Kasin Manpapamoldi Ka ed Sankamaongan ya Managdamili?
“Singa say pitek a walad lima na managdamili, ontan kayo met ed limak.”—JER. 18:6.
1, 2. Akin ya impasen na Dios ya “pinabpabli a too” si Daniel, tan panon tayon magmaliw ya maunor a singa sikato?
KALOOB ed Babilonia na saray narel ya Judio, anengneng dan say syudad et napno na idolo tan saray totoo et mandadayew ed mauges iran espiritu. Balet saray matoor ya Judio, singa si Daniel tan taloran kakaaro to, et agnampaimpluensya ed saray taga Babilonia. (Dan. 1:6, 8, 12; 3:16-18) Determinado ra ya si Jehova labat so pandayewan da bilang Managdamili ra. Tan agawaan da itan! Anggano diad Babilonia so nanayaman nen Daniel ed ngalngali interon bilay to, imbaga na anghel na Dios ya sikatoy “pinabpabli a too.”—Dan. 10:11, 19.
2 Nensaman, itet-telmer na managdamili so pitek legan ton popormaen itan pian magmaliw ya singa ed labay ton itsura na satan. Bibidbiren na saray tuan managdayew ya si Jehova so Soberano ed Uniberso, walay autoridad ton manmoldi ed totoo tan saray nasyon. (Basaen so Jeremias 18:6.) Wala met so autoridad na Dios ya moldien so kada sakey ed sikatayo. Balet, bibidbiren toy kanepegan tayon mandesisyon tan labay ton bulos ed linawa tayo so pampasakop ed sikato. Aralen tayo so taloran paraan no panon itayon mansiansian singa anlemek ya pitek ed lima na Dios: (1) Panon tayon napaliisan iray ugali ya mangamper ed sikatayon awaten so simbawa na Dios? (2) Panon tayon nawalaan na saray ugali ya makatulong ed sikatayon mansiansian anlemek tan maunor? (3) Panon ya manpaigiya ed Dios iray Kristianon atateng no momoldien da iray ananak da?
PALIISAN IRAY UGALIN MAMAAWET ED PUSO
3. Anto ran ugali so nayarin mamaawet ed puso tayo? Mangiter na alimbawa.
3 “Manuna ed amin, alwaran moy pusom, ta ditan so panlalapuan na saray subol na bilay,” kuan na Proverbio 4:23. Anto ran ugali ya mamaawet ed puso so nepeg tayon panalwaran? Kaiba so inkamapaatagey, panggaway kasalanan, tan kakulangan na pananisia. Nayarin manresulta iraya ed pagmaliw ya agmatulok tan rebelde. (Dan. 5:1, 20; Heb. 3:13, 18, 19) Si Arin Uzias na Juda et nagmaliw ya mapaatagey. (Basaen so 2 Awaran 26:3-5, 16-21.) Diad gapo, si Uzias et “nanggaway duga ed pakanengneng nen Jehova,” tan “intultuloy ton inanap so Dios.” Balet “sanen mabiskeg la, nagmaliw a mapaatagey so puso to,” anggano say biskeg to et nanlapud Dios! Sinali to ni ingen so manpool na insenso diad templo—pribilehyon para labat ed saray saserdote ya nanlapud pamilya nen Aaron. Insan nen binano na saray saserdote, sinmanok so mapaatagey ya Uzias! Antoy resulta? Sikatoy impaabeba na Dios tan akating anggad impatey to.—Pro. 16:18.
4, 5. Antoy nayarin nagawa no magmaliw tayon mapaatagey? Mangiter na alimbawa.
4 No agtayo manalwar, nayarin magmaliw tayon mapaatagey tan ‘manisip na alabas ed sarili tayo nen say manepeg tayon isipen,’ ya anggad agtayo la mangawat na simbawa ya nanlapud Biblia. (Roma 12:3; Pro. 29:1) Imanoen so eksperiensya na sakey ya elder ya si Jim ya agmipakna ed desisyon na saray kapara ton elder nipaakar ed sakey a problema na kongregasyon. Inkuan nen Jim: “Imbagak ed sikara ya anggapoy panangaro da, tan tinmaynan ak legan na miting mi.” Kayari anem bulan, sikatoy inmalis ed sananey ya kongregasyon balet ag-inrekomendan magmaliw ya elder diman. Inamin to: “Adismaya ak ya maong. Kombinsido ak ya siak so duga, kanian tinaynan koy katuaan.” Samploy taon ya nagmaliw ya inaktibo si Jim. Impatua to: “Asakitan so pride ko, tan tinetel koy Jehova ed agawa. Aminpigapiga ak ya dinalaw na saray agagi tan pinaliwawaan da ak, balet agko inawat so tulong da.”
