1, 2. Diad Hebreon Kasulatan, antoy tutukoyen na terminon ‘gagatinan na saray sali’?

IMBAGA nen Jehova a Dios: “Say tawen sikato so tronok, et say dalin sikato so gagatinan na saray salik.” (Isa. 66:1) Nipaakar ed sayan ‘gagatinan na saray sali to,’ imbaga to met: “Igloriak so pasen a kawalaan na saray salik.” (Isa. 60:13, NW) Panon ton gawaen itan? Tan antoy epekto na satan ed sikatayo ya manbibilay diad dalin, say ‘gagatinan na saray sali to’?

² Diad Hebreon Kasulatan, say terminon ‘gagatinan na saray sali’ et aglabat ontutukoy ed dalin, noagta ontutukoy met itan ed templo diad Israel nensaman. (1 Awa. 28:2; Sal. 132:7) Satan a templo diad dalin so nagmaliw a sentro na dugan panagdayew. Atan so rason no akin ya marakdakep itan ed pakanengneng nen Jehova. On, satan ya templo so angigloria ed gagatinan na saray sali nen Jehova.

3. Anto so baleg ya espiritual a templo na Dios, tan kapigan itan niletneg?

³ Diad panaon tayo, say sentro na dugan panagdayew et aliwa lan literal a templo diad dalin. Balet, walay espiritual a templo, ya mas mangiiter na gloria ed si Jehova nen say antokaman ya bilding. Satan ya espiritual a templo et ontutukoy ed uksoyan pian saray totoo et makaasingger  ed Dios panamegley na inkasaserdote tan dondon nen Jesu-Kristo. Niletneg itan nen 29 C.E. nen abautismoan si Jesus tan nilanaan nen Jehova bilang Atagey a Saserdote na baleg ya espiritual a templo To.—Heb. 9:11, 12.

4, 5. (a) Panon ya deniskribe na Salmo 99 so pilalek na saray mandadayew ed si Jehova? (b) Antoy kaukolan ya itepet tayod sarili tayo?

⁴ Lapud aapresyaen tayo so uksoyan ya espiritual a templo, iglogloria tayoy Jehova diad pangipapakabat tayoy ngaran to tan idadayew tayo lapud maaron probisyon to ya dondon. Talagan makapalikliket ya naamtaan ya masulok lan waloran milyon so tuan Kristiano natan ya aktibon mangiglogloria ed si Jehova! Aliwan singa saray arum ya relihyoson totoo ya iisipen dan nidayew da so Dios no anggapo la ra diad dalin tan wala la ra kuno ed tawen, amta na saray Tasi nen Jehova ya natan la so nepeg ya pangidayew dad Dios diad mismon dalin.

⁵ Kanian aligen tayo ray alimbawa na saray matoor ya lingkor nen Jehova ya deneskribe ed Salmo 99:1-3, 5-7. (Basaen.) Singa nabasad satan ya salmo, sinuportaan di Moises, Aaron, tan Samuel so uksoyan na dugan panagdayew diad panaon da. Diad panaon tayo, antis ya onlad tawen iray alanaan pian manlingkor bilang saserdote ya kaiba nen Jesus, sikaray matoor lan manlilingkor diad sular na espiritual a templo diad dalin. Susuportaan ira na minilyon ya ‘arum a karnero.’ (Juan 10:16) Anggano mandumaan so ilalo na sayan duaran grupo, mankakasakey iran mandadayew ed si Jehova diad gagatinan na saray sali to. Balet maabig no itepet na kada sakey ed sikatayo: ‘Kasin gagawaen koy anggaay nayarian kon suportaan so uksoyan nen Jehova parad dugan panagdayew?’

6, 7. Antoy linmesan problema ed saray Kristiano nensaman, tan antoy kaukolan ya nagawa kalabas na pigaran siglo?

⁶ Ngalngalin sakey siglo kayarin niletneg so Kristianon kongregasyon, ginmapo so apostasya. (Gawa 20:28-30; 2 Tes. 2:3, 4) Lapud satan et mairap ya bidbiren no siopa ran talagay manlilingkor ed Dios ed espiritual a templo to. Balet kalabas na pigaran siglo, inusar nen Jehova so introno ton Ari, si Jesu-Kristo, pian ipaamta no siopa ray manlilingkor ed espiritual a templo.

