WALAY grupo na kalangweran ya Kristiano ya labay day mansine. Abalitaan da ya agusgustoan na saray kaeskuela da imay sakey ya pelikula. Balet nen kasabi dad sinean, anengneng dad saray poster ya wala ray angkabaleg ya armas tan bibiin mabanday so itsura da. Antoy gawaen na sarayan kalangweran ya Tasi? Kasin onloob niran siansia ed sinean tan ituloy dan bantayan iman ya pelikula?

Ipapanengneng na sayan situasyon ya inagew-agew itayon manggagawa na saray desisyon ya nayarin mamabiskeg o mamakapuy ed espiritualidad tayo tan ed relasyon tayod si Jehova. Ompan no maminsan et wala lay implanom a gawaen, balet nen inaral mon maong so situasyon, anguman so nonot mo. Kasin labay ya ibaga na satan ya agka makapandesisyon, odino talagan duga labat man ya ginawam?

Inad-aro tayoy Jehova kanian indedika tayoy bilay tayo ed sikato tan nampabautismo tayo. Talagan labalabay tayoy mansiansian matoor ed sikato. Balet, gagawaen na kalaban tayon si Satanas a Diablo so anggaay nayarian to pian agtayo makapanmatoor. (Apo. 12:17) Nandesisyon itayon lingkoran si Jehova tan unoren iray ganggan to. No umanen tayo itan ya desisyon, bilay tayo so nalalanor!

Masulok ya 2,600 taon lay apalabas, nampaalagey so ari na Babilonia ya si Nabucodonosor na balbaleg ya imahen ya gawad balitok tan ingganggan tod amin ya sakop to ya dakmomoan tan dayewen da itan. Siopaman ya ag-onunor ed satan et ibantak ed mandarlang ya hurnoan. Balet say taloran lingkor nen Jehova ya si Sadrac, Mesac, tan Abednego et ag-inmunor. Lapud  ag-ira dinmakmomo ed imahen, imbantak irad mandarlang ya hurnoan. Pinaneknekan dan akaparaan iran ompatey nen say ikompromiso day desisyon dan manlingkor ed Dios! Balet nanggaway milagro si Jehova tan inliktar to ra.—Dan. 3:1-27.

Ontan met nen propeta Daniel. Amta to ya no nanengneng na arum ya sikatoy manpipikasi ed Dios, sikatoy ibantak ed ungib na leon. Balet, intuloy to nin siansiay manpikasi a mamitlo ed sanagew. Ag-anguman so determinasyon nen Daniel ya dayewen so tuan Dios. Bilang resulta, sikatoy inliktar nen Jehova ed “saray leon.”—Dan. 6:1-27.

Diad sayan panaon, manmamatoor met iray lingkor na Dios ed dedikasyon dad sikato. Diad sakey ya eskuelaan diad Africa, walay grupo na saray estudyante ya Tasi nen Jehova ya agda labay so mibiang ed seremonya ya pansaludo ed simbolo na bansa ra. No itultuloy day agmibiang, imbagad sikara ya paekalen da rad eskuelaan. Balet ag-abayag et binmisita so minister of education diad lugar da tan kinatongtong to so pigaran estudyante ya Tasi. Marespeto tan makpel ya impaliwawa na sarayan kalangweran so papanisiaan da. Nanlapu lad saman, agla ran balot kinuestion diad eskuelaan. Anggapo la natan so manedesdes ed sikara ya ikompromisoy relasyon dad si Jehova.

Nengnengen met so agawad si Joseph, ya say asawa to et nansakit na cancer tan biglan inatey. Natatalosan tan rerespetoen na pamilya nen Joseph so desisyon tod pangiponpon. Balet say pamilya na asawa to et aliwa ran Tasi, tan labay dan gawaen iray kustombre ed pangiponpon, pati ray ritual ya agmamaliket ed Dios. Inkuan nen Joseph: “Lapud agda nauman so nonot ko, sinali dan impluensyaan iray anak ko; balet ag-iran balot nampaimpluensya. Labay met na saray kakanayon so manggawa na saray ritual diad abung ko ta atan so tradisyon ed lugar mi, balet imbagak ed sikara ya no talagan labay da, agda itan gagawaen ed abung ko. Amta ran kontra itan ed saray papanisiaan ko tan nen asawak, kanian kayari min nantotongtong, ginawa da itan diad arum a pasen.

“Diad sayan mair-irap ya panaon na paneermen ko, nampikasi ak ed si Jehova ya tulongan to kamin sankapamilya ya agmi nasumlang iray ganggan to. Dinengel toy pikakasik tan tinulongan to kamin manmatoor anggano wala ray desdes.” Agbalot ninonot nen Joseph tan saray anak to ya umanen so desisyon dan unoren si Jehova.

Ag-abayag kayari Paskua nen 32 C.E., walay biin taga Fenicia ya inmasingger ed si Jesu-Kristo diad Sidon. Aminpigan akikasi ed si Jesus ya papawayen toy demonyo ed anak ton bii. Nen unaan, ag-inmesel si Jesus. Insan imbaga tod saray disipulo to: “Agak nibaki parad anggan siopa, noagta parad saray abalang a karnero ed abung na Israel.” Nen mapilit nin siansia imay bii, inkuan nen Jesus: “Agmanepeg ya alaen so tinapay na ugugaw insan ibuntok itan ed saray angkekelag nin aso.” Impanengneng na bii ya mabiskeg so pananisia to ta oniay inyebat to: “On, Katawan. Balet ta saray angkekelag nin aso et kakanen da iray mekmek a napepelag manlapud lamisaan na amo ra.” Anguman so nonot nen Jesus tan tinambal to so anak na bii.—Mat. 15:21-28.

