1, 2. Antoy paneknek ya inar-aro nen Jesus iray totoo?

SAY panguloan ya Anak na Dios so “uloen a komikimey” nen Jehova tan sankaabigan ya paneknek na agnaparaan ya karunongan to. Imadyin mo pa labat so liket ya alikna nen Jesus sanen ‘inletneg nen Ama to so tawen tan dalin.’ Balet diad amin a pinalsa, say panliliketan ya maong nen Jesus et “saray anak na totoo.” (Uli. 8:22-31) On, antis nin linmad dalin si Jesus et inar-aro to la ray totoo.

² Pinaneknekan na Panguloan ya Anak na Dios so katooran tan panangaro tod Ama to, ontan met ed panangaro tod “saray anak na totoo,” nen mabulos ton ‘tinaynan so amin a walad sikato’ diad tawen tan linma diad dalin bilang too. Inter to so bilay to ya “panondon ed amayamay.” (Mat. 20:28; Fil. 2:5-8) Talagan inar-aro to ray totoo! Nen wadiad dalin si Jesus, sikatoy inikdan na Dios na pakayarin manggaway milagro. Nanengneng ed saratan ya milagro ya inar-aro to ray totoo tan no antoy asingsingger to lan gawaen diad interon mundo.

3. Antoy aralen tayo ed sayan artikulo?

³ Nen wadiad dalin si Jesus, impulong to so “maong a balita  na panarian na Dios.” (Luc. 4:43) Amta to ya pasantoen na satan a Panarian so ngaran na Ama to tan atan so permanentin solusyon ed problema na amin a totoo. Legan na ministeryo nen Jesus, dakel a milagro so ginawa to. Ipapanengneng na saratan ya milagro ya inar-aro to ray totoo. Akin et importante itan ed sikatayo? Lapud ontulong itan pian ombiskeg so ilalo tan talek tayod arapen. Pantongtongan tayo so apatiran milagro nen Jesus.

4. Antoy agawa nen walay lakin akating ya inmasingger ed si Jesus?

⁴ Nen asingger lan nasumpal so ministeryo nen Jesus, sikatoy linmad Galilea. Diad sakey ed saray syudad ditan, walay laki ya inmasingger ed sikato ya grabe so kating to. (Mar. 1:39, 40) Unong ed si Lucas, ya sakey a doktor, satan a laki et “napno na kating.” (Luc. 5:12) Ibabaga na Biblia a sanen anengneng na lakin akating si Jesus, “dinmakmomo tan akikasi, a kuan to: ‘Katawan, sarag mo ak a linisan no labay mo.’” Amta to ya walay pakayari nen Jesus ya paabigen so sakit to. Balet say labay ton naamtaan et no kasin labay nen Jesus ya gawaen itan. Antoy gawaen nen Jesus? Anto kasi walad nonot to legan ton sankanengneng iyan laki ya napnoy kating? Kasin si Jesus et singa saray Fariseo, ya anggapoy panangasi dad saray akating? Anto kasi gawaen mo no sika si Jesus?

5. Akin ya labay nen Jesus ya paabigen so akating?

⁵ Mapatnag ya agtinulok na sayan lakin akating imay walad Mosaikon Ganggan ya kaukolan toy oneyag na “Marumsis, marumsis.” Balet agla itan sinita nen Jesus. Imbes, say inimano to et samay laki tan say pankaukolan to. (Lev. 13:43-46) Agtayo amta no antoy eksakton inisip nen Jesus, balet amta tayo no antoy walad puso to. Akasian to imay laki, kanian nanggaway milagro. Inyunat nen Jesus so lima to, insan diniwit to, tan maaro ton imbaga: “Labay ko! Nalinisan ka.” Tampol a “naandi so kating na laki”! (Luc. 5:13) On, inikdan nen Jehova si Jesus na pakayari, aliwa labat a pian makapanggaway milagro noagta pian nipanengneng toy panangaro tod totoo.—Luc. 5:17.

6. Antoy makapakelaw ed saray milagro nen Jesus, tan antoy ipapanengneng na saratan?

⁶ Panamegley na pakayari na Dios, akapanggawa si Jesus na dakel iran milagro. Aliwa labat lan akating so pinaabig to, noagta amaabig met na nanduruman sakit. Ibabagad sikatayo na Biblia: “Nikelawan iray totoo sanen anengneng da a mansasalita la iray emel tan manaakar la iray piley tan makakanengneng la iray bulag.” (Mat. 15:31) Nen pinaabig nen Jesus iray mansasakit, agto la kaukolan ya salatan so parte na laman da ya walaay deperensya panamegley na transplant. Pinaabig ton mismo imay parte na laman ya apektado! Tan tampol ton apaabig iray mansasakit, ya no maminsan et anggano walad arawi. (Juan 4:46-54) Antoy ipapanengneng na sarayan milagro? Si Jesus, say Ari tayo, et walaan na pakapanyarin ekalen so amin a sakit tan labalabay ton gawaen itan. No aralen tayo so impantrato nen Jesus ed saray totoo, makapanmatalek tayo ya diad balon mundo et “kasian to so pobri  tan say mairap-bilay.” (Sal. 72:13, NW) On, tulongan nen Jesus so amin ya nanairapan lapud labalabay ton gawaen itan.

