1, 2. Panon ya ipapasabi nen Jehova so instruksion tod saray lingkor to?

MANLAPU la nensaman, nanduruman paraan so uusaren nen Jehova pian igiya iray totoo. Sikatoy angusar na saray anghel, pasingawey, tan kugip pian ipaamtay nagawad arapen odino pian mangiter na espesipikon asainmin. (Num. 7:89; Eze. 1:1; Dan. 2:19) Angusar met si Jehova na saray totoon mangirepresentad sikato tan mangipasabi na instruksion to. Antokaman so paraan ya inusar nen Jehova, abendisyonan iramay inmunor ed salita to.

² Diad panaon tayo, igigiya nen Jehova iray lingkor to panamegley na Biblia, masanton espiritu to, tan kongregasyon. (Gawa 9:31; 15:28; 2 Tim. 3:16, 17) Saray instruksion ya iiter to et malinlinew ya singa ‘makakarengel itayo na salita ed benegan tayo a kuan to, Saya so dalan, ondalan kayo ed sikato.’ (Isa. 30:21) Ipapasabi met nen Jesus so instruksion nen Jehova legan ton idadauloy kongregasyon panamegley na “matoor tan makabat ya aripen.” (Mat. 24:45) Kaukolan tayon seryosoen so panangigiya tan instruksion nen Jehova, ta akadependid itulok tayo so pambilay tayon andi-angga.—Heb. 5:9.

3. Anto ray makaamper ed idengel tayod panangigiya nen Jehova? (Nengnengen so litratod sayan pahina.)

³ Amta nen Satanas a Diablo ya say panangigiya nen Jehova so mangisalbad bilay tayo kanian gagawaen toy anggaay  nayarian to pian agtayo dengelen itan. Ontan met, nayarin impluensyaan itayo na ‘manamalingon puso’ tayo ya ibaliwalay boses nen Jehova. (Jer. 17:9) Kanian, aralen tayo no panon tayon napaliisan iray makaamper ed idengel tayod boses na Dios. Pantongtongan tayo met no panon ya makatulong so regular ya idengel tan pampikasi ed si Jehova pian naprotektaan tayoy relasyon tayod sikato anggan antoy nagawa.

4. Panon ya iimpluensyaan nen Satanas so panagnonot na totoo?

⁴ Iimpluensyaan nen Satanas so panagnonot na totoo panamegley na palson impormasyon tan propaganda. (Basaen so 1 Juan 5:19.) Agaylay karakel na impormasyon diad saray dyaryo, libro, magasin, radyo, TV, tan Internet. Anggaman wala ray makanan impormasyon ed saratan, maslak et susuportaan day kondukta tan estandarte ya kontrad estandarte nen Jehova. (Jer. 2:13) Singa bilang, diad saray balita tan palabas et nipapanengneng ya aliwan mauges so pankasal na parehon laki o parehon bii, kanian isipen laingen na dakel ya masyadon istriktoy Biblia no nipaakar ed homoseksualidad.—1 Cor. 6:9, 10.

5. Antoy gawaen tayo pian agtayo naimpluensyaan na propaganda nen Satanas?

⁵ Antoy gawaen na saray mangaarod estandarte nen Jehova pian ag-ira naimpluensyaan na propaganda nen Satanas? Panon dan nibiig so maong ed mauges? Diad ‘pangimano da ed salita na Dios’! (Sal. 119:9) Nabasad Salita na Dios iray prinsipyo ya ontulong pian nibiig tayoy tuan impormasyon ed palson propaganda. (Uli. 23:23) Inaon nen Jesus so Kasulatan tan imbaga ton ‘say pambilay na too et say amin a salitan manlalapud sangi nen Jehova.’ (Mat. 4:4) Kaukolan tayon aralen no panon tayon niyaplika iray prinsipyo na Biblia ed bilay tayo. Alimbawa, anggano anggapo ni akasulat ya ganggan nen Jehova ya mangisesebel ed pikakalugoran, atalosan nen Jose ya kasalanan itan ed Dios. Agton balot inisip ya agtulokey Jehova nen sikatoy tutuksoen na asawa nen Potifar ya manggaway imoral. (Basaen so Genesis 39:7-9.) Anggano agto tutundaan ya tuksoen, say dinengel nen Jose et say boses nen Jehova, aliwan say boses to man ya bii. Importante met natan ya dengelen tayoy boses nen Jehova, aliwan say propaganda nen Satanas, pian nibiig tayoy duga ed aliwa.