5 Ipapanengneng na eksperiensya nen Jim ya no mapaatagey tayo, ikatunongan tayo ray gagawaen tayo tan magmaliw tayon mairap ya moldien. (Jer. 17:9) “Agnaekal ed nonot ko ya sikara so alingo,” kuan nen Jim. Kasin asalim lay asakitan na sakey ya agi odino naandian na saray pribilehyo? Antoy reaksion mo? Kasin agmo naawat? Odino say manunan nononoten mo et say pikareenan ed agim tan pansiansian matoor ed si Jehova?—Basaen so Salmo 119:165; Colosas 3:13.
6. Antoy nayarin resulta no manggagawa tayoy kasalanan?
6 No say sakey et manggagawa na kasalanan tan iyaamot to itan, mairap toy mangawat na simbawa manlapud Biblia. Magmainomay to lay manggawa na kasalanan. Imbaga na sakey ya brother a sinmabi panaon et aglan balot nakokonsiensia ed mauges a gagawaen to. (Ecl. 8:11) Onia met so inamin na sakey nin brother ya naynay lan manbabantay na pornograpiya: “Nagmaliw ak ya makritiko ed saray elder.” Naapektoan so espiritualidad to lapud naynay ya pambabantay to. Nen naamtaan na saray elder so gagawaen to, tinulongan da. Siempre, amin tayo et aliwan perpekto. Balet no makritiko tayo la odino ikakatunongan tayoy aliwan gagawaen tayo imbes ya onkerew na panamerdona tan tulong na Dios, nayarin onaawet lay puso tayo.
7, 8. (a) Panon ya impanengneng na saray Israelita nensaman ya nayarin onawet so puso lapud kakulangan na pananisia? (b) Antoy naaralan tayo?
7 Nanengneng tayod alimbawa na saray Israelitan inliktar nen Jehova ed Ehipto no panon ya nayarin onawet so puso lapud kakulangan na pananisia. Anengneng da so dakel ya milagron ginawa na Dios parad sikara, say arum et talagan makapadinayew! Balet nen asingger la rad Insipan a Dalin, impanengneng dan kulang so pananisia da. Imbes ya manmatalek irad si Jehova, tinmakot ira tan nanreklamo rad si Moises. Labay da ni ingen so ompawil ed Ehipto, anta diman et inaripen ira! Asakitan ya maong si Jehova. Inkuan to: “Anggad kapigan so agpanrespeto ed siak na sarayan totoo?” (Num. 14:1-4, 11; Sal. 78:40, 41) Lapud anawet so puso ra tan kulang so pananisia da, saman ya henerasyon et aderal ed kalawakan.
8 Natan, legan ya manasingger tayo lad balon mundo, nasusubok so pananisia tayo. Maabig no usisaen tayo no panon kabiskeg so pananisia tayo. Singa bilang, anto kasi pangipapasen tayod samay imbaga nen Jesus ed Mateo 6:33? Tepetay sarilim: ‘Kasin napatnagan ed saray prayuridad tan desisyon ko ya talagan panisiaan koy imbaga nen Jesus? Kasin agak la miaral o manpulong pian mas baleg so naalmok? Antoy gawaen ko no say trabahok et mangaala na dakel ya panaon tan biskeg ko? Kasin abuloyan koy mundo ya mangimpluensya ed siak—ya ompan taynan ko ni ingen so katuaan?’
9. Akin ya kaukolan tayon ‘itultuloy ya suboken’ no kasin wala tayod pananisia, tan panon tayon nagawaan itan?
9 Niay sakey nin alimbawa: Sakey ya lingkor nen Jehova so manduaruwa no unoren to ray prinsipyod Biblia, nayarin nipaakar ed pipiulop, panagdispelosip, o panagligliwaan. Tepetay sarilim, ‘Kasin ontan ak?’ No nalilikas tayon onaawet lay puso tayo, nepeg ya usisaen a tampol so pananisia tayo! Bibilinen itayo na Biblia: “Itultuloy yon suboken no kasin wala kayo ed pananisia; itultuloy yon paneknekan no anto kayo.” (2 Cor. 13:5) Matuan usisaen so sarili tayo panamegley na Salitay Dios tan nepeg tayon gawaen itan a naynay.
