1. Panon tayon uusaren ed ministeryo so pikakasi ya walad Mateo 6:9-13?

KABISADO na dakel ya totoo so Pikakasi na Katawan. No manpupulong tayod kaabungan, naynay tayon uusaren iyan pikakasi pian natalosan na unabung ya say Panarian na Dios et gobierno ya gawaen ton paraiso so interon dalin. Odino uusaren tayoy balikas ya “napasanto komon so ngaran mo” pian ipanengneng ya walay ngaran na Dios tan kaukolan tayon pasantoen.—Mat. 6:9.

2. Panon tayon amta ya aglabay nen Jesus ya ulit-uliten ya salita-por-salita so modelon pikakasi?

² Kasin imbangat nen Jesus iyan pikakasi pian salita-por-salita tayon ulit-uliten, ya singa gagawaen na Kakristianoan? Andi. Antis ya inter nen Jesus iyan pikakasi bilang pangaligan, oniay imbaga to: “Sano manpipikasi ka, agmo uulit-uliten ya ibaga iray apasakey a bengatla.” (Mat. 6:7) Diad sakey nin pankanawnawa, inulit to iyan pikakasi balet ag-angusar na pareho iran salita. (Luc. 11:1-4) No ontan sirin, say rason no akin ya imbangat nen Jesus iyan pikakasi et pian naamtaan  tayo ray kaukolan tayon ipikasi tan no dinan so mas importante. Kanian duga labat sirin ya tawagen itan ya modelon pikakasi.

3. Anto ray nayarin itepet tayod sarili tayo legan tayon aaralen so modelon pikakasi?

³ Aralen tayod sayan artikulo tan ed ontumbok iray karga na modelon pikakasi. Legan tayon aaralen iya, tepetay sarilim: ‘Panon iyan makatulong pian napaaligwas koy pikakasik? Tan kasin manbibilay ak unong ed modelon pikakasi?’

4. Antoy ipapanonot ed sikatayo na balikas ya “Ama mi,” tan akin ya nibaga tayon si Jehova et “Ama” met na saray Kristianon say ilalo ra et diad dalin?

⁴ Inusar nen Jesus so balikas ya “Ama mi,” aliwan “Amak.” Ipapanonot na satan ed sikatayo ya si Jehova et Ama tayon amin a sanaagi ed interon mundo. (1 Ped. 2:17) Agaylan pribilehyo itan! Saray alanaan ya Kristiano et tinagibi bilang ananak na Dios ya manbilay ed tawen. Kanian manepeg labat ya tawagen day Jehova ya “Ama.” (Roma 8:15-17) Saray Kristianon walaan na ilalon manbilay diad dalin et sarag da met ya tawagen si Jehova ya “Ama.” Sikatoy lapuan na bilay da, tan iiter toy pankaukolan da. Magmaliw met la ran “ananak na Dios” no perpekto la ra tan mansiansia ran matoor diad unor ya subok.—Roma 8:21; Apo. 20:7, 8.

5, 6. Anton balibalin regalo so niiter na atateng ed ananak da, tan antoy kaukolan ya gawaen na kada anak ed satan ya regalo? (Nengnengen so litratod gapo na artikulo.)

⁵ Balibalin regalo so iiter na saray atateng ed ananak da no ibabangat da ran manpikasi tan no tutulongan da ran ipasen si Jehova bilang Ama dad tawen. Oniay nanonotan na sakey ya manangasikaso na sirkito diad South Africa: “Manlapu lad inkiyanak na anak min bibii, kada labi et kaibak iran manpipikasi puera labat no anggapo ak ed abung. Naynay ya ibabaga na ananak mi ya agda la natandaan iray eksakton salita na saray pikakasi mi kada labi. Balet, agda nalingwanan so inkasagrado na pitotongtong mid si Aman Jehova, tan say deen na nonot tan seguridad ya alikna da. Nen amta da lay manpikasi, pampipikasien ko ran maksil pian narengel ko no panon dan ibalikas ed si Jehova so nononoten tan nalilikna ra. Pankanawnawa iraman pian naamtaan koy walad puso ra. Kayari to et ibangat kod sikara iray importantin karga na modelon pikakasi ya sarag dan ipila pian mas makabaliksan so pikakasi ra.”

⁶ Kanian agla pankelawan ya binmaleg ya maespiritual iray ananak na sayan brother. Natan et malikeliket ira kaibay asawa ra ya manlilingkor ed si Jehova ya sigpot-panaon. Anggapo lay mas maabig ya regalon niiter na atateng ed ananak da nen say pangibangat ed sikara no panon iran nawalaay maapit ya relasyon ed si Jehova. Siempre, responsabilidad na kada anak ya pansiansiaen itan ya maapit a relasyon. Pian nagawaan da itan, kaukolan dan aroen tan respetoen so ngaran na Dios.—Sal. 5:11, 12; 91:14.

