutulongan tayo ray “duka” o pakaskasi, aaligen tayoy Jehova tan naawat tayoy bendisyon to. (Sal. 41:1; Efe. 5:1) Balet no maminsan aliwa itan ya mainomay ya gawaen. Akin? Nayarin isipen tayo ya  akauley iray agagi ed saray problema ra. Odino iwasan tayo la ra ta agtayo antay ibaga tayo. Oniay imbaga nen Cynthia, * ya tinaynan na asawa to: “Ansakit no iwasan ka na saray agagi odino agda gawaen so iilaloan mod sakey ya kaaro. No wala ray subok, labay mon wadtan so arum ya onsuporta.” Anggan si Arin David nensaman et asakitan met nen iniwasan na saray kakaaro to.—Sal. 31:12.

8. Antoy makatulong pian mas natalosan tayo ray agagin mankaukolan na suporta?

⁸ Antoy makatulong pian mas natalosan tayo ray agagin mankaukolan na suporta? Tandaan ya say arum ed sikara et kinmakkapuy lapud mairap so situasyon da—wala ray mansasakit, aliwan Tasi kapamilyaan da, odino nade-depress ira. Ompan onsabi panaon et naeksperiensya tayo met iratan. Nonoten pa iray Israelita. Nanirap iran maong ed Ehipto, balet antis iran linmoob ed Insipan a Dalin et pinanonotan ira nen Jehova ya agda nepeg ya ‘pagmaliwen a singa bato so puso ra’ ed saray agagi da ya maniirap. Ilaloan nen Jehova ya mabulos iran ontulong.—Deu. 15:7, 11; Lev. 25:35-38.

9. No onkakapuy so agi, antoy unonan gawaen tayo? Iyilustra.

⁹ Imbes ya husgaan odino pansuspetsaan tayo iray agagin walad mairap a situasyon, nepeg tayo ran pabiskegen ed espiritual. (Job 33:6, 7; Mat. 7:1) Singa bilang: No walay imbatik ed ospital lapud aksidente ed dalan, kasin amtaen ni na saray doktor tan nars no sikatoy akankasalanan? Andi, tambalen dan tampol. Ontan met ed sikatayo, no kinmapuy so sakey ya agi lapud walay problema to, say unonan gawaen tayo et tulongan tayod espiritual.—Basaen so 1 Tesalonica 5:14.

10. Akin et nibaga tayon wala ray agagin “mayaman ed pananisia” anggano singa ra makapuy?

¹⁰ Wala ray agagi ya say pakanengneng tayod sikara et makapuy. Balet no nonoten tayon maong so situasyon da, manguman so panmoria tayod sikara. Nonoten pa iray sister ya pigay taon da lan aanosan so isusumpa na pamilya da. Ompan say arum ed sikara et pakaskasi itsura da, balet agta makapadinayew so ipapanengneng dan pananisia tan pakpel? No nanenengneng mo so sakey ya mansusulon ina ya kaiba ton lanang iray ananak to diad aral, agka kasi napapabiskeg ed pananisia tan determinasyon to? Agta ontan met so nibaga tayod saray kalangweran ya inagew-agew dan lalabanan so mauges ya impluensyad eskuelaan? On, bidbiren tayo ya say ontan iran agagi et “mayaman ed pananisia” a singa met ed arum ya agagi ya mas maabig so kipapasen da.—Sant. 2:5.

11, 12. (a) Antoy makatulong pian naalig tayoy panmoria nen Jehova ed kakapuyan na too? (b) Antoy naaralan tayod impideneng nen Jehova ed si Aaron?

¹¹ Natulongan tayon aligen so panmoria nen Jehova ed kakapuyan na too no aralen tayo no panoy impideneng tod saray lingkor to nensaman. (Basaen so Salmo 130:3.) Alimbawa, no bilang ta wadman kad abay nen Moises legan ya ibabaga nen Aaron iray ataptapew ya baraan to no akin ya nanggawa na talintaon baka, anto kasi pakanengneng mod si Aaron? (Exo. 32:21-24) Odino anto kasi naliknam no arengel moy pangikuestion nen Aaron tan Miriam ed si Moises lapud impangasawa toy biin aliwan Israelita? (Num. 12:1, 2) Tan anto kasi reaksion mo nen ag-inter nen Aaron tan Moises so galang ya parad si Jehova nen Sikatoy amapaway na danum diad Meriba?—Num. 20:10-13.

¹² Diad saratan ya situasyon, sarag komon nen Jehova ya dusaen a tampol si  Aaron. Balet amta to ya aliwan mauges a too si Aaron tan aliwan sikato so manunan natetel. Sikatoy alingo lapud mairap ya situasyon tan impluensya na arum. Balet nen nipamoriad sikato iray lingo to, inamin ton tampol tan inawat toy simbawa nen Jehova. (Exo. 32:26; Num. 12:11; 20:23-27) Say ninengneng nen Jehova et say pananisia nen Aaron tan say pagbabawi to. Kalabas na pigaran siglo, kabkabat nin siansia si Aaron tan saray ilalak to ya walaan na takot ed si Jehova.—Sal. 115:10-12; 135:19, 20.

