1. Antoy ginawa na saray lider na Kakristianoan legay guerra?

KASIN linawa na Dios ya miguerra iray tuan Kristiano tan pateyen day agda kalahi? Diad apalabas ya 100 taon, atan so ginawa na dakel ya mangibabagan Kristiano ira kuno. Benendisyonan na saray Katolikon pari iray sundalo tan armas da diad piguerra dad kapara dan Katoliko ed arum a bansa. Ontan met so ginawa na saray Protestantin pari. Say Sankamundoan ya Guerra II so sakey ya alimbawa na satan, a nanresultad graben panagpatey.

2, 3. Antoy ginawa na Saray Tasi nen Jehova legan tan kayari na Sankamundoan a Guerra II, tan akin?

² Antoy ginawa na Saray Tasi nen Jehova diad satan a guerra? Unong ed history, nansiansia ran neutral. Akin? Say manunan rason et lapud inalig day alimbawa nen Jesus tan inyaplika da ray bangat to. Inkuan to: “Diad saya et naamtaan na amin a sikayo iray disipulok, no manaaroan kayo.” (Juan 13:35) Impapuso da met so prinsipyo ed samay insulat nen apostol Pablo ed saray Kristiano ed Corinto.—Basaen so 2 Corinto 10:3, 4.

³ Say konsiensia na saray tuan Kristiano et nipasal ed Biblia kanian ag-ira migi-guerra o manaaral ya mansundalo. Lapud  satan, nilibon Tasi, ugaw man o matatken, laki man o bii, so pinairap. Dakel so puersaan ya pinantrabaho ed saray kampo tan prisoan. Nen panaoy Nazi ed Germany, wala ni ra ingey pinatey. Balet anggano grabe impamairap ed saray Tasi ed Europe, agdan balot nilingwanay kimey dan ipulong so maong a balita na Panarian nen Jehova. Matoor dan ginawa itan diad saray prisoan, panamairapan a kampo, tan anggano inyakar da rad arum ya lugar. * Nen 1994, walay agawan pampapateyan na tribu diad Rwanda balet ag-akibiang iray Tasi. Nansiansia met iran neutral legay graben pateyan ed datin Yugoslavia.

4. Antoy epekto na pansiasiansian neutral na Saray Tasi nen Jehova ed saray makakaobserba?

⁴ Lapud pansiasiansian neutral na Saray Tasi nen Jehova, nilibon makakaobserba diad interon mundo so kombinsido ya saray Tasi so talagan mangaaro ed Dios tan ed kapara dan too, kanian sikara sirin so tuan Kristiano. Balet wala ni ray arum ya aspekto na panagdayew tayo ya akakombinse ed dakel ya Saray Tasi nen Jehova so tuan Kristiano.

5. Anton pananguman so kaukolan ya gawaen na saray inmunan papatumbok na Kristo?

⁵ Manlapud gapo na ministeryo nen Jesus, indanet toy kaimportantian na pangipulong ed maong a balita na Panarian. Nampili na 12 disipulo ya mangigapo ed satan insan kayari to et angipasal na 70 nin disipulo. (Luc. 6:13; 10:1) Imparaan to ran mangipulong ed maong a balita, ya nen unona et diad saray Judio labat. Balet asabi panaon ya imbaga nen Jesus ed sikara ya ipulong da met itan ed arum ni ran bansa. Talagan baleg itan ya pananguman parad saray maseseg ya Judion disipulo!—Gawa 1:8.

6. Akin ya atebek nen Pedro a si Jehova et agmanangidumaduma?

⁶ Imbaki nen Jehova si apostol Pedro ed abung na ag-asegat ya Gentil a si Cornelio. Atebek nen Pedro ya say Dios et agmanangidumaduma. Bilang resulta, abautismoan si Cornelio tan say pamilya to. Diad saman la ginmapon onlaknab so Inkakristiano ed saray balon teritorya. Narengel tan naawat la na totood amin a bansa so mensahe na katuaan. (Gawa 10:9-48) Say teritorya la natan et say interon mundo.

7, 8. Antoy gagawaen na organisasyon nen Jehova pian nipasabid totoo so maong a balita? (Nengnengen so litratod gapo na artikulo.)

⁷ Diad panaon tayo, maseseg ya susuportaan na saray mangidadaulo ed organisasyon nen Jehova so pangipupulong tan pangibabangat ed maong a balita ed interon mundo. Natan et ngalngali la waloran milyon ya Tasi so impasyan mangipapakabat ed mensahe na Kristo diad masulok ya 600 a lenguahe, tan naaaruman ni ‘tan! Saray Tasi nen Jehova et kabkabat ed pampupulong dad kaabungan tan ed saray dalan, tan natan et manguusar met la ray lamisaan tan cart ya pangidispleyan na saray literatura.