6, 7. Antoy nepeg tayon gawaen pian aliwan say simbawa nen Satanas so narengel tayo?

⁶ Diad interon mundo et karakel so mankokontraan ya bangat tan doktrinay relihyon, kanian isipen na dakel ya imposiblin naanap so tuan relihyon. Balet malinew ya ipapaamta nen Jehova so katuaan ed saramay manaanap ed satan. Kanian kaukolan tayon pilien no siopay dengelen tayo. Agtayo nayarin bansag ya dengelen so duaran boses. Nepeg tayon ‘kabatey boses’ nen Jesus tan ondengel tayod sikato. Sikato so tinuro nen Jehova ya mangasikasod saray karnero To.—Basaen so Juan 10:3-5.

⁷ Inkuan nen Jesus: “Imano yo so narerengel  yo.” (Mar. 4:24) Malinew tan duga iray simbawa nen Jehova, balet nepeg ya akaparaan so puso tayon mangimano tan mangawat ed satan. No agtayo maalwar, ompan say dengelen tayo et say mauges ya simbawa nen Satanas imbes ya say maaron simbawa na Dios. Agmon balot sirin aabuloyan ya kontrolen ka na saray musika, video, palabas ed TV, libro, kaulop, managbangat, o anggan saray ekspertod sayan mundo.—Col. 2:8.

8. (a) Anto ray rason ya mainomay lan patitan nen Satanas so puso tayo? (b) Antoy nagawad sikatayo no ibaliwala tayo ray sinyales ya aliwa lay aarapen na puso tayo?

⁸ Amta nen Satanas ya makasalanan itayo, tan sasalien to itayon tuksoen ya peneken iray pilalek tayo. No gawaen to itan ed sikatayo, nairapan itayon mansiansian matoor ed si Jehova. (Juan 8:44-47) Panon tayon nalabanay tukso to? Laen tayo pan alimbawa so sakey ya sankanonot ton lanang so pamenek ed pilalek to kanian akagaway kasalanan ya say amta to et agton balot nagawaan. (Roma 7:15) Akin et ontan so agawa? Ompan kalkalna ton imbaliwalay boses nen Jehova. Nayarin agto aliklikas iray sinyales ya aliwa lay aarapen na puso to, odino ginagala ton ag-imanoen iratan. Ompan agla manpipikasi tan mataltalag lan manpulong o miaral. Kanian sinmabi panaon ya agto la alabanay pilalek to anggano amta ton makapuy itan. Agnagawa itan ed sikatayo no mansiansia itayon alerto ed antokaman ya sinyales tan onkiwas a tampol pian ipetek itan. Tan no dengelen tayoy boses nen Jehova, ag-itayon balot naimpluensyaan na saray apostata.—Uli. 11:9.

9. Akin ya importantin eksaminen tayon lanang no anto ray kakapuyan tayo?

⁹ No say sakey et walay graben sakit to, mas baleg so posibilidad ya natambal no naeksamin ya masakbay. Ontan met, no lanang tayon eeksaminen no anto ray kakapuyan tayo, mas baleg so posibilidad ya napaliisay pankasalanan. No walay anengneng tayon kakapuyan tayo, onkiwas tayo lan tampol antis nin ‘nakalotan itayon mabilay nen Satanas.’ (2 Tim. 2:26) Antoy nepeg tayon gawaen no naimano tayon say kanonotan tan pilalek tayo et onaarawi lad saray estandarte nen Jehova? Mapaabeba tayon ompawil ya tampol ed sikato, dengeley simbawa to, tan ipapuso iratan. (Isa. 44:22) Tandaan ya no aliway desisyon tayo, nayarin mansumpal itan ed ansakisakit tan araldalem a sugat ya kaukolan tayon itepel ed sayan panaon anggano akapawil tayo lad si Jehova. Mas maabig sirin no agtayo la sasaliey onarawid sikato. Onkiwas tayon  tampol pian napaliisay pakagawa na graben kasalanan!

10, 11. (a) Panon ya napatnagan so panagpasirayew? (b) Antoy naaralan tayod nansumpalan di Kora, Datan, tan Abiram?