Inalig nen Jesus so alimbawa nen Jehova. Mabulos si Jehova ya umaney nonot to dependid situasyon. Alimbawa, nen saray Israelita et nanggawa na balitok ya kilaw a baka, labay to la ran pateyen ya amin. Balet inuman toy desisyon to nen akikasi si Moises ya agto ra papateyen.—Exo. 32:7-14.

Inalig nen apostol Pablo so alimbawa nen Jehova tan Jesus. Wala may panaon ya agto labay ya ipila si Juan Marcos diad pambiahe to bilang misionero ta wala may agawa ya tinaynan toy Pablo tan Bernabe nen inmunan impanbiahe da. Balet kalabas na panaon, anengneng nen Pablo ya tinmakken lad espiritual si Marcos tan baleg so naitulong to.  Kanian imbaga nen Pablo ed si Timoteo: “Itagar moy Marcos, ta sikatoy mausa-usar ed siak diad ministeryo.”—2 Tim. 4:11.

Sikatayo ey? Diad pangalig tayod mapangasi, maanos, tan maaron Ama tayod tawen, no maminsan et nayarin duga labat ya umanen tayoy nonot tayo. Singa bilang, ompan kaukolan tayon umanen so impresyon tayod arum ya too. Ag-itayo perpekto, aliwan singa si Jehova tan Jesus. No sikara ya perpekto et mabulos dan umanen so nonot da, agta manepeg labat ya umanen tayo met so nonot tayo no wala ray makatunongan a rason?

Nayarin umanen tayo met so nonot tayo no nipaakar ed iyaligwas ed espiritual tan pandampot na pribilehyo. Say arum et abayag lan manaaral na Biblia tan mimiaral balet agda ni labay so manpabautismo. Odino wala ray agagin manduaruwan manpayunir anggano sarag da met. Tan ompan wala ray brother ya anggapoy plano dan mandampot na pribilehyo ed kongregasyon. (1 Tim. 3:1) Kasin ontan so situasyon mo? Iimbitaan ka nen Jehova ya salien iratan ya pribilehyo. Kanian anto kasi no umanen moy nonot mo pian naliknam so liket na panlingkor ed Dios tan ed arum?

Oniay komento nen Ella ed panlilingkor to ed branch office na saray Tasi nen Jehova ed Africa: “Nen kakkasabik ed Bethel, agko anta no makapanbayag ak. Labalabay kon lingkoran si Jehova ya interon kamarerwa, balet maap-apit ak ed pamilyak. Nen unaan, makakailiw ak ya maong ed sikara! Balet pinaseseg ak na roommate ko, kanian nandesisyon ak ya ag-onalis. Natan ya samploy taon ko lad Bethel, nibagak ya labay koy manbayag nid sayan asainmin anggad posible pian nitultuloy kon lingkoran iray agagik.”

Kasin nanonotan moy agawad si Cain nen nanimon ed agi to tan sinmanok? Imbaga na Dios ed sayan misasanok a too ya sikatoy naabobonan lamet no manggaway maong. Sinimbawa na Dios si Cain ya daegen to so kasalanan ya singa ‘akakepkep [o manatalaran] ed pinto.’ Imbes ya umanen nen Cain so nonot tan ugali to, imbaliwala to so simbawa na Dios. Makapaermen ta pinatey to so agi to tan nagmaliw ya sankaunaan ya toon managpatey!—Gen. 4:2-8.

Nengnengen met so agawad si Arin Uzias. Nen unaan et gagawaen to so duga ed pakanengneng nen Jehova tan intultuloy ton inanap so Dios. Makapaermen ta dineral nen Uzias so rekord to nen nagmaliw ya mapaatagey. Sikatoy linmoob ed templo tan angiyapay na insenso anta aliwa balet ya saserdote! Nen binano na saray saserdote ya agto itan gagawaen, kasin inuman toy nonot to? Andi. ‘Sinmanok’ si Uzias tan imbaliwala to so pasakbay da. Kanian bilang dusa et sikatoy dinapoan nen Jehova na kating.—2 Awa. 26:3-5, 16-20.

On, wala ray panaon ya talagan kaukolan tayon umanen so nonot tayo. Nia so sakey ya alimbawa ed panaon tayo. Abautismoan si Joachim nen 1955, balet adispelo nen 1978. Kalabas na masulok ya 20 taon, inuman toy ugali to, nagbabawi, tan akapawil bilang Tasi nen Jehova. Sikatoy tinepetan na sakey elder no akin ya pinalabas to ni dakel ya taon antis ya pinmawil. Oniay ebat nen Joachim: “Walay sakit na linawak tan mapaatagey ak. Pagbabawian ko ya pinalabas ko ni dakel ya taon. Diad panaon ya dispelo ak, amtak ya saray Tasi nen Jehova so mangibabangat na katuaan.”

Nayarin wala met iray nasali tayon situasyon ya kaukolan tayon umanen so nonot tan kagagawa tayo. Komon ta akaparaan tayon gawaen itan pian napaliket tayoy Jehova.—Sal. 34:8.