7, 8. Panon ya akatongtong nen Jesus so lakin mansasakit diad tiponan na danum na Bethzatha?

⁷ Pigaran bulan kayarin pinaabig nen Jesus so akating diad Galilea, sikatoy linma ed Judea pian ipulong so maong a balita na Panarian na Dios. Seguradon nilibon totoo so akadngel ed mensahe nen Jesus tan atenyeg so puso ra lapud panangaro tod sikara. Labalabay ton ipulong so maong a balita ed saray mairap-bilay, naaripen, tan napapairap.—Isa. 61:1, 2; Luc. 4:18-21.

⁸ Diad bulan na Nisan, linmay Jesus ed Jerusalem pian iselebra so Paskua. Dakel so totoon linma ditan parad satan ya espisyal ya okasyon. Diad bandad norte na templo, walay tiponan na danum ya say tawag et Bethzatha, tan ditan et walay akatongtong nen Jesus ya lakin mansasakit.

9, 10. (a) Akin ya oonla iray totoo ed tiponan na danum diad Bethzatha? (b) Antoy ginawa nen Jesus ditan, tan antoy naaralan tayod satan? (Nengnengen so litratod gapo na artikulo.)

⁹ Dakel ya mansasakit tan walaay deperensyad laman so oonlad Bethzatha. Akin? Lapud papanisiaan da ya onabig so sakit da no onlasur irad nakikimbog ya tiponan na danum. Imadyin mo pa labat so nalilikna na saray totoon wadtan. Desperado, mapagpaga, tan singa anggapo lay ilalo ran onabig. Balet, akin ya linma ditan si Jesus, anta perpekto tan agmet mansasakit? Lapud inaro to ray totoo. Ditan anengneng nen Jesus so lakin abaybayag lan mansasakit.—Basaen so Juan 5:5-9.

¹⁰ Tinepetan nen Jesus so laki no kasin labay toy onabig. Imadyin mo pa labat so ermen to legan ton ibabagad si Jesus ya labay toy onabig balet anggapoy mangilasur ed sikato diad tiponan na danum. Balet walay ingganggan nen Jesus ed sayan too ya singa imposible. Ingganggan ton libiten toy dukolan to tan onakar. Inunor toy Jesus, nilibit toy dukolan to tan nanakar. Satan a milagro et paneknek ed no antoy gawaen nen Jesus diad balon mundo. Tan paneknek met itan na panangaro to. Inanap to ray mankaukolan na tulong. Aligen tayo komon so alimbawa nen Jesus. Tuloytuloy tayon anapen diad teritorya tayo iray totoon maneermen lapud mauges iran nagagawa ed sayan mundo.

11. Panon ya ipapanengneng na Marcos 5:25-34 ya kakasian nen Jesus iray mansasakit?

¹¹ Basaen so Marcos 5:25-34. Labinduan taon lan aanosan na sakey a bii so makapabaing ya sakit to. Lapud satan ya sakit to et naapektoan so bilay to, pati say panagdayew to. Anggano ‘dakel lay nampatambalan to tan naupot lay amin a kaykayarian to,’ siansia nin ag-inmabig tan linmoor ni ingen so sakit to. Balet aminsan, walay anonotan ton gawaen pian onabig. Implano ton asinggeran si Jesus. Akiletletan ed saray totoo tan diniwit toy kawes nen Jesus. (Lev. 15:19, 25) Alikas nen Jesus ya walay pakayarin pinmaway ed sikato, kanian tinepet  to no siopay aniwit ed kawes to. “Natatakot tan manggiwgiw” imay bii ya ‘dinmakmomo ed arap nen Jesus tan impatua to so amin.’ Lapud amta nen Jesus ya say Ama to so amaabig ed sayan bii, maaro ton imbaga: “Ana’ko, say pananisiam so amaabig ed sika. La ka ed kareenan, tan onabig ka la ed makapairap a sakit mo.”

12. (a) Antoy nibagam ed si Jesus base ed saray apantongtongan tayo lad sayan artikulo? (b) Antoy naaralan tayod sikato?

