Ibangat Yo Iray Anak Yo

Timoteo​—Akaparaan tan Mabulos a Manserbi

“AKAPARAAN ka la?” Asalim ta lay atepetan na ontan?​— Bueno, say nayarin labay ya amtaen na samay anepet et no kasin akatarya ka la. Singa bilang, nayarin say labay ton ibaga et ‘Wala la kasi’d sika iray librom? Abasam ta laray leksion mo?’ Unong a nakabatan tayo’d dia, si Timoteo et walaan na ontan ya awawey, sikatoy akaparaan.

Si Timoteo et mabulos met. Akin a nibaga tayon ontan?​— Lapud sanen sikatoy naimbitaan a manlingkor ed Dios, say awawey to et mipara’d samay lingkor nen Jehova ya angibagan: “Wadia ak; ibaki mo ak.” (Isaias 6:8) On, lapud si Timoteo et akaparaan tan mabulos a manserbi, nagmaliw a malikeliket so impanbilay to. Labay mo ta a naamtaan so nipaakar ed satan?

Nianak si Timoteo diad Listra, manga nilasus milya’y kaarawi ed Jerusalem. Say bai ton si Loida tan ina ton si Eunice et maaral na Biblia. Anggan uga-ugaw ni Timoteo, ginapoan da lan ibangat ed sikato so Salita na Dios.​—2 Timoteo 1:5; 3:15.

Nayarin tin-edyer ni labat si Timoteo sanen binmisitay Pablo, kaiba toy Bernabe, ed Listra diad samay primeron andukey a biahe to pian manpulong. Nayarin diad satan a panaon nagmaliw a Kristiano so bai tan ina nen Timoteo. Labay mo ta’n naamtaan no anto’may makapaermen a naeksperiensya di Pablo tan Bernabe ed saman?​— Bueno, saramay totoon agda labalabay iray Kristiano et tinutupak day Pablo anggad sikatoy niparukol-dukol la, insan da inggayugoy ya impaway ed syudad. Abaloan da et inatey la.

Balet sikatoy dinadago na saramay anisia ed ibabangat to, tan sikatoy binmangon. Kaimbuasan to, inmalis ira di Pablo tan Bernabe, ingen ag-abayag et amawil met lanlamang ira ed Listra. Kapawil da ditan, nandiskursoy Pablo tan inkuan to’d saray disipulo to: “Dia ed dakel ya irap nakaukolan ya onloob itayo ed panarian na Dios.” (Gawa 14:8-22) Anto kasi labay ya ibaga nen Pablo?​— Say labay ton ibaga et walaray manggulo tan mamairap ed saray manlilingkor ed Dios. Oniay insulat to ed si Timoteo diad saginonor: ‘Amin iray malabay a manbilay a sinasanto, manako’ra naani panamasegsegang.’​—2 Timoteo 3:12; Juan 15:20.

 Kapanlapu di Pablo tan Bernabe ed Listra, anempet ira ed ayaman da. Kalabas na pigaran bulan, pinili nen Pablo si Silas a nakaiba ton manbiahe tan pinawil daray pasen a naknakar to la pian pasesegen iray balon disipulo diman. Kasabi ra’d Listra, maseguron malikeliket si Timoteo a makapinengnengan lamet ed si Pablo! Balet, mas laloy liket to sanen sikatoy inimbitaan di Pablo tan Silas a mila’d pambiabiahe ra bilang misionero. Inawat nen Timoteo itan ya imbitasyon. Sikatoy akaparaan tan mabulos a mila.​—Gawa 15:40–16:5.

Nanuulop iran talo a nambiahe, ya inaakar day dakel a kilometro, insan ira nambaloto. Kasakbit da, inakar day anggad Tesalonica diad Gresya. Ditan et dakel so nagmaliw a Kristiano. Ingen, sinmanok iray arum tan anatawag ira na saray totoo pian manggulo. Lapud napepeligro lay bilay di Pablo, Silas, tan Timoteo, tinmaynan iran amaarap ed Berea.​—Gawa 17:1-10.

Si Pablo balet et napapagaan ed saray balobalo nin mananisia ed Tesalonica, kanian pinapawil toy Timoteo diman. Antam ta no akin?​— Diad saginonor et impaliwawa nen Pablo ed saray Kristiano ed Tesalonica so rason: ‘Pian mamaletneg ed sikayo, tan manligliwa ed sikayo nipaakar ed pananisia yo.’ Akin kasi et imbaki nen Pablo so sakey a kalangweran a singa si Timoteo ed ontan kadelikadon misyon?​— Ona a ta si Timoteo et agtanton kabkabat na saramay onkokontra ed katuaan, sakey ni et sikatoy mabulos ya onla. Talagan mankaukolan itan na inkakpel! Antoy resulta na imbisita to ey? Kapawil to’d si Pablo, imbalita to a saramay agagi ed Tesalonica et matodtoor. Kanian sinulatan ira nen Pablo na onia: “Aligliwa kami ed sikayo.”​—1 Tesalonica 3:2-7.

Akakkaiba ni nen Timoteo si Pablo diad tinmutumbok niran samploy taon. Agnambayag et aprisoy Pablo ed Roma, tan sikatoy nila nen Timoteo a diad saman et aganggano met nin nibulos ed prisoan. Legan nen Pablo a walad prisoan, sikatoy nanggaway sulat parad saray taga Filipos, tan nayarin impaisulat to itan ed si Timoteo. Oniay inkuan to: ‘Iilaloan ko ya ibaki si Timoteo ed sikayo, ta anggapoy took a kaparay kalakal ko, a mangisakit a peteg ed kipapasen yo.’​—Filipos 2:19-22; Hebreos 13:23.

Seguradon malikeliket si Timoteo diad impakadngel to ed saraman a balikas! Naad-aron maong nen Pablo si Timoteo lapud sikatoy akaparaan tan mabulos a manserbi. Tan iilaloan min ontan mo met komon.

Tepetepet:

○ Iner so binalegan nen Timoteo, tan antoy agawa sanen primeron binmisitay Pablo ditan?

○ Antoy reaksion nen Timoteo sanen sikatoy naimbitaan a manmisionero a kaiba di Pablo tan Silas?

○ Panon ya impatnag nen Timoteo so inkakpel, tan akin a sikatoy naad-aron maong nen Pablo?

[Litrato ed pahina 24]

Anto kasi so agawa?