1, 2. Antoy pakanengneng nen Jehova ed kada lingkor to diad dalin?

NO BAPBANTAYAN na atateng iray anak da ya manggagalaw, mabetbet ya mandinayew irad naimano dan abilidad na ugugaw. Ompan anggan sika et naiimanom met itan. Nayarin say sakey ya ugaw et maong ed sports, say agi to balet et maong ya man-drowing. Antokaman so abilidad na ananak, panliketan na atateng ya tulongan ira pian nipaway day anggaay nayarian da.

² Interesado met si Jehova ed saray ananak to diad dalin. Diad pakanengneng to, sikaray “mabli a bengatla na saray amin a nasyon.” (Ag. 2:7) Say manunan rason ya mabli ira et lapud katooran tan debosyon da. Balet seguro, naimanom ya nandurumay talento na saray agagi. Wala ray brother ya maong a manpaliwawa, say arum balet et maong ed panangorganisa. Dakel ya sister so maples ya makaaral na sananey ya lenguahe tan nausar dan tampol ed panagpulong, say arum balet et maong ya mamaseseg tan mangasikasod saray mansasakit. (Roma 16:1, 12) Agta misalsalamat tayo ta kaiba tayod kongregasyon iray ontan ya agagi?

3. Anto ran tepet so pantongtongan ed sayan artikulo?

 ³ Balet wala ray agagi, lalo lad saray kalangweran o kakkapampabautismo da ni labat, ya iisipen dan anggapo ni makanan betang dad kongregasyon. Panon tayo ran natulongan pian nagawaan day anggaay nayarian da? Akin ya nepeg tayon nengnengen iray maong ya kualidad da, singa si Jehova?

4, 5. Panon ya napatnagan ed Uko-ukom 6:11-16 ya nanenengneng nen Jehova iray abilidad na saray lingkor to?

⁴ Nanengneng tayod pigaran salaysay ed Biblia ya aliwan say kamaongan labat na saray lingkor nen Jehova so nanenengneng to noagta pati saray sarag da nin gawaen. Alimbawa, nen pinili na Dios si Gideon ya ilaban iray Israelita ed saray Midianita, nayarin abigla si Gideon ed imbaga na anghel: “Si Jehova wala ed sika, sika makapanyari a laki.” Agbalot inisip nen Gideon ya sikatoy “makapanyari.” Diad tua, sikatoy manduaruwa ya sarag ton iliktar iray kabaleyan to. Balet napatnagan ed impantongtong da ya walay anengneng nen Jehova ed si Gideon ya anggan sikaton mismo et agto amta.—Basaen so Uko-ukom 6:11-16.

⁵ Matalek si Jehova ya nilaban nen Gideon so Israel ta naobserbaan To ray positibon kualidad to. Alimbawa, anengneng na anghel so impasyan pambabayo nen Gideon na trigo. Tan wala ni naimano na anghel. Nensaman, say kaslakan ya pambabayoan na saray dumaralos et diad paway pian ipalir na dagem so taep. Balet diad panagpespesan na ubas so pambabayoan nen Gideon—ontan so ginawa to pian agnasamsam na saray Midianita so dagdaiset ya ani to. Kampegan diad pakanengneng nen Jehova et aliwa labat ya maalwar ya dumaralos si Gideon noagta marundunong ya laki! On, anengneng nen Jehova so abilidad to tan pinili to ya manggawad linawa to.

6, 7. (a) Akin ya duma so pakanengneng nen Jehova ed si propetan Amos ed pakanengneng na arum ya Israelita ed sikato? (b) Antoy pakapatnagan ya aliwan ignorante si Amos?

⁶ Anengneng met nen Jehova so abilidad na propeta ton si Amos. Nayarin say pakanengneng na arum ed sikato et toon marendeen tan ag-importante. Indeskribe nen Amos so sarili to ya managpastol tan manag-asikaso na saray igos na kiew a sikomoro—aya may klase na igos ya nensaman et kakanen na saray mairap bilay. Kanian nen pinili nen Jehova si Amos ya mangideklaray panangukom ed samploran-tribun panarian na Israel, ompan inisip na arum ya Israelita ya alingoy Jehova ed impanpili to.—Basaen so Amos 7:14, 15.

