1. Panon kaimportante so pananisia? (Nengnengen so litratod gapo na artikulo.)

NAISIP mo ta la, ‘Kasin siak may klase na toon iliktar nen Jehova ed baleg a kairapan?’ Amta tayon wala ray kaukolan tayon gawaen pian makaliktar itayo, balet indanet nen apostol Pablo so sakey ya importantin kualidad a nepeg ya walad sikatayo. Imbaga to: “No anggapoy pananisia et agbalot napaliket so Dios.” (Heb. 11:6) No nengnengen tayo et singa simpli labat itan, balet diad tua, “aliwan amin a totoo et walaan na pananisia.” (2 Tes. 3:2) Natalosan tayod sarayan teksto ya talagan importante ya pabiskegen tayoy pananisia tayo.

2, 3. (a) Antoy imbaga nen Pedro nipaakar ed kaimportantian na pananisia? (b) Anto ran tepet so aralen tayo?

² Impaimano nen apostol Pedro so kaimportantian na pananisia nen tinukoy to so nipaakar ed “asubok a kualidad na pananisia” ya “panlapuan na dayew tan gloria tan galang sano omparungtal lay Jesu-Kristo.” (Basaen so 1 Pedro 1:7.) Natan ya asingsingger lay baleg a kairapan, agta labay tayon seguroen ya say pananisia tayo et irayew na maglorian Ari tayo sano sikatoy omparungtal la? Siempre labay tayon sakey tayo ed saramay “walaan na pananisia a pakaliktaran na kamarerwa.” (Heb. 10:39) Kanian singa samay lakin akikasid si Jesus, ibaga tayo met ya: “Tulongan mo ak no iner so pankukulangan koy pananisia!” (Mar. 9:24) Odino singa saray apostol nen Jesus et napakiwas tayo met ya ibagan: “Aruman moy pananisia mi.”—Luc. 17:5.

 ³ Aralen tayod sayan artikulo irayan tepet: Panon tayon napabiskeg so pananisia tayo? Panon tayon nipanengneng ya walay pananisia tayo? Akin ya segurado itayon ebatan na Dios so kerew tayon aruman toy pananisia tayo?

4. Anto ran alimbawa so mamakiwas ed sikatayon pabiskegen so pananisia tayo?

⁴ “Amin ya insulat nensaman et insulat pian nibangat itayo,” kanian makaaral tayod saramay mabiskeg so pananisia ra ya akarekord ed Biblia. (Roma 15:4) No nabasa tayoy bilay nen Abraham, Sara, Isaac, Jacob, Moises, Rahab, Gideon, Barak, tan arum ni, napakiwas itayon usisaen so mismon pananisia tayo. (Heb. 11:32-35) Ontan met, no basaen tayo ray istoryay bilay na agagi tayo ed sayan modernon panaon ya makapadinayew so pananisia ra, napakiwas itayon gawaen so anggaay nayarian tayon pabiskegen met so pananisia tayo. *

5. Panon ya impanengneng nen Elias ya mabiskeg so pananisia tod si Jehova, tan antoy epektod sikatayo na alimbawa to?

⁵ Say sakey ya alimbawad Biblia et si propetan Elias. Imadyin yo pa ray agawad bilay to ya pakapatnagan ya talagan nanmatalek ed si Jehova. Singa bilang, nen impaamta nen Elias ed si Arin Ahab so mensahe na Dios ya ag-onuran na pigaran taon, oniay mataletalek ton imbaga: ‘Unong a si Jehova et mabilay, anggapoy linaew nisay uran ed sarayan taon, likud labat no salitaen ko.’ (1 Ara. 17:1) Matalek si Elias ya itarya nen Jehova so pankaukolan to tan na arum legan na kelang. (1 Ara. 17:4, 5, 13, 14) Imbalikas to met so talek to ya sarag a paolien nen Jehova so inatey ya ugaw. (1 Ara. 17:21) Agnanduaruwa si Elias ya mangibaki si Jehova na apoy ya mangupot ed bagat ya inyapay to diad Palandey Carmelo. (1 Ara. 18:24, 37) Nen panampoten la nen Jehova so kelang, anggano anggapo ni anengneng nen Elias ya paneknek ya onuran la, imbaga tod si Ahab: “Onsegep ka, mangan ka tan oninum ka; ta wala so tanol na daakan ya uran.” (1 Ara. 18:41) Agta no nababasa tayo irayan salaysay et napapakiwas itayon usisaen so sarili tayo no kasin ontan met so kabiskeg na pananisia tayo?