MANSIANSIAN MAINOMAY YA MOLDIEN
10. Antoy makatulong ed sikatayo pian magmaliw tayon singa anlemek ya pitek ed lima nen Jehova?
10 Kaibad saray probisyon na Dios pian mansiansia tayon singa anlemek ya pitek et say Salita to, Kristianon kongregasyon, tan ministeryo. No panon a say danum et palemeken toy pitek, say inagew-agew ya pambasad Biblia tan pandalepdep et gawaen to tayon mainomay ya moldien nen Jehova. Ingganggan nen Jehova ed saray ari ed Israel ya kopyaen day Ganggan na Dios tan inagew-agew dan basaen itan. (Deu. 17:18, 19) Amta na saray apostol ya say pambasa tan pandalepdep ed Kasulatan et kaukolan ed ministeryo da. Diad saray sulat da et nilasus beses iran angala o anukoy ed Hebreon Kasulatan tan pinaseseg da ray pupulongan da ya ontan met so gawaen da. (Gawa 17:11) Natan et nanenengneng tayo met ya importante so inagew-agew ya pambasad Salita na Dios tan pandalepdep ed satan. (1 Tim. 4:15) Makatulong iratan pian mansiansia tayon mapaabeba tan mainomay ya moldien nen Jehova.
Abuloyan iray probisyon na Dios ya ontulong ed sikan mansiansian mainomay ya moldien (Nengnengen so parapo 10-13)
11, 12. Panon ya uusaren nen Jehova so Kristianon kongregasyon pian moldien itayo base ed pankaukolan na kada sakey? Mangiter na alimbawa.
11 Panamegley na Kristianon kongregasyon, momoldien itayo nen Jehova base ed pankaukolan na kada sakey. Si Jim ya abitlad bandad gapo et inuman toy ugali to nen impanengneng na sakey ya elder so personal ya
interes ed sikato. “Agto ak balot tinetel odino binalaw,” kuan nen Jim. “Imbes, sikatoy nansiansian positibo tan imbalikas ton labay to ak ya tulongan.” Kayari na manga taloran bulan, intagar na saman ya elder si Jim ya miaral. “Maar-aro ak ya inabrasa na kongregasyon,” kuan nen Jim, “tan say panangaro ra so talagan amakiwas ed siak. Atalosan ko ya aliwan say liknaan ko so importante. Diad tulong na saray agagi tan inar-arok ya asawa—ya agbalot kinmapuy ed espiritual—kalkalnan binmiskeg lamet so espiritualidad ko. Apaseseg ak met ya maong ed saray artikulo ya ‘Jehovah Is Not to Blame’ tan ‘Serve Jehovah Loyally,’ ya walad The Watchtower na Nobyembre 15, 1992.”12 Sinmabi panaon et akapawil ya elder si Jim. Manlapu lad saman, atulongan toy arum ya agagi ya nasarag iray subok a singa ed dinalan to tan binmiskeg lamet irad espiritual. Oniay nibaga to: “Say amtak malmalet so relasyon kod si Jehova, andi manaya! Pagbabawian ko ya inabuloyan kon nabulag ak na pride ko pian agko nanengneng iray mas importantin bengatla tan naynay ak ya onnenengneng ed lingo na arum.”—1 Cor. 10:12.
