SAY PANAG-BANTAYAN—PANARALAN YA EDISYON Setyembre 2014
Walad sayan isyu iray aaralen ya artikulo parad Oktubre 27 anggad Nobyembre 30, 2014.
Kasin ‘Manadampot Kay Maabig a Kimey’?
Antoy dugan gawaen pian onkualipika?
Kasin Kombinsido Ka ya Walad Sika so Katuaan? Akin?
Aralen ed sayan artikulo so pigaran rason no akin ya dakel a totoo so manisian walad Saray Tasi nen Jehova so katuaan. Aralen tayo met no akin ya kombinsido iray Tasi ya walad sikaray katuaan.
Matoor ya Manlingkor ed Dios Anggano ‘Dakel so Irap’
Amin tayo et makakaeksperiensyay irap lapud manbibilay tayod mundo nen Satanas. Antoy arum ed saray taktika nen Satanas? Panon itayon makapanparaan parad saratan?
Atateng—
Responsabilidad na atateng ya pabalegen iray ananak da “diad panagdisiplina tan panamilin nen Jehova.” (Efeso 6:4) Aralen ed sayan artikulo so taloran paraan ya napastolan na atateng iray ananak da tan natulongan da ran aroey Jehova.
Tepetepet na Saray Manbabasa
Kasin samay nabasad Salmo 37:25 tan Mateo 6:33 et mankabaliksan ya agbalot abuloyan nen Jehova ya naerasan so sakey ya Kristiano?
Say Unor a Kabusol, say Patey, et Naandi La
Say patey tan amin ya sengegan na satan so mamapairap ed totoo. Akin ya ompapatey so too? Panon ya ‘naandi so unor a kabusol, say patey’? (1 Corinto 15:26) Nengnengen no panon ya idanet na ebat so inkahustisya, karunongan, tan nagkalalo lad panangaro nen Jehova.
Nonoten Iray Manlilingkor ya Full-Time
Dakel ya lingkor nen Jehova so impasyan mankikimey bilang full-time. Panon tayon nipanengneng ya sankanonot tayoy “matoor a pankikimey” tan “maaron pansasagpot” da?