⁷ Nanlapud nisulinek ya lugar si Amos, balet nibagan aliwan ignorante ta dakel so amta to nipaakar ed saray kustombre tan saray manuley nen panaon to. Amta to ray nagagawa ed Israel tan ed saray kakaabay dan bansa, nayarin lapud nakakatongtong to ray ombiabiahen negosyante. (Amos 1:6, 9, 11, 13; 2:8; 6:4-6) Ibabaga na pigaran Bible scholar ya maong ya managsulat si Amos. Simpli ray salitan inusar to balet mapuersa. Nanengneng tayod makpel ya inyebat tod mauges ya saserdoten si Amazias ya ag-alingoy Jehova ed pinili ton propeta. Wala ray anengneng ton abilidad nen Amos ya nayarin ag-anengneng na arum.—Amos 7:12, 13, 16, 17.

8. (a) Antoy impaseguro nen Jehova ed si David? (b) Akin ya makapaseseg so Salmo 32:8 ed saramay anggapoy kompiyansa dad sarili da?

⁸ On, naiimano nen Jehova iray abilidad na kada lingkor to. Impaseguro tod si Arin David ya lanang ton igiya, ya ‘akanengneng so mata to ed sikato.’ (Basaen so Salmo 32:8.) Akin et makapaseseg itan ed sikatayo? Anggano anggapoy kompiyansa tayod sarili tayo, tulongan itayo nen Jehova pian nagawaan tayo ray bengatlan say amta tayo et agtayo sarag. No panon ya say maong  ya maestra et tutokan toy sakey ya estudyante to pian makaaral ya maong, igigiya itayo nen Jehova pian niiter tayoy anggaay nayarian tayo. Sarag met nen Jehova ya usaren iray agagi pian nagawaan tayoy sankaabigan tayo. Panon?

9. Panon tayon niyaplika imay simbawa nen Pablo ya nonoten so pankaabigan na arum?

⁹ Pinaseseg nen Pablo so amin a Kristiano ya nonoten so pankaabigan na arum. (Basaen so Filipos 2:3, 4.) Say sakey ya paraan ya nagawaan tayo itan et no imanoen tayo ray abilidad na agagi tan ibaga tayo iratan ed sikara. Antoy nalikna tayo no walay makaimano ed iyaaligwas tayo? Kaslakan et napakiwas itayon gawaen ni anggaay nayarian tayo pian lalo tayon onaligwas. Kanian no ibabaga tayod saray agagi iray maong ya kualidad da, tutulongan tayo ran mantultuloy ya onaligwas ed espiritual.

10. Siopa so nagkalalo lan mankaukolan na atension tayo?

¹⁰ Siopa so nagkalalo lan mankaukolan na atension tayo? Siempre amin tayo et mankaukolay atension no maminsan. Balet talagan kaukolan ya nalikna na saray kalangweran o saray brother ya kakkapampabautismo da ni labat ya kabiangan irad saray aktibidad na kongregasyon. Ontulong itan pian natalosan da ya importante ira. Papasesegen na Biblia iray brother ya ondampot na kaaruman ni ran responsabilidad. (1 Tim. 3:1) Balet no agda nalilikna ya aapresyaen tayo ra ed panggagawa dad saray asainmin dad kongregasyon, ompan agda la labay ya palaknaben ni so serbisyo dad si Jehova.

11. (a) Panon ya tinulongan na sakey ya elder so kalangweran ya brother pian naekal toy inkamabaing to? (b) Antoy naaralan mod eksperiensya nen Julien?

¹¹ Oniay inkuan nen Ludovic, sakey ya elder ya nen ugaw ni et atulongan lapud interes ya impanengneng na saray agagi ed sikato: “No ipanengneng koy impapuson interes ed sakey ya brother, mas maples so iyaligwas to.” Inistorya toy nipaakar ed si Julien, sakey ya kalangweran ya brother ya mabaing. Inkuan nen Ludovic: “Lapud anggapoy kompiyansa nen Julien ed sarili to, no maminsan singa agto antay gagawaen to. Balet naiimanok ya maomaong so ugali to tan talagan labay toy ontulong ed saray agagi diad kongregasyon. Kanian imbes ya kuestionen koy motibo to, say ninengneng ko et saray positibon kualidad to, tan pinaseseg ko.” Bilang resulta, nagmaliw ya ministeryal a lingkor si Julien tan natan et regular payunir la.

