NEN limay taon mi nen Gwen, nanaral kamin onsayaw. Agkami ni sankabat ed saman. Diad ibabaleg mi, talagan labalabay min dua ya magmaliw ya karera so ballet dancing. Balet nen onsisikat kami lad sayan karera, intunda mi. Akin et ontay desisyon mi?

David: Inyanak ak nen 1945 diad probinsya na Shropshire, England. Walay balibalin farm nen tatay ko diad satan a probinsya. Kada isempet ko manlapud eskuelaan, labalabay kon pakanen iray manok tan tiponen iray iknol da tan asikasoen iray baka tan karnero mi. No bakasyon, ontutulong ak ed panag-ani, ya no maminsan et siak so manda-drive na traktor.

Balet wala ni sakey ya naninteresan kon maong. Naimano nen tatay ya anggano uga-ugaw ak ni, labalabay ko lay onsayaw no walay narengel kon musika. Kanian nen limay taon ko, imbaga tod si nanay ya i-enroll da ak ed dance school diad lugar mi pian makaaral ak na tap dancing. Anengneng na maestrok ya walay potensyal kon magmaliw ya ballet dancer kanian imbangat to met itan ed siak. Nen 15 años ko, analo ak na scholarship ed kabkabat ya Royal Ballet School diad London. Ditan ko akabat si Gwen, tan sikami so ginawa ran san-partner ed sayaw.

Gwen: Inyanak ak diad syudad na London nen 1944. Ugaw ak ni et wala lay pananisiak ed Dios. Sinalik ya basaen so Biblia balet mairap kon talosan. Antis na satan, nen limay taon ko, nanaral ak ed dance school. Kayari anem taon, analo ak ed sakey ya contest ed interon Britain, ya say premyo et panaral ed The Royal Ballet School, ya walad White Lodge, sakey ya marakdakep ya mansyon ed Richmond Park ya arawid syudad na London. Ditan ak nanaral tan saray kabkabat ya instruktor so angibangat ed siak na ballet. Nen 16 ko la, nagmaliw ak ya senior student ed The Royal Ballet School diad central London, tan ditan ko akabat si David. Kalabas labat na pigaran bulan, onsasayaw kami lan dua ed saray palabas diad Royal Opera House ed Covent Garden, London.

David: On, singa imbaga nen Gwen, akapansayaw kami ed kabkabat ya Royal Opera House tan akaiba mi so London Festival Ballet (natan et English National Ballet). Walay sakey ya choreographer na Royal Ballet ya angigapoy internasyonal a kompanya diad Wuppertal, Germany, tan kaiba kami nen Gwen ed saray dancer ya impila to. Lapud satan, akapansayaw kamid saray teatro ed interon mundo, ya akaiba mi ray kabkabat ya managsayaw ya singa si Margot Fonteyn tan Rudolf Nureyev. Makompetensia so onian bilay, tan gawaen to kan  mapaatagey, kanian talagan nampokus kamid karera mi.

Gwen: Say interon isip tan laman ko et akapokus ed panagsayaw. Parehoy ambisyon mi nen David, labay mi so onsikat. Malikeliket ak no manpipirma ak na saray autograph, no makakaawat ak na saray rosas, tan no narerengel koy tipak na saray manbabantay. Balet apaliberan ak na totoon imoral, mansisigarilyo, tan mainum na alak; singa met ed saray katrabahok, manmamatalek ak ed saray pampasuwerte.

David: Kayari dakel ya taon ed sayan propesyon, naksawan ak lan biahe lan biahe. Lapud binmaleg ak ed farm, naiiliw koy simplin bilay ed probinsya. Kanian nen 1967, tinaynan koy karerak tan nantrabaho ak ed baleg ya farm ya asingger ed abung na atateng ko. Walay melag ya alolong ya imparentaan ed siak na samay akanggaway farm. Tinawagan koy Gwen diad kawalaan ton teatro tan tinepetan ko no labay toy miasawa ed siak. Sikatoy a-promote lan solo dancer tan talagan onsisikat la, kanian mairap toy mandesisyon. Balet inmabuloy lanlamang ya mankasal kami tan nanayam kamid probinsya anggano ag-apasal ed satan.

