1. Antoy maslak ya ibabaga na arum?

ANGANKO et narerengel mo iyan ibabaga na arum: ‘Agmo naapresya so sakey a bengatla anggad naandi lad sika.’ Kasin no maminsan et nagagawa ’tan ed sika? No manlapud inkaugaw et naaala na sakey a too so amin a labay to, nayarin agto masyadon naapresya iratan. Alimbawa, no say sakey et binmaleg ed mayaman ya pamilya, ompan ibaliwala to labat iray walad sikato. Ontan so nayarin nagawad saray kalangweran. Lapud kulang so eksperiensya da, ompan agda ni natatalosan no anto ran talagay importantid bilay.

2, 3. (a) Anton kanonotan so nepeg ya paliisan na saray kalangweran a Kristiano? (b) Antoy makatulong pian naapresya tayoy walad sikatayo?

² No sakey kan kalangweran, nayarin tinedyer o masulok ya 20 años mo, antoy importantid sika? Parad dakel ya totoo, say importantid bilay et saray materyal—baleg a sueldo, balibalin abung, odino sankabaloan ya high-tech iran gadyet. Balet no saratan labat so sankanonot tayo, walay importantin napapaulyanan tayo—saray espiritual ya kayamanan. Makapaermen ta minilyon ya totoo so agbalot interesado ed saratan. Sikayo ran  kalangweran ya pinabaleg na Kristianon atateng, manalwar kayo ya agyo nibaliwala so inawat yon mablin espiritual ya tawir. (Mat. 5:3) No agyo apresyaen itan, makapaermen so resulta ya apektaen toy interon bilay yo.

³ Agmo sirin aabuloyan ya nagawa itan ed sika. Antoy makatulong pian napablim so espiritual ya tawir mo? Aralen tayoy pigaran alimbawa diad Biblia pian nanengneng tayo no akin ya nepeg tayon apresyaen so espiritual a tawir tayo. Makatulong iratan ed saray kalangweran tan ed amin tayo ran Kristiano pian napabli tayo ray inter nen Jehova ed sikatayo.

4. Antoy nabasa tayod 1 Samuel 8:1-5 nipaakar ed saray anak nen Samuel?

⁴ Wala ray nabasa tayod Biblia ya akaawat na mayaman ya espiritual a tawir balet ta agda inapresya. Agawa itan ed pamilya nen propeta Samuel, ya ugaw ni et nanlingkor lad si Jehova tan apansiansia toy maong ya rekord to. (1 Sam. 12:1-5) Maong so alimbawa ya impanengneng nen Samuel ed saray anak ton si Joel tan Abias. Balet agda itan inapresya, tan nagmaliw iran mauges. Ibabaga na Biblia ya aliwa ran singa si ama ra ta “dineral da so inkatunong.”—Basaen so 1 Samuel 8:1-5.

5, 6. Antoy nansumpalan na ananak tan apo nen Josias?

⁵ Ontan met so agawad saray anak nen Arin Josias. Matoor si Josias tan inaro toy Jehova. Nen nalmo tan imbasad sikato so libro ya akasulatan na Ganggan na Dios, ginawa toy anggaay nayarian ton unoren iray instruksion nen Jehova. Inekal toy idolatriya tan espiritismo ed Juda, tan pinaseseg to ray totoo ya unorey Jehova. (2 Ara. 22:8; 23:2, 3, 12-15, 24, 25) Talagan dakel so espiritual a kayamanan ya impatawir tod saray ananak to! Talora ed saray anak to tan sakey ya apo to so nagmaliw ya ari, balet anggapoy anggan sakey ed sikara so angapresyad satan ya tawir da.

⁶ Say anak nen Josias ya si Joacaz so sinmublay ed sikaton ari, balet “ginawa to so mauges dia ed pakanengneng nen Jehova.” Taloy bulan to ni labat ya manaari nen impriso na Faraon na Ehipto, tan diman la inatey. (2 Ara. 23:31-34) Insan say agi ton si Joacim so sinmublay ya nanuley ed 11 taon. Anggapo met so apresasyon tod impatawir nen ama ra. Lapud inkauges nen Joacim, oniay impropesiya nen Jeremias ya nagawad sikato: “Sikatoy niponpon a singa asno.” (Jer. 22:17-19, NW) Say arum nin ari ya tinmumbok ed si Josias—say anak ton si Zedekias tan say apo ton si Joachin—et pareho met ya mauges; agda inalig so matoor ya alimbawa to.—2 Ara. 24:8, 9, 18, 19.

