1, 2. Panon ya nipropesiya ed Biblia so idakel na totoo nen Jehova?

SARAY Tasi, ya matoor ya lingkor nen Jehova diad dalin, et sakey ya organisasyon ya talagan nikadkaduma. Tua, totoo ira ya agperpekto tan nalilingo met. Balet say masanton espiritu nen Jehova so ontutulong pian ombaleg tan onaligwas so kongregasyon to ed interon mundo. Imanoen so pigara ed saray makapadinayew ya gagawaen nen Jehova panamegley na totoo to ya maliket a manlilingkor anggano ag-ira perpekto.

² Nen ginmapo so kaunoran iran agew na sayan sistema na mundo nen 1914, dagdaiset ni ray lingkor na Dios ed dalin. Balet benendisyonan nen Jehova so pampupulong da. Diad tinmumbok iran dekada, minilyon so nanaral na katuaan ed Biblia tan nagmaliw ya Tasi nen Jehova. Diad tua et impasakbay la nen Jehova iyan makapakelaw ya idakel da. Inkuan to: “Say daiset et magmaliw a sanlibo tan say melag et magmaliw a mabiskeg a nasyon. Siak a mismo, si Jehova, so mamapeles ed saya diad mismon panaon to.” (Isa. 60:22) Talagan nasusumpal itan ya propesiya ed sayan kaunoran iran agew. Kanian natan, say bilang na totoo na Dios ed  dalin et mas dakel nen say pinan-iiban populasyon na dakel ya bansa.

3. Panon ya impanengneng na saray lingkor na Dios so panangaro?

³ Legan na sayan panaon, tutulongan met nen Jehova iray totoo to ya nipatnag dan maong so manunan kualidad to​—aro. (1 Juan 4:8) Si Jesus, ya inalig toy panangaro na Dios, et inkuan tod saray disipulo to: “Iter kod sikayo so sakey a balon ganggan, a manaaroan kayo . . . Diad saya et naamtaan na amin a sikayo iray disipulok—no manaaroan kayo.” (Juan 13:34, 35) Talagan importante itan lalo la nen nanggi-guerra iray bansa ya dakdakel so inatey. Singa bilang, manga 55 milyon ya totoo so inatey dia labat ed Sankamundoan a Guerra II. Balet anggapoy Tasi nen Jehova ya akibiang ed satan ya impamatey diad interon mundo. (Basaen so Miqueas 4:1, 3.) Kanian nansiansia ran ‘malinis ed dala na amin a totoo.’—Gawa 20:26.

4. Akin ya makapadinayew so idarakel na totoo nen Jehova?

⁴ Tuloytuloy so idarakel na totoo na Dios diad mauge-uges ya mundo ya kokontrolen nen Satanas, say “dios na sayan sistema na mundo.” (2 Cor. 4:4) Kokontrolen toy politika, singa gagawaen to met ed media. Balet agto sarag ya patundaen so pangipupulong ed maong a balita. Anggaman ontan, lapud amta ton antiktikey lay panaon to, gagawaen toy anggaay nayarian ton iyarawi iray totoo ed dugan panagdayew, tan nanduruman paraan so uusaren to.—Apo. 12:12.

5. Akin ya no maminsan et nasakitan na arum so liknaan tayo? (Nengnengen so litrato ed gapo na artikulo.)

⁵ Idadanet ed Kristianon kongregasyon so kaimportantian na pangaro ed Dios tan ed kaparan too. Ontan so imbangat nen Jesus. Nen tinepetan no antoy sankaimportantian ya ganggan, inkuan to: “‘Arom si Jehova a Dios mo ed interon pusom tan interon kamarerwam tan interon nonot mo.’ Saya so sankaimportantian tan unonan ganggan. Say komadua a mipadpara ed saya: ‘Arom so kaparam a too a singa ed sikan dili.’” (Mat. 22:35-39) Balet ibabaga na Biblia ya lapud kasalanan nen Adan, amin tayo et niyanak ya agperpekto. (Basaen so Roma 5:12, 19.) Kanian no maminsan et nayarin nasakitan tayo ed imbaga o ginawa na arum ya agagi. Nayarin satan so manubok ed panangaro tayod si Jehova tan ed totoo to. Antoy gawaen tayo no nagawa itan? Anggan saray matoor ya lingkor na Dios nensaman et akapangibaga o akagawa na saray bengatlan akasakitan na arum, tan makaaral tayod ibabaga na Biblia nipaakar ed saya.

