1, 2. (a) Anto ran regalo so inter na Dios ed si Adan? (b) Akin et inikdan na Dios si Adan na asawa? (Nengnengen so litratod sayan pahina.)

WALAY gagala nen Jehova nen pinalsa toy dalin. Pinalsa to itan ‘pian panayaman.’ (Isa. 45:18) Perpekto so inmunan toon pinalsa to, si Adan, tan balibali so inter Ton panayaman to—say hardin na Eden. Seguradon na-enjoy nen Adan iray angkakabaleg a kiew, marakdakep iran ilog, tan makapalikliket ya ayayep! Balet singa walay kulang. Amta itan nen Jehova kanian imbaga to: “Aliwan maong a manbukbukor so too; igawaan ko na sakey a manepeg a katulongan to.” Pinaugip a maong na Dios si Adan, anguyos na sakey ya taglang to, tan ‘ginawa ton sakey a bii.’ Kabangon nen Adan, malikeliket ed anengneng to! Inkuan to: “Saya so pukel na saray pukepukel ko, tan laman na laman ko. Saya ingaran ya Bii, ta sikato et inala ed Laki.”—Gen. 2:18-23.

² Say bii et espisyal ya regalo na Dios ed si Adan ta magmaliw ya perpekton katulongan to. Si Eva et naikdan met na pribilehyon mananak. Diad tua, ‘nginaranan nen Adan so asawa to ya Eva, lapud sikato so ina na amin a mabilay.’ (Gen. 3:20) Makapakelkelaw so regalon inter na Dios ed inmunan sanasawa! Sarag day manilalak na arum nin perpekton totoo. Sikara tan saray ananak da et pagmaliwen dan paraiso so interon  dalin tan asikasoen da so arum nin mabilay a pinalsa.—Gen. 1:27, 28.

3. (a) Antoy kaukolan ya gawaen di Adan tan Eva pian bendisyonan ira na Dios, balet antoy agawa? (b) Anto ran tepet so pantongtongan tayo?

³ Pian tuloytuloy ya bendisyonan nen Jehova si Adan tan Eva, kaukolan dan unoren tan bidbiren so autoridad to. (Gen. 2:15-17) Naabuloyan labat iran gawaen so gagala na Dios no mansiansia ran matoor. Makapaermen balet ta nampaimpluensya rad “daan ya uleg,” si Satanas, tan nankasalanan irad Dios. (Apo. 12:9; Gen. 3:1-6) Panon ya naapektoan iray bibii ed satan ya impanrebelde? Anto ray ginawa na saray bibii nensaman ya matakot ed Dios? Akin et nibagan “baleg ya armada” iray Kristianon bibii natan?—Sal. 68:11, NW.

4. Diad pakanengneng nen Jehova, siopay walaan na eebatan ed impankasalanan na inmunan sanasawa?

⁴ Nen tinepetan nen Aman Jehova si Adan ed agto intulok, oniay ataptapew ya baraan to: “Say bii ya inter mo ya ibak, inikdan to ak na bunga, et angan ak.” (Gen. 3:12) Agnagbabawi si Adan ed kasalanan to. Imbes, tinetel to so bii ya inter na Dios ed sikato, tan anggan si Jehova ya Amalsa ed asawa to! Parehon nankasalanan si Adan tan Eva, balet diad pakanengneng nen Jehova et si Adan so walaan na eebatan ed desisyon dan dua. Kanian insulat nen apostol Pablo ya “linmoob so kasalanan ed mundo lapud sakey a too [si Adan] tan say ipapatey lapud kasalanan.”—Roma 5:12.

5. Antoy apaneknekan ed temporaryon impangiyabuloy na Dios ya uleyan na too so sarili to?

⁵ Inimpluensyaan nen Satanas si Adan tan Eva a nonoten ya agda kaukolan si Jehova bilang Manuley da. Lapud satan et linmesa so importantin isyu nipaakar ed soberanya: Siopa so makanepegan ya manuley? Pian naebatan itan a tepet, temporaryon inyabuloy na Dios ya uleyan na too so sarili to. Amta to ya panamegley na satan et seguradon napaneknekan ya makapuy so resulta no agmanpaigiya so too ed Dios. Diad apalabas iran siglo, nantutumbokan so trahedya lapud uley na too. Singa bilang, diad imbeneg labat ya sanlasus ya taon et manga 100,000,000 ya totoo so inatey ed guerra—tan kaibad satan so minilyon ya inosentin lalaki, bibii, tan ugugaw. Kanian dakdakel lay ebidensya ya ‘aliwan say too so mangitonton ed kurang to.’ (Jer. 10:23) Lapud satan, bibidbiren tayon si Jehova so Manuley tayo.—Basaen so Uliran 3:5, 6.