7, 8. (a) Akin ya nibaga tayon pinerdi nen Solomon so espiritual a tawir to? (b) Antoy naaralan tayod saray alimbawad Biblia ya pinerdi day espiritual ya tawir da?

⁷ Dakel met so espiritual a kayamanan ya atawir nen Arin Solomon ed ama ton si David. Balibali ray ginawa to diad gapo, balet sinmabi panaon ya nakal so apresasyon tod espiritual ya tawir to. ‘Sanen masiken lay Solomon, saray asawa to pinapawil [“inyarawi,” NW] da so puso to ya ontumbok ed saray dirios da; et say puso to aliwan naskey ed Jehova a Dios to, a singa ed puso nen David ya ama to.’ (1 Ara. 11:4) Lapud satan, naandid sikato so panangabobon nen Jehova.

⁸ Makapaermen ya pinerdi labat na sarayan lalaki so pankanawnawa ran kabatey Jehova tan gawaen so duga! Balet aliwan amin ya kalangweran ed Biblia tan ed  panaon tayo et ontan so nansumpalan da. Aralen tayoy pigaran maabig ya alimbawa nensaman ya naalig na saray kalangweran a Kristiano natan.

9. Akin ya nibaga tayon balibali alimbawa na saray anak nen Noe? (Nengnengen so litratod gapo na artikulo.)

⁹ Balibalin alimbawa iray anak nen Noe. Ingganggan na Dios so ama ra ya manpaalagey na biong tan iloob to ditan so pamilya to. Mapatnag ya inapresya na ananak nen Noe so panggawad linawa nen Jehova. Seguradon sinuportaan day ama ra. Tinulongan dan nampaalagey na biong tan linmoob ira ditan antis ya ginmapoy Delap. (Gen. 7:1, 7) Antoy resulta? Ibabaga na Genesis 7:3 ya inloob day ayayep diad biong pian mansiansia iratan ya mabilay diad dalin. Tan pati sikara et nisalba. Lapud pinabli na saray anak nen Noe so impatawir tod sikara, awalaan iray pribilehyo ya ontulong pian nisalba so bilay na totoo tan ipawil lamet so dugan panagdayew diad dalin.—Gen. 8:20; 9:18, 19.

10. Panon ya impanengneng na apatiran Hebreon kalangweran so apresasyon da ed saray katuaan ya naaralan da?

¹⁰ Kalabas na nilasus ya taon, impanengneng na apatiran Hebreon kalangweran ya agda nilingwanan no anton talagay importante. Saratan et si Ananias, Misael, Azarias, tan Daniel. Inawit irad Babilonia nen 617 B.C.E. Guapo tan intelihente irayan kalangweran tan no nengnengen et singa mainomay iran naimpluensyaan na saray kagagawad Babilonia. Balet andi. Nanengneng ed saray ginawa da ya agda nilingwanan so espiritual ya tawir da. Benendisyonan iran maong nen Jehova lapud tinumbok da nin siansia iray katuaan ya naaralan da nen ugugaw ni ra.—Basaen so Daniel 1:8, 11-15, 20.

11. Panon ya agunggonaan so arum ed espiritual ya tawir nen Jesus?

¹¹ Si Jesus so sankaabigan ya alimbawa ya angapresya ed espiritual ya tawir to. Dakel so imbangat ed sikato na Ama to, tan talagan pinabli to iratan. Nanengneng tayoy apresasyon to ed sayan imbaga to: “Sasalitaen ko no anto iray imbangat ed siak na Ama.” (Juan 8:28) Tan labay ton inabang so naaralan tod arum pian nagunggonaan met ira. Imbaga to: “Kaukolan ko met so onla ed arum niran syudad pian iyabawag so maong a balita na panarian na Dios, ta saya so angibakian ed siak.” (Luc. 4:18, 43) Lapud agpapablien na mundo so espiritual iran bengatla, tinulongan to ray disipulo to pian namoria dan kaukolan ya ‘ag-ira kabiangan na mundo.’—Juan 15:19.