¹² Talagan inar-aro nen Jesus iray totoo, lalo la ray mansasakit. Labay nen Satanas ya nalikna tayon anggapoy kana tayo tan anggapoy mangaaro ed sikatayo. Balet pinaneknekan nen Jesus diad saray milagro to ya inar-aro to itayo tan labay to tayon tulongan. Talagan maar-aron Ari tan Atagey a Saserdote si Jesus! (Heb. 4:15) Aliwan mainomay ya talosan so nalilikna na saray walaan na graben sakit, lalo la no agtayo ni ‘tan asali. Balet tandaan tayo ya anggano agbalot asali nen Jesus so nansakit, akasian to ray mansasakit. Komon ta gawaen tayoy anggaay nayarian tayon aligen si Jesus.—1 Ped. 3:8.

13. Antoy naaralan tayo nipaakar ed si Jesus sanen binilay toy Lazaro?

¹³ Alikna nen Jesus so sakit ya nalilikna na arum. Singa bilang, nen inatey so kaaro ton si Lazaro, nanermen a maong tan agonigon si Jesus. Manakis anggano amta ton bilayen to lanlamang si Lazaro. (Basaen so Juan 11:33-36.) Agto inyamot so emosyon to. Inar-aro nen Jesus si Lazaro tan say pamilya to kanian inusar toy  pakayari na Dios pian bilayen si Lazaro.—Juan 11:43, 44.

14, 15. (a) Antoy mangipapanengneng ya labalabay nen Jehova ya ekalen so paniirap na totoo? (b) Antoy naaralan tayod salitan “pakanodnonotan iran lubok”?

¹⁴ Ibabaga na Biblia ya si Jesus et “kaulibay ton maong” so Ama to. (Heb. 1:3) Kanian, panamegley na saray milagro to, pinaneknekan ton labalabay to tan na Ama to ya ekalen so sakit tan ipapatey. Tan diad arapen et mas dakel ni bilayen nen Jehova tan nen Jesus. Imbaga nen Jesus: “Onsabi so oras a saray amin a walad pakanodnonotan iran lubok et . . . ompaway.”—Juan 5:28, 29.

¹⁵ Inusar nen Jesus so balikas ya “pakanodnonotan iran lubok,” a mangipapanengneng ya nalalanor so memorya na Dios. Say Makapanyarin-amin ya Dios ya Amalsa ed interon uniberso et nanonotan to so amin a detalye na kada inatey ya inad-aro tayo, kaiba la ditan so personalidad da. (Isa. 40:26) Aglabat iratan sarag ya nonoten nen Jehova noagta labalabay ton nonoten iratan. Ipapanengneng na inkioli nen Lazaro tan na arum nin nirekord ed Biblia no antoy nagawa ed balon mundo.

16. Antoy pribilehyo na dakel a Kristiano ya mansiansian matoor?

¹⁶ No mansiansia tayon matoor, nanengneng tayoy sakey ed saray sankarakepan ya milagro—say pakaliktar ed baleg a kairapan! Kayari na Armagedon, dakel nin milagro so nagawa. Diad satan, say kondisyon na laman na amin a totoo et perpekto la. (Isa. 33:24; 35:5, 6; Apo. 21:4) Imadyin mo pa ray totoo ya ibantak da la ray salming da, baston, saklay, wheelchair, tan hearing aid da. Amta nen Jehova ya amin a makaliktar ed Armagedon et kaukolan ya mabiskeg tan maong so kondisyon na laman da, ta dakel so nepeg dan gawaen. Parakepen da so interon dalin tan gawaen dan paraiso.—Sal. 115:16.

17, 18. (a) Akin ya nanggaway milagro si Jesus? (b) Akin ya kaukolan tayon gawaey anggaay nayarian tayo pian makaloob ed balon mundo na Dios?

¹⁷ Napapaseseg so “baleg ya ulop” natan no nababasa day impamaabig nen Jesus nensaman ed saray mansasakit. (Apo. 7:9) Lapud saratan a milagro, ombibiskeg so ilalo tayo ya diad arapen et naekal lan amin so sakit. Ipapanengneng na saratan ya inar-aro na panguloan ya Anak na Dios so amin a totoo. (Juan 10:11; 15:12, 13) Nanengneng met ed inkamapangasi nen Jesus ya inar-aro nen Jehova so kada lingkor to.—Juan 5:19.

¹⁸ Saray totoo natan et nagogonigon, naiirapan, tan ompapatey. (Roma 8:22) Kanian kaukolan tayoy balon mundo. Ditan et perpekto lay kondisyon na laman na totoo ya singa impormisa na Dios. Ibabaga na Malaquias 4:2 ya ‘onlukso itayo’ ed liket ta perpekto tayo la. Komon ta say apresasyon tan pananisia tayod saray sipan nen Jehova so mamakiwas ed sikatayon gawaey anggaay nayarian tayo pian makaloob ed balon mundo. Talagan makapalikliket ta naamtaan tayon ipapanengneng na saray milagro nen Jesus legan a wadiad dalin no anto ray permanentin bendisyon ya gawaen to diad uley to!