1, 2. Akin ya inar-aro nen Jesus si Marta, balet antoy ginawa nen Marta ya pakapatnagan ya sikatoy aliwan perpekto?

ANTOY tampol ya naisip mo no nabitla tay ngaran ya Marta ya karakter ed Biblia? Diad tua, sikato labat so biin binitlay ngaran tod Biblia ya deneskribe ya inar-aro nen Jesus. Balet siempre, inar-aro met nen Jesus so arum nin bibii ya matakot ed Dios, singa say ina ton si Maria, tan say yugtan nen Marta ya manngaran met na Maria. (Juan 11:5; 19:25-27) Akin ya inar-aro nen Jesus si Marta?

² Inar-aro nen Jesus si Marta aliwa labat ya lapud maparawes tan makuli, noagta lapud maespiritual ya bii. Talagan manisia si Marta ed saray bangat nen Jesus. Mabiskeg so pananisia to ya si Jesus imay insipan ya Mesias. (Juan 11:21-27) Balet siempre, singa sikatayo, aliwan perpekto si Marta. Aminsan, nen sinangkaili di Marta si Jesus, inisip nen Marta ya kaukolan ya korihien nen Jesus si Maria. Imbaga nen Marta: “Katawan, anggapo labat ed sika a papaulyanan to ak nen agik a mankikimey a bukor? Ibagam pa ed sikato a tulongan to ak.” (Basaen so Lucas 10:38-42.) Antoy naaralan tayod sayan salaysay?

3, 4. Akin ya nibagan pinili nen Maria so “sankaabigan a bengatla,” tan anton simbawa nen Jesus so seguradon impapuso nen Marta? (Nengnengen so litratod gapo na artikulo.)

³ Bilang panangapresya nen Jesus ed impanangkaili nen Marta tan Maria, labay to ran bangatan na katuaan. Sinambot nen Maria so pankanawnawan makaaral ed Sankamaongan a Managbangat tan ‘yinmurong ed salian na Katawan tan dinmengel ed salita to.’ No ontan met komon so ginawa nen Marta, seguradon kinomendaan nen Jesus ed indengel tod saray bangat to.

⁴ Balet, okupadon maong si Marta ed pampaparaay dakel ya putahe tan ed arum nin kimey pian naasikason maong si Jesus. Balet lapud satan, masyadon mapagpagay Marta tan mansyodot ed si Maria. Naimano itan nen Jesus kanian maaron imbaga tod Marta: “Marta, Marta, dakdakel so pampapagaan tan pakakaaburidoan mo.” Insan to imbaga ya anggan sakey labat ya putahe et magenap la. Tan kinomendaan toy Maria, a kuan to: “Si Maria et pinili toy sankaabigan a bengatla, tan ag-itan naandi ed sikato.” Nayarin agla nanonotan nen Maria no anton putahe so kinan da ed saman ya agew, balet agton balot nalingwanan imay komendasyon nen Jesus tan say naawat ton espiritual ya naakan lapud indengel to. Kalabas na masulok ya 60 a taon, insulat nen apostol Juan: “Inar-aro nen Jesus ira di Marta tan say yugtan ton bii.” (Juan 11:5) Paneknek itan ya impapuso nen Marta so maaron simbawa nen Jesus tan nansagpot pian matoor ton nalingkoran si Jehova legay bilay to.

5. Antoy pandumaan na panaon tayo natan ed panaon nensaman, tan anton importantin tepet so ebatan tayo?

⁵ Mas dakel so pakaabalaan natan nen say nensaman. “Anggapo lay makapiparad panaon tayo no nipaakar ed inyaligwas na komunikasyon, mapmaples iran printing press, makolor iran magasin, radyo, pelikula, telebisyon. . . . Kanian inagew-agew ya dakdakel so pakakaabalaan tayo . . . Dakel so mangibabaga ya sayan panaon tayo et ‘Panaon na Pakaliwawaan.’ Balet magmamaliw lan ‘Panaon na Pakaabalaan.’” Sarayan salita et imbaga ed grupo na saray estudyante diad United States masulok ya 60 a taon lay apalabas. Inkuan na The Watchtower ya Setyembre 15, 1958, ya “seguradon ondakel so pakaabalaan legan ya manasingger so kaderal na sayan mundo.” Talagan tua itan! Kanian say importantin tepet: Antoy gawaen tayo pian napaliisan tayo ray pakaabalaan tan mansiansia itayon akapokus ed saray espiritual ya bengatla, ya singa si Maria?

