Anto so Panarian na Dios?

ANTO so manunan impulong nen Jesus? Unong ed inkuan ton mismo, satan et say Panarian na Dios. (Lucas 4:43) Kapagno ondedengel so totoo ed sikato, seguradon mabetbet dan narengel itan a Panarian. Kasin awetwet ira odino agda atalosan itan? Kasin tinepet da ed sikato no anto itan a Panarian? Andi. Anggapoy ontan a nabasa tayo ed saray Ebanghelyo. Kanian, nibaga kasi a kabisado itan na saraman a totoo?

Diad tua, say Kasulatan nensaman ya impasen a masanto na saray Judio et angipaliwawa ed satan a Panarian, a malinew tan espisipikon angipaamta no anto itan tan no antoy gawaen na satan. No aralen tayo natan so Biblia, mas dakel so naamtaan tayo nipaakar ed satan a Panarian, a singa saray Judio nensaman. Sansakeyen tayo pa so pitoran katuaan ya ibabangat na Biblia nipaakar ed Panarian. Say unonan taloran katuaan et nipaamta la ed saray Judio antis tan legan na panaon nen Jesus. Insan, say ontumbok a talora so impakabat nen Kristo odino saray apostol to nen inmunan siglo. Tan say unor so apalinew diad panaon tayo.

1. Say Panarian na Dios et tudtuan gobierno, tan ag-itan manampot. Imbaga na sankaunaan a propesiya ed Biblia a mangibaki so Dios na manangiliktar ed saray matoor a totoo. Sayan manangiliktar a tinawag ya “ilalak [odino bini],” so mangekal ed amin a teriblin kairapan a linmesa lapud impanrebelde di Adan, Eva, tan Satanas. (Genesis 3:15) Diad inlabas na panaon, walay makapalikliket a balita ya imbaga ed matoor ya Arin David. Sayan ‘bini’ odino Mesias so manuley ed sakey a Panarian. Satan a Panarian et duma ed amin a panarian lapud ag-itan manampot.​—2 Samuel 7:12-14.

 2. Ekalen na Panarian na Dios so amin a gobierno na too. Si propetan Daniel so akaawat na sakey a pasingawey, tan diad satan et anengneng to so impantutumbokan na saray sankamakapanyarian a gobierno angga ed panaon tayo. Imanoen pa so sankarakpan a parte na satan: “Dia ed saray agew naani na saratan [ya unor lan totoo] ya ar-ari, say Dios na tawen mamaalagey naani na sakey a panarian ya anggan kapigan agnaani naderal tan say pananguley to agnaani niiter ed sananey a baley. Balet buybuyaken to naani tan upoten to naani so saraya ya amin a panarian, et sikato so mansiansia lawas.” Kanian lawas lan naandi so amin a panarian odino gobierno ed sayan mundo tekep na saray guerra, panamairap, tan panagkurakot da. Unong ya ipapanengneng na propesiya nen Daniel, say Panarian na Dios et magano lan manuley diad interon dalin. (Daniel 2:44, 45) Satan a Panarian et aliwa labat lan tudtua, noagta magmaliw met ya alenleneg a gobierno ed interon mundo. *

3. Patundaen na Panarian na Dios iray guerra, tan ekalen to so sakit, eras, anggan say patey a mismo. Ipapanengneng na saray makapalikliket a propesiya ed Biblia no anto so sumpalen na Panarian na Dios dia ed dalin. Gawaen na satan a gobierno so agbalot agawaan odino nagawaan na organisasyon na too. Isip yo pa, diad satan et sigpot lan naandi iray armas ed guerra! “Sikato patundaen to so bakabakal angga ed sampot na dalin.” (Salmo 46:9) Anggapo la ray doktor, ospital, odino nanduruman sakit. “Say manaayam agto naani ikuan, Mabeblay ak.” (Isaias 33:24) Anggapo lay eras, kakulangan na naakan, odino malnutrisyon. “Wala so daakan ya ilik ed tapew na dalin.” (Salmo 72:16) Anggapo la ray ponpon, lamay, sementeryo, morge, tan ermen lapud satan. Anggapo lay patey, a maruksan kalaban tayo. “Inakmon [na Dios] so patey ed ando lan ando; et say Katawan a Jehova punasen to naani so saray lua ya unagus ed saray amin a lupa.”​—Isaias 25:8.