⁸ Masulok ya 2,900 a translator so nipapasal a mangipatalos ed Biblia tan saray publikasyon ya base ed Biblia. Balet aliwan diad saray manunan lenguahe labat. Saray literatura tayo et nipapatalos met ed nilasus ya lenguahen agtanton kabat balet ta uusaren na minilyon ya totoo. Alimbawa, diad Spain et minilyon so mansasalitay lenguahen Catalan. Diad agano ni, binilay lamet so lenguahen Catalan diad saray syudad na Valencia tan Alicante, diad Balearic Islands, tan ed bansan Andorra. Natan, Saray Tasi nen Jehova et  mangipa-publish la na saray literaturan base ed Biblia diad lenguahen Catalan, tan uusaren met la itan ya lenguahe diad saray aral pian nasabi puso na saray Catalonian.

9, 10. Antoy paneknek ya interesado so organisasyon na Dios ed espiritual ya pankaukolan na amin a totoo?

⁹ Satan ya kimey a panagpatalos et nagagawad interon mundo pian nibangat iray totoo ed sarili dan lenguahe. Singa bilang, diad Mexico et Spanish so manunan lenguahe, balet dakel met so walay sarili dan lenguahe. Say sakey ed saratan et say lenguahen Maya. Inyasain na branch ed Mexico so Maya translation team ed lugar ya atan so salita. Lapud lanang itan ya uusaren tan narerengel na saray translator, mas mainomay ya natalosan so pangipapatalos da ed saray publikasyon. Say sakey nin alimbawa et say lenguahen Nepali, ya sakey ed saray lenguahe ed Nepal a masulok ya 29 milyon so populasyon to. Manga 120 so lenguahe ed Nepal balet masulok ya samploran milyon so mansasalitay Nepali tan komaduan lenguahe itan na dakel. Nipapatalos met iray literatura tayo ed satan ya lenguahe.

¹⁰ Talagan seryosoy organisasyon nen Jehova ed responsabilidad ya ipulong so maong a balita na Panarian ed interon mundo. Nanengneng itan ed suportan iiter ed saray translation team diad interon mundo. Minilyon ya tract, brosyur, tan magasin so ibubunog ya libre. Satan ya kimey et susuportaan na boluntaryon donasyon na saray Tasi nen Jehova, lapud uunoren da iyan instruksion nen Jesus: “Inawat yon anggapoy bayar, iter yon anggapoy bayar.”—Mat. 10:8.

11, 12. Antoy maabig ya epekto ed arum na pampupulong na saray Tasi nen Jehova ed interon mundo?

¹¹ Papablien na saray Tasi nen Jehova so kimey dan manpulong tan manbangat. Lapud kombinsido iran nalmo day katuaan, mansasakripisyo iran maong pian nipasabi so mensahe ed saray totood nanduruman bansa tan tribu. Pinasimpli na dakel so bilay da, nanaral iray arum ya lenguahe, tan akibagay irad duman kultura pian makapibiang irad sayan kimey. Sayan internasyonal ya panagpulong tan panagbangat so sakey nin rason no akin ya dakel so kombinsido ya Saray Tasi nen Jehova so tuan papatumbok nen Kristo Jesus.

 ¹² Gagawaen iratan na saray Tasi lapud kombinsido iran nalmo day katuaan. Balet anto ni arum ya rason no akin ya kombinsido so minilyon a totoo ya walad Saray Tasi nen Jehova so katuaan?—Basaen so Roma 14:17, 18.

13. Panon a pansiasiansiaen na saray Tasi a malinis so organisasyon?

¹³ Nandurumay rason na saray agagi no akin ya kombinsido iran walad sikara so katuaan. Oniay imbaga na sakey a brother ya abayag lan manlilingkor: “Talagan pansiasiansiaen ya malinis tan agnarutakan ed moral so organisasyon nen Jehova, anggano siopa ni tay nepeg ya simbawaen o disiplinaen.” Panon ya napansiasiansia so atagey ya estandarte ed moral? Uunoren day estandarte ya walad Salita na Dios tan aaligen day alimbawa nen Jesus tan saray disipulo to. Mataltalag ed kongregasyon so agmalabay ya onunor ed estandarte na Dios tan kaukolan ya dispeloen. Maslak ed saray Tasi et mansiasiansian malinis ed panagbilay da, anggan saramay datin manggagaway mauges ya natan et anguman la.—Basaen so 1 Corinto 6:9-11.

14. Antoy ginawa na dakel ya adispelo, tan antoy resulta?

¹⁴ Ibabaga na Biblia ya kaukolan ya ekalen ed kongregasyon iramay agmalabay ya ontulok ed Dios. Balet makapaliket ta nilibo ed sikara so nagbabawi lanlamang tan akapawil ed kongregasyon. (Basaen 2 Corinto 2:6-8.) Lapud lanang tayon uunoren so atagey ya estandarte na Biblia, mansiasiansian malinis so kongregasyon. Bilang resulta, matalek tayon say organisasyon tayo so aabobonan na Dios. Talagan midumaan itan ed arum ya relihyon ya kokonsintien day aliwan gagawaen na saray membro da. Kanian dakel so kombinsido ya walad Saray Tasi nen Jehova so katuaan.