6. Panon ya uusaren na totoo nen Jehova so teknolohiya na sayan mundo?

⁶ Uusaren na saray lingkor nen Jehova iray teknolohiya na sayan mundo pian nipulong so maong a balita. Say sakey ya alimbawa et say “Photo-Drama of Creation,” ya photographic slide tan pelikula ya colored tan walay sound. Lapud satan et minilyon so aligliwa antis tan legan na Sankamundoan ya Guerra I, lalo lad samay bandad sampot na pelikula ya nipanengneng so isabi na mareen ya Sanlibon Taon ya Uley nen Jesu-Kristo. Ag-abayag, panamegley na saray istasyon ed radyo et arengel na minilyon ed interon mundo so mensahe na Panarian. Diad panaon tayo, manguusar tayo na saray computer tan Internet pian nipulong so maong a balita, kanian nasasabi iray totoo ya walad ararawin isla tan ed anggan iner a pasen ed mundo.

7. (a) Akin ya mapeligro no usaren tayon maong so mundo? (b) Antoy nepeg ya panalwaran tayo? (Nengnengen so footnote.)

 ⁷ Papasakbayan itayo na Biblia ya mapeligro no usaren tayon maong iray bengatlan iyoopresi na sayan mundo. (Basaen so 1 Corinto 7:29-31.) Wala ray bengatlan agmet mauges balet nayarin mangupot na panaon tayo, singa say pankolekta na nanduruman bengatla, pambasa na saray libro, pambantay na TV, pampasyar, iyakar ed mall, tan pannengneng na sankabaloan iran gadyet. Naupot met so panaon tayo odino naadik tayo ni ingen ed social networking, pan-text, pangipasay e-mail, tan naynay ya pannengneng na sankabaloan ya balita tan no siopay mananalo ed sports. * (Ecl. 3:1, 6) No agtayo limitaan so oras ya uusaren tayod saratan a bengatla, nayarin napaulyan tayo lay sankaimportantian—say panagdayew tayod si Jehova.—Basaen so Efeso 5:15-17.

8. Akin ya importante so simbawa ya ‘ag-aaroen iray bengatlan walad mundo’?

⁸ Gagawaen nen Satanas so anggaay nayarian to pian nasagyat tayod mundo to tan naapag so imano tayo. Ontan so ginawa to nen inmunan siglo, tan mas papasyaen to natan. (2 Tim. 4:10) Kanian nepeg tayon unoren iyan simbawa: ‘Agyo aaroen iray bengatlan walad mundo.’ No naynay tayon i-adjust so kanonotan tayo pian naunor tayo itan ya simbawa, agnaapag so imano tayo tan lalon onaralem so ‘panangaro tayod Ama.’ No ontan so gawaen tayo, mas mainomay tayon tuloken so Dios tan mansiansia itayon maapit ed sikato diad andi-anggaan.—1 Juan 2:15-17.

9. Antoy imbaga nen Jesus nipaakar ed simbolikon mata tayo, tan panon ya angipanengneng na maabig ya alimbawa ed satan?

⁹ Samay maaron insimbawa nen Jesus ed si Marta et nanengneng tayod saray bangat to tan ed alimbawa to. Pinaseseg to ray disipulo to ya pansiansiaen dan “simpli” o akapokus so simbolikon mata ra pian niyuna day Panarian ya anggapoy makaabala. (Basaen so Mateo 6:22, 33.) Impanengneng ya mismo nen Jesus so maabig ya alimbawa. Agto pinabelatay sarili to na dakel ya materyal ya kayamanan; anggapo ingey abung odino dalin to.—Luc. 9:58; 19:33-35.

