1. Antoy imbaga nen Pablo nipaakar ed saramay impasyan mankikimey parad si Jehova?

SANKANONOT nen apostol Pablo iramay Kristiano nensaman ya impasyan mankikimey parad maong a balita. Insulat to: “Diad imaton na Dios tan Ama tayo et sankanonot min naynay so matoor a pankikimey yo tan maaron pansasagpot yo tan pansusungdo yo lapud ilalo yo ed Katawan tayon Jesu-Kristo.” (1 Tes. 1:3) On, anggan si Jehova ya mismo et sankanonot toy maaron pansasagpot na amin ya matoor a manlilingkor ed sikato, balanglan daiset o dakel so nagagawaan da, depende ed sirkumstansya ra.—Heb. 6:10.

^2. Antoy aralen tayod sayan artikulo?

² Baleg so insakripisyo na dakel ed saray agagi tayo—nensaman anggad natan—pian makapanlingkor irad si Jehova ya full-time. Nengnengen tayo no panon ya nanlingkor so arum nen inmunan siglo. Aralen tayo met so nanduruman klase na full-time ya panaglingkor diad panaon tayo tan amtaen tayo no panon tayon nonoten irayan pinabpablin agagi ya angiyapay ed sarili da diad espisyal iran paraan.

3, 4. (a) Panon ya nanlingkor so arum nen inmunan siglo? (b) Panon ya asuportaan so materyal a pankaukolan da?

³ Ag-abayag kayarin abautismoan si Jesus, inggapo to so panagpulong a kimey ya onlaknab ed interon mundo. (Luc. 3:21-23; 4:14, 15, 43) Kayari impatey to, satan a kimey et indaulo na saray apostol to. (Gawa 5:42; 6:7) Nanlingkor so pigaran Kristiano, singa si Felipe, bilang ebanghelisador tan misionero ed Palestina. (Gawa 8:5, 40; 21:8) Si Pablo tan saray arum ni et nambiahe na arawi. (Gawa 13:2-4; 14:26; 2 Cor. 1:19) Wala ray nanlingkor ya managkopya tan managsulat, singa si Silvano (Silas), Marcos, tan Lucas. (1 Ped. 5:12) Akitulongan met iray Kristianon bibii ed sarayan matoor ya lalaki. (Gawa 18:26; Roma 16:1, 2) Makapaliket ya basaen so Kristianon Griegon Kasulatan lapud saray balibalin eksperiensya da, tan paneknek iratan ya sankanonot nen Jehova iray lingkor to.

⁴ Panon ya asuportaan so materyal a pankaukolan na saray Kristianon nanlingkor ya full-time nen inmunan siglo? No maminsan, paparawesen tan tutulongan ira na saray kaagian da, balet agda ra oobligaen ya mangiter. (1 Cor. 9:11-15) Mabulos ya sinmuporta iray indibidual tan kongregasyon. (Basaen so Gawa 16:14, 15; Filipos 4:15-18.) Nantrabaho met na part-time si Pablo tan saray kaiba ton manbiabiahe pian walay gastosen da.

