Pisalamatan a si Jehova so Managdamili Tayo
“O Jehova, . . . sika so Managdamili ed sikami; amin mi et kimey na limam.”—ISA. 64:8.
1. Akin ya si Jehova so sankamaongan ya Managdamili?
NEN Nobyembre 2010, walay ceramic vase ya gawad China nen koma 18 siglo ya labay dan saliwen na ngalngali 70 milyon a dolyar diad London, England. Ipapanengneng to ya a say sakey a bengatlan walad anggan iner tan mamurmura a singa say pitek et sarag na managdamili ya gawaen ya marakdakep tan mabmablin obra-maestra. Balet anggapoy toon managdamili ya makapiparad si Jehova. Nen mansampot lay komanem ya agew na panamalsa na Dios, pinorma toy perpekton too “manlapud dabok [pitek] na dalin” tan inikdan to na pakayarin ipatnag iray kualidad na Nanggawa ed sikato. (Gen. 2:7) Satan ya perpekton too, si Adan, ya ginawa manlapud dalin et manepeg labat ya tawagen ya “anak na Dios.”—Luc. 3:38.
2, 3. Panon tayon naalig so ehemplo na saray magbabawin Israelita?
2 Balet nen nanrebelde si Adan ed Nanggawa ed sikato, abalang toy pribilehyon natawag ya anak na Dios. Anggaman ontan, diad amin ya sinmublay a henerasyon, “walay baleg a grupo” na saray ananak nen Adan ya pinili dan suportaan so soberanya na Dios. (Heb. 12:1) Diad mapaabeban impanpasakop dad Amalsa, impanengneng da ya sikato so labay dan Ama tan Managdamili da, aliwan si Satanas. (Juan 8:44) Say katooran dad Dios et mangipanonot ed samay imbaga nen Isaias nipaakar ed saray magbabawin Israelita: “O Jehova, sika so Ama mi. Sikami so pitek, tan sika so Managdamili ed sikami; amin mi et kimey na limam.”—Isa. 64:8.
3 Natan, amin ya mandadayew ed si Jehova ed espiritu tan katuaan et mansasagpot ya ipatnag met so ontan ya inkamapaabeba tan inkamapasakop. Parad sikara et kagalangan da ya tawagen si Jehova ya Ama tan manpasakop ed sikato bilang Managdamili ra. Kasin ipapasen moy sarilim ya singa anlemek ya pitek ed lima na Dios, ya maliket ya pamoldi pian magmaliw a pananginan ya marakdakep ed pakanengneng to? Kasin ipapasen mo met a saray agagim ed espiritual et peles nin kikimeyan tan momoldien na Dios? Pian nagawaan iratan, aralen tayoy taloran kabiangan ed kimey nen Jehova bilang Managdamili tayo: No panon ton pipilien iray momoldien to, no akin ya momoldien to ra, tan no panon ton gagawaen itan.
PIPILIEN NEN JEHOVA IRAY MOMOLDIEN TO
4. Panon ya pipilien nen Jehova iramay iyaasingger tod sikato? Mangiter na alimbawa.
4 No oobserbaan nen Jehova iray totoo, ag-onnenengneng ed itsura da. Imbes, sikatoy onnenengneng ed puso, say inkatoo na sakey. (Basaen so 1 Samuel 16:7b.) Apruebaan iya nen pinorma na Dios so Kristianon kongregasyon. Inyasingger tod sikato tan ed Anak to so dakel ya indibidual ya singa aglabalabay na totoo. (Juan 6:44) Sakey ed sikara si Saulo ya Fariseo—“managmudmora ed Dios tan managpairap tan agmangikabkabilangan.” (1 Tim. 1:13) Balet say Dios ya “manguusisa ed kapusoan” et agto impasen si Saulo ya anggapoy kana. (Pro. 17:3) Imbes, anengneng na Dios a sikatoy nayarin gawaen ya marakdakep a pananginan—diad tua, ‘sakey a pananginan a pinili’ a mantasi “ed saray nasyon ontan met ed saray arari tan ed saray anak na Israel.” (Gawa 9:15) Arum ed saray impasen na Dios ya nayarin gawaen ya pananginan ya “onkana ed kagalangan” et saray datin buanges, imoral, tan matakew. (Roma 9:21; 1 Cor. 6:9-11) Nen naaralan da so katuaan na Salita na Dios tan impatnag day pananisia, inabuloyan dan si Jehova so manmoldi ed sikara.