10. Anton maong ya alimbawa so impanengneng nen Jesus diad bandad gapo na ministeryo to?

¹⁰ Dakel so agawgawa legan na ministeryo  nen Jesus ya nayarin mangabala ed sikato, balet nansiansian akapokus ed kimey to. Diad bandad gapo na ministeryo to, kayari ton nambangat tan nanggaway milagro diad Capernaum, akikasi iray totoo diman ya agni onaalis. Antoy ginawa nen Jesus? Imbaga to: “Kaukolan ko met so onla ed arum niran syudad pian iyabawag so maong a balita na panarian na Dios, ta saya so angibakian ed siak.” (Luc. 4:42-44) On, linmad ararawin lugar si Jesus pian napulongan tan nabangatan toy dakel ya totoo anggad posible. Anggano perpekto, alikna to met so kesaw lapud makulin panlilingkor to ed Dios.—Luc. 8:23; Juan 4:6.

11. Antoy imbaga nen Jesus ed toon walay problema tod agi to, tan antoy impasakbay nen Jesus?

¹¹ Aminsan, legan ya babangatan nen Jesus iray patumbok to no panon dan nasarag so isusumpa, sinmalet so sakey a laki ya kuan to: “Managbangat, ibagam pa’d agik ya iyapag to ak na tawir.” Balet agla akibabali si Jesus ed problema na sayan too. Inmebat si Jesus: “Siopa so anuro ed siak a magmaliw ya ukom odino manag-apag yo?” Insan intuloy nen Jesus so pambabangat to, ya pinasakbayan to ray patumbok to ya manalwar ira pian agnibalang so imano ra ed panlilingkor dad Dios lapud materyal ya kayamanan.—Luc. 12:13-15.

12, 13. (a) Manga pigaran agew antis na impatey nen Jesus, antoy ginawa to ya pandinayewan na arum ya Griegon proselita? (b) Antoy reaksion nen Jesus nen labay komon na saray Griegon proselita ya napitongtongan?

¹² Makapagonigon imay sampot lan simba na bilay nen Jesus diad dalin. (Mat. 26:38; Juan 12:27) Dakel ni kaukolan ton gawaen, tan asingsingger to lan naeksperiensya so makapabaing ya panlitis tan maruksan pamatey ed sikato. Imanoen pay agawa nen agew na Simba, Nisan 9, taon 33 C.E. Singa nipropesiya, linmoob si Jesus ed Jerusalem ya akalugan ed kilaw ya asno, tan sikatoy inrayew na totoo bilang say “onsasabin Ari ed ngaran nen Jehova.” (Luc. 19:38) Diad sinmublay ya agew, linmoob si Jesus ed templo tan makpel ton pinapaway iramay managlako ya uusaren day abung na Dios pian katkatan iray kapara dan Judio.—Luc. 19:45, 46.

¹³ Wala ray Griegon proselita ya wadman ed Jerusalem tan pandinayewan day ginawa nen Jesus, kanian kinerew dad si apostol Felipe ya napitongtongan da komon. Balet, aglabay nen Jesus ya naapag so imano to ta wala ni ray mas importantin gawaen to. Agto labay ya laen so pabor na arum ya too pian walay mangiyagel ed sikato tan napaliisan toy ipapatey. Kanian kayari ton impanonot ed saray disipulo to ya sikatoy asingger lan ompatey, imbaga tod si Andres tan Felipe: “Samay mamapabli ed kamarerwa to et naderal to itan, balet samay mamubusol ed kamarerwa to diad sayan mundo et nasalimbengan to itan parad bilay ya andi-anggaan.” Imbes ya ikdan toy imano so panguusisa na saraman ya Griego, imbaga ton mas maabig no tumboken day masakripisyon alimbawa to tan insipan to: “Siopaman a manlingkor ed siak et pagalangan na Ama.” Seguradon impasabi nen Felipe iyan mensahe nen Jesus ed saramay Griegon proselita.—Juan 12:20-26.