6. Akin ya nibagan agdinisiplina nen Eli so duaran anak to?

⁶ Alimbawa, say Atagey ya Saserdoten si Eli et walay duaran anak to ya ag-inmunor ed ganggan nen Jehova. Nabasa tayo: “Saray ananak nen Eli et mauges a lalaki; agda italtalek si Jehova.” (1 Sam. 2:12) Anggano say ama ra et walay importantin betang to diad panusuporta ed dugan panagdayew, nanggawa na ambelat iran kasalanan so ananak to. Amta iya nen Eli tan dinisiplina to ra komon, balet pinaulyanan to labat ira. Kanian inukom na Dios so sankaabungan nen Eli. (1 Sam. 3:10-14) Onsabi panaon ya agla manlingkor ya atagey ya saserdote iray ilalak to. No nambilay ka ed panaon nen Eli, antoy reaksion mod pangokonsinti tod kasalanan ya gagawaen na ananak to? Kasin onkapuy ka ya anggad ontunda ka lan manlingkor ed Dios?

7. Anto ray ambelat a kasalanan nen David, tan antoy ginawa na Dios?

⁷ Inar-aro nen Jehova si David, lakin “makapaliket ed puso to.” (1 Sam. 13:13, 14;  Gawa 13:22) Balet akapikalugoran ed si Bat-sheba, tan alukonan to. Agawa itan legan ya si Urias ya asawa nen Bat-sheba et anggapo diman lapud migueguerra. Nen sinmempet ya agano si Urias, nanggaway paraan si David pian akdolan nen Urias si Bat-sheba tan ompaway ya sikato so ama na ugaw. Aglabay nen Urias ya gawaen so pagagawa na ari, kanian implano nen David ya sikatoy ompatey ed guerra. Inani nen David iray makapuy a resulta na ginawa to—dakel ya problema so sinmabi ed sikato tan ed pamilya to. (2 Sam. 12:9-12) Balet kinasian na Dios si David, ya nanakar ed arapan na Dios a “walaan na matoor a puso.” (1 Ara. 9:4) No nambilay ka ed saman a panaon, anto kasi reaksion mo? Kasin nagapol ka ed ginawa nen David?

8. (a) Panon ya ag-atoor nen Pedro so imbaga to? (b) Akin ya inusar nin siansia nen Jehova si Pedro anggano akagaway lingo?

⁸ Say sakey nin alimbawa et si apostol Pedro. Sikatoy sakey ed saray pinili nen Jesus ya apostol; balet wala ray imbaga o ginawa nen Pedro ya pagbabawian to lanlamang. Singa bilang, diad panaon ya kakkaukolan nen Jesus iray apostol, sikatoy tinaynan da. Antis to man, imbaga nen Pedro ed si Jesus ya anggano sikatoy taynan na arum, agto man gawaen. (Mar. 14:27-31, 50) Balet nen erelen lay Jesus, sikatoy tinaynan na amin ya apostol—kaibay Pedro. Aminpigan imburi nen Pedro ya kabat toy Jesus. (Mar. 14:53, 54, 66-72) Balet nagbabawi kanian sikatoy inusar nin siansia na Dios. No sakey kad saray disipulo nensaman, kasin naapektoan so katooran mod si Jehova lapud ginawa nen Pedro?

9. Akin et matalek ka ya naynay ya gawaen na Dios so hustisya?

⁹ Pigara labat iratan ya alimbawa na saray nanggawa na akasakitan na arum. Nayarin dakel ni nabitla tayon agawa nensaman tan natan, ya saray arum ya nanlingkor ed si Jehova et akapanggaway mauges tan akasakit ed arum. Balet say punto, antoy reaksion mo ed saratan? Abuloyan mo kasin onkapuy ka lapud saray lingo da, tan taynan  moy Jehova tan saray totoo to, kaiba la ray kakongregasyon mo? Odino isipen mon iikdan nen Jehova na panaon ya magbabawi iramay akagaway kasalanan tan ipetek to lanlamang iray lingo tan gawaen toy hustisya? Balet no maminsan, saramay akagawa na ambelat ya kasalanan et agda awaten so panangasi nen Jehova tan agmagbabawi. No ontan so situasyon, kasin matalek ka ya onsabi panaon et ukomen nen Jehova iray ontan ya akagaway kasalanan, nayarin diad pangekal tod sikara diad kongregasyon?