7. Anton pribilehyo so walad totoo na Dios, balet antoy kaukolan tayon gawaen?

⁷ Talagan sakey ya pribilehyo ya amta tayoy ngaran na Dios tan sikatayo so “totoon parad ngaran to.” (Gawa 15:14; Isa. 43:10) Ipipikasi tayod Ama tayod tawen: “Napasanto komon so ngaran mo.” No ontan so ipipikasim, kerew mo met  ed si Jehova ya tulongan to ka pian agka makagawa odino makapansalita na bengatlan mamabanday ed masanton ngaran to. Agtayo labay ya aligen iray arum nen inmunan siglo ya agda iyaaplika so ipupulong da. Oniay insulat nen apostol Pablo ed sikara: “Say ngaran na Dios et pansasalitaan na mauges lapud sikayoran totoo ed limog na saray nasyon.”—Roma 2:21-24.

8, 9. Mangiter na alimbawa no panon ya bebendisyonan nen Jehova iramay mamapasanto ed ngaran to.

⁸ Labay tayon napasanto so ngaran na Dios. Imanoen pay eksperiensya na sakey ya sister diad Norway. Nen biglan inatey so asawa to, atilak ed sikato so duay taon ya anak dan laki. “Ansaki-sakit iman ya agawad bilay ko,” so imbaga to. “Inagew-agew tan inoras-oras kon ipipikasi ya nawalaan ak komon na biskeg ya kontrolen so emosyon ko, diad ontan et duga iray desisyon ko tan makapanmatoor ak, pian anggapoy rason nen Satanas ya balawen si Jehova. Labay kon napasanto so ngaran nen Jehova, tan labay kon nanengneng lamet na anako so tatay to diad Paraiso.”—Uli. 27:11.

⁹ Kasin inebatan nen Jehova iray pikakasi to? On. Akatulong ed sikato so regular ya pipiulop ed saray agagi. Kayari limay taon, sikatoy akiasawa ed sakey ya elder. Natan et 20 años lay anak to, tan bautismado la. Imbaga to: “Malikeliket ak ta tinulongan ak na asawak ya napabaleg so anako.”

10. Panon a sigpot ya napasanto so ngaran na Dios?

¹⁰ Panon a sigpot ya napasanto so ngaran na Dios? Pian nagawa itan, kaukolan ya ekalen nen Jehova so amin ya agmanpapasakop ed soberanya to. (Basaen so Ezequiel 38:22, 23. *) Diad satan ya panaon, kalkalnan magmaliw lan perpekto iray totoo. Labalabay tayo lan onsabi so panaon ya amin ya intelihentin pinalsa ed tawen tan dalin et igalang da so masanton ngaran na Dios. Diad satan a panaon, say maaron Ama tayod tawen so magmaliw lan “alenleneg a Manuley na amin.”—1 Cor. 15:28.

11, 12. Nen 1876, antoy atalosan na saray tuan Kristiano?

¹¹ Antis ya pinmawil ed tawen si Jesus, sikatoy tinepetan na saray apostol to: “Katawan, ipawil mo ta so panarian na Israel diad sayan panaon?” Ipapanengneng na ebat nen Jesus ya aliwa nin panaon pian naamtaan da no kapigan onggapon manuley so Panarian na Dios. Imbaga tod saray apostol to ya manpokus irad panagpulong a kimey. (Basaen so Gawa 1:6-8.) Imbangat to met iran ipikasi dan onsabi so Panarian na Dios. Kanian anggad natan, ipipikasi na saray Kristiano ya onsabi so Panarian.

¹² Nen asingger lan onggapon manuley si Jesus ed Panarian na Dios, tinulongan nen Jehova iray totoo to ya natalosan no kapigan itan nagawa. Nen 1876, im-publish so artikulon insulat nen Charles Taze Russell diad magasin ya Bible Examiner. Indanet na artikulon “Kapigan Manampot so Panaon na Saray Gentil?” ya say 1914 et importantin taon. Impaliwawa na satan ya say “pitoran panaon” ya impropesiya  nen Daniel et pareho lanlamang ed samay “aturon panaon na saray nasyon” ya impropesiya nen Jesus. *—Dan. 4:16; Luc. 21:24.

13. Antoy agawa nen 1914, tan antoy pinaneknekan na saray agawgawad mundo ed satan ya taon?

¹³ Nen 1914, ginmapo so guerra diad Europe ya anggad akibiang so dakel nin bansa diad interon mundo. Lapud guerra, naeksperiensya na totoo so graben eras. Tan antis itan ya anampot nen 1918, walay kinmayat ya trangkaso ya amatey ed mas dakel nin totoo nen say inatey ed guerra. Amin iratan et kaibad inter nen Jesus ya “tanda” ya sikatoy manuuley la bilang Ari diad tawen nen 1914. (Mat. 24:3-8; Luc. 21:10, 11) Diad satan ya taon, “sikatoy linma pian manalo tan sumpalen toy panatalo to.” (Apo. 6:2) Sikatoy akilaban ed si Satanas tan ed saray demonyo to, tan imbantak to ra diad dalin. Manlapu lad saman, anengneng na totoo ya tinmua irayan impuyan ya salita: “Kasi lay dalin tan say dayat, lapud linmeksab ed sikayo so Diablo, ya agaylay pasnok to, ta amta ton antikey lay panaon to.”—Apo. 12:7-12.