4. Say Panarian na Dios so walaan na Manuley a pinili na Dios. Agtinuro na Mesias so inkasikato tan sikatoy agmet imboto na aliwan perpekto a totoo. Sikatoy pinilin mismo nen Jehova a Dios. Ipapabitar itan na mismon titulo a Mesias tan Kristo, a mankabaliksan na “Say Alanaan.” Kanian sayan Ari et alanaan, odino tinuro nen Jehova parad espisyal a posisyon. Oniay inkuan na Dios nipaakar ed sikato: “Nia, say aripen ko, a sikato so ampayaen ko; say pinilik, a panliketan na kamarerwak. Inyan ko so espirituk ed sikato. Sikato yakar to naani inkatunong ed saray Gentil.” (Isaias 42:1; Mateo 12:17, 18) Siopa ni, likud ed say Manamalsa tayo, so makaamta no anton klase na Manuley so nakaukolan tayo?

5. Say Manuley ed Panarian na Dios et pinaneknekan to ed amin a totoo a sikatoy kualipikado. Say impasakbay a Mesias et si Jesus a taga-Nazaret. Sikatoy inyanak a manlapud kapolian a tinuro na Dios. (Genesis 22:18; 1 Awaran 17:11; Mateo 1:1) Sanen wadiad dalin, sinumpal to so dakerakel a propesiyan nipaakar ed Mesias a pigaran siglo lan akasulat. Manlapud tawen, sikato met so nipabidbir bilang Mesias. Panon? Nansalita so Dios manlapud tawen, ya imbaga ton sikato so Anak To. Tan impabitar na saray anghel a si Jesus so impasakbay a Mesias. Sakey ni, mapatnag a diad panamegley na pakapanyari na Dios et nanggawa si Jesus na saray milagro, a kaslakan et diad arap na dakerakel a totoo. * Aminpigapigan impanengneng nen Jesus no anto so personalidad to bilang Manuley. Agto labat la nayarian so ontulong ed totoo noagta labay to so ontulong. (Mateo 8:1-3) Sikatoy mapangasi, makpel, mapaabeba, tan agmasiblet. Akasulat ed Biblia so impanbilay to diad dalin pian nabasa na amin.

6. Diad Panarian na Dios, wala so nakaiba nen Kristo a 144,000 a manuley. Inkuan nen Jesus a saray arum, pati saray apostol to, so nakaiba ton manuley ed tawen. Tinawag to iyan grupo a “daiset a papastolan.” (Lucas 12:32) Diad saginonor, impaamta ed si apostol Juan a say  bilang na daiset a papastolan et 144,000. Marakdakep so kimey da ed tawen lapud manuley ira bilang arari tan manlingkor ira bilang saserdote a kaiba nen Kristo.​—Apocalipsis 5:9, 10; 14:1, 3.

7. Say Panarian na Dios, a manuuley la natan ed tawen, so akaparaan lan manuley diad interon dalin. Sayan unor a katuaan et sakey ed saray makapalikliket a naamtaan tayo. Dakel so paneknek ed Biblia a naawat la nen Jesus so autoridad bilang Ari ed tawen. Diad kaplesan, sikatoy manuuley la natan ed tawen, tan agmanbayag et uleyan to met la so interon dalin, tan tooren to iray marakdakep a propesiya a sinalambit tayo. Balet, panon tayon naseseguro a manuuley la natan so Panarian na Dios? Tan kapigan itan onggapo a manuley diad dalin?

[Saray paimano ed leksab]