15. Akin ya kombinsido so sakey a brother ya walad sikatoy katuaan?

¹⁵ Akin ya manisia so arum ya abayag lan Tasi a walad sikaray katuaan? Oniay imbaga na brother ya 54 años to: “Manlapu nen tinedyer ak, say pananisiak et akabase ed taloran katuaan: (1) walay Dios; (2) pinuyanan toy Biblia; tan (3) uusaren tan bebendisyonan toy kongregasyon na Saray Tasi nen Jehova natan. Diad pigaran taon lan panaaral ko, lanang kon susuboken iratan ya katuaan tan tetepetan koy sarilik no talaga kasin walay malet a basiyan na saratan. Kada ilalabas na taon et naaaruman lan naaaruman iray ebidensya kanian mas ombibiskeg so pananisiak tan mas kombinsido ak ya talagan walad sikatayo so katuaan.”

16. Akin ya kombinsido so sakey a sister ya walad sikatoy katuaan?

¹⁶ Imbaga na sakey ya de-asawan sister ya manlilingkor ed world headquarters  diad New York no antoy akakombinsid sikato ya walad sikatoy katuaan. Inkuan ton say organisasyon nen Jehova labat so mangipapaamtad ngaran na Dios, ya manga 7,000 beses a nabasad Biblia. Apaseseg met ed ibabaga na 2 Awaran 16:9: ‘Saray mata nen Jehova onnenengneng ed amin a dalin, pian mabiskeg ya ontulong ed saramay ayadyari puso ra ed sikato.’ Inkuan to: “Lapud katuaan et anengneng ko no panon ak ya nawalaay ayadyarin puso pian mabiskeg ya ontulong ed siak si Jehova. Say relasyon kod si Jehova so sankaimportantian ed bilay ko. Tan aapresyaen koy betang nen Jesus ed pangitatarya toy aralem ya kakabatan ed Dios ya manusustuni ed siak.”

17. Antoy akakombinse ed sakey ya datin ateista, tan akin?

¹⁷ Oniay inamin na datin ateista: “Lapud saray palsa et akombinse ak ya labay na Dios ya na-enjoy na totoo so bilay tan agto sirin abuloyan ya mantultuloy so irap ed andi-anggaan. Sakey ni, anggano onloloor so kaugsan, lalon nipapanengneng na saray lingkor nen Jehova so pananisia, seseg, tan aro. Say espiritu nen Jehova labat so makagawad sayan milagro ed panaon tayo.”—Basaen so 1 Pedro 4:1-4.

18. Antoy nibagam ed inkuan na duaran brother no akin ya kombinsido iran walad sikaray katuaan?

¹⁸ Onia met so imbaga na sakey ya abayag lan Tasi no akin ya panisiaan toy katuaan ya ipupulong tayo: “Say pigay taon lan panaaral ko so akakombinsid siak ya nansagpot ya maong iray Tasi pian nipawil imay Inkakristiano ya singa nen inmunan siglo. Diad pambiabiahek ed nanduruman bansa, anengneng kon mismo so pankakasakey na Saray Tasi nen Jehova ed interon mundo. Say katuaan ed Biblia so angiter ed siak na inkapnek tan liket.” Nen tinepetan so sakey a brother ya masulok lan 60 años no akin ya sikatoy kombinsido ya nalmo toy katuaan, oniay kuan to: “Inaral tayon maong so bilay tan ministeryo nen Jesus tan naapresya tayoy alimbawa to. Nanggawa tayo ray pananguman ed bilay tayo pian mas onapit tayod Dios panamegley nen Kristo Jesus. Atalosan tayon posible so kilalaban lapud dondon bagat na Kristo. Tan amta tayon sikatoy pinaolid bilay. Abasa tayo ray napanmatalkan ya testimonya na saray akatasi ed satan.”—Basaen so 1 Corinto 15:3-8.

19, 20. (a) Anton responsabilidad so indanet nen Pablo ed kongregasyon ed Roma? (b) Bilang dedikadon Kristiano, antoy pribilehyo tayo?

¹⁹ Lapud inaro tayo ray kapara tayon totoo, agtayo isisiblet so mablin katuaan ya amta tayo. Oniay inkatunongan nen Pablo ed saray agagid kongregasyon ed Roma: “No maparungtal mon iyaabawag itan a ‘salita diad sangim,’ a si Jesus so Katawan, tan walaan kay pananisia diad pusom a sikatoy pinaoli na Dios manlapud inaatey, sikay nilaban. Ta diad puso na sakey et ipapatnag toy pananisia a mangitonton ed inkatunong, balet diad sangi na sakey et maparungtal ton iyaabawag so pananisia a mangitonton ed kilalaban.”—Roma 10:9, 10.

²⁰ Bilang dedikadon Tasi nen Jehova, kombinsido itayon walad sikatayo so katuaan tan pribilehyo tayon ibangat ed arum so maong a balita na Panarian na Dios. Legan tayon manpupulong, komon ta aliwa labat ya say ibabangat tayo manlapud Biblia so pandinayewan da, noagta nanengneng da met ed kabibilay tayo ya kombinsido itayon walad sikatayo so katuaan.