Alinmaong Kasin Usaren so Ngaran na Dios?

DIAD orihinal a Hebreon Kasulatan, a kaslakan a tatawagen a “Daan a Sipan,” et ngalngali 7,000 danay a nausar so ngaran na Dios, ya oniay inkisulat na satan: יהוה (basaen manlapud kawanan a manpakawigi). Diad arum a salita, say ngaran na Dios et nirepresenta ed apatiran Hebreon letra a Yohdh, He, Waw, tan He, a kaslakan et nipapatalos a YHWH.

Nensaman, nagmaliw ya anito na saray Judio ya alinmaong kunon usaren so ngaran na Dios. Kanian nisengeg ed satan et agda la laingen bibitlaen itan. Insan diad saray sulsulat da, sinandian da itan na duman balikas. Balet, dakel so managpatalos na Biblia ya impatalos dan “Yahweh,” odino “Jehova” itan a ngaran. Sakey ed saratan iramay nampatalos na Biblian Pangasinan ya impalapag na Philippine Bible Society. Unong ed sayan patalos, sanen tinepetan nen Moises so Dios no antoy ibaga to no bilang ta tepetan na saray Israelita no siopay angibaki ed sikato, oniay inkuan na Dios: “Onia naani salitaen mo ed saray anak na Israel, Si Jehova a Dios na saray atateng yo, a Dios nen Abraham, Dios nen Isaac, tan Dios nen Jacob, imbaki to ak ed sikayo. Sikato ya so ngaran ko ed andi anggaan, tan sikato ya so pakanodnonotan ed saray amin a kailalakan.”​—Exodo 3:15.

Diad sakey a pikakasi nen Jesus, oniay inkuan to nipaakar ed impangusar ton mismo ed ngaran na Dios: “Impakabat ko ed sikara so ngaran mo, tan ipakabat kon siansia.” Tan diad samay pikakasi ton kabkabat bilang Ama Mi et inkuan to met: “Ama min wala ka ed tawen, nagalang komon so ngaran mo.”​—Juan 17:26; Mateo 6:9.

Kanian makapakelaw ta diad samay balo nin libro nen Papa Benedict XVI a Jesus of Nazareth, et oniay inkuan to nipaakar ed panangusar ed ngaran na Dios: “Talagan duga labat. . . ya ag-inusar na saray Israelita iyan ngaran a pinili na Dios parad sikato, salanti, say salitan YHWH ta pian ag-itan nipabpaabeba a singano ngaran labat na sakey ed saray paganon dios. Lapud saya, lingo so impangusar na agano ni ran patalos na Biblia ed satan a ngaran, a lawas impasen na saray Israelita bilang misteryoso tan agnayarin bitlaen​—a singano sakey labat itan a karaanan a ngaran.”

Antoy padesir mo? Duga kasi so pangusar ed ngaran na Dios, odino andi? No si Jehova a mismo et kuan ton: “Sikato ya so ngaran ko ed andi anggaan, tan sikato ya so pakanodnonotan ed saray amin a kailalakan,” wala kasi kanepegan na siopaman ya onkontra ed sikato?

[Litrato ed pahina 30]

Inusar nen Jesus so ngaran na Dios