Say Katuaan Nipaakar ed Ritual a Komunion

SAYAN seremonya et regular a ngingilinan na totoo ed sankamundoan, balanglan maminpigapiga ed sakey taon, sinimba, odino inagew-agew. Ingen ta ibabaga na arum a sakey iyan “misteryo na pananisia,” tan kuan na dakel a mibibiang ya agda amta no antoy kabaliksan na saya. Sagrado met iya kuno tan mamilagro ni ingen.

Say seremonyan pantotongtongan tayo et say Komunion. Saya imay parte na misa a bendisyonan na pari so ostia tan alak tan insan to pibiangen iray akimisa a mikasakey ed si Kristo panamegley na Masanton Komunion. * Inkuan nen Papa Benedict XVI a parad saray Katoliko, sayan seremonya so “sankaimportantian ed amin a sisisiaen” da. Tan diad agano ni labat, nanggawa iray Katoliko na selebrasyon parad sayan ritual salanti, say “Taon na Komunion,” pian “nabilay lamet tan napabiskeg so pananisia ed [satan].”

Anggan saray Katolikon kibangkibang ed pananisia ra et debotado ed sayan ritual. Alimbawa, diad sakey ya artikulo ed Time a magasin, oniay insulat na sakey a bii a nideskribe a balo ni tan progresibon Katoliko: “Antokaman ni isyu ed saray doktrina na relihyon a Katoliko, siansia nin ombebemben itayo ed say mamebedber ed sikatayo ed Katolikon pananisia, salanti, say debosyon tayo ed panagngilin na Komunion.”

Say tepet balet et: Anto ta iyan ritual? Niganggan kasi iray papatumbok nen Kristo a ngilinan iya? Pantongtongan tayo nin unona no panon a niwala iyan tradisyon. Insan tayo ebatan so mas importantin tepet a: Mipara kasi so Komunion ed samay orihinal ya impanngilin nen Jesus ngalngali 2,000 taon lay apalabas?

Say Komunion tan Kakristianoan

Aliwan mairap a talosan no akin ya ipapasen a mamilagro so Komunion. Say sankaimportantian a parte na sayan seremonya et sano ibabalikas la na pari imay pikakasi parad Komunion. Unong ed Catechism of the Catholic Church, “lapud pakapanyari na saramay balikas tan say kiwas nen Kristo, tan ed pakapanyari na Masanton Espiritu,” “niwala” ed saman a bekta so laman tan dala nen Jesus. Inumen na samay pari so alak tan kanen to so ostia, insan to pibiangen iramay debotado a man-komunion, mabetbet a diad pangan da labat ed ostia.

 Unong ed bangat na Katoliko, samay ostia tan alak et mamilagron magmamaliw a literal a laman tan dala nen Kristo. Saya imay doktrinan tatawagen da a transubstantiation. Sayan bangat et agtampol niwala, tan salambengat la nen koma-13 siglo nausar tan naikdan na kabaliksan iyan termino. Sanen agawa imay Repormasyon na Protestanti (impanrebeldi ed autoridad na Katolikon Simbaan), akuestion so pigaran doktrina na sayan Katolikon ritual. Alimbawa, impulisay nen Martin Luther so doktrinan transubstantiation tan say sinisia to et say doktrinan consubstantiation. Ngalngali anggapo lanlamang balet so pandumaan na saraya. Say pananisia labat nen Luther et samay laman tan dala nen Jesus et wadman la ed ostia tan alak.

Diad inlabas na panaon, linmelesa ed limog na saray relihiyon ed Kakristianoan so nanduruma niran interpretasyon ed Komunion, pati say paraan tan kabetbet na panagngilin ed satan. Ingen ta say arum a nengneng na sayan ritual et nansiansian sankaimportantian ed Sankakristianoan. Komusta balet imay orihinal ya impanngilin a ginawa nen Jesus?

Say Orihinal ya Impanngilin ed ‘Pangdem na Katawan’

Si Jesus so angigapo ed ‘Pangdem na Katawan,’ odino say Pakanodnonotan na impatey to. (1 Corinto 11:20, 24) Balet, misteryoso kasi so impanggawa to ed satan, a talagan kinan na papatumbok to so laman to tan ininum da so dala to?

Diad saman et kapkapanselebra ni labat nen Jesus ed Judion Paskua, tan kapkapanpaalis to ed si Judas Escariote ya asingger lan mantraidor ed sikato. Oniay insalaysay nen Mateo, a sakey ed saramay 11 ya apostol a wadman: “Tan diad pangakan da, angalay Jesus na tinapay, tan binendisionan to, tan sikatoy pinipisag to; tan inter to’d saray babangatan, inkuan to, Ala yo, kanen yo; saya sikatoy laman ko. Et angala na sakey a kopa, tan angiter na pisasalamat, tan inter to’d sikara, a kuan to, Oninum kayo ya amin ed saya. Ta sikato yay dalak ed sipan a sikatoy naibung nipaakar ed amayamay a pangekal ed saray kasalanan.”​—Mateo 26:26-28.