12. (a) Panon ya onaplika so 2 Timoteo 3:14-17 ed dakel ya kalangweran natan? (b) Anto ray nepeg ya itepet na saray kalangweran a Kristiano ed sarili da?

¹² Singa sarayan kalangweran ya nantongtongan tayo, ompan pinabaleg ka met na atateng ya matoor ed si Jehova. No ontan so situasyon mo, onaplikad sika imay ibabaga na Biblia nipaakar ed si Timoteo. (Basaen so 2 Timoteo 3:14-17.) Saray atateng mo so “akaaralan mo” nipaakar ed tuan Dios tan no panon mon napaliket. Nayarin ginapoan da ka lan bangatan manlapud inkaugaw mo. Baleg so nitulong na satan pian ‘magmaliw kan marunong parad kilalaban diad panamegley na pananisia nipaakar ed si Kristo Jesus’ tan pian ‘akaparaan kan maong’ ed panlingkor mod Dios. Say tepet natan et: Kasin talagan aapresyaen mo iray inawat mo? Kaukolan mon usisaey sarilim. Nonot mo irayan tepet: ‘Kasin maliket ak ta kaiba ak ed andukey ya listaan na saray matoor ya  tasi? Kasin proud ak ya sakey ak ed saray pigpigara diad dalin ya ipapasen na Dios ya kaaro to? Kasin aapresyaen ko so espisyal tan baleg ya pribilehyon naamtaan so katuaan?’

13, 14. Antoy labay ya salien na arum ya Kristianon kalangweran, balet akin ya makapuy itan? Mangiter na alimbawa.

¹³ Wala ray kalangweran ya pinabaleg na Kristianon atateng ya agda nanenengneng so baleg ya pandumaan na espiritual ya paraiso natan tan say ambilbilunget ya mundo nen Satanas. Wala ni ra ingey arum ya atukson salien so bilay ed mundo. Balet kasin salien moy manpatalapos pian naamtaan mo labat no kasin ansakit itan—odino no kasin ompatey kad satan? Siempre andi! Kanian agmo la kaukolan ya naeksperiensyay “marutak a kabibilay” ed sayan mundo pian naamtaan mo labat ya graben sakit na linawa so iter na satan.—1 Ped. 4:4.

¹⁴ Si Gener, ya taga Asia, et pinabaleg ed Kristianon pamilya tan abautismoan nen 12 años to. Balet nen tinedyer la, sikatoy atukson salien so bilay ed mundo. Inkuan to: “Labay koy magmaliw ya ‘bulos’ ed sayan mundo.” Nagmaliw ya doble so panagbilay nen Gener. Nen 15 años to, inalig to lay arum ya kagagawa na saray mauges ya kaaro to. Naaralan to lay oninum tan manayew. Lablabi met la no onsempet ed abung da ta mibilyar ni tan manggalaw na bayolenti ran computer games kaiba ray kakaaro to. Balet kalabas na panaon, amoria to ya agmet lanlamang maliket ed gagawaen to. Singa anggapoy kabaliksan na bilay to. Natan et akapawil lay Gener ed kongregasyon. Imbaga to: “Dakel nin siansiay subok, balet mas dakel so bendisyon ya iiter nen Jehova.”

15. Antoy nepeg ya dalepdepen na saray kalangweran, balang lan pinabaleg ira na Kristianon atateng odino andi?

¹⁵ Siempre, wala ray kalangweran ed kongregasyon ya aliwan Tasi atateng da. No sakey kad sikara, isip mo pay pribilehyom ya nakabat tan nalingkoran so Amalsa! Pigaran bilyon so totoo diad dalin. Kanian talagan baleg ya bendisyon ya inyapit to ka nen Jehova tan sikaton mismo so manbabangat ed sika. (Juan 6:44, 45) Sakey labat ed kada sanlibon too ya manbibilay natan so walaan na suston kakabatan, tan sakey kad sikara. Agta rason itan ya manliket itayo, antokaman so paraan  ya naaralan tayoy katuaan? (Basaen so 1 Corinto 2:12.) Oniay imbaga nen Gener: “Ombebegas so bagok no isipen kon manlilingkor ak ed Mabilay a Dios. Siopa ak pian kabaten nen Jehova, say Akanggawa ed uniberso?” (Sal. 8:4) Oniay kuan na sakey a sister: “Pap-proud so sakey ya estudyante no kabat na maestro to. Di mas proud tayo ta kabat itayo nen Jehova, say Makapadinayew ya Managbangat!”

