Kasin Antam La?

Kapigan dinalaw na saray astrologo si Jesus?

Akabatan tayo ed Ebanghelyo nen Mateo a walaray dinmalaw ed si Jesus a ‘makabat a totoo [astrologo o mago] a nanlapu ed letakan,’ tan awi-awit da iray regalo parad sikato. (Mateo 2:1-12) Ag-asalambit no pigaran astrologo so dinmalaw ed ugaw a si Jesus tan anggapoy malet a basiyan na samay sisiaen na karaklan a talora ira. Ag-anggan abitla so kangaranan da ed salaysay na Biblia.

Onia so komento na New International Version Study Bible ed Mateo 2:11: “Misumlangan ed sisiaen na karaklan, diad tua et agdinalaw na saramay Mago si Jesus diad mismon labi na inkianak to diad atotong, ya aliwan singa saramay pastol. Apalabas ni so piga-pigaran bulan insan da dinalaw si Jesus, a diad saman et sakey lan ‘ugaw’ (aliwan kapangiyanak) a wala la’d ‘abung.’” Say paneknek ed saya et sanen labay nen Herodes ya ipapatey so ugaw, ingganggan to a pateyen so amin ya ugaw a lakin mantaon na duara a mamaleksab diad interon Betlehem tan ed kaabay iran distrito. Ontan ya edad so ginetma ton ipapatey base ed impangalkula to ‘ed panaon ya akabatan ton maong ed saray makabat a totoo [odino astrologo].’​—Mateo 2:16.

No talagan dinalaw na saray astrologo si Jesus nen mismon labi na inkianak to tan walaray awit dan balitok tan arum niran mablin regalo, aliwa labat komon a duaran malapati so inyapay nen Maria sanen inawit toy Jesus diad templo ed Jerusalem kalabas na 40 agew. (Lucas 2:22-24) Unong ed Ganggan, ontan so uksoyan parad saray pobrin totoo ya agmakasaliw na kilaw a karnero. (Levitico 12:6-8) Anggaman kuan, nayarin saramay mablin regalo et nipanpanaon tan makanakana ed pamilya nen Jesus diad impan-ayam da ed Ehipto.​—Mateo 2:13-15.

Akin ya apat agew ni so apalabas antis ya akasabi si Jesus ed lubok nen Lazaro?

Ompatnag a ginagala nen Jesus ya ontan so nagawa. Akin a nibaga tayon ontan? Konsideraen pa imay salaysay a nirekord ed Juan kapitulo 11.

Sanen nansakit na grabe so kaaro nen Jesus a si Lazaro a taga-Betania, angibaki so agagi ton bibii na saray mangipakabat ed si Jesus.

(Bersikulo 1-3) Diad saman, say kawalaan nen Jesus et masulok a duay agew nin akaren manlapud Betania. (Juan 10:40) Kanian, sanen akasabi ed si Jesus iramay mangipakabat, mapatnag ya inatey lay Lazaro. Anto so ginawa nen Jesus? Sikatoy ‘nanayam [ni na] duay agew ed pasen a kawalaan to,’ insan linma ed Betania.(Bersikulo 6, 7) Sirin, lapud amalabas ni si Jesus na duay agew diad kawalaan to, insan duay agew nin nambaroy, sikatoy akasabi diman ed lubok apat agew lay apalabas kayari impatey nen Lazaro.​—Bersikulo 17.

Antis ni na satan, wala lay duaran pinaoli nen Jesus​—samay sakey et kapate-patey to ni labat tan samay sakey et mansanagew lan inatey. (Lucas 7:11-17; 8:49-55) Balet, ompan panduaruwaan na arum no kasin sarag ton paolien so toon apat agew lan inatey a say bangkay to et ginmapo lan nabulok. (Bersikulo 39) Unong ed ibabaga na sakey a reperensya ed Biblia, panisiaan na saray Judio ya anggapo lay ilalo “na sakey a toon apat agew lan inatey; a diad satan, say bangkay to et napatnagan lan nabubulok, tan say kamarerwa to, a sisiaen dan taloy agew a manletletaw ed tapew na bangkay, et tinmaynan la.”

No bilbilang ta walaray manduaruwa ed saramay linma diman ed lubok, asingger da lan naimatonan so pakapanyari nen Jesus a mamabilay. Legan ton akaalagey diman ed arap na akalukas a lubok, inkelyaw to: “Lazaro, paway ka!” Insan, “saman so inatey pinmaway.” (Bersikulo 43, 44) Sirin, say peteg ya ilalo na saray inaatey et say kikioli, aliwan say palson pananisia na karaklan a say kamarerwa et mantultuloy a manbilay kayari ipatey.​—Ezequiel 18:4; Juan 11:25.