⁷ Nen 1919, alinewan no siopa ray aabobonan nen Jehova tan no siopa ray manlilingkor ed espiritual a templo to. Nilinisan irad espiritual pian magmaliw ya mas makapaliket ed si Jehova so panaglingkor da. (Isa. 4:2, 3; Mal. 3:1-4) Diad satan ya agawa, nibagan nasusumpal la ed limitadon paraan so sakey a pasingawey ya anengneng nen apostol Pablo pigaran siglo lay apalabas.

8, 9. Ipaliwawa so taloran aspekto na “paraiso” ya anengneng nen Pablo ed pasingawey.

⁸ Nabasa tayoy makapakelkelaw a pasingawey ya anengneng nen Pablo diad 2 Corinto 12:1-4. (Basaen.) Adeskribe itan bilang “panangiparungtal” ta nagawa ni labat itan diad arapen, aliwan diad mismon panaon nen Pablo. Nen “biglan niyakar ed komatlon tawen” si Pablo, anton “paraiso” so anengneng to? Say paraiso ya tinukoy nen Pablo et literal ya paraiso, espiritual a paraiso, tan paraiso ed tawen—satan ya talo et nagawa nid arapen. Kaibad satan so literal ya paraiso ed dalin diad arapen. (Luc. 23:43) Kaiba met ed satan so espiritual a paraiso ya sigpot lan naeksperiensya diad balon mundo. Ontan met, kaibad satan so balibalin kipapasen ed tawen diad “paraiso na Dios.”—Apo. 2:7.

 ⁹ Akin balet et imbaga nen Pablo ya “nadngel to iray salitan agnayarin ibalikas tan agmanepeg a salitaen na sakey a too”? Diad saman et aliwa nin panaon pian detalyadon ipaliwawa nen Pablo iray makapakelkelaw ya anengneng tod satan ya pasingawey. Balet natan et manepeg lan ibaga ed arum iray bendisyon ya naeeksperiensya la na saray totoo na Dios!

10. Akin ya aliwan pareho so terminon “espiritual a paraiso” tan “espiritual a templo”?

¹⁰ Lanang ti lan uusaren so balikas ya “espiritual a paraiso,” balet anto itan? Tutukoyen na satan so nikadkaduma tan mayaman ya kipapasen tayod espiritual, ya lapud satan et walaan tayoy maapit a relasyon ed Dios tan ed saray agagi tayo. Balet tandaan ya say “espiritual a paraiso” tan “espiritual a templo” et aliwan pareho. Say espiritual a templo et say uksoyan na Dios parad dugan panagdayew. Say espiritual a paraiso et say pakabidbiran no siopa ray aabobonan na Dios tan no siopa ray mandadayew natan ed espiritual a templo to.—Mal. 3:18.

11. Anton pribilehyo so walad sikatayo natan nipaakar ed espiritual a paraiso?

¹¹ Talagan makapalikliket ya naamtaan ya manlapu la nen 1919 et inikdan nen Jehova na pankanawnawa iray agperpekton totoo ya mitulongan ed sikato pian pabunaen, pabiskegen, tan palaknaben so espiritual a paraiso diad dalin! Kasin mitutulongan ka ed sayan marakdakep a kimey? Kasin labalabay moy mitulongan ed si Jehova pian igloriay ‘pasen ya kawalaan na saray sali to’?

12. Akin ya kombinsido itayon nasusumpal la so Isaias 60:17? (Nengnengen so litratod gapo na artikulo.)

¹² Impasakbay nen propeta Isaias ya wala ray nagawan marakdakep a pananguman ed kabiangan na organisasyon nen Jehova a walad dalin. (Basaen so Isaias 60:17.) Nayarin saramay ugugaw odino balo nid katuaan et abasa da la so nipaakar ed sarayan pananguman odino arengel da la itan ed arum. Balet wala ray agagi ya naeksperiensya dan mismo itan tan baleg itan a pribilehyo! Kanian kombinsido ira ya uusaren nen Jehova so introno ton Ari pian igiya so organisasyon To! Amta dan walay basiyan na talek da, ya singa met ed sikatayo. Ombiskeg so pananisiam tan talek mod si Jehova no narengel mo ray makapaseseg ya eksperiensya ra.

13. Anton obligasyon so ibabagad sikatayo na Salmo 48:12-14?

¹³ Anggan panon lay kabayag tayod katuaan, kaukolan tayon ibagad arum so nipaakar ed organisasyon nen Jehova. Talagan milagro ya naeeksperiensya tayoy espiritual a paraiso ed sayan mundo ya mauges, imoral, tan anggapoy panangaro! Kanian, malikeliket tayon ipasa ed ‘ontumbok a kailalakan’ odino henerasyon iray amta tayo nipaakar ed espiritual a paraiso tan ed “Sion,” say makapakelaw ya organisasyon nen Jehova.—Basaen so Salmo 48:12-14.