12. Antoy nepeg tayon gawaen no labay tayon tulongan so arum pian niiter day anggaay nayarian da? Mangiter na alimbawa.

¹² Siempre, no labay tayon tulongan so arum pian niiter day anggaay nayarian da, kaukolan ya makatebek itayo. Singa anengneng tayod eksperiensya nen Julien, imbes ya say kakapuyan na too so imanoen tayo, manpokus tayod saray maong ya kualidad tan abilidad to. Ontan so ginawa nen Jesus ed si apostol Pedro. Wala ra may pankanawnawa ya singa agnapanpiyaan iyan apostol, balet sikatoy nginaranan nen Jesus na Cefas o Pedro ya mankabaliksay bato. On, impropesiya nen Jesus ya si Pedro et magmaliw ya mapekder a singa sakey ya bato.—Juan 1:42.

13, 14. (a) Panon ya atulongan nen Bernabe si Marcos? (b) Panon ya tinulongan na sakey ya elder so kalangweran ya brother? (Nengnengen so litratod gapo na artikulo.)

¹³ Ontan met so ginawa nen Bernabe ed si Juan ya manngaran met na Marcos. (Gawa 12:25) Diad inmunan impanbiahe nen Pablo tan Bernabe bilang misionero, si Marcos so “managlingkor” da, a nayarin sikato so mangaasikasod saray pankaukolan da. Balet nen akasabi rad Pamfilia, bigla to  ran tinaynanan. Kanian si Pablo tan Bernabe labat so nambiahe paarap ed norte ya say dalanen da et delikadon lugar a wala ray tulisan. (Gawa 13:5, 13) Anggaman ontan, antoy siansia nin ginawa nen Bernabe? Say ninengneng to et saray maong a kualidad nen Marcos, aliwan saray kakapuyan to. Agto inisip ya agla napanmatalkan. Imbes, impasal toy Marcos, tan lapud satan et tinmakken ed espiritual. (Gawa 15:37-39) Kalabas na pigaran taon, nen apriso si Pablo diad Roma, wadman met si Marcos, tan sikatoy sakey ed saray angipawit na pakumusta ed saray Kristiano diad Colosas. Tan imbaga ni ingen nen Pablo ya awaten day Marcos no sikatoy onlad sikara. (Col. 4:10) Imadyin yo pa labat so liket nen Bernabe nen manpapatulong si Pablo ed si Marcos diad ministeryo to.—2 Tim. 4:11.

¹⁴ Naeksperiensya met itan nen Alexandre, a balo ni labat ya elder. Inkuan to: “Nen kalangweran ak ni, irap koy mangidauloy pikakasi. Imbangat ak na sakey ya elder no panon kon iparaan so sarilik tan magmaliw ya relaks. Imbes ya agto ak la turoen, inikdan to ak na pribilehyo ya regular ya mangidauloy pikakasi diad pantitipon antis na kapapaway. Kanian sinmabi panaon et wala lay kompiyansak ed sarilik.”

15. Panon ya imbalikas nen Pablo so apresasyon tod saray agagi to?

¹⁵ No walay naimanom ya maong a kualidad ed sakey ya agi, kasin kokomendaan mo? Diad Roma kapitulo 16, binitla nen Pablo so masulok ya 20 ya agagi, tan saray kualidad da ya papablien to. (Roma 16:3-7, 13) Alimbawa, imbaga nen Pablo ya si Andronico tan Junias et mas abayag lan manlilingkor ed Kristo nen say sikato, ya labay ton ibaga et kokomendaan toy pansusungdo da. Binitla met nen Pablo so ina nen Rufo lapud maaron impangasikaso to ed apostol.