5, 6. Panon a say talek tayod si Jehova bilang Managdamili et walaan na epekto ed no panon tayon ipasen iray (a) totoo ed teritorya tayo? (b) agagi tayo?
5 Antoy naaralan tayod saya? No panisiaan tayo a nabasa nen Jehova so walad puso tan iyaasingger tod sikato iramay pipilien to, agtayo nepeg ya husgaan so arum diad teritorya tan diad kongregasyon tayo. Imanoen pay alimbawa nen Michael. “No wala ray oonlad siak ya Tasi nen Jehova,” kuan to, “basta ak labat onaalis tan agko ra iimanoen. Anggapoy galang ko! Insan walay akabat kon pamilya, tan pandinayewan ko ra lapud maomaong so ugali ra. Abigbigla ak nen naamtaan kon Tasi nen Jehova ira! Lapud satan et intepet kod sarilik no akin ya papaliisan ko ray Tasi. Amoriak a kanian onman so impantratok lapud anggapoy amtak ed sikara tan anisia ak ed saray narerengel ko labat, ya aliwan base ed katuaan.” Pian naamtaan nen Michael so tua, nanaral na Biblia. Ag-abayag et inawat toy katuaan tan nanlingkor ya full-time.
6 No awaten tayoy Jehova bilang Managdamili tayo, walay epekto na satan no panon tayon ipasen iray agagi tayo. Kasin ipapasen tayo ra a singa ed pangipapasen nen Jehova, ya agni ra asumpal noagta peles ni labat ya dadamilien? Amta to met so inkatoo na sakey tan no anton klase na too so nayarin pagmaliwan na samay damilien na lima to. Kanian, positibo so pangipapasen nen Jehova ed saray totoo tan agto iimanoen iray kakapuyan da. (Sal. 130:3) Sikatoy naalig tayo no positibo met so pangipasen tayo ed saray lingkor to. Diad tua, makapikimeyan itayo ed Managdamili tayo no suportaan tayo ray agagi diad pansasagpot dan onaligwas ed espiritual. (1 Tes. 5:14, 15) Saray elder ya “regalo a lalaki” et nepeg a magmaliw ya ehemplo ed saya.—Efe. 4:8, 11-13.
AKIN YA MOMOLDIEN ITAYO NEN JEHOVA?
7. Akin ya pisalamatan moy pandidisiplina nen Jehova?
7 Nayarin wala lay nadngel mon oniay imbaga to: ‘Agkon balot naapresya so impandisiplinad siak na atateng ko anggad sanen wala la ray anak ko.’ No diman ondadakel so eksperiensya tayo, mas natalosan tayoy gagala na disiplina tan ipasen tayo itan a singa ed pangipapasen nen Jehova, a satan et panangaro. (Basaen so Hebreo 12:5, 6, 11.) On, lapud inaro itayo nen Jehova bilang ananak to, maan-anos to tayon momoldien. Labay ton magmaliw tayon marunong tan maliket tan sikatoy aroen tayo met. (Pro. 23:15) Agto labay ya manirap tayo; agto met labay ya ompatey tayo bilang ‘ananak ya manepeg ed sanok na Dios,’ lapud ontan so atawir tayod si Adan.—Efe. 2:2, 3.
8, 9. Panon itayon ibabangat nen Jehova natan, tan panon iyan mantultuloy diad arapen?
8 Lapud sikatayo nensaman et ‘ananak a manepeg ed sanok na Dios,’ dakel iray ugali tayon agmakapaliket ed Dios, nayarin arum ed saratan et ugalin singa ayayep! Balet lapud panmomoldi ed sikatayo nen Jehova, anguman tayo; singa tayo la kilaw a karnero. (Isa. 11:6-8; Col. 3:9, 10) Natan et wala tayo lad espiritual a paraiso ya dia et momoldien itayo nen Jehova. Mareen tan maligen so liknaan tayo dia anggano apaliberan tayo na kaugsan. Ontan met, anggan saramay binmaleg ed anggapoy aroan tan magulon pamilya et dia da naeksperiensya so tuan panangaro. (Juan 13:35) Naaralan tayo met ya aroen so arum. Manuna ed amin, akabat tayo si Jehova tan nalilikna tayo natan so panangaro to bilang Ama.—Sant. 4:8.