¹⁰ Agtayon balot lilingwanan ya sarag itayon iyarawi na puso tayo ed si Jehova. Talagan mabiskeg so makasalanan ya tendensia tayo! Alimbawa, walay tendensia tayon magmaliw ya mapasirayew tan maagum. Sarayan ugali et makaamper ed idengel tayod boses nen Jehova tan posiblin manresultad graben kasalanan. Say toon mapasirayew et atagtagey so pakanengneng tod sarili to. Isipen ton sarag ton gawaen no antoy labay to, tan ag-ondengel ed simbawa na saray kapara ton Kristiano, saray elder, odino anggan say mismon organisasyon na Dios. Satan ya too et onaarawi lad si Jehova kanian agto la narengel so boses To.

¹¹ Nen walad desierto iray Israelita, nanrebelde si Kora, Datan, tan Abiram ed autoridad nen Moises tan Aaron. Lapud mapasirayew ira, nanggawa ray sarili dan uksoyan ed pandayew ed si Jehova. Antoy ginawa nen Jehova? Pinatey to ra. (Num. 26:8-10) Leksion itan ed sikatayo! Talagan mauges so resulta na panrebelde ed si Jehova. Tandaan tayo met ya “say panagpasirayew et mansumpal ed kadederal.”—Uli. 16:18, NW; Isa. 13:11.

12, 13. (a) Mangiter na alimbawa ya mangipapanengneng a makapuy so epekto na inkaagum. (b) Ipaliwawa no panon ya onloor so inkaagum no napaulyanan.

¹² Mapeligro met so inkaagum. No say sakey et maagum, isipen ton ag-onaplikad sikato iray instruksion nen Jehova tan sarag ton laen so agto gawa. Nen inmabig so kating nen Naaman ya lider na armaday Sirya, reregaloan toy propetan Eliseo, balet agto inawat. Say aripen to balet ya si Gehazi et labay to iraman. Imbaga tod sarili to: “Unong a si Jehova mabilay, onusil ak ed [si Naaman], mangala ak na anggan anto ed sikato.” Kanian ag-amta nen Eliseo ya inusilan nen Gehazi si Naaman tan nantila pian ikdan nen Naaman na “sakey a talento a pilak, tan duaran pampalesan a kawes.” Antoy agawad si Gehazi lapud maagum tan matila? Inmalis ed sikato so kating nen Naaman!—2 Ara. 5:20-27.

¹³ No napaulyanan so agum, onloor itan ya anggad deralen toy bilay na sakey. Nanengneng tayoy epekto na inkaagum diad samay agawad si Acan. Imanoen no panon ya maples ya linmoor so inkaagum to. Inkuan to: ‘Nen anengneng kod nanleleetan na samsam so marakep a pandong na Babilonia, tan duanlasus siklo a pilak, tan sakey a bareta a balitok a say belat to et limamplo a siklo, inaguman ko tan inalak iratan.’ Imbes ya labanan nen Acan so makapuy ya pilalek to, tinakew to iratan tan inyamot tod tolda to. Nen nipaamtay kasalanan to, imbaga nen Josue ya sikatoy dusaen nen Jehova. Diad saman ya agew, si Acan tan say pamilya to et tinupak ya anggad inatey ira. (Jos. 7:11, 21, 24, 25) Walay posibilidad ya magmaliw itayon maagum a singa si Acan. Kanian nepeg ya ‘manalwar tayod amin a klase na panag-agum.’ (Luc. 12:15) Say imoralidad et sakey met a klase na inkaagum. Nayarin sagpaminsan et wala ray onsebang ed isip tayon makapuy o man-imadyin tayoy imoral, balet importantin kontrolen tayoy nonot tayo tan ag-abuloyan ya onloor iray pilalek tayo ya anggad makagawa tayoy kasalanan.—Basaen so Santiago 1:14, 15.

