Binasam ta iray agano nin isyu na Say Panag-bantayan tan The Watchtower? Salim pa sirin ya ebatan irayan tepet:

Sano onsabi anggaan, anto ray pigara ed saray mangangga?

Pigarad saray mangangga et say makapuy ya gobierno na too, guerra tan ag-inkahustisya, saray relihyon ya ag-angirayew ed Dios tan ag-akatulong ed totoo, tan saray totoon agmaridios.—7/1, p. 3-5.

Siopa so Gog na Magog ya abitlad libro na Ezequiel?

Ag-itan ontutukoy ed si Satanas, noagta ed alyansa na saray bansa ya manalin maneral ed totoo na Dios sano ginmapo lay baleg a kairapan.—5/15, p. 29-30.

Antoy anemiran makatulong pian say sakey ed maliket ed itatken to?

Ibabaga na Biblia ya magmaliw ya (1) mapaabeba, (2) balanse, (3) positibo, (4) maiter, (5) makaaro, tan (6) maapresya. Makatulong irayan kualidad pian say sakey et maliket ed itatken to.—7/1, p. 9-11.

Panon ya nanengneng so inkamaiter nen Jesus diad saray milagro to?

Diad sakey a bansal ed Cana, ginawa nen Jesus ya alak so 380 a litro na danum. Aminsan et mamilagro to met ya pinakan so masulok ya 5,000 a totoo. (Mat. 14:14-21; Juan 2:6-11) Diad saratan ya ginawa to et aaligen toy inkamaiter nen Ama to.—6/15, p. 4-5.

Anggano ag-itayo perpekto, panon tayon amta ya talagan sarag tayon paliketen so Dios?

Saray lalakin singa si Job, Lot, tan David et akagawa na saray lingo. Balet labay dan lingkoran so Dios, pagbabawian da ray lingo ra, tan anguman ira. Kanian apaliket da so Dios. Sarag tayo met itan ya gawaen.—9/1, p. 12-13.

Kasin isipen tayo ya no naderal iray relihyon na Makapanyarin Babilonia et ompatey met so amin ya membro na saratan ya relihyon?

Andi. Nanengneng ed Zacarias 13:4-6 ya nayarin anggan saray pari o pastor et agla magmaliw ya relihyoso tan agda aminen ya dati iran membro na palson relihyon.—7/15, p. 15-16.

Akin ya inmabuloy labat si Barak ya milaban no mila si Debora ed sikato?

Mabiskeg so pananisia nen Barak. Imbes ya onkerew ed si Jehova na mas dakel ya armas, labay ton mila so representanti na Dios ya si Debora pian mamabiskeg ed sikato tan ed saray sundalo to. (Uko. 4:6-8; 5:7)—8/1-E, p. 13.

Anto ray pigaran nepeg ya dalepdepen na saray Kristiano?

Saray palsa nen Jehova, say kaimportantian na pinuyanan a Salita to, say pribilehyon manpikasi ed sikato, tan say maaron probisyon to ya dondon.—8/15, p. 10-13.

Panon tayon niyaplika so prinsipyon paliisan so mauges ya pipiulop no nipaakar ed piinaroan?

Maong so pidedeneng tayod saray agmananisia. Balet nasusumlang tayo lay ganggan na Dios no onggusto odino miinaroan tayod aliwan dedikado ed sikato tan agmanguunor ed saray estandarte to. (1 Cor. 15:33)—8/15, p. 25.

Akin ya kinmapuy so pananisia nen Pedro, tan panon ton apapawil itan?

Lapud pananisia, akaakar si Pedro ed danum paonlad si Jesus. (Mat. 14:24-32) Balet nen ninengneng nen Pedro so maksil a dagem, sikatoy tinmakot. Sikatoy ninmengneng lamet ed si Jesus tan nampatulong ed sikato.—9/15, p. 16-17.

Ibabaga na Gawa 28:4 ya inisip na saray taga Malta ya managpatey si apostol Pablo. Akin ya ontay inisip da?

Nen walay uleg ya angetket ed si Pablo, nayarin inisip da ya sikatoy dudusaen nen Dike, say diosa na inkahustisya.—10/1-E, p. 9.

Antoy naaralan tayod si Marta nen naapag so imano to lapud dakel ya kimey?

Wala may pankanawnawa ya okupadon maong si Marta ed pampaparaan toy dakel a putahe. Imbagad sikato nen Jesus ya pinili nen agi ton si Maria so sankaabigan a bengatla. Manalwar itayo ya lapud saray pakaabalaan et napaulyan tayo la ray espiritual ya aktibidad.—10/15, p. 18-20.