Parad si Jesus tan ed amin a lingkor na Dios, say pikekerew na panamendisyon ed naakan et kabiangan lay bilay. (Deuteronomio 8:10; Mateo 6:11; 14:19; 15:36; Marcos 6:41; 8:6; Juan 6:11, 23; Gawa 27:35; Roma 14:6) Ingen, wala tay rason pian manisia itayo a sanen manpipikasi na pisasalamat si Jesus et sikatoy manggagawa met na milagro, tan bilang resulta et literal a naakan na papatumbok to so laman to tan nainum day dala to?

Anto so Kabaliksan na “Sikato Ya”?

Tua a diad Pangasinan a Biblia na PBS (Philippine Bible Society), saramay imbaga nen Jesus et nipatalos a: “Saya sikatoy laman ko” tan “Sikato yay dalak.” Tan tua met a say manunan kabaliksan na samay orihinal a Griegon salita ya e·stin et “sikatoy” odino “so.” Balet ta nayari met a say labay ya ibaga na sayan salita et “kabaliksan na saya,” tan ontan met imay salita na Pangasinan a “sikato so.” Alimbawa, imanoen pay inkausar na salitan “sikato so” ed Lucas 8:11: “Bang say alimbawa sikato’ya [e·stin]; Say ilik sikato so [e·stin] salita na Dios.” Seguradon aglabay ya ibaga na saya a samay ilik et literal a Salita na Dios! Noagta, say ibabaga labat na satan et samay “ilik” et kabaliksan toy odino isisimbolo toy Salita na Dios. Makapainteres ta diad saya met lanlamang a Biblia, samay Griegon salita ya e·stin, a nipatalos a “sikatoy” ed Mateo 26:26-28, et nipatalos a “kabaliksan na saya” diad arum a parte. Singa bilbilang diad Mateo 12:7: “Bang komon no akabatan yo no anto so kabaliksan na saya [e·stin], Say panangasi so pirawat ko, ya aliwan say bagat, agyo komon dusaen so saray andi kasalanan.” Niarum ni, diad dakel a bersion na Biblia, sayan salita et mabetbet lan nipapatalos a “kabaliksan na saya” odino “labay ton ibaga.” *

Wala lanti posibilidad a lapud pigaran doktrina et ompan literal laingen so pantalos na arum ed saray imbaga nen Jesus. Kanian onabobon so dakel a respetadon iskolar na Biblia a say  sankasustoan a pangipatalos ed samay ideyan impasabi nen Jesus et “kabaliksan to” imbes a “sikato so.” Alimbawa, inaral a maong na Katolikon teologo a si Jacques Dupont so kultura tan komunidad a nambilayan nen Jesus tan say konklusyon to et say “sankanaturalan,” tan sirin et say mas malinew a pangipatalos ed saman a bersikulo et: “Kabaliksan na saya so laman ko” odino, “Isisimbolo na saya so laman ko.”

Balet, walay mas mabiskeg nin rason pian panisiaan a seguradon aglabay ya ibaga nen Jesus a literal a kanen na saramay papatumbok to so laman to tan inumen da so dala to. Kayari na samay Delap ed panaon nen Noe, inabuloyan na Dios iray totoo a mangan ed laman na ayayep. Balet, agto ran balot inikdan na permison mangan ed laman na too. Niarum ni, diretsaan ton sinebelan so totoo a mangan na dala. (Genesis 9:3, 4) Sayan ganggan et kaiba met ed saramay niiter ed si Moises a Ganggan, ya inunor ya amin nen Jesus. (Deuteronomio 12:23; 1 Pedro 2:22) Ontan met, saray apostol et pinakiwas na Dios panamegley na masanton espiritu pian mangipaakseb lamet ed sayan ganggan a mangibabawal ed pangan na dala, kanian onaplika met itan sirin ed amin a Kristiano. (Gawa 15:20, 29) Diad padesir yo labat, mangigapo kasi Jesus na selebrasyon a panggawaen to iray papatumbok to na onkontra ed sagradon ganggan na Makapanyarin amin a Dios? Seguradon andi!

Kanian, malinlinew sirin ya inusar labat nen Jesus a pinagkasimbolo imay tinapay tan alak. Samay tinapay ya anggapoy laok ton pampaalsa et kabaliksan toy, odino isisimbolo toy andiay kasalanan a laman to ya iyapay. Samay ambalangan alak balet et isisimbolo toy dala to ya iyibung parad “amayamay a pangekal ed saray kasalanan.”​—Mateo 26:28.