10. Antoy atalosan nen Jesus nipaakar ed kasalanan nen Judas Iscariote tan Pedro?

¹⁰ Wala ray nabasad Biblia nipaakar ed saray lingkor na Dios ya nansiansian matoor ed si Jehova tan ed totoo to anggano say arum et nanggawa na ambelat ya kasalanan. Singa bilang, kayari na sanlabin impanpikasi nen Jesus ed Ama to, nampili na 12 apostol. Sakey ed sikara si Judas Iscariote. Nen si Jesus et trinaidor nen Judas, agto inabuloyan ya makaapekto itan ed personal ya relasyon tod Ama to, si Jehova; anggan samay impangiburi ed sikato nen Pedro. (Luc. 6:12-16; 22:2-6, 31, 32) Amta nen Jesus ya aliwan si Jehova odino saray totoo to so akankasalanan ed saratan. Intuloy nen Jesus so importantin kimey to anggano adismaya ed ginawa na arum ya papatumbok to. Kanian tinumangan nen Jehova diad impamaoli ed sikato, tan lapud satan et nagmaliw ya posible so panuley to ed Panarian diad tawen.—Mat. 28:7, 18-20.

11. Antoy impasakbay na Biblia nipaakar ed saray lingkor nen Jehova diad sayan panaon?

¹¹ Walay mabiskeg ya rason no akin ya walay talek nen Jesus ed si Jehova tan ed totoo to, tan ontan nin siansia anggad natan. Talagan makapakelaw no isipen tayo ray gagawaen nen Jehova panamegley na saray lingkor to diad sayan kaunoran iran agew. Anggapo lay arum ya totoon mangipupulong ed katuaan diad interon mundo, ta say igigiya labat nen Jehova et say nankakasakey ya kongregasyon to natan. Nabasad Isaias 65:14 so espiritual ya kipapasen na totoo na Dios: “Oneyag ed liket iray lingkor ko lapud maabig a kipapasen na puso.”

12. Antoy nepeg tayon isipen ed saray lingo na arum?

¹² Panliliketan na saray lingkor nen Jehova iray maabig ya nagagawaan da lapud panangigiya to. Balet say mundo ya iimpluensyaan nen Satanas et maneermen, legan ya onloloor iray kipapasen. Talagan aliwan makabat ya tetelen si Jehova odino say kongregasyon to lapud lingo na pigpigara labat ya lingkor to. Kaukolan tayon pansiansiaen so katooran tayod si Jehova tan ed saray uksoyan to tan aralen no antoy nepeg ya isipen odino reaksion tayo ed lingo na arum.

13, 14. (a) Akin ya nepeg tayon manaanosan? (b) Anton promisa so labay tayon tandaan?

¹³ Anto sirin so gawaen tayo ed saray pankanawnawan nasakitan so liknaan tayo lapud imbaga o ginawa na sakey ya agi tayo? Say makatulong ya prinsipyo ed Biblia: “Agka komon mainomay a nasakitan, ta say panem-em na sakit na linawa et walad pagew na saray makulangkulang.” (Ecl. 7:9) Nepeg tayon tandaan ya amin tayo et manga 6,000 taon lan arawi ed inkaperpekto ya wala nensaman ed Eden. Saray agperpekton totoo et makakagawa na saray lingo. Kanian, aliwan maabig no sobra so iilaloan tayod saray kapananisiaan tan abuloyan tayon lapud saray lingo da et naekal so liket tayo bilang kaibad totoo na Dios ed sayan kaunoran iran  agew. Say mas baleg ya lingo et no abuloyan tayoy lingo na arum ya mangigapol ed sikatayo tan lapud satan et taynan tayoy organisasyon nen Jehova. No ontan so nagawa, nabalang tayo so pribilehyon gawaen so panlabayan na Dios tan say ilalo ya manbilay ed balon mundo na Dios.

