Nayarin walay kabat mon sian ed asawa to—ompan dakel ingen so kabat mon ontan. On ta singa ordinaryo labat lay pansian natan. Singa bilang, naamtaan ed sakey ya research ed Poland ya saray mantaon na 30 ya talora o anem taon lan kasal et baleg so posibilidad ya mandiborsyo; tan aliwan sikara labat.

Diad tua, unong ed report na GMA News Online, “say bilang na sanasawan manfa-file na annulment ed [Pilipinas] et tuloytuloy ya dinmakel diad apalabas ya waloran taon, tan nen 2012, diad average et 28 ya sanasawa kada agew so labay da lay legal ya mansian.” Ontan met so situasyon diad mayaman iran bansa.

Antoy rason ed sayan nagagawa? Oniay imbaga na eksperiensyadon marriage counselor ed Eastern Europe: “Lapud diborsyo, magmaliw lan legal so akauna lan agawa—say impakaderal na relasyon tan impansian, ya ansakisakit ed liknaan.” Say onsublay ed satan et “sanok, pagbabawi, pakadismaya, ermen, tan kababaingan,” so kuan to. No maminsan et isipen na saray akisian so manbikkel. “No pinmaway lay pinal ya desisyon na korte, onggapo la so onsublay ya parte. Nalikna na toon akidiborsyo ya anggapoy kana to tan bukbukor to la kanian isipen to: ‘Natan ya sian ak la, siopa ak la ey? Anto lay gawaen kod bilay ko?’”

Oniay imbaga nen Ewa ya alikna to pigaran taon lay apalabas: “Talagan nababaingan ak nen saray kakaabay tan katrabahok et tawagen da ak ya ‘diborsyada’ nen pinal lay desisyon na korte. Agaylay pasnok ko. Lapud atilak ed siak so duaran angkekelag nin anako, siak so nagmaliw ya nanay tan tatay da.” * Oniay komento nen Adam ya 12 taon a nanlingkor bilang elder: “Ngalngali anggapo lay respetok ed sarilik, ya no maminsan et onsanok ak ya maong, tan singa labay koy manbukbukor.”

Wala ray arum ya lapud mapagpaga irad arapen et irap day nawalaan na dugan panmoria—anggano pigaran taon lay linmabas manlapu nen akisian ira. Nayarin isipen dan ag-ira iyaansakit na arum. Sakey ni, kaukolan da lan “umanen so apasalan dan kabibilay tan aralen ya solusyonan ya bukor iray problema,” unong ed sakey ya kolumnista.

Oniay istorya nen Stanisław: “Nen nandiborsyo kami la na datin asawak, sinebelan to ak ya nanengneng so duaran angkelag nin anak min bibii. Lapud satan, say pakaliknak et anggapoy mangaarod siak tan anggan si Jehova et pinaulyan to ak la. Agko la labay so manbilay. Balet amoriak lanlamang  ya talagan aliwa iman ya nononoten ko.” Lapud pampapaga ed arapen, aprobleman maong so sakey ya biin sian ya say ngaran to et Wanda. Inkuan ton: “Nen sian kami la, inisip ko ya anggapoy mangiyaansakit ed siak tan ed ananak ko—anggan saray agagi ingen. Balet natan ko namomoria ya talagan sinuportaan kami na saray agagi tan tinulongan da ak legan kon papabalegen iray ananak ko ya mandayew ed si Jehova.”

Nanengneng ed saratan ya komento ya kayari impansian, wala ray puro negatibo so nalikna tan isipen da. Nayarin abebbeba lay pakanengneng dad sarili da, ya isipen dan anggapoy kana ra tan ag-ira makanepegan ya aroen. Ompan husgaan da ni ingen iray totoon walad kaliberliber da. Bilang resulta, nayarin isipen da ya anggapoy mangaaro tan misisimpatya ed sikara diad kongregasyon. Balet ipapanengneng na eksperiensya di Stanisław tan Wanda ya amoria da met lanlamang ya iyaansakit ira na saray agagi. Diad tua, baleg so nitulong na saray kaparan Kristiano anggano diad gapo et singa agtanton naimano itan.

Tandaan ya anggano gawaen tayoy anggaay nayarian tayon tulongan iray agagi ya sian, nayarin no maminsan et onermen tan nadismaya ni ran siansia. Ompan isipen dan pigpigara labat so mangiyaansakit ed sikara, lalo lad biang na saray sister ya sian. Oniay inamin nen Alicja: “Waloy taon lay linmabas manlapu la nen akisian ak. Balet no maminsan et siansia nin naliliknak ya agak importante. No ontan lay naliliknak, labay ko lay manbukbukor insan ko la iyakis; kakkasian koy sarilik.”

Anggano natural ya ontay nalikna na saray agagi ya sian, isisimbawa na Biblia ya makapuy so pangibiig ed sarili. No agda unoren itan ya simbawa, ompan onsabi panaon et ipulisay da lay “amin ya aralem a kakabatan.” (Uli. 18:1) Balet nepeg da met ya tandaan ya aliwan makabat so mabetbet ya ikerew day simbawa o ligliwa ed agda kaparay sekso. Diad ontan et napaliisan ya ontubo so agmanepeg ya romantikon liknaan.

Nandurumay nalikna na saray agagi tayo ya sian—mapagpaga irad arapen, onermen ira, tan ompan isipen dan anggapoy mangaarod sikara. Talosan tayo ya normal iratan ya liknaan tan mairap iratan ya labanan, tan nepeg tayon aligey Jehova diad matoor tayon isuporta ed sarayan agagi. (Sal. 55:22; 1 Ped. 5:6, 7) Seguradon apresyaen day antokaman ya iter tayon tulong. On, nalikna day suporta na tuan kakaaro diad loob na kongregasyon!—Uli. 17:17; 18:24.