 Say Gagala na Pangdem na Katawan

Sinampotan nen Jesus so selebrasyon na Pangdem na Katawan ed onia iran salita: “Gawa yo iya a pakanodnonotan ed siak.” (Lucas 22:19) Peteg a tutulongan itayo na sayan selebrasyon pian nanodnonotan si Jesus tan saray maabig a bengatlan agawaan diad panamegley na impatey to. Nanodnonotan tayo met ed satan a si Jesus et sinuportaan tan indepensa to so Ama ton si Jehova bilang say sankatagyan. Panamegley met na satan et nanodnonotan tayo a diad impatey to bilang perpekto tan andiay kasalanan a too, ‘inter to so bilay to a panondon ed amayamay,’ kanian say siopaman a manisia ed apay to et nayari lan nibulos ed kasalanan tan nawalaan na andi-anggaan a bilay.​—Mateo 20:28.

Balet, manuna ed amin, say Pangdem na Katawan et sakey a pandurungo. Say mandurungo et si (1) Jehova a Dios, a sikatoy angiyuksoy ed apay, (2) Jesu-Kristo, “say Kordero na Dios,” a sikaton mismo so inyapay, tan (3) saramay papatumbok nen Jesus a pinili na Dios ya onla ed tawen. Diad pangan na sarayan pinili ed tinapay tan iyinum day alak et ipapanengneng dan nikasakey ira ed Kristo. (Juan 1:29; 1 Corinto 10:16, 17) Ipapanengneng da met a kabiangan ira ed “balon sipan.” Sikaraya so kakaiba nen Kristo a manuley ed tawen bilang arari tan saserdote.​—Lucas 22:20; Juan 14:2, 3; Apocalipsis 5:9, 10.

Balet kapigan ta nepeg a selebraan iyan pakanodnonotan ed si Jesus? Tandaan tayo a sanen inggapo nen Jesus iyan selebrasyon, imbana to itan ed sakey a petsa, salanti, petsa na Paskua, a diad kalendaryo ra et Nisan 14. Abayag lan tinaon a seselebraan na saray totoo na Dios nensaman iyan petsa, 1,500 lan taotaon, pian nodnonoten so makatantandan impangiliktar nen Jehova ed totoo to. Malinlinew sirin a singano ibabaga nen Jesus ed saray papatumbok to a diad sayan petsa da nepeg a nodnonoten so nagkalalo nin abalbaleg a panangiliktar a gawaen na Dios panamegley na ipatey nen Kristo. Kanian kada taon, saray tuan papatumbok nen Jesus et onaatendi ed Pangdem na Katawan diad samay petsan mipetekan ed Nisan 14 na Hebreon kalendaryo.

Gagawaen da kasi itan lapud panangaro ed sayan ritual? Diad tua, ontan so mamapakiwas ed maslak a mibibiang ed Komunion. Imanoen pay inkuan na samay abitla niman a nansulat ed sakey ya artikulo ed Time magasin: “Duma sikay liknaan no mibiang ka ed sakey a karaanan lan maong a ritual a pibibiangan met na amayamay.” Singa met ed amayamay a Katoliko natan, labay na sayan autor a say lenguahen usaren ed sayan seremonya et Latin, a singa met nensaman. Akin ey? Insulat to: “Say labay ko, saray kansionen ed misa, samay agko natalosan so lenguahe to, ta mabetbet lan agko nagugustoan so narerengelan ko ed Ingles.”

Balet, panliketan a ngilinan na saray Tasi nen Jehova tan saray kakaiba ran interesado so Pangdem na Katawan diad lenguahen natatalosan da, inerman so panaayaman da. Labay da a mas natalosan ni so kabaliksan tan kakanaan na impatey nen Kristo. Tan saraya so katuaan a nepeg a nodnonoten tan pantongtongan diad interon taon. Parad saray Tasi, say panselebra ed saya so sankaabigan a paraan pian agnalingwanan so balbaleg a panangaro nen Jehova a Dios tan say panangaro nen Anak to, si Jesu-Kristo. Ontutulong itan ed sikaran mantultuloy a ‘mangipakabat ed impatey na Katawan angga ed isabi to.’​—1 Corinto 11:26.

[Saray paimano ed leksab]

[Blurb ed pahina 27]

Panoy impanngilin nen Jesus ed samay pilpilimeron Pangdem na Katawan?

[Litrato ed pahina 28]

Si Jesus so angigapo ed selebrasyon a pakanodnonotan ed impatey to

[Litrato ed pahina 29]

Panagngilin ed Pangdem na Katawan bilang pannodnonot ed impatey nen Jesu-Kristo