¹⁴ Pian mansiansian maliket tan mabiskeg so ilalo tayo, naynay tayon nodnonoten imay makaligliwan promisa nen Jehova: “Manggawa ak na balon tawen tan balon dalin; tan agla nanonotan iray apalabas a bengatla, tan agla iratan mansiansia ed puso.” (Isa. 65:17; 2 Ped. 3:13) Agmo aabuloyan ya lapud lingo na arum et agmo naawat iratan ya bendisyon.

15. Antoy imbaga nen Jesus ya gawaen tayo no akagaway lingo so arum?

¹⁵ Balet lapud anggapo tayo ni ed balon mundo, nepeg tayon ikonsidera no antoy ibabaga na Dios ya gawaen tayo no walay angibaga o nanggawa na akasakitan tayo. Singa bilang, say sakey ya prinsipyon tandaan tayo et samay imbaga nen Jesus: “No perdonaen yo iray totoo ed saray impakalingo ra, perdonaen kayo met na Ama yo ed tawen; balet no agyo perdonaen iray totoo ed saray impakalingo ra, agmet perdonaen na Ama yo iray impakalingo yo.” Tandaan met ya nen tinepet nen Pedro ed si Jesus no kasin kaukolan so mamerdona ya “anggad maminpito,” oniay inyebat nen Jesus: “Ibagak ed sika, aliwan anggad maminpito, noagta, anggad mamin-77.” Malinew ya say labay ya ibaga nen Jesus et nepeg ya naynay tayon mabulos a mamerdona; saya so nepeg ya unonan gawaen tayo.—Mat. 6:14, 15; 18:21, 22.

16. Antoy maabig ya alimbawa ya impanengneng nen Jose?

¹⁶ Say balibalin gawaen no walay akagaway lingo et say pangalig ed si Jose, say unaan ed duaran anak nen Jacob ed si Raquel. Si Jose et paniimonan na samploran agagi ton lalaki lapud sikatoy inar-aro nen ama ra. Inlako day Jose pian magmaliw ya aripen. Kayari dakel ya taon, lapud maong ya panagkimey nen Jose ed Ehipto, sikatoy nagmaliw ya komaduan manuley ed satan a bansa. Nen walay agawan eras, linmad Ehipto iray agagi nen Jose pian mangaliw na naakan balet agda abidbir. Sarag komon ya usaren nen Jose so pakayari to pian ombawi ed mauge-uges ya impantrato dad sikato. Imbes, sinubok to ray agagi to pian naamtaan no kasin anguman la ra. Nen anengneng nen Jose ya talagan anguman la ra, nampakabat ed sikara. Insan inkuan to: “Agkayo natatakot. Itultuloy kon iter ed sikayo tan ed saray angkekelag ya ananak yo so abasto yon kakanen.” Insan intuloy na salaysay: “Diad ontan et niligliwa to ra tan pinabiskeg toy liknaan da.”—Gen. 50:21.

17. Antoy labay mon gawaen no walay akagaway lingo ed sika?

¹⁷ Maabig met ya tandaan ya amin tayo et nalilingo, kanian nayarin nasakitan tayo met so arum. No amta tayo ya walay asakitan tayo, say bilin na Biblia et onlad samay asakitan tayo tan ayosen so problema. (Basaen so Mateo 5:23, 24.) Pisalamatan tayo no palampasen la na arum iray lingo tayo, kanian ontan met so nepeg ya gawaen tayod sikara. Papasesegen itayo na Colosas 3:13: “Itultuloy yon itepel so sakey tan sakey tan mabulos a perdonaen so sakey tan sakey anggano walay rason na sakey ya ireklamo imay sakey. No panon a si Jehova et mabulos to kayon pinerdona, ontan met so gawaen yo.” Say aro na Kristiano et “agmanbibilang na impakasakitan” kuan na 1 Corinto 13:5. No ipasal tayoy mamerdona ed arum, perdonaen itayo nen Jehova. Kanian no wala ray akagaway lingo ed sikatayo, nepeg tayon aligen so Ama tayo ya kakasian to tayo no akagawa tayoy lingo.—Basaen so Salmo 103:12-14.