BINMALEG si Katherine ed United States tan abautismoan ya Tasi nen Jehova nen 16 años to. Makulikulin manpulong balet dagdaiset so interesadod teritorya da. Inkuan to: “Wala ray abasak ya eksperiensya na saray totoon nampikasi ed Dios ya mangibaki komon na ontulong ed sikara pian sikatoy nakabat da. Labay koy makalmo na ontan ya too, balet anggapon talaga.”

Kayari pigaran taon ya impanpulong nen Katherine ed satan ya teritorya, inisip toy onalis ed arum a lugar ya mas interesado ray totood mensahe Panarian. Balet ta panduaruwaan to no kasin sarag to. Diad interon bilay to, aminpinsan ni labat ya akaarawid pamilya to, tan duay simba labat, et inagew-agew ya makakailiw. Balet talagan mabiskeg so pilalek ton ontulong ed saray manaanap ed si Jehova. Kayari ton inkonsidera so pigaran lugar ya nayarin alisan to, sinmulat ed sangan opisina diad Guam tan impaamta rad sikatoy impormasyon ya kaukolan to. Nen Hulyo 2007, nen 26 nen Katherine, sikatoy linmad Saipan, sakey ya isla diad Pacific Ocean ya manga 10,000 kilometro so kaarawi tod abung da. Antoy resulta na inyalis to?

Ag-abayag kasabi nen Katherine ed balon kongregasyon to, apulongan toy Doris, biin masulok ya 40 años to, tan inawat toy panangiyaral na Biblia. Kayari dan inaral so kapitulo uno anggad tres na libron Ibabangat na Biblia, walay naisip nen Katherine. “Maong ya estudyante si atsi Doris, kanian agko labay ya nasayang,” so kuan to. “Agko ni asali angikondukta na regular ya panangiyaral na Biblia kanian inisip ko ya kaukolan nen atsi Doris so mas marunong ya sister ya mangiyaral ed sikato, seguro et kaedaran to.” Impikasi nen Katherine ya sikatoy tulongan nen Jehova ya manpili na sister ya pangi-endorsoan tod si Doris. Insan plano to la itan ya ibagad si Doris.

“Antis ko nin nibagay labay kon ibaga,” so kuan nen Katherine, “imbaga nen atsi Doris ed siak ya walay labay ton ibesngaw ya problema. Kayari to, inistoryak ed sikato no panon ak ya tinulongan nen Jehova nen naeksperiensyak met itan. Akisalamat ed siak.” Insan imbaga nen Doris ed si Katherine: “Inusar ka nen Jehova ya ontulong ed siak. Amay sankaunaan ya inyakar mod abung ko, pigaran oras ak lan manbabasay Biblia ed saman. Onaakis ak, tan impikasik ed Dios ya mangibaki komoy ontulong ed siak pian natalosan koy Biblia. Insan tinmoktok ka. Inebatan nen Jehova so pikakasik!” Makakaakis si Katherine legan ton iistoryaen  itan. Inkuan to: “Aman ya imbaga nen atsi Doris so ebat ed pikakasik. Impaamta nen Jehova ed siak ya sarag kon ituloy so pangiyaaral kod sikato.”

Abautismoan si Doris nen 2010, tan natan et pigara lay iyaaralan to na Biblia. Oniay inkuan nen Katherine: “Misalsalamat ak ta amay abaybayag ko lan labay ya gawaen ya ontulong ed sakey ya toon magmaliw a lingkor nen Jehova et agawaan kon siansia!” Natan, maliket ya manlilingkor si Katherine bilang espisyal payunir diad Kosrae, sakey ya isla diad Pacific.

Masulok ya sanlasus a brother tan sister a nanlapud nanduruman bansa (say edad da et 19 anggad 79) so nanlingkor ed saray lugar diad Micronesia ya mas baleg so pankaukolan. Say liknaan na sarayan maseseg ya agagi et nanengneng ed imbalikas nen Erica, ya linmad Guam nen 2006 nen 19 to. Inkuan to: “Balibali manpayunir ed teritorya ya saray totoo et napnapgaan ed katuaan. Misalsalamat ak ed si Jehova ta tinulongan to ak ya makapanlingkor ed onian paraan. Aya so sankaabigan ya bilay!” Natan et malikeliket si Erica ya manlilingkor bilang espisyal payunir diad Ebeye ed Marshall Islands. Siempre, wala met iray subok ed panlingkor diad arum a bansa. Nengnengen tayoy talora ed saratan tan amtaen tayo no panon ya asarag iratan na saramay linmad Micronesia.

Panagbilay. Kasabid Palau na 22 años ya si Simon nen 2007, naamtaan ton melmelag labat so naalmo ton kuarta diman no ikomparad England, say bansan nanlapuan to. “Naaralan kon agsaliwen so amin ya labay ko. Natan pipilien ko lan maong no anto ray saliwen kon panangan, tan anapen koy sankamuraan antis ak ya mangaliw. No walay aderal ya kagawaan ko, mananap ak na segunda manon spare parts tan mananap ak na ontulong ed siak ya man-apiger.” Antoy nitulong na simplin panagbilay ed si Simon? Inkuan to: “Naamtaan ko no anton talagay nakaukolan ed bilay tan no panon kon pasaragey daiset. Aminpigak lan apaneknekan so panangasikaso nen Jehova. Diad pitoy taon lan panlilingkor ko dia, walan walay naakan tan naugipan ko.” On, susuportaan nen Jehova iramay pinasimpli day bilay da lapud labay dan iyunay Panarian.—Mat. 6:32, 33.