14, 15. Anto ray pananguman ed organisasyon nen 1970’s, tan akin ya maong so resulta na saratan?

¹⁴ Diad linmalabas iran taon, anengneng a mismo na saray maedad lan agagi tayo iray pigaran pananguman ya lalon amarakep ed kabiangan na organisasyon nen Jehova a walad dalin. Nanonotan da ya nensaman, saray kongregasyon et idadaulo na congregation servant imbes ya ulop na saray mamatatken, diad saray bansa et branch servant imbes ya Branch Committee, tan presidente na Watch Tower Society so mangiiter na instruksion imbes ya say Mananguley ya Ulop na Saray Tasi nen Jehova. Anggano amin irayan brother et wala  ray katulongan da, saksakey labat so manggagaway desisyon ed saray kongregasyon, branch office, tan diad world headquarters. Balet nen 1970’s, inuman itan ya uksoyan pian say responsabilidad ya mangidaulo et niiter ed grupo na saray elder, aliwan diad saksakey labat a too.

¹⁵ Kasin maong so resulta na saratan ya pananguman? On, ta nibase iratan ed onlilinew a pikakabat tayod Kasulatan. Imbes ya saksakey labat ya too so manggaway amin ya desisyon, mas inmaligwas so organisasyon lapud maabig iran kualidad na amin ya “langkap a lalaki.”—Efe. 4:8; Uli. 24:6.

16, 17. Anto ran agano nin pananguman so labalabay mo, tan akin?

¹⁶ Isipen tayo pa met iray agano nin pananguman, singa say impanguman na itsura, karga, tan paraan na panangibunog na saray publikasyon tayo. Malikeliket tayon iyoopresi irayan praktikal tan marakdakep ya literatura! Tan no usaren tayo ray modernon teknolohiya pian nipulong so katuaan, singa say jw.org ya website tayo, aaligen tayoy Jehova, ya labalabay ton iter ed amin a totoo so panangigiya ya kakkaukolan da.

¹⁷ Maabig met so resulta ed ginawan pananguman ed eskedyul na aral pian walay panaon tayo parad Panagdayew na Pamilya odino personal ya panagaral. Aapresyaen tayo met so inyaligwas na saray programa ed asemblea tan kombension tayo. Talagan nanenengneng tayo ya kada taon et mas ondadakep iratan! Seguradon malikeliket tayo met ed dakel ya teokratikon eskuelaan ya diad saratan et nipapasal itayo. Diad sarayan pananguman, talagan nanenengneng tayo so panangigiya nen Jehova. Tuloytuloy ton pararakepen so organisasyon to tan  say espiritual a paraiso ya natan ni labat et naeeksperiensya tayo la!

18, 19. Antoy nitulong tayo pian mas ondakep so espiritual a paraiso?

¹⁸ Sakey a pribilehyo ya inikdan itayo nen Jehova na pankanawnawan makatulong pian naparakep so espiritual a paraiso tayo. Gagawaen tayo itan diad maseseg ya pangipupulong tayoy maong a balita na Panarian tan panaggaway mas dakel nin babangatan. Diad itutulong tayod arum pian idedika day bilay dad si Jehova, papaawangen tayoy ketegan na espiritual a paraiso.—Isa. 26:15; 54:2.

¹⁹ Mas napaparakep tayo met so espiritual a paraiso tayo no tuloytuloy tayon paaligwasen so ugali tayo. Lapud satan, mas ondadakep so espiritual a paraiso diad pakanengneng na arum. No maminsan, aliwan say kakabatan tayod Biblia, noagta say malinis ya panagbilay tan maong iran ugali tayo so rason no akin ya onasingger iray totoo ed organisasyon tayo tan ed Dios tan ed Kristo.

20. Singa ibabaga na Uliran 14:35, antoy labalabay tayon gawaen?

²⁰ Seguradon malikeliket si Jehova tan si Jesus no nanenengneng day marakdakep ya espiritual a paraiso tayo natan! No natan ni labat et maliket tayo lan ontutulong pian mas ondakep itan, mas maliket tayo no gawaen tayo lan literal a paraiso iyan dalin. Tandaan tayon naynay so ibabaga na Uliran 14:35, NW: “Say ari et naliliketan ed lingkor ya onkikiwas a makabat.” Komon ta naynay tayon onkiwas ya makabat legan tayon mitutulongan pian mas ondakep so espiritual a paraiso tayo!