14. (a) Akin ya importante nin siansia ya ipikasin onsabi la komon so Panarian na Dios? (b) Anton importantin kimey so nepeg tayon gawaen?

¹⁴ Say propesiya ya walad Apocalipsis 12:7-12 so ontulong ed sikatayon natalosan no akin ya wala ray makapataktakot ya agawa diad dalin nen niletneg so Panarian  na Dios. Anggaman manuuley lay Jesus diad tawen, siansian si Satanas so manuuley diad dalin. Balet asingsingger lan ‘sumpalen nen Jesus so panatalo to’ diad pangekal to ed amin ya kaugsan diad dalin. Kanian kaukolan tayo sirin ya tuloytuloy ya ipikasin onsabi la komon so Panarian na Dios. Tan nepeg ya manbilay itayo unong ed satan ya pikakasi diad makulin pangipulong ed Panarian. Impropesiya nen Jesus: “Sayan maong a balita na panarian so nipulong ed interon dalin bilang pantasi ed amin a nasyones, insan onsabi so anggaan.”—Mat. 24:14.

15, 16. Panon tayon nipanengneng ya manbibilay itayo unong ed kerew tayon nagawa komon so linawa na Dios diad dalin?

¹⁵ Manga 6,000 taon lay apalabas, agawa so linawa na Dios diad dalin. Kanian imbaga nen Jehova: “Agaylay abig iya.” (Gen. 1:31, NW) Balet nanrebelde si Satanas, tan manlapu lad saman et dagdaiset lay totoon manggagaway linawa na Dios. Anggaman ontan, natan et manga waloran milyon lay manlilingkor ed si Jehova. Ipipikasi dan nagawa la komon so linawa na Dios diad dalin, tan gagawaen day anggaay nayarian dan manbilay unong ed satan ya pikakasi. Nanengneng itan ed paraan na kabibilay da tan ed maseseg ya pibibiang dad kimey a panaggaway babangatan.

¹⁶ Singa bilang, oniay imbaga na sister ya abautismoan nen 1948 tan nanlingkor ya misionero ed Africa: “Naynay kon ipipikasi ya amin ya kinmarneron totoo et naromog komon tan nakabat day Jehova legan ya wala ni panaon. Ontan met, antis ak ya manpulong et ipipikasik ya nawalaan ak komon na karunongan pian nasabik so puso na nakatongtong ko. Tan diad saramay iyaaralan la na Biblia, ipipikasik met ed si Jehova ya bendisyonan toy sagpot tayon natulongan ira.” Sayan 80 años ya sister et nagmaliw ya epektibo ed ministeryo. Diad tulong na arum ya agagi, dakel so atulongan ton magmaliw ya Tasi nen Jehova. Seguradon wala met iray kabat mon maseseg ya agagi ya gagawaen day linawa na Dios anggano maedad la ra.—Basaen so Filipos 2:17.

17. Antoy nibagam ed gawaen nen Jehova diad arapen parad totoo tan ed dalin?

¹⁷ Anggad agni aderal iray onkokontrad Panarian na Dios, itultuloy tayon ipikasi ya nagawa la komon so linawa na Dios diad dalin. Say dalin et magmaliw ya paraiso, tan binilyon ya totoo so napaoli. “Agyo pankelawan iya,” so imbaga nen Jesus, “lapud onsabi so oras a saray amin a walad pakanodnonotan iran lubok et narengel day boses [ko] tan ompaway ira.” (Juan 5:28, 29) Imadyin mo pay liket tayo sano nanengneng tayo lamet iray inad-aro tayod bilay ya napaoli! ‘Punasen na Dios so amin a lua ed kamataan tayo.’ (Apo. 21:4) Dakel ed saray napaoli et “agmatunong,” ya agdan balot naamtaay katuaan nipaakar ed si Jehova tan ed si Jesus. Talagan malikeliket tayon ibangat ed sikara so linawa na Dios pian nawalaan ira na “bilay ya andi-anggaan.”—Gawa 24:15; Juan 17:3.

18. Anto ray manunan pankaukolan na totoo?

¹⁸ Niwala so deen tan pankakasakey ed interon uniberso no pasantoen la na Panarian na Dios so ngaran nen Jehova. No naebatan la so unonan taloran kerew diad modelon pikakasi, niiter la so manunan pankaukolan na totoo. Balet, wala ni ray pankaukolan tayo ya abitlad modelon pikakasi nen Jesus. Aralen tayo iratan diad onsublay ya artikulo.