6. Diad dakel a lugar, panon ya tratratoen iray bibii?

⁶ Parehon maniirap iray lalaki tan bibii ed sayan mundo ya kokontrolen nen Satanas. (Ecl. 8:9; 1 Juan 5:19) Balet saray bibii so kaslakan ya biktima na sankagrabian iran krimen. Alimbawa, diad interon mundo et manga 30 porsiento ed saray bibii so angireport ya sinakitan na asawa o boyfriend da. Diad arum a kultura, mas papaboran iray lalaki, ta isipen da ya naawit day apelyido na pamilya tan naasikaso da ray matatken lan atateng tan bai-laki ra. Diad arum a lugar, agda labay so anak a bii, tan kaslakan et ipaekal day lukon da no bii.

7. Anton klase na bilay so inter na Dios ed laki tan bii?

⁷ Aglabay na Dios ya namaltrato iray bibii. Patas tan marespeto so pidedeneng tod sikara. Nibaga tayon papablien nen Jehova iray bibii ta pinalsa to si Eva ya perpekto, tan aliwan bilang aripen nen Adan noagta bilang maomaong a katulongan to. Atan so sakey ya rason no akin ya nen kasumpal na komanem ya agew na impamalsa na Dios, “anengneng to so amin a bengatla a ginawa to, et nia maong iran tuloy.” (Gen. 1:31) On,  “amin” ya ginawa nen Jehova et “maong iran tuloy.” Balibali inggapo na bilay di Adan tan Eva!

8. (a) Deskribien so ugali na dakel a totoo. (b) Manlapu la nensaman siopa ray tutulongan tan bebendisyonan na Dios?

⁸ Kayari rebelyon ed Eden, inmuges lan inmuges so ugali na lalaki tan bibii, tan lalo itan ya linmoor ed apalabas ya siglo. Impasakbay la na Biblia ya onuges so ugali na totoo ed “kaunoran iran agew.” Anggan iner et walay kaugsan kanian nibaga ya talagan ‘nikadkaduma tan mair-irap iyan panaon.’ (2 Tim. 3:1-5) Anggaman ontan, manlapu la nensaman et walan wala ray lalaki tan bibii ya matulok ed si Jehova tan sikato so binidbir dan Manuley da. Lapud nanmatalek irad sikato, tinulongan tan benendisyonan to ra.—Basaen so Salmo 71:5.

9. Pigaran totoo so akaliktar ed Delap, tan akin?

⁹ Nen dineral na Dios so mauges ya mundo ed panaon nen Noe panamegley na Delap, pigpigara labat ya too so akaliktar. No bilang ta mabilay ni ray agagi nen Noe ed saman a panaon, kaiba met iran inatey ed delap. (Gen. 5:30) Balet akaliktar si Noe, say asawa to, say taloran ananak da, tan say kaasawaan da. Kanian parehoy bilang na lalaki tan bibiin akaliktar. Walay takot dad Dios tan ginawa ray linawa to kanian akaliktar ira. Amin ya totoon mabilay natan et nanlapud saraman ya waloran totoo ya tinulongan tan prinotektaan nen Jehova.—Gen. 7:7; 1 Ped. 3:20.

10. Akin et tinulongan nen Jehova iray matakot ed Dios ya asawa na saray matoor ya lalaki?

¹⁰ Kalabas na pigapigaran taon, tinulongan met nen Jehova iray matakot ed Dios ya asawa na saray matoor ya lalaki. Ag-ira nanreklamod kipapasen dad bilay kanian benendisyonan ira nen Jehova. (Jud. 16) Singa bilang, agnanreklamo so marespeton asawa nen Abraham a si Sara nen tinaynan da so mainawan bilay ed Ur tan nanayam irad saray tolda ed arum ya lugar. “Si Sara [et] tinmulok ed si Abraham, a tinawag ton ‘katawan.’” (1 Ped. 3:6) Isipen pa met si Rebeca, ya mabmablin regalo nen Jehova ed si Isaac tan nagmaliw ya maomaong ya asawa to. Kampegan sikatoy ‘naar-aron maong nen Isaac tan aligliwa ed impatey nen ina to.’ (Gen. 24:67) Pribilehyo tayo met natan ya nakaiba iray bibiin matakot ed Dios ya singa si Sara tan Rebeca!

