INMAKI-AKIS si Pedro kayari ton imburi si Jesus. Talagan kaukolan toy mansagpot pian napapawil toy espiritualidad to. Balet labay nin siansia nen Jesus ya usaren si Pedro ya ontulong ed arum. Kanian imbaga nen Jesus ed sikato: “Sano akapawil ka la, pabiskeg mo iray agagim.” (Luc. 22:32, 54-62) Si Pedro so sakey ed saray nagmaliw ya lusek na kongregasyon nen inmunan siglo. (Gal. 2:9) Ontan met natan, no say sakey ya brother et datin elder, sarag ton awaten lamet itan ya responsabilidad tan nalikna toy liket ed pamabiskeg ed saray agagi.

Wala ray datin manangasikaso ya nakal ed pribilehyo da kanian isipen dan anggapo lay kana ra. Oniay imbaga nen Julio * ya masulok ya 20 taon a nanlingkor bilang elder ed South America: “Say pangiparaay paliwawa, ibisitad saray agagi, tan pan-shepherding et kabiangan lay bilay ko! Balet biglan naandi iratan, kanian singa wala lay kulang ed bilay ko. Aman so sankaermenan ya agawad siak.” Natan et manlilingkor la lamet ya elder si Julio.

Insulat nen disipulon Santiago: “Agagik, manliket kayo sano nipapaarap kayo ed nanduruman subok.” (Sant. 1:2) Say subok ya tutukoyen to dia et resulta na saray panamasegsegang tan agtayo inkaperpekto. Binitla toy makasarilin pilalek, paboritismo, tan arum ni. (Sant. 1:14; 2:1; 4:1, 2, 11) No disiplinaen itayo nen Jehova, nayarin ansakit itan. (Heb. 12:11) Balet agto labay ya ibagan lapud satan et naandi lay liket tayo.

Anggano nakal itayod pribilehyod kongregasyon, wala nin siansiay pankanawnawa tayon paneknekan so pananisia tan panangaro tayod si Jehova. Sarag tayo met ya dalepdepen no akin ya inawat tayo iman ya pribilehyo nensaman. Kasin nanlingkor itayo parad pankaabigan tayo, odino lapud  inaro tayoy Dios tan manisia tayon sikato so akanggawa ed kongregasyon kanian nepeg ya naasikaso itan a maong? (Gawa 20:28-30) No saray datin elder et maliket nin siansiad panaglingkor da, papaneknekan dad amin, pati lad si Satanas, ya tua so panangaro dad si Jehova.

Nen adisiplina si Arin David lapud akagaway grabe iran kasalanan, inawat toy panamaat tan aperdona. Inkansion to: “Maliket so too ya aperdona la ed insumlang to, tan asakbongan lay kasalanan to. Maliket so too ya ipapasen nen Jehova ya ag-akagaway kasalanan, a say puso to et andiay panamalikdo.” (Sal. 32:1, 2, NW) Lapud disiplina, si David et nagmaliw ya mas maong a pastol na saray totoo na Dios.

Kaslakan lan saray datin elder ya akapawil ed pribilehyo et nagmaliw ya mas maong a pastol. “Natan et mas natatalosan ko la no panoy pangasikasod saramay akagaway lingo,” so kuan na sakey ya elder ya ontay eksperiensya to. Oniay imbaga na sananey nin elder: “Natan et mas papablien koy pribilehyon manlingkor ed agagi.”

Si Jehova et “agto lawas nonoten iray lingo tayo.” (Sal. 103:9, NW) Kanian agtayo iisipen ya agla panmatalkan na Dios so sakey ya akagaway seryoson lingo. “Adismaya ak ya maong lapud lingok,” so kuan nen Ricardo ya nakal ya elder kayari dakel a taon ya impanlingkor to. “Abaybayag ya say pakaliknak et agak makanepegan kanian agko la labay so manlingkor bilang manangasikaso. Inisip kon agko lan balot napaneknekan ya napanmatalkan ak. Balet lapud maliket ak ya ontulong ed arum, awalaan ak na saray iyaaralan na Biblia, napapaseseg ko ray agagi diad Kingdom Hall, tan nakakaibak irad panagpulong. Akatulong iratan pian napapawil koy kompiyansak ed sarilik, tan natan et manlilingkor ak lamet ya elder.”

Say panem-em na sakit na linawa et posiblin makaamper ed ipawil na sakey ya brother bilang elder. Mas maabig no aligen tayoy David, ya batik lapud labay ya pateyen na maimon ya Arin Saul. Agbinmales si David anggano wala ray  pankanawnawa ton gawaen itan. (1 Sam. 24:4-7; 26:8-12) Nen inatey si Saul ed sakey ya guerra, nanermen si David, tan imbaga to ya “inad-aro tan pinabpabli” toy Saul tan say anak ton si Jonatan. (2 Sam. 1:21-23, NW) Agnanem-em na sakit na linawa si David.

No say pakaliknam et agka atalosan na saray elder odino aliwan patas so impantrato dad sika, agka manpapadaeg ed sakit na linawa. Singa bilang, nen si William a taga Britain et nakal ya elder kayari manga 30 taon ya impanlingkor to, binmarong ed pigaran elder. Antoy akatulong ed sikato pian nipetek so panmoria to? “Apaseseg ak nen binasak so libro na Job,” so inkuan to. “No tinulongan nen Jehova si Job ya mikareenan ed taloran kaiba to, di mas tulongan To ak ya mikareenan ed saray elder!”—Job 42:7-9.

No inmepas kad pribilehyon manpastol ed pulok na Dios, maabig no isipen mo no akin ya onmay desisyon mo. Kasin dakdakel so problemam? Kasin wala ray bengatlan nagmaliw ya mas importantid sika? Kasin adismaya kad ag-inkaperpekto na arum? Antokaman so situasyon mo, tandaan ya mas makakatulong kad agagi nen elder ka ni. Apabiskeg mo rad paliwawam, apaseseg mo rad alimbawam, tan atulongan mo ran anosan iray subok diad impan-shepherding mod sikara. Aliketan si Jehova ed matoor ya impanlingkor mo bilang elder, tan maliket ka met ed saman.—Uli. 27:11.

Tinulongan nen Jehova iray lalakin lingkor to ya napapawil day liket tan pilalek dan idaulo so kongregasyon. No inmepas o nakal ka ya elder, sarag mo lamet ya ‘dampoten so betang na manangasikaso.’ (1 Tim. 3:1) Si Pablo et ‘agtinmundan nampikasi’ ya saray agagi ed Colosas et napano komon na suston pikakabat ed linawa na Dios ‘pian manbilay iran makana ed si Jehova tan napaliket dan maong.’ (Col. 1:9, 10) No napribilehyoan ka lamet ya manlingkor bilang elder, ipikasim ed si Jehova ya ikdan to kay biskeg, anos, tan liket. Diad sarayan kaunoran ya agew, kakkaukolan na totoo na Dios so espiritual a suporta na saray maaron pastol. Kasin sarag mo tan labay mon pabiskegen iray agagim?