6. Antoy kerewen tayod si Jehova pian ombiskeg so pananisia tayo?

⁶ Agtayo napabiskeg so pananisia tayo dia labat ed dilin sagpot tayo. Say pananisia et sakey ya aspekto na bunga na masanton espiritu na Dios. (Gal. 5:22) Kanian maabig no unoren tayo imay insimbawa nen Jesus ya ipikasi tayod si Jehova a tuloytuloy to tayon ikdan na masanton espiritu. Impaseguro nen Jesus ya say Ama et “mangiter na masanton espiritu ed saramay onkekerew ed sikato.”—Luc. 11:13.

7. Iyilustra no panon tayon napabiskeg so pananisia tayo.

⁷ Anggano mabiskeg lay pananisia tayo, kaukolan ya tuloytuloy tayo nin pabiskegen itan. Say pananisia et singa apoy. No mamarlang kay kiew, nayarin diad gapo et marngat itan. Balet no agmo sungloran, kalkalnan onkuyep so apoy ya anggad ngalab labat lay nakera insan magmaliw lan dapol. Balet no sungloran mo lan sungloran, tuloytuloy ya marlang so apoy. Ontan met ed pananisia tayo. Mansiansia itan ya mabiskeg no regular itayon manaral na Salita na Dios. No tuloytuloy tayon aralen so Biblia, onaralem so panangaro tayo ed satan tan ed Autor to, tan atan so mamakiwas ed sikatayon pabiskegen ni so pananisia tayo.

8. Antoy makatulong pian napabiskeg tayoy pananisia tayo tan napansiansia tayon mabiskeg itan?

 ⁸ Anto ni nagawaan mo pian napabiskeg moy pananisiam tan napansiansiam itan ya mabiskeg? Agka labat mankokontento ed saray inaral mo antis kan nampabautismo. (Heb. 6:1, 2) Aral mo ray asumpal lan propesiya ed Biblia pian lalon ombiskeg so pananisiam. Usar mo met so Salita na Dios pian nausisam no kasin talagan mabiskeg so pananisiam.—Basaen so Santiago 1:25; 2:24, 26.

9, 10. Panon ya ombiskeg so pananisia tayo panamegley na (a) maong iran kaulop? (b) saray pantitipon? (c) panagpulong?

⁹ Sisimbawaen itayo nen apostol Pablo ya ‘manpapasesegan itayo panamegley na pananisia na kada sakey.’ (Roma 1:12) Diad pilimog tayod saray agagi, napapabiskeg tayoy pananisia na balang sakey, lalo la no nakakaiba tayo iramay asubok lay pananisia da. (Sant. 1:3) Deralen na mauges iran kaulop so pananisia tayo, balet pabiskegen itan na maong iran kaulop. (1 Cor. 15:33) Atan so rason no akin ya nabibilin itayon agpaulyanan iray “pantitipon tayo,” noagta itultuloy tayoy “manpapasesegan.” (Basaen so Hebreos 10:24, 25.) Sakey ni, ombibiskeg so pananisia tayo ed saray nanaaralan tayod saray pantitipon. Unong ed si Pablo, nawalaan labat na pananisia so sakey “kayari ton narengel so salita.” (Roma 10:17) Kasin parte la na bilay tayo so iyatendi ed saray Kristianon pantitipon?

