Kasin Antam La?

Akin et kalkalna so impanambal nen Jesus ed samay bulag a laki?

Diad Marcos 8:22-26, nabasa tayo so nipaakar ed impanambal nen Jesus ed sakey a bulag a laki diad Betsaida. Inkuan na salaysay a diad primero, nilutdaan nen Jesus so mata to may laki, insan to tinepetan no antoy nanenengneng to. Mapatnag ed ebat na samay laki ya agni tanton malinew so pakanengneng to: “Makanengneng ak na totoo; ta sikara so naimanok a singa saray kiew, a manaakar.” Intapew lamet nen Jesus so lima to ed mata na samay laki, tan oniay agawa: “[Samay laki] so tinmangwa ya abaybayag, et nipawil, tan anengneng to so amin a bengatla a malinlinew.” Mapatnag sirin a kalkalna so impanambal nen Jesus ed samay laki. Akin kasi?

Ag-ibabaga na Biblia so rason balet ta sarag tayon ikonsidera so sakey a posibilidad. Sano say sakey a toon pigay taon lan bulag, odino inyanak lan bulag, et makanengneng la, baleg itan a pananguman. Pian niyilustra itan, imanoen pa iya: Nensaman et walaray angkelag a kabayon uusaren diad saray minaan. Saraya et apasal lan maong ed bilunget kanian katatdang da manlapud minaan, onabot ni’d sanagew antis a nipasal so mata ra ed liwawa. Ontan met ed sakey a bulag, mas baleg ni ingen so pananguman a dalanen to. Diad panaon tayo, walaray pankanawnawan apaabig na saray doktor so deperensya na mata na bubulag, kanian akanengneng ira lamet. Anggaman ontan, maslak ed saray pasyente et nabibigla ed karakel na nanenengneng da. Nawewetwet ira ed nambabangil a kolor, uhas, tan itsura ed kaliberliber da tan agda ni ingen nabidbir iray bengatlan dati lan amta ra. Balet, diad ilalabas na panaon, nabibidbir da lanlamang iray nanenengneng na mata ra.

Sirin, say kalkalnan impanambal nen Jesus ed samay bulag a laki et mangipapatnag na maaron panangiyansakit to. Diad kaunoran, samay laki et “anengneng to so amin a bengatla a malinlinew,” kanian abidbir to lan amin iratan.

Nen panaon nen Jesus, akin ya aliwan ontan kainomay so pambasa’d lukot?

Diad kaslakan, say sukat na sakey a pirason inusar ed panaggaway lukot et 9 anggad 11 a pulgada karukey, tan 6 anggad 9 a pulgada kalapar. Sarayan piraso et impansusuldongan ed gilig tan gilig panamegley na lino a timbey odino beket. No maminsan et mas andukey ni ingen nen saratan so inusar. Singa bilang, say Dead Sea Scroll na Isaias so tutugyopen na 17 a piraso a gawa’d katat. Samay akera labat lan kabiangan na satan et 24 piye so karukey to. Nayarin ontan met so karukey to imay lukot na Isaias a binasa nen Jesus diad sinagoga na Nazaret.​—Lucas 4:16, 17.

Nipaakar ed saya, onia so imbaga nen Alan Millard diad libro ton Discoveries From the Time of Jesus: “Bembenan na managbasa so libro [lukot], buskagen to itan panamegley na kawigin lima to, bembembenan balet na kawanan a lima to imay basil ya angirolyoan. Insan to lamet ilukot imay imbuskag na kawigin lima to bangta kalkalnan ibubuskag na kawanan a lima to imay basil a rolyo legan ton babasaen so kada kolum. Nayari lagin aminpiga-pigan ontan a proseso so ginawa nen Jesus pian nasabi to so Isaias 61, say kapitulon binasa to diman ed sinagoga.”

Diad saman a panaon, agni aketegketeg ed kapitulo tan bersikulo so libro na Isaias, aliwan singa natan. Sanen say lukot na Isaias et inderew ed si Jesus diman ed sinagoga na Nazaret, kaukolan to nin anapen imay partin naromog ed Isaias 61:1, 2 diad Biblia tayo natan. Balet ta tampol ya “aromog [nen Jesus] so pasen” na satan, a mangipapanengneng labat a kabkabisado toy Salita na Dios.