14. Antoy nepeg tayon gawaen no naimano tayon natutukso itayon manggaway aliwa lapud panagpasirayew o inkaagum?

¹⁴ Mansumpal ed kadederal so panagpasirayew tan inkaagum. No dalepdepen tayoy resulta na makapuy a gawaen tayo, mas  determinado tayon dengelen so boses nen Jehova. (Deu. 32:29) Diad Biblia, aglabat ibabaga na tuan Dios no antoy dugan gawaen, ibabaga to met iray bendisyon no gawaen tayo itan, tan saray mauges ya resulta no agtayo unoren. No natutukso itayon manggaway aliwa lapud panagpasirayew o inkaagum, isipen tayo ray pansumpalan! Nonoten tayo no antoy magmaliw ya epekto na satan ed sikatayo, diad saray inad-aro tayo, tan nagkalalo lad relasyon tayod si Jehova.

15. Antoy naaralan tayod komunikasyon nen Jesus ed Ama to?

¹⁵ Sankanonot nen Jehova so pankaabigan tayo. (Sal. 1:1-3) Iikdan to itayo na instruksion sano kaukolan tayo itan. (Basaen so Hebreos 4:16.) Anggano perpektoy Jesus, lanang ya nampikasi ta say regular ya komunikasyon ed si Jehova so lapuay biskeg to. Sinuportaan tan inggiya nen Jehova si Jesus ed makapakelkelaw iran paraan. Angibaki na anghel ya manlingkor ed sikato, inikdan toy masanton espiritu ya ontulong ed sikato, tan inggiya tod pampili na 12 apostol. Nansalita ni ingen si Jehova manlapud tawen pian ibalikas so suporta tan panangabobon tod si Jesus. (Mat. 3:17; 17:5; Mar. 1:12, 13; Luc. 6:12, 13; Juan 12:28) Singa si Jesus, kaukolan tayon ibesngaw ed si Jehova so walad puso tayo. (Sal. 62:7, 8; Heb. 5:7) Panamegley na pikakasi, napansiansia tayon maapit so komunikasyon tayod si Jehova tan makapambilay tayo diad paraan ya mamagalang ed sikato.

16. Panon tayon naawat so tulong nen Jehova pian mas narengel tayoy boses to?

¹⁶ Anggano mabulos ya iiter nen Jehova so simbawa to, agto itayo pipiliten ya unoren itan. Nepeg tayon kerewen so masanton espiritu to, tan seguradon ikdan to itayo. (Basaen so Lucas 11:10-13.) Importante balet ya ‘imanoen tayo no panon so idedengel tayo.’ (Luc. 8:18) Singa bilang, no ipipikasi tayod si Jehova ya tulongan to itayon nalabanay imoral ya kanonotan balet ta onnenengneng tayod pornograpiya odino imoral iran palabas, nibagan mansimpisimpitan tayo. Pian tulongan itayo nen Jehova, kaukolan tayon seguroen ya wala itayod pasen o situasyon ya wadmay espiritu to. Amta tayon say espiritu to et walad saray aral. Dakel ya lingkor nen Jehova so nipaliis ed makapuy iran nansumpalan lapud dinengel day boses to diad saray aral. Bilang resulta, naamtaan dan wala ray makapuy ya pilalek ya ontutubo lad puso ra tan impetek da iratan.—Sal. 73:12-17; 143:10.

17. Akin et mapeligro so manmatalek ed sarili tayo?

¹⁷ Walay naaralan tayod si Arin David. Nen ugaw ni, atalo toy higanten Filisteo ya si Goliat. Nagmaliw ya sundalo, ari, managprotekta, tan managdesisyon parad Israel. Balet nen nanmatalek ed sarili to, sikatoy pinalikdo na puso to tan akagawa ira nen Bat-sheba na seryoson kasalanan, tan impapatey to ni ingen si Urias. Balet nen dinisiplina nen Jehova, mapaabeba ton inawat so lingo to tan nansagpot pian nipawil so relasyon tod Dios.—Sal. 51:4, 6, 10, 11.

18. Antoy makatulong pian naynay tayon dengelen so boses nen Jehova?

¹⁸ Kaukolan tayon unoren imay simbawan walad 1 Corinto 10:12 tan ag-alablabas a manmamatalek ed sarili tayo. Lapud agtayo sarag ya ‘itonton iray sarilin kurang tayo,’ walan walay pilien tayon dengelen, balanglan say boses nen Jehova o say boses na Kabusol to. (Jer. 10:23) Komon ta lanang itayon manpikasi, tumboken tayoy panangigiya na masanton espiritu, tan naynay tayon dengelen so boses nen Jehova.