¹⁰ No mibiang tayod ministeryo, napabiskeg tayoy pananisia na arum tan ombiskeg met so mismon pananisia tayo. Singa saray Kristiano nen inmunan siglo, naaralan tayoy manmatalek ed si Jehova tan makpel ya manpulong ed amin a pankanawnawa.—Gawa 4:17-20; 13:46.

11. Akin ya mabiskeg so pananisia di Caleb tan Josue, tan panon tayo ran naalig?

¹¹ Ombiskeg so pananisia tayod si Jehova legan tayon nanenengneng no panon to tayon tutulongan tan no panon ton eebatan iray pikakasi tayo. Ontan so naeksperiensya di Caleb tan Josue. Impanengneng day pananisia rad si Jehova sanen nan-espiya irad Insipan a Dalin. Balet kayari to man, legan dan nanenengneng so panangigiya nen Jehova ed interon bilay da, binmiskeg lan binmiskeg so pananisia rad sikato. Kampegan oniay mataletalek ya imbaga nen Josue ed saray Israelita: “Anggapoy anggan sakey a salita ed amin ya insipan nen Jehova a Dios yo ya agtinmua.” Insan inyarum to: “Kanian takotan yo si Jehova tan manlingkor kayod sikato tekep na integridad tan inkamatoor . . . Parad siak tan say pamilyak, manlingkor kamid si Jehova.” (Jos. 23:14; 24:14, 15, NW) Legan tayon naeeksperiensya so kamaongan nen Jehova, magmaliw ya ontan met so kabiskeg na pananisia tayo.—Sal. 34:8.

12. Unong ed si Santiago, panon tayon nipanengneng ya mabiskeg so pananisia tayo?

¹² Panon tayon nipanengneng ya mabiskeg so pananisia tayo? Satan ya tepet et inebatan nen disipulon Santiago: “Ipanengneng ko ed sika so pananisiak ed panamegley na saray gawak.” (Sant. 2:18) On, nanengneng ed saray gagawaen tayo no kasin mabiskeg so pananisia tayo. Amtaen tayoy pigaran paraan ya nipanengneng tayo itan.

13. Panon tayon nipapanengneng so pananisia tayo no manpupulong tayo?

¹³ Say pibiang ed panagpulong a kimey et maabig ya paraan pian nipanengneng tayoy pananisia tayo. Akin? No manpupulong itayo, ipapanengneng tayon walay pananisia tayon asingger lay anggaan na sayan sistema na mundo, ya ‘agla itan manbayag.’ (Hab. 2:3) Say sakey a paraan pian nasukat so kabiskeg na pananisia tayo et usisaen tayo no kaunongan so sarag tayon gawaen parad ministeryo.  Kasin iiter tayoy sankaabigan tayo, ya manggagawa tayoy paraan pian napalaknab tayo ni ministeryo tayo? (2 Cor. 13:5) On, say pangipulong ed maong a balita et maabig ya paraan pian nipanengneng tayon mabiskeg so pananisia tayo.—Basaen so Roma 10:10.

14, 15. (a) Panon tayon nipanengneng so pananisia ed inagew-agew ya panagbilay tayo? (b) Isalaysay so eksperiensya na pamilyan impanengneng day mabiskeg ya pananisia.

¹⁴ Nipanengneng tayo met so pananisia tayo legan tayon susungdoan iray subok ed bilay. Balanglan say dadalanen tayon subok et sakit, ikakapuy na liknaan, pakaka-depress, irap na bilay, odino antokaman ya problema, matalek tayon tulongan itayo nen Jehova tan na Anak to “sano mankaukolan itayo na tulong.” (Heb. 4:16) Ipapanengneng tayon walay talek tayod si Jehova no diad pikakasi tayo et aliwa labat ya espiritual a tulong so kerewen tayo. Imbaga nen Jesus ya ipikasi tayo met iray materyal ya pankaukolan tayo, pati ‘kanen tayo ed kada agew.’ (Luc. 11:3) Papaneknekan na saray salaysay ed Biblia ya sarag ya iter nen Jehova so antokaman ya nakaukolan tayo. Singa bilang, nen abayag ya ag-inmuran ed Israel nensaman, si Jehova so angiter na inumen tan naakan nen Elias. “Saray wawak so mangaawit ed sikato na tinapay tan karne diad kabuasan tan labi, tan diad kulos oniinum,” unong ya ingganggan nen Jehova. (1 Ara. 17:3-6, NW) Walay pananisia tayo ya sarag ya imaneobra nen Jehova iray bengabengatla pian niiter tod sikatayo so kaukolan tayo.