9 Diad balon mundo, naeksperiensya tayo la so amin ya bendisyon na espiritual a paraiso. Insan nilikud ed espiritual ya paraiso, niwala met la so literal ya paraiso diad panuley na Panarian na Dios. Legan ya napapasimbalo so interon dalin, itultuloy nen Jehova ya moldien iray manaayam ditan, tan dakel so ibangat tod sikara ya no isipen natan et singa imposible. (Isa. 11:9) Gawaen met la na Dios ya perpekto so nonot tan laman tayo pian natalosan tayon maong so ibabangat to tan nagawaan ya amin so panlabayan to. Kanian tuloytuloy tayo komon ya manpasakop ed si Jehova, tan ipanengneng tayon aapresyaen tayoy panmomoldi to bilang panangaro tod sikatayo.—Pro. 3:11, 12.
NO PANON ITAYON MOMOLDIEN NEN JEHOVA
10. Panon ya impatnag nen Jesus so inkaanos tan inkadunong na Sankamaongan ya Managdamili?
10 Singa say sakey ya marundunong a managdamili, amta nen Jehova no anton klase na “pitek” so moldien to, tan mandepende ed satan so gawaen to. (Basaen so Salmo 103:10-14.) Ikokonsidera to ray kakapuyan, limitasyon, tan espiritualidad na kada sakey. Say pangipapasen tod saray agperpekton lingkor to et impanengneng na Anak to. Imanoen no antoy ginawa nen Jesus nen anengneng toy kakapuyan na saray apostol to, lalo la nen aminpiga dan nansasangsangan no siopay atagey ed sikara. No bilang ta anengneng yo ray impansasangsangan da, nibaga yo kasin mauyamo tan mapaabeba irayan lalaki? Balet aliwan negatibo so impangipasen nen Jesus ed sikara. Amta to ya nayarin moldien iray matoor ya apostol diad maaro tan maanos ya pamilin ed sikara tan diad pangimano dad inkamapaabeba to. (Mar. 9:33-37; 10:37, 41-45; Luc. 22:24-27) Kayarin apaoli si Jesus tan nikalbo so masanton espiritu ed saray apostol, say nampokusan da la et no panon dan nagawaan so kimey ya inter ed sikara, aliwan say pakawalaan na atagey ya posisyon.—Gawa 5:42.
11. Panon ya impanengneng nen David ya sikatoy singa anlemek ya pitek, tan panon tayon naalig so alimbawa to?
11 Momoldien nen Jehova iray lingkor to natan panamegley na Salita to, masanton espiritu to, tan Kristianon kongregasyon. Namoldi tayo na Salitay Dios no pansagpotan tayon basaen, dalepdepen, tan patulongan tayod si Jehova ya niyaplika itan. “Nanononotan ta ka legan a wala ak ed dukolan ko,” insulat nen David. “Dadalepdepen ta ka legan na saray panagbantay ed labi.” (Sal. 63:6) Insulat to met: “Idayew koy Jehova, a mamibilin ed siak. Anggan diad labi et ipepetek ak na sankaaraleman a kanonotan ko.” (Sal. 16:7) Inabuloyan nen David ya makasabi ed sankaaraleman ya inkatoo to so simbawa nen Jehova, pian namoldi so sankaaraleman a kanonotan tan liknaan to, anggano ambelbelat so simbawa. (2 Sam. 12:1-13) Talagan maabig ya alimbawa ed sikatayo so inkamapaabeba tan inkamapasakop nen David! Kasin dadalepdepen mo met so Salita na Dios, aabuloyan mon makasabi itan ed sankaaraleman ya inkatoom? Kasin kaukolan mon itultuloy ya gawaen itan?—Sal. 1:2, 3.
12, 13. Panon itayon momoldien nen Jehova panamegley na masanton espiritu tan kongregasyon?
12 Dakel iray paraan ya namoldi itayo na masanton espiritu. Singa bilang, natulongan itayon nawalaan na ugalin singa si Kristo, ya pakapatnagan na bunga na espiritu na Dios. (Gal. 5:22, 23) Kaiba ed satan ya bunga so aro. Inaro tayoy Dios tan labay tayon unoren tan pamoldi ed sikato, ta amta tayon agmakapabelat iray ganggan to. Sarag met na masanton espiritu ya ikdan itayo na biskeg pian nalabanan tayoy impluensya na mundo tan mauges ya espiritu na satan. (Efe. 2:2) Si apostol Pablo, ya nen kalangweran ni et naimpluensyaan ya maong na inkamapaatagey na saray Judion lider na relihyon, et sarag ton ibaga: “Walay biskeg kon arapen so amin a bengatla lapud samay mangiiter ed siak na pakayari.” (Fil. 4:13) Kanian singa si Pablo, tuloytuloy tayon onkerew na masanton espiritu. Dengelen nen Jehova iray nanlapud puso ya pikakasi na saray mauyamo.—Sal. 10:17.