5. Antoy imbaga na sanasawa nipaakar ed panlilingkor dan full-time?

⁵ Diad panaon tayo, dakel met so impasyan mankikimey diad nanduruman klase na full-time ya panaglingkor. (Nengnengen so kahon ya “ Nanduruman Klase na Full-Time ya Panaglingkor.”) Antoy nibaga rad pinili dan bilay? Sarag yo ran tepetan, tan seguradon napaseseg kayo. Alimbawa, walay sakey ya brother ya nanlingkor bilang regular payunir, espisyal payunir, misionero, tan membro na pamilyan Bethel diad sananey a bansa. Inkuan to: “Parad siak, say inloob kod full-time ya panaglingkor so sakey ed saray sankaabigan ya desisyon kod bilay. Nen 18 años ko, nairapan ak ya mandesisyon no kasin manaral ak ed unibersidad, mantrabahon full-time, odino manpayunir. Apaneknekan kod saray eksperiensyak ya agbalot lingwanan nen Jehova iray sakripisyom no manlingkor kan full-time. Nausar ko ray talento tan abilidad ya inter nen Jehova ed siak diad paraan ya nayarin agkon balot agawaan no say pinilik et propesyon ed sayan mundo.” Inkomento na asawa to: “Kada asainmin et tinmulong ed siak ya onaligwas. Naynay min naliliknay proteksion tan panangigiya nen Jehova diad paraan ya nayarin agmin balot asali no nansiansia kamid apasalan min bilay. Inagew-agew ak ya misasalamat ed si Jehova lapud panlilingkor min full-time.” Labay mo ya ontan ka met?

6. Antoy nalilikna nen Jehova ed panlilingkor tayo natan?

⁶ Siempre, say arum et agmakapanlingkor ya full-time lapud sirkumstansya ra. Matalek tayon papablien nen Jehova so interon kamarerwan panlilingkor da. Nonoten iramay agagin binitla nen Pablo so ngaran da diad Filemon 1-3, tan amin ya agagid Colosas. (Basaen.) Inapresya ira nen Pablo, tan si Jehova a mismo. Ontan met natan, seguradon aapresyaen na Ama tayod tawen so panlilingkor mo. Balet, anto ray sarag mon gawaen pian nasuportaan mo iramay manlilingkor ya full-time?

7, 8. Panon ya manlilingkor iray regular payunir, tan panon iran natulongan na kongregasyon?

⁷ Singa saray ebanghelisador nen  inmunan siglo, saray makukulin payunir natan et makapaseseg ed kongregasyon. Gagawaen day anggaay nayarian da ya manpulong na 70 oras kada bulan. Panon mo ran natulongan?

⁸ Oniay naobserbaan na payunir a sister ya si Shari: “Singa lanang ya mabisbiskeg iray payunir ta inagew-agew iran manpupulong. Balet siansia nin kaukolan day panamaseseg.” (Roma 1:11, 12) Oniay imbaga na sakey ya sister ya nampayunir a pigay taon nipaakar ed saray payunir ed kongregasyon da: “Makukuli ra tan ag-ira ontutunda. No walay mangilugan ed sikara diad panagpulong, mangimbita ed sikaran mangan, mangiter na daiset ya panggasolina odino arum nin pinansyal ya tulong, misalsalamat ira. Nalikna dan walay mangaarod sikara.”

9, 10. Antoy ginaway arum pian natulongan da iray payunir ed kongregasyon da?

⁹ Labay mo ta’n tulongan iray payunir diad ministeryo? Imbaga na duaran payunir ya sister ya kakkaukolan day kaiban manpulong manlapud Lunes anggad Biernes tan kada ngarem. Nanonotan ni na sakey ya sister ya manlilingkor la natan ed Brooklyn Bethel so impanpayunir to: “Walay sakey a sister ya walay kotse to ya angibagan, ‘No anggapoy partner mo, tawagan mo ak ta ibaan ta ka.’ Lapud sikato, akapansiansia ak ya payunir.” Tan oniay imbaga nen Sister Shari: “Kayari panagpulong, mabetbet ya bukbukor la na saray single ya payunir. Sarag yon imbitaan no maminsan iray agagin single diad panagdayew na pamilya yo. Maabig met no ipila yo rad arum nin aktibidad yo pian mansiansia ran mabiskeg.”

¹⁰ Oniay inkomento na sister ya ngalngali 50 taon lan manlilingkor ya full-time no nanonotan toy impanpayunir to kaibay arum nin single ya sister: “Kada pigaran bulan et bibisitaen na saray elder mi iray payunir. Tetepeten da no kumustay bunigas tan trabaho mi, tan no kasin wala ray problema mi. Talagan sinsero ira. Oonla rad apartment mi pian nanengneng da no kasin kaukolan mi tulong.” Nayarin nanonotan tayod satan si Onesiforo ya taga Efeso, ya anggano walay pamilya to et tinmulong ed si Pablo.—2 Tim. 1:18.

