‘Iyaansakit Ka’ nen Jehova
AKIN a makaseguro kan tua iratan ya salita tan talagan iyaansakit ka nen Jehova? Say sakey ya rason et atan so mismon ibabaga na Biblia. Nabasa itan ed 1 Pedro 5:7: “Ipaawit yod sikato so amin a kapagaan yo, lapud iyaansakit to kayo.” Anto ray ebidensya ya talagan interesado ed sika si Jehova a Dios?
ITATARYA NA DIOS SO MATERYAL A PANKAUKOLAN NA TOTOO
Si Jehova so alimbawa tayo ed pagmaliw ya maomaong tan maiter
Unona, walad Dios iray ugali ya nayarin aanapen mo ed maapit ya kaaro. Mabetbet ya saramay maomaong tan maiter ed sakey tan sakey et magmamaliw ya maapit a sankaaro. Kada agew et nanenengneng mo a si Jehova et talagan maomaong tan maiter ed totoo. Singa bilang: “Papasinagen toy agew to ed saray mauges tan maong a totoo tan papepelagen toy uran ed saray matunong tan agmatunong.” (Mat. 5:45) Antoy niiiter na agew tan uran? Panamegley na saratan, ‘pepeneken itayo na Dios na naakan tan paliliketen toy puso tayo.’ (Gawa 14:17) On, seseguroen nen Jehova ya dakel so naakan diad dalin, tan panliliketan tayo iratan.
Akin balet et dakel so naeerasan? Lapud say manunan nononoten na totoon manuuley et say pakala day posisyon tan kuarta imbes ya tulongan so arum. Asingger lan solusyonan nen Jehova itan ya problema na inkaagum. Say peles ya gobierno na too et salatan to na Panarian ed tawen tan say Anak to so man-ari. Diad satan et anggapo lay naerasan. Balet legan ya anggapo ni itan, susustinien na Dios iray matoor ya lingkor to. (Sal. 37:25) Agta pakapatnagan itan na panangiyansakit to?
SI JEHOVA ET AGMASIBLET NA PANAON TO
Si Jehova so alimbawa tayo ed pagmaliw ya agmasiblet na panaon
Say maong ya kaaro et agto isisiblet so panaon tod sika. Nayarin mitongtong ed sika anggan pigay oras nipaakar ed saray labalabay yon dua. Tan ondengel a maong no ibagam ed sikato iray problemam tan pampapagaan mo. Kasin ontan si Jehova? Segurado! Dedengelen to ray pikakasi tayo. Kanian papasesegen itayo na Biblia ya ‘manseet ed pikakasi’ odino ‘naynay ya manpikasi.’—Roma 12:12; 1 Tes. 5:17.
Panon karukey ya oras so idengel nen Jehova ed saray pikakasim? Nanengneng tayoy ebat ed sakey ya alimbawa ed Biblia. Antis ya nampili si Jesus na saray apostol to, “sanlabin nampikasi ed Dios.” (Luc. 6:12) Diad satan ya pikakasi to, nayarin binibitla to ray ngaran na dakel ed saray disipulo to, inkonsidera to ray ugali tan kakapuyan da, tan kinerew toy tulong na Ama to ed pampili ed sikara. Diad tinmumbok ya agew, amta nen Jesus ya apili to iramay sankakualipikadoan ya magmaliw ya apostol to. Si Jehova et “Dumerengel na pikakasi,” kanian labalabay ton dengelen so amin ya nanlapud puso ya pikakasi. (Sal. 65:2) Anggan andukey so pampikasi na sakey lapud importantin bengatla, ag-onnenengneng ed oras si Jehova.
SAY DIOS ET AKAPARAAN YA MAMERDONA
Si Jehova so alimbawa tayo ed pagmaliw ya akaparaan ya mamerdona
No maminsan, anggan saray sankaaro et mairap day mamerdona. Wala ni ingen iray totoo ya pupultoten day abayag lan pankakaaro lapud agda labay so mamerdona. Aliwan ontan si Jehova. Papasesegen na Biblia so amin ya magbabawi ya onkerew ed sikato na panamerdona, “ta baleg so panamerdona to.” (Isa. 55:6, 7) Akin ya akaparaan so Dios ya mamerdona?
Lapud agnaparaan ya panangaro na Dios. Inar-aro toy mundo kanian inter toy Anak to, si Jesus, pian iliktar iray totoo ed kasalanan tan makapuy iran epekto na satan. (Juan 3:16) Diad tua, wala ni arum ya nagawaan na dondon. Panamegley na bagat nen Kristo, peperdonaen na Dios iramay aaroen to. Insulat nen apostol Juan: “Say Dios et matoor tan matunong, kanian no ipatua tayo ray kasalanan tayo, perdonaen to iratan.” (1 Juan 1:9) Lapud panamerdona nen Jehova, saray totoo et tuloytuloy ya makapikaaro ed sikato, tan pisalsalamatan tayo itan.
TULONGAN TO KA SANO KAKKAUKOLAN MO
Si Jehova so alimbawa tayo ed pagmaliw ya wadtan sano kakkaukolan tayo
Say tuan kaaro et ontutulong ed arum sano kakkaukolan da itan. Ontan met kasi si Jehova? Ibabaga na Salita to: “Anggan [say sakey ya lingkor na Dios] natumba et agnipasubsob, ta sikatoy susuportaan nen Jehova diad lima.” (Sal. 37:24) ‘Susuportaan nen Jehova iray lingkor to’ diad nanduruman paraan. Imanoen iyan eksperiensya ed isla na Caribbean diad St. Croix.
Sakey ya ugaw a bii so babalawen na saray kaklase to ta agmansasaludo ed bandira lapud relihyon to. Kayari ton nampikasid si Jehova, nandesisyon ya ipaliwaway papanisiaan to. Diad sinmublay ya report to ed klase da, say pinili ton topic et panagsaludo ed bandira. Inusar toy libron Saray Istorya ed Biblia pian ipaliwawa no panon ya akatulong ed desisyon to so salaysay nipaakar ed si Sadrac, Mesac, tan Abednego. Inkuan to, “Prinotektaan nen Jehova iraman ya taloran Hebreo lapud ag-ira nandayew ed imahen.” Insan to inyopresi so libro ed saray wadman. Labinsakey ed saray kaklase to so malabay ya nawalaan na kopya. Alikna to ya si Jehova so angiter ed sikato na biskeg tan karunongan pian makapantasi nipaakar ed satan ya topic, kanian malikeliket.
No manduaruwa ka ni ya iyaansakit ka nen Jehova, dalepdepen iray teksto ed Biblia singa say Salmo 34:17-19; 55:22; tan 145:18, 19. Tepetan iray abayag lan Tasi no panon iran inasikaso nen Jehova. Tan no kaukolan moy tulong na Dios, ipikasim itan. Nanengneng mo ya talagan ‘iyaansakit ka’ nen Jehova.