13. Panon tayon nauman so panagnonot tayo? Mangiter na alimbawa.

¹³ Singa si Aaron, nayarin makagawa met na lingo so sakey ya agi. No ontan, anto lay pakanengneng mod sikato ey? Kasin kaukolan mon umaney panagnonot mo? (1 Sam. 16:7) Singa bilang, antoy reaksion mo no walay kalangweran ya agmaalwar ed panagpili toy panagligliwaan odino walay aliwliwan kagagawa to? Imbes ya husgaan mon tampol, anto kasi no nonoten mo no panon mon natulongan pian onaligwas ed espiritual? Sikatayo lay manggaway paraan pian natulongan tayo so sakey ya agi. No ontan so gawaen tayo, magmaliw tayon mas maanos tan maaro ed saray agagi tayo.

14, 15. (a) Antoy alikna nen Jehova nen naandi pakpel nen Elias? (b) Antoy naaralan tayod paraan na intulong nen Jehova ed si Elias?

¹⁴ Onlaknab met so pakatalos tayod arum no ikompara tayoy panagnonot tayo ed reaksion nen Jehova ed saray lingkor to ya kinmakkapuy so liknaan da. Say sakey ya alimbawa et si Elias. Anggano sikatoy makmakpel ya akiarap ed 450 ya propeta nen Baal, binmatik nen naamtaan ton plano nen Reyna Jezebel ya pateyen. Nanakar na 150 kilometro paonlad Beer-sheba ya anggad akasabid kalawakan. Lapud naknaksawan  ed impanakar tod mansasnit ya petang na agew, inyurong tod silong na kiew tan impikasi tod si Jehova ya ompatey la komon.—1 Ara. 18:19; 19:1-4.

¹⁵ Anto kasi alikna nen Jehova legan ton sankanengneng manlapud tawen so matoor ya propeta to ya natatakot tan maer-ermen? Kasin pinaulyanan to la ta anengneng ton kinmapuy so liknaan to tan naandi pakpel to? Andi! Inkonsidera nen Jehova iray limitasyon nen Elias tan angibaki na anghel. Amiduan inikdan na anghel si Elias na kanen to pian walay biskeg ton ituloy so panaakar to. (Basaen so 1 Arari 19:5-8.) On, antis ya angiter si Jehova na instruksion ed si Elias, dinengel to ni insan nanggaway paraan pian natulongan to.

16, 17. Panon tayon naalig so impangasikaso nen Jehova ed si Elias?

¹⁶ Panon tayon naalig so maaron Dios tayo? Agtayo bengatbengat ya manisimbawa. (Uli. 18:13) No say agi et nade-depress tan liknaen ton anggapoy kana to, mas maabig no dengelen tayo nin unona tan ipalikna tayon natatalosan tayoy situasyon to. (1 Cor. 12:23) No ontan so gawaen tayo, naamtaan tayo no anton tulong so talagan kaukolan to.

¹⁷ Singa bilang, nonoten pay Cynthia ya abitla nen niman ya tinaynan na asawa to tan atilak ed sikato so duaran anak dan bii. Agaylay ermen da. Antoy ginawa na arum ya agagi? Oniay imbaga to: “Nen tinawagan mi ra tan impaamta mid sikaray agawa, wala la rad abung mi kayari manga 45 minuto. Manakis ira. Agda kami tinaynan anggad komadua o komatlon agew. Lapud agkami makakapangan tan emosyonal kamin maong, pinan-ayam da kami nid abung da.” Nayarin nanonotan yod sayan eksperiensya imay insulat nen Santiago: “No say sakey ya agin laki odino agin bii et mankaukolay kawes tan kanen parad sanagew, ingen ta sakey ed sikayo so mangikuan ed sikaran: ‘La kayo ed kareenan, napetangan tan napesel kayo komon,’ balet ta agyo ra ikdan na saray nakaukolan na laman da, antoy gunggona na satan? Ontan met sirin, say pananisia et inatey no andian na saray gawa.” (Sant. 2:15-17) Maong labat ta wadtan iray agagid kongregasyon ya sinmuporta ed si Cynthia tan ed ananak to, tan lapud satan et akapan-auxiliary payunir ira kalabas labat na anem bulan manlapud saman ya maer-ermen ya agawa.—2 Cor. 12:10.

18, 19. (a) Panon tayon natulongan iray makapuy? (b) Siopay nagunggonaan no tulongan tayo ray makapuy?

¹⁸ No say sakey et walay graben sakit to, kaukolan ni manpalabas na panaon antis ya onabig. Ontan met ed agin kinmapuy lapud saray problema tod bilay, kaukolan so panaon pian ombiskeg lamet so espiritualidad to. Tua, nepeg ton pabiskegey pananisia to panamegley na personal ya panaral, pikakasi, tan pipiaral. Balet kaukolan to met so tulong tayo. Legan ton manpapabiskeg ed espiritual, kaukolan ya maanos tayod sikato. Itultuloy tayon ipanengneng so panangaro tan ipalikna tayon sikatoy importante ed kongregasyon.—2 Cor. 8:8.

¹⁹ Tandaan ya legan tayon tutulongan iray agagi, nalikna tayoy liket ya manlalapu labat ed panangiter. Naaralan tayo met so milikna tan magmaliw ya maanos. Balet aliwan sikatayo labat so nagunggonaan. Say interon kongregasyon et magmaliw ya mas maaro tan maapit ed sakey tan sakey. Sankaimportantian ed amin, aaligen tayoy Jehova, ya parad sikato et mabmabli so kada indibidual. On, dakel so rason tayo ya gawaen imay ibabaga na Biblia ya “tulongan iramay makapuy.”—Gawa 20:35.