11. Panon ya manlilingkor iray espisyal payunir?

¹¹ Bendisyon met ed arum ya kongregasyon  iray espisyal payunir ya kaiba dan manlilingkor. Dakel ed sikara so manguusar na 130 oras kada bulan diad ministeryo. Lapud lanang iran walad ministeryo tan ontutulong ed arum diad nanduruman paraan, dagdaiset o anggapo lay panaon dan mantrabaho. Iikdan ira na branch office na melag ya allowance kada bulan pian makapanpokus irad ministeryo da.

12. Panon a natulongan na saray elder tan arum ya agagi iray espisyal payunir?

¹² Panon tayon natulongan iray espisyal payunir? Diad sakey ya branch office, oniay impaliwawa na elder ya aka-asain ed saray espisyal payunir: “Kaukolan iran kumustaen na saray elder, amtaen day kipapasen da, insan da nengnengen no panon da ran natulongan. Isipen na arum ya agagi ya anggapo lay kaukolan na saray espisyal payunir ta walay allowance da, balet diad tua et dakel ni naitulong na saray agagi ed kongregasyon.” Singa saray regular payunir, aapresyaen na saray espisyal payunir no walay kaiba dad ministeryo. Sarag mo ran ibaan?

13, 14. (a) Antoy kaukolan tayon nonoten no nipaakar ed saray manangasikaso na sirkito? (b) Antoy iisipen mon naitulong mod saray ombiabiahen manangasikaso?

¹³ Say pakanengneng tayod saray manangasikaso na sirkito tan kaasawaan da et mabiskeg so espiritualidad da. Tua itan, balet nonoten tayon kaukolan da met so panamaseseg, kaiba ya manpulong, tan panaon parad panrelaks. Panon to no mansakit tan naospital ira, ya ompan kaukolan day manpaopera o manpa-therapy? Seguradon naligliwa ira no bisitaen ira na agagi tan tulongan da rad saray pankaukolan da. Ontan so panangiyansakit na “inad-aron managtambal” ya si Lucas ed si Pablo tan ed saray iba ton manbiabiahe.—Col. 4:14; Gawa 20:5–21:18.

¹⁴ Kaukolan na saray ombiabiahen manangasikaso tan kaasawaan da so panangaro tan panamaseseg na maapit ya kakaaro. Oniay insulat na manangasikaso na sirkito: “Singa amta na saray kakaarok no kaukolan koy panamaseseg. Tetepetan da ak, kanian nibabagak ed sikara iray problemak. Anggan say idengel da labat et baleg lay nitulong to.” Aapresyaen a maong na saray manangasikaso na sirkito tan kaasawaan da so personal ya interes ya ipapanengneng na agagi.

15, 16. Antoy gagawaen na saray membro na pamilyan Bethel, tan panon tayo ran natulongan?

¹⁵ Diad interon mundo, baleg so nitutulong na saray manlilingkor ed Bethel pian nasuportaan so Panarian diad saray bansan aasikasoen na nanduruman branch office. No wala ray Bethelite ed kongregasyon o sirkito yo, panon yon nipanengneng ya sankanonot yo ra?

¹⁶ Nen kakkasabi dad Bethel, nayarin makakailiw irad pamilya tan kakaaro da. Seguradon apresyaen da no kaaroen ira na saray kapara dan Bethelite tan saray balon kakongregasyon da! (Mar. 10:29, 30) Diad normal ya eskedyul na trabaho da, makapiaral tan makapanpulong iran sinimba. Balet no maminsan, wala ray ekstran trabaho da. Maabig no natalosan itan na saray kakongregasyon da tan ipanengneng dan papablien day trabaho na saray Bethelite.—Basaen so 1 Tesalonica 2:9.