11. Akin et nibagan makpel iramay duaran Hebreon manamianak?

¹¹ Nen aripen iray Israelita ed Ehipto, dinmakel iran maong, kanian ingganggan na Faraon ya pateyen so amin ya kapangiyanak ya ugaw a laki. Balet, isipen pay ginawa na duaran Hebreon manamianak ya si Sefora tan Pua. Sikara so posiblin angidaulo ed arum ya manamianak. Agda tinulok so ganggan na Faraon. Ontan lay pakpel da ta mas antakot day Jehova nen say Faraon. Kanian sikaray benendisyonan nen Jehova tan inikdan to ra na ananak.—Exo. 1:15-21.

12. Antoy makapadinayew ed si Debora tan Jael?

¹² Nen panaon na saray ukom ed Israel, tinulongan na Dios so propetan bii ya si Debora. Pinaseseg nen Debora so Ukom ya si Barak tan tinmulong pian nibulos iray Israelita ed pamapairap na saray kalaban da. Balet impropesiya to ya say kagalangan ed panalo dad saray Canaanita et agniiter ed si Barak noagta diad “lima na sakey a bii.” Ontan so agawa nen say lider na armada na Canaan ya si Sisera et pinatey nen Jael, bii ya aliwan Israelita.—Uko. 4:4-9, 17-22.

13. Antoy ibabaga na Biblia nipaakar ed si Abigail?

¹³ Makapadinayew met si Abigail, sakey ya biin nambilay manga 1,100 ya taon antis  na Kristo. Walay pakatebek to, balet say asawa ton si Nabal et anggapoy panangasi to, andi kakanaan, tan makulangkulang. (1 Sam. 25:2, 3, 25) Prinotektaan nen David tan saray bataan to iray kayarian nen Nabal, balet nen mikakasi iran ikdan to ra na panangan tan arum nin kaukolan da, “minudmora” to ra tan anggapon balot so inter to. Sinmanok si David kanian implano ton pateyen si Nabal tan amin ya lalakid sankaabungan to. Nen naamtaan itan nen Abigail, inyawitan toy David tan saray bataan to na kanen tan inumen da, kanian ag-atuloy so plano dan pamatey. (1 Sam. 25:8-18) Oniay imbaga nen David ed si Abigail: “Bendito si Jehova, a Dios na Israel, ya angibaki ed sika ed sayan agew ya onabet ed siak.” (1 Sam. 25:32) Nen inatey lay Nabal, inasawa nen David si Abigail.—1 Sam. 25:37-42.

14. Anton trabaho so sinuportaan na saray anak a bibii nen Salum, tan panon ya ontan met so gagawaen na saray Kristianon bibii natan?

¹⁴ Dakel ya lalaki, bibii, tan ugugaw so inatey nen dineral na armaday Babilonia so Jerusalem tan say templo nen 607 B.C.E. Diad panangidaulo nen Nehemias, nipaalagey lamet so padir na syudad nen 455 B.C.E. Kaibad tinmulong ed satan a kimey iray anak a bibii nen Salum, prinsipe na kapalduay distrito na Jerusalem. (Neh. 3:12) Mabulos dan ginawa so mairap ya trabaho anggano anak iray prinsipe. Aapresyaen tayo met natan so dakel ya Kristianon bibii a maliket ya onsusuportad nanduruman proyekton panagpaalagey diad interon mundo!

15. Anton pribilehyo so inter na Dios ed si Maria?

¹⁵ Antis tan kaleganay inmunan siglo C.E., wala ray bibiin benendisyonan nen Jehova na espisyal iran pribilehyo. Say sakey ed sikara et say birhen ya si Maria. Sikatoy akisipan lan miasawa ed si Jose, balet mamilagron nanlukon panamegley na masanton espiritu. Akin et sikato so pinili na Dios ya magmaliw ya ina nen Jesus? Seguradon walad sikato iray maabig ya kualidad a kaukolan ed pamabaleg tod perpekton anak to. Balbaleg ya pribilehyo so magmaliw ya ina na sankatalonggaringan ya toon nambilay ed dalin!—Mat. 1:18-25.

16. Mangiter na alimbawa a pakapatnagan ya maomaong so impideneng nen Jesus ed saray bibii.

¹⁶ Maomaong si Jesus ed saray bibii. Singa bilang, isipen pa imay bii ya 12 taon lan manpaparala. Sikatoy akiletletan ed dakel ya totoo tan diniwit toy kawes nen Jesus. Imbes ya pampasnokan nen Jesus, oniay maar-aron imbaga to: “Ana’ko, say pananisiam so amaabig ed sika. La ka ed kareenan, tan onabig ka la ed makapairap a sakit mo.”—Mar. 5:25-34.

