AMTA na dakel a totoo ya walay 12 ya apostol nen Jesus. Balet ompan agda amta ya wala ray bibiin disipulo to ya akakkaiba to. Si Juana so sakey ed sikara.—Mat. 27:55; Luc. 8:3.

Antoy intulong nen Juana ed ministeryo nen Jesus, tan antoy naaralan tayod alimbawa to?

Si Juana et “asawa nen Cuza, a lakin manangasikaso ed sankaabungan nen Herodes.” Nayarin si Cuza so mayurdomo ed abung nen Herodes Antipas. Si Juana et sakey ed saray pigaran bibii ya pinaabig nen Jesus. Akila si Juana tan say arum nin bibii ed impanpulong nen Jesus tan na saray apostol to ed nanduruman lugar.—Luc. 8:1-3.

Imbangat na saray Judion rabbi ya saray bibii et agnepeg ya miulop ed saray lalaki ya agda kanayon, lalo la no mila ran manbiahe diad nanduruman lugar. Diad tua, agtanton kakatongtongen na saray Judion lalaki iray bibii. Balet anggano wala ray ontan ya tradisyon, inmabuloy si Jesus ya milad sikato si Juana tan arum nin bibii.

Amta nen Juana ya sikatoy balawen na saray lider na relihyon, kakanayon, tan kakaaro to no sikatoy milad si Jesus tan ed saray apostol. Amin ya akilad si Jesus et nepeg ya akaparaan ed saray pananguman ya nagawad bilay da. Anggaman ontan, oniay imbaga nen Jesus nipaakar ed saray patumbok to: “Say inak tan saray agagik et sarayan onderengel tan manusumpal ed salita na Dios.” (Luc. 8:19-21; 18:28-30) Talagan makapaseseg ya naamtaan ya maapit so liknaan nen Jesus ed saramay akaparaan ya mansakripisyo pian magmaliw ya patumbok to.

Nanlingkor si Juana tan saray dakel nin bibii ed si Jesus tan ed Labindua, ya “inusar da iray kayamanan da.” (Luc. 8:3) “Anggapoy ibabaga nen Lucas ya saray bibii so nanlutoy panangan, nansinop na anganan, tan nandait na saray kawes,” so kuan na sakey a managsulat. “Nayarin ginawa da met itan . . . , balet aliwan ontan so imbaga nen Lucas.” Mapatnag ya inusar na sarayan bibii so kuarta odino saray kaykayarian da pian nasuportaan si Jesus tan saray apostol to.

Diad impanpulong nen Jesus tan saray apostol to, ag-ira nantrabaho. Kanian, ompan anggapoy pakasarag dan mangaliw na naakan tan arum nin  pankaukolan na manga 20 ya totoo ya kaibad grupo da. Anggano wala ray amarawes ed sikara, mapatnag ya ag-ira nanilalon naynay ya walay mamarawes ta walay awi-awit dan “kahon na kuarta.” (Juan 12:6; 13:28, 29) Nayarin si Juana tan arum nin bibii so nandonasyon pian walay nagastos da.

Ibabaga na arum ya imposiblin nawalaay kuarta o kaykayarian so sakey ya Judion bii. Balet unong ed daan iran sulsulat, say sakey ya Judion bii et nayarin nawalaay kuarta o kayamanan diad nanduruman paraan: (1) walay naawat ton tawir lapud inatey so ama to ya andian na anak a laki, (2) walay angiter ed sikato na kaykayarian, (3) walay nanaawat ton sustento ed datin asawa to ya angidiborsyo ed sikato, (4) walay kuarta tan kaykayarian ya intilak ed sikato na asawa ton inatey la, odino (5) walay trabaho to kanian makakalmo.

Seguradon sinmuporta iray patumbok nen Jesus diad paraan ya sarag da. Nayarin wala ray mayaman ya bibiin nagmaliw ya patumbok to. Wala ray mangibabagan posiblin mayaman si Juana ta asawa na manangasikaso na sankaabungan nen Herodes. Nayarin sikato so angiter ed samay kawes nen Jesus ya anggapoy nansaipan. Imbaga na sakey a managsulat ya say ontan ya kawes et “agnasaliw na asaway managsigay.”—Juan 19:23, 24.

Ag-espisipikon ibabaga na Kasulatan ya nandonasyon na kuarta si Juana. Balet ginawa toy anggaay nayarian to, tan makaaral tayod satan. Antokaman so iter tayo parad Panarian—odino wala man so iter tayo o anggapo—sikatayoy akauley. Say importantid Dios et maliket tayon gagawaey anggaay nayarian tayo.—Mat. 6:33; Mar. 14:8; 2 Cor. 9:7.

Mapatnag ya wadman si Juana nen inatey si Jesus, kaiba to ray arum ya bibii “a mimila tan manlilingkor ed sikato sanen walad Galilea, tan say dakel nin bibii ya akiulop ed sikaton tinmatdang ed Jerusalem.” (Mar. 15:41) Nen inekal lay bangkay nen Jesus diad poste pian niponpon la, ‘saramay bibiin akila ed sikato manlapud Galilea et ninengneng day lubok tan no panon so impangilira ed bangkay to; tan sinmempet ira pian mangiparaan na saray pabalingit tan ambalingit a larak.’ Kayari na sabaton, sarayan bibii—ya unong ed si Lucas et di “Maria Magdalena, tan Juana, tan Maria ya ina nen Santiago”—et pinmawil ed lubok tan anengneng da iray anghel ya angibagad sikara ya pinaoli lay Jesus.—Luc. 23:55–24:10.

Posiblin kaiba si Juana ed saramay disipulo ya nantitipon ed Jerusalem nen Pentecostes 33 C.E. ya kaiba da met so ina tan agagi nen Jesus. (Gawa 1:12-14) Lapud nantrabahoy asawa nen Juana ed si Herodes Antipas, nayarin si Juana so nanlapuan na saray detalyin insulat nen Lucas nipaakar ed si Herodes, lalo la ta si Lucas labat so managsulat na Ebanghelyo ya amitlad ngaran nen Juana.—Luc. 8:3; 9:7-9; 23:8-12; 24:10.

Wala ray makapainteres ya naaralan tayod alimbawa nen Juana. Ginawa toy anggaay nayarian to pian nalingkoray Jesus. Seguradon malikeliket ya nanenengneng ton nauusar so kuarta to pian makatulong ed si Jesus, ed saray Labindua, tan ed arum nin disipulo diad impanpulong da. Nilingkoran nen Juana si Jesus tan nanmatoor anggano wala ray subok. Satan ya kualidad to et balibalin aligen na saray Kristianon bibii natan.