16. Antoy posiblin resulta no komendaan tayo ray kalangweran?

¹⁶ Maong so resulta no mangiter tayoy impapuson komendasyon. Laen tayon alimbawa si Rico, ugaw ya taga France, ya kinmapuy so liknaan to lapud kontra so ama to ed pampabautismo to. Inisip nen Rico ya ompan say pampabautismo to la et no aliwa lan menor-de-edad. Maermen met ed pambabalaw na saray kaklase to. Balet oniay imbaga nen Frédéric, sakey ya elder ya angiyaral ed si Rico: “Kinomendaan koy Rico ta say rason ya sikatoy susumpaen na arum et lapud makpel ton ibabaga iray sisiaen to.” Lapud satan ya komendasyon, nagmaliw ya mas determinado si Rico ya onaligwas tan tinmulong itan pian mas onapit so ulopan da nen ama to. Abautismoan si Rico nen 12 años to.

17. (a) Panon tayon natulongan iray brother pian onaligwas ira? (b) Panon ya impanengneng na sakey ya misionero so personal ya interes ed saray kalangweran ya brother, tan antoy resulta?

¹⁷ Diad kada pangibalikas tayoy apresasyon ed saray agagi lapud maabig ya agawaan da, papakiwasen tayo ran gawaen ni anggaay nayarian da ya lingkoray Jehova. Imbaga  nen Sylvie, * ya pigaran taon lan manlilingkor ed Bethel diad France, ya sarag met ya komendaan na saray sister iray brother. Naimano to ya wala ray detalyin naapresya na saray bibii ya nayarin agnaobserbaan na saray lalaki. Kanian “saray makapaseseg ya salita da et onarum ed komendasyon na saray eksperiensyadon brother.” Imbaga to ni: “Ipapasen kon obligasyon so pangiter na komendasyon.” (Uli. 3:27) Si Jérôme, ya misionero ed French Guiana, et dakel lay atulongan ton kalangweran ya brother ya magmaliw ya kualipikado parad panagmisionero. Imbaga to: “Naimanok ya no komendaan ko ray kalangweran ya brother ed espesipikon bengatla ya agawaan dad ministeryo, odino lapud balibalin komento ra, mas walay kompiyansa rad sarili da. Kanian lalon onaligwas iray abilidad da.”

18. Akin et maabig so pangipasal tan pikimey ed saray kalangweran ya brother?

¹⁸ Napaseseg tayo met iray agagi ya onaligwas diad pangipasal tan pikimey tayod sikara. Alimbawa, nayarin iyasain na sakey ya elder so kalangweran ya brother ya marunong ed computer ya mangi-print na saray impormasyon ed jw.org ya makapaseseg ed saray maedad la ya anggapoy computer da. Odino no walay kimey ya kaukolan ya gawaen ed Kingdom Hall, anto kasi no mangitagar kay kalangweran ya brother ya mangibad sika? No ontan so gawaen mo, naobserbaan mo ray abilidad na saray kalangweran, nakomendaan mo ra, tan nanengneng mo no antoy resulta.—Uli. 15:23.

19, 20. Akin ya nepeg tayon tulongan so arum ya onaligwas?

¹⁹ Nen pinili nen Jehova si Josue ya mangidaulo ed saray Israelita, ingganggan Toy Moises ya ‘bilinen’ tan “pabiskegen” toy Josue. (Basaen so Deuteronomio 3:28.) Diad panaon tayo, ondarakel so totoon malabay ya mandayew ed si Jehova. Kanian kaukolan tayo ray kualipikadon brother ya mangidaulo. Amin tayo ran Kristiano—aliwan saray elder labat—so makatulong ed saray kalangweran ya brother tan saray balo ni pian niiter day anggaay nayarian da. Bilang resulta, ondakel so payunir tan ondakel met so brother ya “kualipikadon manbangat ed arum.”—2 Tim. 2:2.

²⁰ Balanglan kabiangan itayo na baleg a kongregasyon odino melag a grupo ya asingger lan magmaliw a kongregasyon, manplano tayo parad arapen. Nagawaan tayo itan no aligen tayoy Jehova, ya say lanang ya nenengnengen to et say kamaongan na saray lingkor to.