17, 18. Anto ray asainmin na saray full-time ya manlilingkor ed arum a bansa?

¹⁷ Saramay niasain ya manlingkor ed arum a bansa et nayarin kaukolan day  onadaptad panangan, lenguahe, ugali, tan kabibilay ya dumad apasalan da. Akin et mabulos dan inawat itan ya asainmin anggano aliwan mainomay?

¹⁸ Say arum ed sikara et misionero, ya uusaren day dakel ya panaon dad ministeryo. Marundunong iran manpulong tan manbangat kanian dakel so naaralan na saray agagi ed sikara. Saray misionero et itataryaan na branch office na simplin panayaman tan melag ya allowance parad pankaukolan da. Say arum ya manlilingkor ed arum a bansa et aka-asain ed branch office odino ontutulong ed pampaalagey na saray pasilidad ed branch, remote translation office, Assembly Hall, o Kingdom Hall. Walay itataryan panangan, simplin ayaman, tan arum nin probisyon parad sikara. Singa saray membro na pamilyan Bethel, regular iran mimiaral tan manpupulong, kanian bendisyon irad kongregasyon.

19. Antoy nepeg tayon tandaan nipaakar ed saray full-time ya nanlapud arum a bansa?

¹⁹ Panon yon nipanengneng ya sankanonot yo ray full-time ya nanlapud arum a bansa? Tandaan ya diad unaan et nayarin agda ni nagustoan so panangan ed lugar yo. Kanian no imbitaan yo ran mangan, tepetan yo ra no anton panangan so labay da odino walay panangan ed lugar yo ya labay dan tawayan. Anosan yo ra legan dan aaraley lenguahe tan kustombre yo. Ompan agdan tampol natalosan so amin ya ibaga yo, kanian seetan yo ran bangatan. Seguradon labay day makaaral!

20. Antoy sakey a paraan ya nipanengneng tayon nononoten tayo ray walad full-time tan saray atateng da?

²⁰ Nasabi panaon ya ontatken iray walad full-time, tan saray atateng da. No Tasi iray atateng, nayarin labay da ya saray ananak da et mansiansiad asainmin da. (3 Juan 4) Siempre, no kaukolan lan asikasoen iray atateng da, gawaen na saray walad full-time so anggaay nayarian da tan regular iran ombisita no posible. Anggaman ontan, natulongan tayo ray walad full-time no akaparaan tayon mitulongan ed pangasikasod saray maedad lan atateng da. Tandaan ya baleg so responsabilidad da ed sankaimportantian a kimey natan ed mundo. (Mat. 28:19, 20) Kasin sarag mo tan na kongregasyon yo so ontulong ed atateng na saray walad full-time no kaukolan?

21. Antoy nalilikna na saray walad full-time ed itutulong tan pamapaseseg na arum ed sikara?

²¹ Manlilingkor iray walad full-time aliwan pian onyaman, noagta labay dan iter so sankaabigan dad si Jehova tan ed arum. Aapresyaen dan maong so anggan anton tulong ya niiter yo. Oniay imbaga na sister a manlilingkor ed arum a bansa: “Anggan say simplin sulat na apresasyon et mangipaliknad sika ya sankanonot ka na arum tan maliket irad gagawaen mo.”

22. Antoy nibagam ed full-time ya panaglingkor?

²² Say panlingkor ed si Jehova ya full-time so sankaliketan ya bilay. Tua, aliwa itan ya mainomay, balet dakel so naaralan tan makapaliket. Tan balibali itan ya preparasyon ed makapnek tan andi-anggaan ya panlingkor ed uley na Panarian na Dios ya aalagaren na amin a matoor ya lingkor nen Jehova. Komon ta ‘sankanonot tayon naynay so matoor a pankikimey tan maaron pansasagpot’ na amin ya manlilingkor ya full-time.—1 Tes. 1:3.