17. Anton milagro so agawa nen Pentecostes 33 C.E.?

¹⁷ Wala ray bibiin disipulo nen Jesus ya nanlingkor ed sikato tan ed saray apostol to. (Luc. 8:1-3) Tan nen Pentecostes 33 C.E., manga 120 ya lalaki tan bibii so akaawat na espiritu na Dios diad espisyal ya paraan. (Basaen so Gawa 2:1-4.) Satan ya impangikalboy masanton espiritu et nipasakbay la, ta oniay inkuan nen Jehova: “Ikalbok naani so espirituk ed amin a laman; et saray anak yo a lalaki tan bibii manpropeta ra naani . . . Tan ontan met ed saray ariripen a lalaki tan bibii dia ed saratan ya agew ikalbok naani so espirituk.” (Joel 2:28, 29) Diad satan ya milagron agawa nen Pentecostes, impanengneng na Dios ya aliwa lan say apostatan Israel so aabobonan to, noag say “Israel na Dios,” ya tugyopen na lalaki tan bibii. (Gal. 3:28; 6:15, 16) Kaibad saray Kristianon bibii ya akibiang ed panagpulong nen inmunan siglo iramay apatiran anak nen Felipe ya ebanghelisador.—Gawa 21:8, 9.

18, 19. (a) No nipaakar ed dugan panagdayew, anton pribilehyo so inter na Dios ed lalaki tan bibii? (b) Panon ya deneskribe na salmista iray bibii ya mangiyaabawag na maong a balita?

¹⁸ Nen bandad sampot na 1800’s, wala ray pigaran lalaki tan bibii ya interesadod dugan panagdayew. Sikara so angigapo ed panagpulong a kimey ya impropesiya nen Jesus: “Sayan maong a balita na panarian so nipulong ed interon dalin bilang pantasi ed amin a nasyones, insan onsabi so anggaan.”—Mat. 24:14.

¹⁹ Say melag ya grupo na Saray Estudyante na Biblia et nagmaliw lan manga 8,000,000 ya Tasi nen Jehova natan. Tan wala ni masulok ya 11,000,000 ya interesado ed Biblia tan ed kimey tayo ya onaatendid tinaon ya Memoryal na impatey nen Jesus. Dakel ed sikara et bibii. Ontan met, diad masulok ya 1,000,000 ya walad sigpot panaon, mas dakel so bibii. Talagan inikdan nen Jehova na pribilehyo iray matoor ya bibii ya mibiang ed kasumpalan na sayan imbaga na salmista: “Si Jehova so mangiiter na ganggan; saray bibiin mangiyaabawag na maong a balita et baleg ya armada.”—Sal. 68:11, NW.

20. Anto ray balibalin aralen diad Panagdayew na Pamilya o personal ya panagaral tayo?

²⁰ Agnakarga na sayan magasin no pantongtongan tayoy amin a matoor ya bibiin nabasa ed Biblia. Balet nabasa tayoy istorya da diad Salita na Dios tan ed saray artikulon ni-publish ed literatura tayo. Singa bilang, sarag tayon dalepdepen so katooran nen Rut. (Rut 1:16, 17) Ombiskeg so pananisia tayo no basaen tayoy librod Biblia ya inngaran ed si Reyna Ester tan saray artikulon nipaakar ed sikato. Sarag tayon aralen so istorya na sarayan bibii diad Panagdayew na Pamilya tayo. No anggapoy sarilin pamilyam, sarag mon aralen iratan diad personal ya panagaral mo.

21. Panon ya pinaneknekan na saray bibiin matakot ed Dios so katooran dad si Jehova?

²¹ Malinlinew ya bebendisyonan nen Jehova so pampupulong na saray Kristianon bibii tan tutulongan to rad saray subok ya dadalanen da. Alimbawa, diad tulong to et apansiansia na bibiin matakot ed Dios so katooran da diad uley na Nazi tan Komunista, ya dakel ed sikara so nanirap tan say arum et inatey ni ingen lapud katutulok dad Dios. (Gawa 5:29) Singa nensaman, susuportaan na saray agagi tayon bibii natan so soberanya na Dios kaibay arum nin agagi. Singa ed saray Israelita, sankabembenan nen Jehova so kawanan ya lima ra tan ibabaga tod sikara: ‘Agka ontatakot. Tulongan ta ka.’—Isa. 41:10-13.

22. Anto ran pribilehyo ed arapen so aalagaren tayo?

²² Asingsingger la ya saray matakot ed Dios ya lalaki tan bibii et pagmaliwen dan paraisoy interon dalin tan bangatan da so minilyon ya napaoli nipaakar ed gagala nen Jehova. Legan tayon aalagaren itan, balanglan laki itayo o bii, pablien tayoy pribilehyon manlingkor ed si Jehova a nankakasakey.—Sof. 3:9.