Binasam ta iray agano nin isyu na Say Panag-bantayan tan The Watchtower? Salim pa sirin ya ebatan irayan tepet:

Kasin nepeg ya manpikasi iray Kristiano ed si Jesu-Kristo?

Andi. Imbangat a mismo nen Jesus ya manpikasi itayod si Jehova, tan angiter ni ingen na alimbawa no panon ya gawaen itan. (Mat. 6:6-9; Juan 11:41; 16:23) Anggan saray patumbok nen Jesus nensaman et nampikasi ed Dios, aliwan diad sikato. (Gawa 4:24, 30; Col. 1:3)—1/1-E, pahina 14.

Anto ray nagawaan tayo pian makapanparaan parad pannodnonot ed impatey nen Jesus kada taon?

Say sakey ya nagawaan tayo et tumboken tayoy eskedyul na babasaen ed Biblia parad Memoryal. Sarag tayo met ya aruman so panaon tayod ministeryo. Tan nayari tayon ipikasi tan dalepdepen so ilalon inter na Dios ed sikatayo.—1/15, pahina 14-16.

Antoy nansumpalan na saramay duaran Ehipsion priso ya angibagay kugip da ed si Jose?

Imbaga nen Jose ed managserbi na iinumen na Faraon ya sikatoy makapawil ed datin trabaho to. Balet imbaga tod samay panadero ya say kabaliksan na kugip to et sikatoy pateyen tan ibitin ed sakey ya poste. Tinmua iraman ya imbaga to. (Gen. 40:1-22)—2/1-E, pahina 12-14.

Antoy surprisa parad saray agagi ed Japan?

Walay naawat dan balon publikasyon ya say karga to et libro na Mateo ya inalad Balon Mundo a Patalos. Inyopresi itan ed ministeryo, tan dakel ya agpamilyar ed Biblia so angawat ed satan.—2/15, pahina 3.

Anto ray agawgawa nen inmunan siglo ya akatulong pian nipulong so maong a balita?

Lapud Pax Romana odino Kareenan ed Roma, ngalngali anggapoy agawan rebelyon. Saray disipulo nensaman et akapambiahe ed marakep iran dalan. Lapud dakel so makapansalitay Griego, akatulong itan ed panagpulong pati ed saray Judio ya nitayak ed nanduruman lugar ya sakop na empiryo. Nausar ni ingen na saray disipulo so ley na Roma pian idepensa so maong a balita.—2/15, pahina 20-23.

Akin ya agmanseselebra iray tuan Kristiano na Easter?

Ingganggan nen Jesus iray patumbok to ya nodnonoten day impatey to, aliwan say inkioli to. (Luc. 22:19, 20)—3/1-E, pahina 8.

Diad imbeneg iran taon, akin et matalag lan nabasa ed saray publikasyon tayo so nipaakar ed tipiko tan antitipiko?

Ibabaga na Biblia ya wala ray totoo nensaman ya walay irerepresenta da. Say sakey ya alimbawa et nabasad Galacia 4:21-31. Anggaman ontan, mas maabig no agtayo iisipen ya amin a detalye et mangisisimbolo ed bengatlan nagawad arapen. Balet dakel a leksion so naaralan tayo ed saray indibidual tan agawgawa ya abitlad Biblia. (Roma 15:4)—3/15, pahina 17-18.

Akin ya importante so piraso na papyrus ya nalmod daan ya basuraan diad Ehipto?

Masulok ya 100 taon lay apalabas, walay nalmon piraso na papyrus ya pakabasaan na pigaran bersikulo na Ebanghelyo nen Juan. Insulat itan pigaran dekada kayari na impatey nen Juan. Say nabasa ditan et eksakto lawari ed no antoy walad Biblia tayo natan, kanian paneknek itan ya agnauman so Biblia anggan aminpigapiga lan kinopya.—5/1, pahina 10-11.

Akin ya maaron uksoyan so pandispelo ed nankasalanan ya agmagbabawi?

Nabasad Biblia so importantin uksoyan na pandispelo, ya parad pankaabigan na amin. (1 Cor. 5:11-13) Napagalangan so ngaran nen Jehova, napansiansian malinis so kongregasyon, tan natulongan so nankasalanan a manguman.—4/15, pahina 29-30.