¹⁵ Matalek tayo ya no iyaplika tayo ray prinsipyo na Biblia, nalegpet tayoy pamilya tayo. Apaneknekan itan nen Rebecca, sakey a sister a taga Asia. Lapud iyaaplika na pamilya to so Mateo 6:33 tan Uliran 10:4, iyuuna day Panarian tan makuli ran mankimey. Imbaga nen Rebecca ya wala may panaon ya nan-resign so asawa tod trabaho ta naaapektoay espiritualidad na pamilya da. Balet walay apatiran ananak da ya kaukolan dan legpeten. Imbaga nen Rebecca no antoy ginawa ra: “Nanggawa kami ray palamis tan inlako mi. Diad pigaran taon ya atan so anapan mi,  alikna mi ya agkamin balot pinaulyanan nen Jehova. Agmin balot asali naerasan.” Kasin wala met lay naeksperiensyam ya nipanengneng mon manmamatalek ka ya walad Biblia so sankaabigan ya giya diad panaon tayo?

16. Antoy resulta no manmatalek tayod Dios?

¹⁶ Agtayon balot panduaruwaan ya no unoren tayoy panangigiya na Dios et maong so pansumpalan tayo. Inaon nen Pablo imay imbaga nen Habacuc: “Say matunong et manbilay nisengeg ed pananisia.” (Gal. 3:11; Hab. 2:4) Kanian importante ya walay pananisia tayod si Jehova ta sikato so talagan makatulong ed sikatayo. Ipapanonot ed sikatayo nen Pablo ya ‘nagawaan na Dios so amin a bengatla a mas nagkalalo ni nen say nayarian tayon kerewen odino isipen, unong ed pakayari to a napapatnagan ed sikatayo.’ (Efe. 3:20) Gagawaen na saray lingkor nen Jehova so anggaay nayarian da pian nagawaan day linawa na Dios. Balet amta dan wala ray limitasyon da, kanian manmamatalek ira ya si Jehova so akauley ya mamendisyon ed saray sagpot da. Agta misalsalamat itayo ta tutulongan itayo na Dios?

17. (a) Panon ya naebatan imay kerew na saray apostol parad kaaruman ya pananisia? (b) Akin ya nailaloan tayo met ya ebatan na Dios so kerew tayo parad kaaruman ya pananisia?

¹⁷ Diad sarayan inaral tayo, nayarin nalilikna tayo imay alikna na saray apostol nen imbaga rad Katawan: “Aruman moy pananisia mi.” (Luc. 17:5) Naebatan itan ya kerew da nen Pentecostes 33 C.E. sanen inkalbod sikara so masanton espiritu tan mas atalosan day gagala na Dios. Satan so amabiskeg na pananisia ra. Bilang resulta, agawaan da so sankalaknaban ya panagpulong a kimey ed saman a panaon. (Col. 1:23) Kasin nailaloan tayo met ya ebatan na Dios so kerew tayo parad kaaruman ya pananisia? Ipapaseguro na Biblia ya iter na Dios so kerew tayo no “unong [itan] ed linawa to.”—1 Juan 5:14.

18. Panon ya bebendisyonan nen Jehova iramay papabiskegen day pananisia ra?

¹⁸ On, naliliketan si Jehova ed saramay talagan manmamatalek ed sikato. Ebatan nen Jehova so kerew tayo parad kaaruman ya pananisia, tan lalon ombiskeg so pananisia tayo, ya anggad ‘ipasen itayo na Dios ya makana ed panarian to.’—2 Tes. 1:3, 5.