Uusaren nen Jehova iray elder pian moldien itayo, balet nepeg tayon gawaen so betang tayo (Nengnengen so parapo 12, 13)
13 Uusaren nen Jehova so kongregasyon tan saray manangasikaso pian moldien so kada sakey ed sikatayo. Singa bilang, no naimano na saray elder ya wala ray problema tayod espiritual, tulongan da tayo—balet aliwan base ed karunongan na too. (Gal. 6:1) Imbes, mapaabeba ran onkekerew ed Dios na aralem a pakatalos tan karunongan. Legan dan sankanonot so situasyon tayo, manre-research ira ed Salitay Dios tan ed saray publikasyon tayo pian nagawaan day ipipikasi da. Diad ontan et niiter da no anton tulong so kaukolan tayo. No onasingger irad sika pian mangiter na maaron tulong, nayarin lapud panangawes mo, kasin awaten moy simbawa da bilang panangaro na Dios ed sika? No gawaen mo itan, ipapanengneng mon singa ka anlemek ya pitek ed lima nen Jehova, akaparaan ya pamoldi parad pankaabigan mo.
14. Anggano walay autoridad nen Jehova ed sikatayo, panon ton rerespetoen so kanepegan tayon mandesisyon?
14 No natatalosan tayo no panon itayon momoldien na Dios, magmaliw ya maong so pipiulop tayod agagi tan panagtrato tayod totoo ed teritorya tayo, kaiba la ray iyaaralan tayo. Nensaman, say managdamili et agbasta mangala na pitek tan pormaen to lan tampol. Iparaan to ni, ekalan to na saray bato tan arum nin dutak. Ontan met so gagawaen na Dios ed kada sakey a malabay ya pamoldi ed sikato. Agto ra pipiliten ya manguman, balet ipapaamta to ray matunong ya prinsipyo to pian nalinisan day bilay da odino sikara lan mismo so manggaway pananguman.
15, 16. Panon ya nipanengneng na saray iyaaralan ya labay day pamoldi ed si Jehova? Mangiter na alimbawa.
15 Imanoen so alimbawa nen Tessie, sister a taga Australia. “Mainomay ya inaral nen Tessie so katuaan ed Biblia,” kuan na agi ya angiyaral ed sikato. “Balet ta ag-onaaligwas—ag-anggan onaatendi ed saray aral! Kanian kayarik ya inisip ya maong tan impikasi, nandesisyon ak ya itundak lan iyaralan. Insan walay makapakelaw ya agawa. Diad samay inisip kon sampot lan panaral mi, impatua ed siak nen Tessie so nalilikna to. Say pakalikna to kuno et singa mankunkunwari labat ta labalabay toy mansugal. Balet natan et nandesisyon ya itunda la iyan bisyo to.”
16 Ag-abayag, ginapoan la nen Tessie so miaral tan ipapanengneng to la ray ugali na Kristiano—anggano balawbalawen na saray kakaaro to. Imbaga ni na samay agi: “Asabi panaon, abautismoan si Tessie tan nagmaliw ya regular payunir, anggan wala ni angkelag ya ananak to.” No lilinisan la na saray iyaaralan so bilay da pian paliketen so Dios, iyasingger to rad sikato tan gawaen to ran marakdakep ya pananginan.
17. (a) Antoy labalabay mod si Jehova bilang Managdamilim? (b) Anto ran kabiangan na panagmoldi so onsublay ya aralen tayo?
17 Diad sayan panaon, wala ni ray banga ya gawad lima, ya inas-asikason ginawa na managdamili. Mipadpara, say Managdamili tayo et maas-asikaso tan maan-anos ya manmomoldi ed sikatayo panamegley na simbawa to tan iimanoen to ray kiwas tayo. (Basaen so Salmo 32:8.) Kasin naliliknam ya interesado ed sika si Jehova? Kasin nanenengneng moy sarilim ya momoldien na maasikason lima to? No ontan, anto ni ran ugali so ontulong ed sikan mansiansian anlemek ya pitek ya mainomay a moldien nen Jehova? Anto ran ugali so nepeg mon paliisan pian agka magmaliw ya anawet odino mairap ya moldien? Tan panon ya makapitulongan iray atateng ed si Jehova diad panmoldi ed ananak da? Aralen iraya ed onsublay ya artikulo.