Say Kerew na Interon Mundo

ISIPEN pa a nilasus milyon anggad binilyon a totoo so onkekerew na saksakey a bengatla. Ipipikasi ra ed sankatageyan ya autoridad ed uniberso ya ebatan to la komon itan a kerew da. Balet, pigpigara ed sikara so makaamta no anton talaga so kekerewen da. Nayari kasin nagawa iya? Diad tua et inagew-agew iyan nagagawa. Anto so kekerewen na sarayan totoo? Say isabi na Panarian na Dios!

Unong ed sakey a kalkulasyon, manga 37,000 a relihyon so mangibabagan Kristiano ira, a papanisiaan dan si Jesu-Kristo so Lider da. Say membro ra et masulok lan duaran bilyon. Dakel ed sikara so manpipikasi na “Ama Mi.” Kasin antam iyan pikakasi? Unong ya imbangat nen Jesus ed saray patumbok to, onia so gapo na saya: “Ama min wala ka ed tawen, nagalang komon so ngaran mo. Onsabi komon so panarian mo. Nagawa komon so linawam, unong ed tawen, ontan met ed dalin.”​—Mateo 6:9, 10.

Diad nilasus lan taon natan, sarayan salita so lanang lan ipipikasi ed saray simbaan. Bilang pamilya tan bilang indibidual et uulit-uliten da ni ingen iraya, maabig man odino andi so kipapasen da. Bibitlaen da iraya diad masimoon tan madebosyon a paraan. Kaslakan ed sikara et memoryado ra tan naynay dan ipipikasi iraya anggaman agda tanton natatalosan odino agdan balot natatalosan so kabaliksan na saya. Aliwa labat lan saray membro na Kakristianoan so maniilalo tan manpipikasi ed isabi na Panarian na Dios.

Kerew met na Saray Aliwan Kristiano

Say sakey a kabkabat a dasal na Judion relihyon et say Kaddish. Anggaman ag-itan direktan manutukoy ed ipapatey odino ermen, satan so kaslakan a dadasalen da sano inateyan ira na inad-aro. Onia so idadasal ed saya: “Komon ta iletneg to [Dios] so Panarian to legay bilay mo . . .  a tamtampol.” * Sakey nin dadasalen diad saray sinagoga nensaman et nipaakar ed paniilalo ed Panarian na Mesias a manlapud sankaabungan nen David.

 Arum ya aliwan Kristiano et asagyat ed ideya a walay Panarian na Dios. Unong ed The Times of India, sakey a prominentin lider na relihyon ed India nen koma-19 a siglo, ya interesadon napankasakey iray relihyon a Hindu, Muslim, tan Kristiano, so angikuan: “Say tuan panarian na Dios et agnagawa anggad agmankasakey so bukig tan sagur.” Tan diad agano ni, say prinsipal na sakey a kolehyo na Islam ed Strathfield, Australia so nansulat ed dyaryo: “Singa saray Muslim, panisiaan ko a si Jesus et ompawil tan iletneg to so Panarian na Dios.”

Anggapoy panduaruwa sirin a walay binilyon a totoon maniilalo tan manpipikasi ed isabi na Panarian na Dios. Balet ikonsidera pa ni sakey a makapainteres a katuaan.

Nayarin amta yo la a sikami ran Tasi nen Jehova, a mangipapalapag ed sayan magasin, so mankakabkaabungan ed lugar yo pian napitongtongan mi ray totoo nipaakar ed Biblia. Legan ya isusulat iyan magasin, gagawaen mi itan a kimey diad interon mundo, diad 236 a bansa tan diad masulok lan 400 a lenguahe. Say manunan ipupulong mi et say Panarian na Dios. Diad tua, imanoen a say kompleton ngaran na sayan magasin et Say Panag-Bantayan Mangipapalapag na Panarian nen Jehova. Maslak min tetepetan iray totoo no kasin ipipikasi ra itan a Panarian. Dakdakel so mangibabagan on. Balet, no tepetan ira no anto itan a Panarian, dakel ed sikara so onebat na, “Agko amta,” odino say ebat da et aliwan malinew tan agsegurado.

Akin a dakel so manpipikasi na sakey a bengatla ya agda met lanlamang natatalosan? Say rason kasi et lapud say Panarian na Dios et komplikado tan aliwan malinew ya ideya? Andi. Say Panarian so malinew tan impaliwawan maong ed Biblia. Niarum ni, say mensahe na Biblia nipaakar ed Panarian et makapangiter ed sika na peteg ya ilalo ed sarayan magulon panaon. Diad ontumbok ya artikulo, nengnengen tayo no panon ya impaliwawa na Biblia iyan ilalo. Insan nengnengen tayo met no kapigan naebatan so pikakasi ya imbangat nen Jesus nipaakar ed isabi na Panarian.

[Paimano ed leksab]