14. Anggano inyuna nen Jesus ed bilay to so panagpulong a kimey, antoy mangipapanengneng ya sikatoy balanse?

¹⁴ Anggano aglabay nen Jesus ya naapag so imano to ed manunan kimey to ya panagpulong, aliwa met ya satan lan lanang so ginawa to. Aminsan et inmatendi met ed sakey a bansal tan ginawa to ni ingen ya alak so danum pian mansiansian maliket so okasyon. (Juan 2:2, 6-10) Sikatoy oonla met no iimbitaan dan mangdem kaiba  na saray maapit ya kakaaro tan saray interesado ed maong a balita. (Luc. 5:29; Juan 12:2) Tan say sankaimportantian ed amin, angigana si Jesus na panaon pian manpikasi, mandalepdep, tan manpainawa.—Mat. 14:23; Mar. 1:35; 6:31, 32.

15. Antoy insimbawa nen apostol Pablo, tan panon ton impanengneng so maong ya alimbawa?

¹⁵ “Ekalen tayo met sirin so amin a pakabelatan,” so insulat nen apostol Pablo, ya inkompara to so bilay na sakey ya Kristiano ed lumbay batik. (Basaen so Hebreos 12:1.) Impanengneng ya mismo nen Pablo so maong ya alimbawa. Sarag to pa komoy magmaliw ya mayaman tan kabkabat bilang lider na Judaismo, balet aliwan satan so pinili to. Sikatoy nampokus ed saray “mas importantin bengatla,” tan makulin nampulong ed dakel a lugar, singa diad Syria, Asia Minor, Macedonia, tan Judea. “Lilingwanan ko iray bengatlan binenegan ko la tan dadampoten iray bengatlan walad arapen, [ya] manggugunaet ak a maong pian naawat ko so premyo,” so kuan nen Pablo nipaakar ed ilalo to ya bilay ya andi-anggaan diad tawen. (Fil. 1:10; 3:8, 13, 14) Anggapoy asawa nen Pablo tan inusar toy panaon to pian ‘naynay a makapanlingkor ed Katawan ya anggapoy makasbel.’—1 Cor. 7:32-35.

16, 17. Balanglan single odino walay asawa tayo, panon tayon naalig so alimbawa nen Pablo? Mangisalaysay na eksperiensya.

¹⁶ Singa si Pablo, wala ray lingkor na Dios ya pinili day mansiansian single pian mas daiset so responsabilidad dad pamilya tan mas niyuna day Panarian. (Mat. 19:11, 12) Kaslakan et mas dakel so responsabilidad ed pamilya na saray lingkor na Dios ya walaan na asawa. Balet balanglan single odino walay asawa tayo, kaukolan tayon ‘ekalen so amin a pakabelatan’ tan anggad posible et mansiansia tayon akapokus ed panaglingkor ed Dios. Pian nagawaan tayo itan, ompan kaukolan tayon bawasan so oras ya uusaren tayod saray agmet tanton importante ya bengatla tan aruman tayoy oras tayod panaglingkor ed si Jehova.

¹⁷ Ontan so ginawa na sanasawan taga Wales, si Mark tan Claire. Pareho iran nampayunir ka-graduate dad haiskul tan anggad nen sanasawa la ra et payunir ni ran siansia. “Lalo min pinasimpli so bilay mi nen inlako mi so abung mi ya taloray kuarto to tan intunda mi part-time ya trabaho mi pian makapanboluntaryo kami ed international construction,” so kuan nen Mark. Diad apalabas ya 20 ya taon, tinmulong irad pangipaalagey na saray Kingdom Hall diad nanduruman lugar ed Africa. Aminsan et 15 ya dolyar labat lay akeran kuarta da, balet ag-ira pinaulyan nen Jehova. “Malikeliket kami,” so kuan nen Claire, “ta inagew-agew min nalilingkoran si Jehova. Dakel so akaaro mi, tan agkamin balot kinmulang na antokaman. Melag labat may insakripisyo mi no ikomparad liket ya nalilikna mid sigpot panaon ya panlilingkor mid si Jehova.” Ontan met so naeeksperiensya na dakel ya walad full-time. *

18. Antoy nepeg ya itepet tayod sarili tayo?

¹⁸ Sika ey? Antoy gawaen mo no nalilikas mon singa kinmapuy lay seseg mo parad Panarian lapud saray pakaabalaan? Ompan kaukolan mon paaligwasen so panagbasa tan panagaral moy Biblia. Panon mon nagawaan itan? Atan so aralen tayod ontumbok ya artikulo.