Parad Saray Manbabasa
Parad Saray Manbabasa
MALIKET min ipaamta ed sikayo a manlapud sayan isyu et walay pigaran pananguman ed Say Panag-Bantayan. Antis min ipaliwawa no anto iratan, pantongtongan tayo ni iramay ag-umanen.
Say ngaran na sayan magasin a Say Panag-Bantayan Mangipapalapag na Panarian nen Jehova et agsinalatan. Kanian, Say Panag-Bantayan so mantultuloy a mangigalang ed si Jehova bilang say tuan Dios tan manligliwa ed saray manbabasa diad panamegley na maong a balita na Panarian to. Diad sayan isyu, saray artikulo ed pahina 5 anggad 9 so mangipapaliwawa no anto itan a Panarian tan kapigan itan onsabi. Niarum ni, Say Panag-Bantayan so mantultuloy a mamabiskeg na pananisia ed si Jesu-Kristo, manuporta ed katuaan na Biblia, tan mangipaliwawa ed kabaliksan na saray nagagawa ed mundo diad panamegley na saray propesiya ed Biblia, a singa gagawaen la na sayan magasin ed loob na masulok a sanlasus taon.
Anto sirin so balo? Abuloyan yo kami pan mangipaliwawa ed pigaran makapainteres ya artikulo a nabasa ed edisyon a petsa-1 na bulan. *
Walaray artikulo a nabasa ed sayan edisyon a pannonoten ton maong iray manbabasa. Say artikulo a “Kasin Antam La?” so mangiter na makapainteres ya impormasyon pian naamtaan so kabaliksan na saray pinilin salaysay ed Biblia. Diad artikulon “Onapit ed Dios,” malinew tayon naaralan ed saray teksto ed Biblia so nipaakar ed si Jehova. Tan diad artikulon “Tepet na Saray Manbabasa” et naebatan iray kaslakan a tepet nipaakar ed Biblia. Singa bilang, onia so itetepet na dakel a totoo: “Tua ta a say Panarian na Dios et walad puso tayo?” Naamtaan yo so ebat diad pahina 13.
Pigaran regular ya artikulo so intarya parad saray pamilya. Say artikulo a “No Panon a Magmaliw a Maliket so Pamilya,” so mangiparungtal no anto iray peteg a problema ed pamilya natan tan no panon a makatulong iray prinsipyo ed Biblia pian naresolbe iratan. Say artikulon “Ibangat Yo Iray Anak Yo” et nepeg ya ibasa na atateng ed saray anak da. Tan diad artikulon “Parad Saray Kalangweran” et naikdan iray tobonbalo na pinagka-proyekto ra ed panagaral na Biblia.
Wala ni arum ya artikulo ed sayan edisyon. Say artikulon “Alig Yoy Pananisia ra” so mamaseseg ed sikatayo pian aligen so alimbawa na sakey ya indibidual diad Biblia. Singa bilang, nabasa ed pahina 18 anggad 21 na sayan isyu so makapatenyeg a salaysay nipaakar ed si propetan Elias tan naaralan tayon aligen so pananisia to. Diad artikulon “Sulat a Nanlapud . . .” et nabasa so mismon report na saray misionaryo tan arum ni ran walad nanduruman pasen na mundo. Tan say artikulon “No Anto so Naaralan ed si Jesus” so mangipaliwawa ed saray manunan bangat ed Biblia diad simplin paraan.
Segurado kami a Say Panag-Bantayan et siansia nin makapainteres ed amin a manbabasa a manrerespeto ed Biblia tan malabay a makaamta no anton talaga so ibabangat na sayan libro. Iilaloan mi a natulongan kayo na sayan magasin pian naromog yo so aanapen yo a katuaan na Biblia.
SARAY MANANGIPALAPAG
[Paimano ed leksab]
^ par. 4 Say Panag-Bantayan et iyimprinta la natan ed duaran edisyon. Diad Ingles tan arum ni ran lenguahe, say edisyon a petsa-1 na bulan et parad publiko. Diad lenguahen Pangasinan, apatiran isyu so iyimprinta ed sayan edisyon kada taon. Say edisyon a petsa-15, a binulan ya iyimprinta et aralen na saray Tasi nen Jehova ed saray pantitipon da ed kongregasyon, a nayarian yo met ya atendian.