Gwen: Lanti, mairap so man-adjust ed bilay diad farm. Agak apasal ya gatasan iray baka tan pakanen iray baboy tan manok anggan antoy tiempo. Siameran bulan ya nanaral si David na kurso ed farming pian amta to ray balon paraan ed satan, kanian maslak et bukbukor ko ta labi lay isesempet to. Diad saman et inyanak ko lay panguloan ya anak min si Gilly. Nanaral ak ya man-drive, tan aminsan nen wala ak ed baley, anengneng koy Gael, sakey ya biin akabat ko nen sikatoy mantratrabaho nid shop ed lugar mi.

Inimbitaan ak nen Gael ya man-tsaa ed abung da. Impanengneng mid balang sakey iray litrato mid kasal, tan walay litrato da diad arap na lugar ya tatawagen a Kingdom Hall. Tinepet ko no anto itan ya simbaan. Nen imbaga tod siak ya sikaran sanasawa et Tasi nen Jehova, manliket ak. Anonotan ko ya walay panginaen kon Tasi met. Balet anonotan ko met ya agaylay pasnok nen amak ed sikato, tan imbantak to ray literatura to diad basuraan. Pankelawan ko no akin ya si amak ya mauy-uyamo et agaylay pasnok tod si panginaen ko ya maomaong met ya too.

Naamtaan ko ya talagan duma so sisiaen nen panginaen ko ed ibabangat na simbaan. Impanengneng ed siak nen Gael no anton talagay ibabangat  na Biblia. Abigla ak ya dakel manayan doktrina, singa say Trinidad tan imortalidad na kamarerwa, so kontra ed Biblia. (Ecl. 9:5, 10; Juan 14:28; 17:3) Tan diad saman ko labat abasa ed Biblia so ngaran na Dios ya Jehova.—Exo. 6:3.

David: Imbagad siak nen Gwen iray nanaaralan to. Nanonotan ko ya nen ugaw ak ni et imbagad siak nen tatay ko ya manbasa ak na Biblia. Kanian nampaiyaral kami nen Gwen na Biblia ed si Gael tan ed asawa ton si Derrick. Kayari anem bulan, inmalis kamid Oswestry, dia lanlamang ed probinsya na Shropshire, ta akaanap kami ditan na melag ya farm ya narentaan mi. Maanos kamin inyaralan na Tasin taga ditan ya si Deirdre. Nen primero, agkami tanton onaaligwas. Busy kamin maong ed pangaasikasod saray ayayep mi. Balet kalkalnan tinmubo so katuaan diad puso mi.

Gwen: Say sankairapan kon inekal et say pangusar na anting-anting o pampasuwerte. Akatulong ed siak so Isaias 65:11 pian nanengneng koy panmoria nen Jehova ed saray manisia ed “Kapalaran.” Abayag met antis kon imbantak so amin ya anting-anting tan pampasuwertek, tan impikasik itan ya maong. Nen naaralan ko ya “siopaman a mangiyaatagey ed inkasikato et niyabeba, tan siopaman a mangiyaabeba ed inkasikato et niyatagey,” atalosan ko no anton klase na too so aabobonan nen Jehova. (Mat. 23:12) Labay kon lingkoran so Dios ya ontan lay panangaro tod sikatayo ya inter toy mabmablin Anak to bilang dondon. Diad saman et akaduaan lay anak mi, tan makapalikliket ya naamtaan ya say pamilya mi et makapambilay na andi-angga ed paraison dalin.

David: Nen atalosan ko so makapakelaw iran kasumpalan na saray propesiyad Biblia, ya singa say nabasad Mateo kapitulo 24 tan ed libro na Daniel, akombinse ak ya saya so katuaan. Atalosan ko ya anggapoy bengatla ed sayan mundo ya makapiparad maapit ya relasyon ed si Jehova. Kanian diad kalabas na panaon, agak la tanton maambisyon. Atalosan ko ya say asawak tan saray anako et importante met a singa siak. Akombinse ak na Filipos 2:4 ya agnepeg ya say sankanonot kon lanang et say sarilik tan say pakawalaan na mas baleg a farm. Imbes, kaukolan kon iyunad bilay ko so panlingkor ed si Jehova. Intundak lay pansisigarilyok. Balet aliwan mainomay so pangiyeskedyul mid saray kimey mi pian makapiaral kami no Sabadoy labi ya 10 kilometro so kaarawi to, ta atan met so panaon ya gagatasan mi ray baka. Balet, diad tulong nen Gwen, anggapoy aral ya agmi naatendian; tan lanang min kaiba iray ananak mi ya manpulong kada Simba na kabuasan—kayari min gatasan iray baka.

