Onapit ed Dios

Aman Anggapoy Kapara

Mateo 3:16, 17

SAY salitan “Ama” et sakey ed saray pigaran salita a talagan makaapektan maong ed emosyon na too. No peteg a mangaaro so ama ed ananak to, natulongan to iran ombaleg a walaay maabig a pansumpalan. Satan no akin a tinawag na Biblia ya “Ama” si Jehova a Dios. (Mateo 6:9) Anto ta’n klase na Ama si Jehova? Pian naebatan itan, usisaen tayo pa iray salitan imbalikas nen Jehova sanen abautismoan si Jesus. Siempre, nakabkabat tayon maong so sakey ya ama diad paraan na pitotongtong to ed ananak to.

Manga Oktubre 29 C.E. ed saman sanen linma si Jesus ed Ilog na Jordan pian manpabautismo. Tan oniay ibabaga na Biblia ya agawa: “Si Jesus, sanen abinyagan la, tinmatdang a tampol a nanlapu ed danum; et nia, alukasan so saray tawen ed sikato, et anengneng to so espiritu na Dios ya onleleksab a singa sakey a malapati, tan oonla ed sikato. Tan nia, sakey a boses a nanlapu ed saray katawenan a kuan to, Saya so Ana’ko ya inararok; napaliket ak a maong ed sikato.” * (Mateo 3:16, 17) Nipapanengneng na saratan a mauy-uyamon salitan imbalikas nen Jehova, no sikatoy anton klase na Ama. Imanoen tayo pa so taloran bengatla ya imbalikas nen Jehova ed Anak to.

Unona, saray salitan “saya so Ana’ko,” et singa ibabaga nen Jehova ya, ‘Ikinon kon siak so Amam.’ Sirin, say makatalos ya ama et niiter toy pankaliktan na ananak a sikaray bidbiren tan naikday atension. Nepeg a nipalikna ed balang anak a sikaray pabpablien a membro na pamilya. Isipen pa labat so liknaan nen Jesus sanen sikatoy binidbir nen Ama to anggan adulto la!

Komadua, diad impanukoy nen Jehova ed Anak to ya “inararok,” parungtalan ton imbalikas so panangaro to ed si Jesus, a singa to ibabagan, ‘Inar-aro ta ka.’ Ibabalikas na maong ya ama ed saray anak to a sikaray inad-aro ton maong. Satan a balikas ya atekepay nisipor lan panangaro ed ananak et pagmaliwen to iran makalakal. Agaylay impakaliketan nen Jesus sanen nadngel toy boses nen Ama to a mangibabagan sikatoy inad-aro!

Mikatlo, diad saray salitan “napaliket ak a maong,” imbalikas nen Jehova so panangabobon to ed Anak to. Kuanmono ibabaga ton, ‘Ana’ko alikeliketan ak ed ginawam.’ Aanamoten na maaron ama iray pankanawnawa pian nipaamta’d ananak to a sikatoy naliliketan nisesengeg ed maabig a salita tan gawa ra. Lapud panangabobon na atateng ed ananak et sikaray napabiskeg tan napaseseg. Segseguradon apaseseg si Jesus sanen nadngel toy impangabobon na Ama ed sikato!

Peteg a si Jehova et Aman anggapoy kapara. Agyo ta pilpilaleken so ontan ya ama? No ontan, sika so naliketan lapud antam a posiblin nawalaan ka na relasyon ed si Jehova. Sano nanaaralan mo so nipaakar ed sikato tekep na pananisia tan masimsimoon a gawaen so linawa to, sika so aroen to met. Inkuan na Biblia: “Singger kayo ed Dios, et sikato so onsingger naani ed sikayo.” (Santiago 4:8) Wala ta ni so makapangiter ed sikayo na ontan a liknaan na inkaligen nen say pakawalaay maapit a relasyon ed Jehova a Dios, say sankamaongan lan Ama?

[Paimano ed leksab]