13. Anto ran ugali so niwalad sikatayo diad pibibiang tayod ministeryo, tan anto ray maabig ya resulta?
13 Panon itayon namoldi na ministeryo parad pankaabigan tayo? Say panginabang ed maong a balita ed arum et makatulong ed sikatayon magmaliw ya mapaabeba tan nipanengneng tayo ray nanduruman kabiangan na bungay espiritu na Dios. (Gal. 5:22, 23) Isipen pa ray maong ya ugali ya niwalad sika lapud pampupulong mo. Ontan met, legan tayon ipapatnag iray ugalin singa Kristo, napaparakep tayoy mensahe tayo tan nayarin maong so epekto tod saray nakakatongtong tayo. Singa bilang, walay duaran Tasi ed Australia ya marespeton dinmengel ed biin aliwliway pitotongtong tod sikara. Balet ag-abayag et nagbabawian na sayan bii so ginawa to tan nansulat ed branch office. Oniay imbaga tod sulat to: “Diad samay duaran maan-anos tan mapaabeban agagi yo, labay koy onkerew na pasensia lapud nagmaliw ak ya mapaatagey tan pinabaingan ko ra. Singa ak makulangkulang ya inmarap ed duaran totoon mangipupulong ed Salita na Dios tan pinataynan ko ra.” Mansulat kasi na ontan imay bii no saramay agagi tayo et nampasnok anggan daiset labat? Ompan andi. Talagan makagunggona so ministeryo tayo—diad sikatayo tan ed arum a totoo!
PAIGIYA ED DIOS NO MOMOLDIEN IRAY ANANAK YO
14. Antoy nepeg ya gawaen na atateng pian talagan epektibo so panmoldi dad ananak da?
14 Maslak ya ugugaw et labalabay day makaaral, tan mapaabeba ra. (Mat. 18:1-4) Kanian sarag na marunong ya atateng ya ipurek ed nonot tan puso na ananak da so katuaan tan say panangaro ed satan. (2 Tim. 3:14, 15) Balet pian nagawaan na atateng itan, nepeg ya ipurek da nin unona ed mismon puso ra so katuaan, tan iyaplika da itan ed bilay da. No ontan so gawaen na atateng, aglabat narengel na ananak da so katuaan noagta naeksperiensya da met itan. Sakey ni, nibangat ed sikara ya say disiplina et panangaro na atateng da tan panangaro nen Jehova.
15, 16. Panon ya nipanengneng na atateng ya manmamatalek irad Dios no adispelosip so anak da?
15 Anggaman pinabaleg ira na Kristianon atateng, arum ya ananak so ontataynan ed katuaan odino nadidispelosip, tan makapaermen iyad pamilya. “Nen adispelosip so kuyak,” kuan na sakey ya sister ed South Africa, “singa kami inateyan. Talagan makapaermen iman!” Panon ya inarap iman na pamilya da? Inunor da so ibabaga na Salitay Dios. (Basaen so 1 Corinto 5:11, 13.) “Determinado kamin iyaplika so Biblia,” kuan na atateng to, “ta amta mi ya maong so pansumpalan na pangunor ed uksoyan na Dios. Inisip min say panagdispelosip et disiplinan nanlapud Dios. Kombinsido kami ya say panagdisiplina nen Jehova et lapud panangaro tan dugaruga labat. Kanian say pitotongtong mid anak mi et no talagan kakkaukolan labat.”
16 Anto kasi alikna na samay adispelon anak? “Antak ya agak bubusolen na pamilyak,” kuan to, “uunoren da labat si Jehova tan say organisasyon to.” Imbaga to met: “No anggapoy arum ya nagawaan mo noag say onkerew na tulong tan panamerdona nen Jehova, naliknam ya talagan sikatoy kakkaukolan mo.” Isip yo pa labat no panon kaliket iyan pamilya nen akapawil so anak da! On, no nonoten tayoy Dios ed amin ya gagawaen tayo, sankaabigan iray resulta.—Pro. 3:5, 6; 28:26.
17. Akin ya nepeg ya naynay itayon manpasakop ed si Jehova, tan panon tayon nagunggonaan ed saya?
17 Impasakbay nen propetan Isaias ya no magano lan nibulos iray Judio manlapud inkibantak da, bidbiren na saray magbabawi: “O Jehova, sika so Ama mi. Sikami so pitek, tan sika so Managdamili ed sikami; amin mi et kimey na limam.” Insan mikasi ra: “Agmo nononoten iray kasalanan mi ed andi-anggaan. Nengneng mo kami, ipangasim, ta amin mi et totoom.” (Isa. 64:8, 9) No mapaabeba tayo met ya manpasakop ed si Jehova tan ontan so naynay tayon gawaen, ipasen to tayon pinabpabli, singa si propetan Daniel. Ontan met, itultuloy itayon moldien nen Jehova panamegley na Salita, espiritu, tan organisasyon to pian onsabi panaon et nayari tayo lan onarap ed sikato bilang perpekton “ananak na Dios.”—Roma 8:21.