Ag-agustoan na saray kakanayon mi iyan pananguman ed bilay mi. Anem taon ya si Gwen et agkinatongtong nen tatay to. Sinali met na atateng ko ya patundaen kamid panaaral mi Biblia.

Gwen: Tinulongan kami nen Jehova pian nasarag  mi irayan subok. Tan diad inlabas na panaon, saray agagi ed Oswestry Congregation so singa nagmaliw ya balon pamilya mi, ya maaron sinmuporta ed sikami. (Luc. 18:29, 30) Indedika mi bilay mi ed si Jehova tan nampabautismo kami nen 1972. Labay kon gawaey anggaay nayarian ko pian anggad posible et dakel so natulongan kon makaamtad katuaan, kanian nampayunir ak.

David: Talagan makapakesaw so pigaran taon ya impantrabaho mid farm. Balet impanengneng mid saray anak mi so maong ya alimbawa ed espiritual. Sinmabi panaon ya inmabebay ekonomya kanian tinaynan mi imay farm. Anggapoy abung tan trabaho mi, tan sakey taon ni labat na komatlon anak mi. Nampikasi kamid si Jehova ya tulongan tan igiya to kami. Nandesisyon kamin usaren so talento mi tan nanlukas kami na dance studio pian nasuportaay pamilya mi. Maabig so resulta na sagpot min iyuna so espiritual iran bengatla. Malikeliket kami ta amin ya taloran ananak mi et nampayunir kayari impaneskuela da. Lapud payunir met si Gwen, inagew-agew ton naaasistian iray ananak mi.

Nen akiasawa lay panguloan tan komaduan anak mi, si Gilly tan Denise, inkapot mi la may dance studio. Sinmulat kamid branch office no iner so nayarin pamboluntaryoan mi. Imbaki da kamid saray baley ya bandad southeast na England. Lapud saksakey lay anak min walad pudir mi, si Debbie, nampayunir ak met la. Kayari limay taon, imbaki kamin ontulong ed arum iran kongregasyon diad bandad norte. Nen akiasawa met lay Debbie, apribilehyoan kamin manboluntaryo ya samploy taon ed international construction program diad Zimbabwe, Moldova, Hungary, tan Côte d’Ivoire. Insan pinmawil kamid England pian ontulong ed pangipaalagey na London Bethel. Lapud walay eksperiensyak ed trabahod farm, niasain ak ya ontulong ed Bethel farm ya diad saman et wala ni. Natan et manpapayunir kamid bandad northwest na England.

Gwen: Say ballet so inmunan angidedikaan mi bilay mi. Makapaliket itan balet temporaryo labat. Si Jehova so komadua tan sankaimportantian ya angidedikaan mi bilay mi. Inikdan to kami baleg tan agmanganggan liket. San-partner kami nin siansia, balet natan et uusaren mi ray sali mi diad panagpayunir. Agnaparaan so nalilikna min liket diad itutulong mid dakel ya totoo pian naamtaan day mablin katuaan ya mangisalbay bilay. Sarayan “sulat na rekomendasyon” et agbalot naparaan na anggan anton karera ed sayan mundo. (2 Cor. 3:1, 2) No agmi nalmo so katuaan, say nakera labat ed sikami et daan iran litrato, programad teatro, tan arum nin pakanodnonotan ed datin karera mi.

David: Talagan anguman so bilay mi lapud karera mid panaglingkor ed si Jehova. Amtak ya akatulong itan pian magmaliw ak ya mas maong ya asawa tan ama. Ibabaga na Biblia ya si Miriam, Arin David, tan arum ni et sinmayaw lapud liket da. Kanian tatalaranan mi, ontan met na arum, so panaon ya onsayaw kami lapud liket diad balon mundo nen Jehova.—Exo. 15:20; 2 Sam. 6:14.