Pakakailiw. Inkuan nen Erica: “Maap-apit ak ed pamilyak, tan mapaga ak ya ompan lapud pakakailiw ko et naapektoay ministeryok.” Antoy ginawa to pian niparaan toy sarili to? “Antis ak ya inmalis, nambasa ak na saray artikulod Panag-bantayan nipaakar ed pakakailiw. Baleg so nitulong na satan pian nalabanan koy emosyon ko. Diad sakey ya artikulo, impaseguro na ina ed anak ton bii, ‘Mas naasikaso ka nen Jehova nen say pakaasikasok ed sika.’ Binmiskeg so liknaan ko lapud satan.” Si Hannah tan say asawa ton si Patrick et manlilingkor diad Majuro, Marshall Islands. Nalalabanan  nen Hannah so pakakailiw to ta say pangipopokusan to lay imano to et saray agagid kongregasyon. Inkuan to: “Lanang kon pisasalamatay Jehova ed inter ton internasyonal ya impanaagi tayo ya ipapasen ko met bilang pamilyak. No aliwan lapud maaron tulong da, agak balot makapanlingkor ed lugar ya mas baleg so pankaukolan.”

Pibagay ed arum. “Kasabim ed arum ya bansa, balon amin,” so kuan nen Simon. “No maminsan, nami-miss ko may man-joke ak ya makalek so arum.” Inkuan nen Erica: “Nen unaan, singa anggapoy nakaarok, balet akatulong itan pian usisaen koy motibok ed inyalis ko. Inmalis ak aliwan parad sarilik noagta pian mas dakel so nagawaan ko parad si Jehova.” Inyarum to: “Awalaan ak met lanlamang na kakaaro ya papablien ko.” Nansagpot ya nanaral si Simon na lenguahen Palauan, kanian ‘ninatnat toy panangarod puso to’ ed saray agagid man. (2 Cor. 6:13) Lapud maseet ya panaaral to ed lenguahe ra, mas lalon inmapit ed sikato iray agagi. On, no saniban mankimey iray balon-sabi tan saray sipor lan wadman, niwalay maapit ya pankakaarod kongregasyon. Anto ni ray bendisyon ya naaawat na saramay mabulos dan iyaapay so sarili da diad lugar ya mas baleg so pankaukolan?

Imbaga nen apostol Pablo: “Samay mantatanem na dakel et manani met na dakel.” (2 Cor. 9:6) Sayan prinsipyo et onaplika ed saramay amalaknab ed ministeryo da. Anto ran maong ya resulta so ‘aanien da’ diad Micronesia?

Diad Micronesia, dakel nin siansiay malabay ya manaral na Biblia tan talagan nasubaybayay iyaligwas ed espiritual na saray indibidual ya manaaral tan mangiyaaplikad katuaan. Nampulong met si Patrick tan Hannah ed Angaur, melag ya isla ya 320 labat so manaayam. Kayari duay bulan, walay apulongan dan mansusulon ina. Tampol ya nampaiyaral na Biblia, inawat toy katuaan, tan nanggaway baleg iran pananguman ed bilay to. Inkuan nen Hannah: “Kada kayari panaral mi, no onlugan kami lad bisikleta mi, mannengnengan kamin sanasawa insan mi ibaga: ‘Salamat, Jehova!’” Imbaga ni nen Hannah: “Antak ya sarag nen Jehova ya iyasingger ed sikato iyan bii diad arum ya paraan, balet lapud manlilingkor kamid lugar ya mas baleg so pankaukolan, aromog tan atulongan mi iyan kinmarnero pian nakabat toy Jehova. Sakey iyad saray sankaliketan ya naeksperiensya mid bilay mi!” Singa inkuan nen Erica, “no tulongan mo so sakey a toon nakabat si Jehova, dakel so liket ya anien mo!”

Diad dakel a lugar, baleg so pankaukolan parad managpulong na Panarian. Sarag mo kasi ontulong ed sarayan lugar? Ipikasim ed si Jehova ya pabiskegen toy pilalek mon palaknabey ministeryom. Mitongtong kad saray elder ed kongregasyon yo, diad manangasikaso na sirkito, odino diad saramay asali da lay nanlingkor ed lugar ya mankaukolay tulong. No akaplano ka la, manggawa kay sulat parad sangan opisina ya mangaasikasod teritoryan labay mon pamboluntaryoan, tan kerew kay impormasyon. * Iter mo itan ya sulat ed saray elder ed kongregasyon yo, tan mangiyan iray komento da antis da itan ya ipawit. Ompan sakey kad saray nilibon agagi—lalaki tan bibii, ugaw o matatken, walaay asawa o anggapo—ya mabulos ya mangiyaapay ed sarili da tan alikna day liket na ‘panani na dakel.’