16. Antoy makabat ya gawaen na saray kalangweran a Kristiano?

¹⁶ Natan ya naaralan mon baleg a pribilehyo so walad sika, agta mas determinado kan manlingkor ed si Jehova? No ontan so gawaen mo, nakaiba kad andukey ya listaan na saray matoor ya lingkor na Dios. Agmo aaligen iray kalangweran ed mundo ya pipirdien day bilay da tan anggapoy ilalo dad arapen.—2 Cor. 4:3, 4.

17-19. Akin ya nibaga tayon sankaabigan so magmaliw ya duma ed mundo?

¹⁷ Siempre, aliwan mainomay so magmaliw ya duma ed sayan mundo. Balet diad tua, atan so sankaabigan ya gawaen. Niay sakey ya alimbawa: Nonoten so atleta ya labay toy onkualipika ed Olympics. Pian makasabid Olympics, kaukolan toy magmaliw ya duma. Seguradon agmanggawa na saray bengatlan mangupot ed panaon tan atension to, ta no andi, limitado labat so training ya nagawaan to. Balet ayos labat ed sikato ya duma ed arum pian makapan-training ya maong tan manalo.

¹⁸ Agnononoten na dakel a totoo so makapuy a resulta na saray gagawaen da. Balet aliwan ontan iray lingkor na Dios. No duma itayod mundo tan papaliisan tayo ray kagagawa ya maneral ed moral tan espiritualidad tayo, ‘nabembenan tayon malet so peteg a bilay.’ (1 Tim. 6:19) Oniay imbaga na samay sister ya abitla nen niman: “No ilaban moy papanisiaan mo, balibali liknaan mo. Labay ton ibaga, walay biskeg mon magmaliw ya duma ed mundo nen Satanas. Manuna ed amin, singa nanenengneng moy Jehova ya pap-proud tan makakaimis ed sika! Ditan mo nalikna ya maong manayay duma!”

¹⁹ Anggapoy kana na bilay no say nononoten labat na sakey ya too et no anto ray naala to natan. (Ecl. 9:2, 10) No sakey kan kalangweran tan seryosom ya nonoten so gagala tan katikey na bilay, agta napakiwas kan ‘agmanbilay a singa ed saray nasyon’ tan usarey bilay mo ya makabaliksan?—Efe. 4:17; Mal. 3:18.

20, 21. No duga iray desisyon tayo, antoy tawiren tayod arapen, balet antoy nepeg tayon gawaen?

²⁰ No duga ray desisyon tayo, maliket so bilay tayo natan, tan diad arapen et ‘tawiren tayo so dalin’ tan manbilay tayoy andi-angga. Talagan dakel so bendisyon ya naawat tayo, ya agtayo naimadyin iratan ya amin. (Mat. 5:5; 19:29; 25:34) Siempre, aliwan automatiko ya iter na Dios ed sikatayo so bendisyon to. Walay nepeg tayon gawaen. (Basaen so 1 Juan 5:3, 4.) Balet seguradon nabawbawi tayoy matoor ya panlingkor tayod sikato natan!

²¹ Dakdakel lay inter nen Jehova ed sikatayo! Walaan itayo na suston kakabatan ed Salita to tan malinew so pakatalos tayod katuaan nipaakar ed sikato tan ed saray gagala to. Pribilehyo tayon natawag ed ngaran to tan magmaliw ya Tasi to. Isisipan to ya tulongan to tayo. (Sal. 118:7) Kalangweran man itayo o maedad la, komon ta ipanengneng tayon amin ya aapresyaen tayoy espiritual ya tawir tayo tan labay tayon ‘igloria si Jehova ed andi-anggaan.’—Roma 11:33-36; Sal. 33:12.