NEN abautismoan si Anita * bilang Tasi nen Jehova, sikatoy graben pinasegsegang na asawa to. “Papatundaen to ak ya miaral tan agto anggan labay ya bitlaen koy ngaran na Dios,” so imbaga nen Anita. “Narengel to labat ya bitlaen koy ngaran nen Jehova, onsabo lay dala to.”

Sakey ni, aglabay na asawa nen Anita ya ibangat to ray ananak da nipaakar ed si Jehova odino ipila iran miaral. Talagan mairap iya ta kaukolan to nin iyamot so pangibangat ed ananak da.

Nanengneng tayod eksperiensya nen Anita ya talagan nasubok so katooran na sakey a Kristiano no sikatoy patundaen na kapamilya ton manlingkor ed si Jehova. Nasubok met so katooran tayo no walaan tayoy graben sakit, inateyan na anak odino asawa, odino walay kapamilya tayon tinaynan toy katuaan. Antoy makatulong ed sakey a Kristiano pian makapansiansian matoor ed si Jehova?

Oniay imbaga nen apostol Pablo: ‘Kaukolan yoy mansungdo.’ (Heb. 10:36) Balet antoy makatulong pian makapansungdo tayo?

Sakey ed saray manunan paraan pian nasungdoan tayo ray subok et say pampikasi ed Dios. Imanoen pay agawad si Ana. Ngarem na Lunes ed saman nen biglan inatey so asawa to. Talomplon taon la ran sanasawa. “Agla akasempet ed abung” so kuan nen Ana, “tan 52 años to ni labat.”

Panon itan ya asarag nen Ana? Sikatoy nampokus ed trabaho, balet siansian agnakal so ermen ya nalilikna to. Imbaga to: “Imbalikas kod si Jehova so naliliknak tan impikasik ya tulongan to ak.” Kasin inebatan nen Jehova so pikakasi to? On. Imbaga to: “Say deen ya iiter na Dios so tinmulong pian onlemew so liknaan ko tan nabawasay ermen ko. Segurado ak ya paolien nen Jehova so asawak.”—Fil. 4:6, 7.

‘Dedengelen nen Jehova iray pikakasi tayo’ tan impormisa to ya iter toy antokaman ya kaukolan na saray lingkor to pian makapansiansia iran matoor ed sikato. (Sal. 65:2) Agta makapabiskeg itan na pananisia? Agta makatulong met itan pian makapansungdo ka?

Susuportaan nen Jehova iray lingkor to panamegley na kongregasyon. Singa bilang, nen apasegsegang so kongregasyon na Tesalonica, pinaseseg ira nen Pablo ya “itultuloy [dan] ligliwaen tan pabiskegen so sakey tan sakey, a singa gagawaen [da] la.” (1 Tes. 2:14; 5:11) Lapud inar-aro tan tutulongan day sakey tan sakey, saray agagi ed Tesalonica et akapansiansian matoor. Say maabig ya alimbawa ra et makatulong ed sikatayo natan pian makapansungdo itayo met.

Kaukolan tayoy mikaaro ed saray agagi tan manpapasesegan, lalo lad saray mairap ya panaon. (Roma 14:19) Naeksperiensyan mismo nen Pablo so dakel ya kairapan, balet pinabiskeg nen Jehova pian makapansungdo. Wala ray panaon ya inusar na Dios iray agagi pian pabiskegen si Pablo. Singa bilang, nen impawit nen Pablo so panangomusta tod saray agagi ed Colosas, oniay imbaga tod sikara: “Nagmaliw iran makapabiskeg a tulong ed siak.” (Col. 4:10, 11) On, inar-aro day Pablo kanian niligliwa tan pinabiskeg da nen kakkaukolan toy tulong. Seguradon asalim met lay apaseseg tan tinulongan na saray agagi ed kongregasyon.

Sakey nin lapuan na tulong ya uusaren na Dios diad kongregasyon et saray elder. Sarayan  maespiritual a lalaki et “singa sakey ya amotan [ed] dagem, tan sakey a siroman ed bagyo, singa saray agus na saray danum ed pasen ya amaga, singa anino na sakey a baleg a batondampay ed sakey a dalin ya amagaan.” (Isa. 32:2) Talagan makaligliwa itan! Kasin patutulongan kad saray elder no walay problemam? Say panamaseseg tan suporta da et ontulong pian makapansungdo ka.

Siempre, agnasolusyonan na saray elder so amin a problemam. Ag-ira perpekto, tan ‘wala ray kakapuyan da a singa sikatayo.’ (Gawa 14:15) Balet, baleg so nitulong na pampikasi ra parad sikatayo. (Sant. 5:14, 15) Walay brother diad Italy ya abayag to lan aanosan so graben sakit ton tatawagen ya muscular dystrophy. Oniay imbaga to: “Say panangaro na saray elder tan naynay ya ibibisita ra et akatulong ed siak pian makapansungdo ak.” No nanairapan ka, labay nen Jehova ya onkerew kay tulong ed saray elder.

Wala ni arum ya nagawaan mo pian makapansungdo—say pangitultuloy ed espiritual a rotinam. Imanoen pay alimbawa nen John ya 39 años to, ya a-diagnose a walay cancer to. Imbaga to: “Agak makapanisian walay sakit ko anta uga-ugaw ak ni.” Diad saman et taloy taon ni labat so anak to. “Lapud sakit ko, aliwan say anak mi labat so asikasoen nen asawak noagta pati siak met, tan kaukolan to ak ya ibaan a naynay ed doktor,” so kuan nen John. Lapud chemotherapy, kinmapuy ya maong so laman nen John tan naynay a makakauta. Aliwan satan labat. Nansakit met na grabe so tatay to tan kaukolan met ya asikasoen.

Panon ya asarag nen John tan na pamilya to iyan mair-irap ya situasyon? “Anggano makapkapuy ak, seseguroen kon tuloytuloy so espiritual a rotina na pamilyak,” so imbaga to. “Aatendian min amin so aral, sinimba kamin manpupulong, tan regular so family worship mi anggan no maminsan et mairap.” On, apaneknekan nen John ya pian nasungdoan so antokaman ya subok, kaukolan ya pansiansiaey espiritualidad. Anggaman abigla tan kinmapuy nen naamtaan toy sakit to, ag-abayag et dinmeen so nonot to. Amta ton sikatoy inar-aro tan papabiskegen nen Jehova. Tulongan ka met nen Jehova no wala ray kapagaan mo tan natatakot ka. Imbaga nen John: “Pabiskegen ka nen Jehova, a singa ginawa tod siak.”

Diad tulong na Dios, seguradon nasungdoan tayo ray kairapan odino subok—natan tan diad arapen. Manpikasi tayod si Jehova, magmaliw a maapit ed saray agagi, patulongan ed saray elder, tan itultuloy so regular ya espiritual a rotina tayo. No gawaen tayo iratan, iyaaplika tayo so simbawa nen Pablo ya: ‘Kaukolan yoy mansungdo.’